Apokalipsis 9 - Northern Tepehuan Bible

Go Juan oja ix tuma tïï ïgai tïïtïkidïrï dukai aidïxi ïpï baika Diuxi tïtïañikarudï iba trompetakïdï dai Diuxi surhi ïpï baika gïgïbidaragai oidigi daama

¹ Dai bhodïrï iba ïpï ïmo Diuxi tïañikarui trompetagadï dai aidïpïrï nïidi aanï ïmo xabugai xi oidigi daama daja. Gïitadai ïgai tïbagiañdïrï mïtai maa ïgai yabigadï go maixakarui ix makïdï ïr ïmo gïï tukabakami dïgai.

² Dai kupioka ïgai go gïï dïgai kuuparadï dai busai gïïpi kubhuxi, ïpïamaaxi kubhuxigadï ïmo gïï táí dai tukutu go tïbagi dai iña go tasai bai tukamutu oidigi kubhuxikïdï.

³ Dai abhai kubhuxiañdïrï bubuaka soosoyi dai tïapai oidigi daama mïtai maa ïgai gubukarhigai ix kïkïiya ïgai odami naakasorai dukai.

⁴ Dïï gia ix makïdï maatadai gubukarhigai daidi xi soi buadagi odami ix makïdï ïr Diuxi tuidadï biakatai Diuxi seyogadï kobadïrï. Daidi ïgai xi soi buada ïgai tomax tuma tïdoidagai oidigi daama ïpï. Mai biakatadai ïgai oigaragai xi soi buadagi tomarhi ïmo uxi xiïpï basoi tudu. Mosïkaxi biakatadai ïgai oigaragai xi soi buadagi odami ix makïdï mai biakatadai Diuxi seyogadï kobadïrï.

⁵ Biakatadai ïgai oigaragai xi kabami soimaaxi taatamiturhiadagi óídakami taama masadai kïïkai dai kïidï ïpïan taadaga naakasorai kïidï. Po buadamu go soosoyi dïï gia mai biakamu ïgai oigaragai xi kodagi odami.

⁶ Daidi go odami koiyagi ïrhiadamu dai asta gaagamu ixdukatai gïn kodagi ïïgi mos ïï soi taadakatai dïï maiti ixtutuidimu.

⁷ Gïn aagidamu aanï ix maaxkatadai go soosoyi ix makïdï tïï aanï. Ïpïamaaxi ïgai kapayo dai po ïrhiada maaxi ix ka bhai gïn duitadai ïgai kokodi bïïtarï. Gïn aadaka ïgai oro maaxi korona dai odan maaxi momodï.

⁸ Kuupa ïgai ïpïandukai oki dai taatamudï ïpïan maaxi mabidi taatamudï.

⁹ Gïn aadaka ïgai taagiana nagiakarui maaxi baiñomi duñixikami ix makïdï ïr kokodi bïïtarï. Dai xuduku daiyagi ïgai bai aanadï ïpïan kaitiña mui kapayo ix makïdï bapainxarïi kareta kokodi bïïtarï. Ïpïan kaiti xi kabami bopogïi ïgai jaa buidïrï gakokoda agaitai.

¹⁰ Bhajidï go soosoyi naakasorai maaxi dai bia sïïxikarui ïpïan dukai naakasorai ïpï. Dai taama masadai ukami biakatadai ïgai oigaragai xi kïiyagi odami bhajidïkïdï dai kokotudagi.

¹¹ Dai ïgai ix makïdï tïanïi go soosoyi ïr go galbaaxi ix makïdï gatïanïi go gïï dïgai ix makïdï ïr ïmo maixakarui. Abadón tïgidu ïgai Hebreokïdï dai Apolión tïgidu griegokïdï ix makïdï itïiya ïrhidi sai ïgai ïr gamuakami.

¹² Podukai daibusai ïmo gïgïbidaragai dïï kia biïga ïpï goka.

¹³ Dai bhodïrï iba ïpï ïmo Diuxi tïañikarudï trompetagadï. Dai gï kaidatu ïmo ñoki abhai go daxdakaruañdïrï ix makïdï Diuxi buidïrï kïïka. Daidi ikaiti go ñoki, —Upasañi go maakoba gin tïtïañikaruga ix makïdï bupurhikan daraka ugidïrï go gïï aki Eufrates tïgidukïdï— ikaiti. Ami go gïï daikarui buidïrï kïïka ïmo daxdakarui oro duñixikami tudu dai bïï maakoba xixixodïrï arasaka kukugadï ix makïdï ïpïamaaxi turu aagadï. Dai abhai go daxdakarui aagadï saagidañdïrï gï kaidatu go ñoki.

¹⁴ Daidi potïtïdai gobai go ibadami, —Upasañi go maakoba gin tïtïañikaruga ix makïdï bupurhikan daraka ugidïrï go gïï aki Eufrates tïgidukïdï— ikaiti go ñoki. Ami go gïï daikarui buidïrï kïïka ïmo daxdakarui oro duñixikami tudu dai bïï maakoba xixixodïrï arasaka kukugadï ix makïdï ïpïamaaxi turu aagadï. Dai abhai go daxdakarui aagadï saagidañdïrï gï kaidatu go ñoki.

¹⁵ Diuxi ka ïkiaxdïrï iduitadai go maakoba tïtïañikaru ïgai amaxi bïïtarï dai kaduku bïïtarï dai ka aïkai kaduku sai upasdana ïgai bai kodana bhaitoma tajukami go oidigi daama óídakami. Diuxi ka dáítadai ix tuma umiïrï dai ix tuma masadiïrï dai asta ix tuma tasïrï ayi agaitadai gobai tudu. Dai aidïpïrï ka iji go maakoba Diuxi tïtïañikarudï dai koda agai óídakami.

¹⁶ Dai ïmadutai ix makïdï ami dajatadai gin aagidi ix xïïkidu sandadarugadï go Diuxi tïtïañikarudï. Goka ciento millonkatadai ïgai dai kapayo daama daitugai ïgai.

¹⁷ Gïn aagidamu aanï ix maaxkatadai go sandadaru ïmadï sosoigadï kapayo ix makïdï tïïtïkiïrï dukai tïï aanï. Go sandadaru gïn aada ajiopai baiñomi taagiana sobhidakaru ix makïdï bïpïgi lïïlïchi dai lïïlïchi tïtïdogi dai lïïlïchi buama. Dai go kapayo momodï ïpïamaaxi mamaabidi momodï. Dai usudïañdïrï busanïi táí ïmadï kubhuxi dai asufre.

¹⁸ Go táí ïmadï kubhuxi dai asufrekïdï ix makïdï usudïañdïrï busanïi koi ïgai bhaitoma tajukami go oidigi daama óídakami.

¹⁹ Kïï gupuka usudï go kapayo tudu dai bhajidï gupuka ïpï. Bhajidï biakana kooyi momodï maaxi kugïrï ixtukïdï kïkïiyiña odami.

²⁰ Gïïpi naana maaxi daibusai soimaaxi tudu dai mui óídakami koi dïï modukai mai ïma dukai gïn tïtïgito go odami ix makïdï bitadai kia. Apia xadutudaiña ïgai ixtumaxi ibuadana ïïgi ïgai dukami oro dai plata dai bhronse dai odai dai asta uxi duñixikami uubixi. Xadutudaiña ïgai go diabora tïtïañikarudï tudu pomaaxi xadutudaitai uubixi maaxi ix makïdï mai duduaka. Go maaxi uubixi mai nïayi tudu dai mai kaidaga dai mai bhaiga imidagai ïpï. Dïï bïïxkïrï go odami maiti ipïrhi xi dagitoagi go uubixi dai Diuxi xadutuadagi bhaiyoma.

²¹ Bhaiyoma ipïrhi ïgai xi apia gïn kodadagi aipakoga dai gaatabuidadagi dai gaïmadï bopodagi aipakoga dai gaïxiadagi jaa buxtuidadï. Tomaxi gïïpi soimaaxi daibusai modukai maiti ipïrhi ïgai xi ïma dukai gïn tïtïgitoagi tudu.