Apokalipsis 8 - Northern Tepehuan Bible

Suxi Kristo go Arhi Kañiru tïgidukïdï kupioka go kugatïrï seyo

¹ Bhodïrï upai go Arhi Kañiru tïgidukïdï go kugatïrï seyo ixtukïdï kuupikatadai go libro. Dai aidïxi podui ïgai mai taadatu tomarhi ïmo ixtumaxi parï tajukami hora ami tïbagiana.

² Dai tïï aanï kubarakami Diuxi tïtïañikarudï xi ami gukatadai Diuxi buidïrï dai gïn maakiatu ïïmo trompeta ïïmadutai ix tukïdï gaiibadagi ïgai.

³ Dai bhodïrï ami dibia ïpï ïmai tïañikarudï Diuxi dai ïmo oro asokorhiïrï bhïkati kubhimadarhi dai ami kïkiba buidïrï go daxdakarui xako gï dadaxdi daxdaragai. Go gïï daikarui buidïrï kïïka go daxdakarui. Dai gï maakiatu tïañikarui gïïpi kubhimadarhi sai daxdaiña gobai ïmadï go daañigaigadï go buaboitudadami. Ïmapi dadaxdiña ïgai go kubhimadarhi ïmadï go daañigai ami daxdakarui daama. Oro duñixi go daxdakarui.

⁴ Dai go kubhimadarhi saagida imïiña go daañigai ix makïdï ibuadana buaboitudadami dai mïï aïjïi Diuxi buidïrï. Tïsadïi gobai abhai daxdakaruañdïrï xako toidiña go Diuxi tïañikarudï tudu.

⁵ Daidi go Diuxi tïañikarudï bhïiyi go oro asokorhi dai sudagi tutuparhi toñikami abhai daxdakaruañdïrï. Dai surhi ïgai oidigi daama bai koboñimi oidigi dai pïpïdokïi dai gigiburhi ïpï.

Diuxi tïtïañikarudï gaiiba trompetagadï gï surhigi agaitai gïgïbidaragai oidigi daama

⁶ Daidi go kubarakami Diuxi tïañikarudï ix makïdï bia go kubarakami trompeta bhai gïn dui dai gaiibada agai.

⁷ Dai gaiiba go tukamidïrï tïañikarui daidi oidigi daama surhi tïayi dai táí saagida ïrai bai mïji bhaitoma tajukami go oidigi. Bhaitoma tajukami mïji gobai go uxi oidigi daama gukakïdï. Dai go basoi, gobai gia bïïxi naato mïji gobai.

⁸ Dai bhodïrï gaiiba ï gokatïrï tïañikarudï Diuxi mïtai go gïï sudagiïrï daitu ïmo ixtumaxi ïpïamaaxi ïmo tubidaki mïïkami dai ïrai gï naato bhaitoma tajukami go gïï sudagi.

⁹ Dai gokïdï koi bhaitoma tajukami go sudaïrï óídakami dai bhaitoma tajukami dudupi go barkos sudaïrï iimïdami ïpï.

^10-11 Dai bhodïrï gaiiba ïpï ïmo Diuxi tïañikarudï trompetagadï bai tïbagiañdïrï gïi ïmo gïï xabugai ix makïdï Xibukïdï Xabugai tïgidu. Mïjïi gobai ïpïan dukai ïmo kudakarui dai gïsïkai ayi bhaitoma tajukami go ajaki dai bapabiki oidigi daama. Dai xako ayi gobai xibuturhi go sudagi bai mui koi óídakami yïïkai go sudagi xibukami.

¹² Dai bhodïrï gaiiba ïpï ïmai tïañikarudï Diuxi daidi bhaitoma tajukami xia tui go tasai ïmadï go masadai dai podukai ïpï go xixabugai. Gïn tukutu ïgai bai mai kïï tonorïkana tasïrï dai bamioma tukamugakana tukarï ïpï.

¹³ Dai bhodïrï tïï aanï xi tïbagiana daigigi ïmo Diuxi tïañikarudï dai kaï aanï ix kaitimi, —Sogigi oidigi daama óídakami. Kia biïga ïpï baika Diuxi tïañikarudï xi ibagi trompetakïdï. Sïïrhikïdï soimaaxi taata agai óídakami gaiibakai ïgai— ikaitimi.