Apokalipsis 7 - Northern Tepehuan Bible

Diuxi seyumagi go buaboitudadami sai gï maatïkana xi Diuxi tutuidadï ïgai

¹ Dai gokiïrï tïï aanï maakoba Diuxi tïtïañikarudï ix aipako xixixodïrï oidigi guka. Ïmoko norteamako kïïka dai ïmai suramakoga dai ïmai xarhi utapakoga dai go gïmai tasai dupikïrï amakoga. Dai sobhikïiña ïgai ïbïrhi xi mai ïbïradagi oidigi daama. Mai daadagitoiña ïgai xi ïbïradagi dïbïriana tomarhi go gïï sudagiana dai sai mai oiñidiña ïbïrhi tomarhi ïmo uxi ïpï.

² Dai biakatadai ïgai oigaragai xi xia buadagi oidigi. Dïï gia nïidi aanï xi xarhi utamajadïrï imïi ïpï ïmo Diuxi tïañikarudï dai bhïkati Diuxi seyogadï ixtukïdï tïpaltudaiña ïgai ix makïdï ïr Diuxi tuidadï. Bhïkati seyugadï Diuxi ix makïdï bïïxkïrï bïïtarï oidaga tudu. Dai gïgïrï iiña ix makïdï bhïkati go seyo dai potïtïdai ïgai go maakoba tïtïañikaru ix makïdï biakatadai oigaragai xi xia buadagi oidigi,

³ potïtïdai ïgai, —Maiti abïr xia buada oidigi tomarhi go gïï sudagi tomarhi go uxi kia. Gï agai xi kokobadïrï tïpaltuda aatïmï Diuxi pipioñigadï kia— itïtïdai.

⁴ Dai aidïxi ka naato tïpaltu ïgai Diuxi pipioñigadï kaï aanï ïmo ñoki aagaitai ix xïïkidu ïgai. Ïmo ciento dan gokobhai dan maakoba mirhi pipioñigadï Diuxi tïpaltu ïgai aidï.

⁵ Dai bïïxkatai ïgai ïr piipixaradï go bhaibuxtama dan goka maamaradï Israel. Go Juda piipixaradïañdïrï tïpaltu ïgai bhaibuxtama dan goka mirhi dai po kaaki ïpï go Rubén piipixaradï dai go Gad piipixaradï

⁶ dai podukai ïpï go Aser dai go Naftali dai go Manases

⁷ dai go Simeón dai go Lebi dai go Isakar

⁸ dai go Zebulón dai go Benjamin. Bhaibuxtama dan gokadukatadai maamaradï go Israel tudu dai go tïtïañikaru tïpaltu bhaibuxtama dan goka mirhi piipixaradï ïïmoko dai podukai aiturhi ïmo ciento dan gokobhai dan maakoba mirhi piipixara ix makïdï tïpaltu ïgai.

Juan tïï mui aipadïrï óídakami xadutuadami Diuxi

⁹ Dai bhodïrï tïï aanï sïïrhikïdï mui naana maaxi odami bïïxi aipakoga oidigi daamaiñdïrï óídakami. Ami gukatadai ïgai go gïï daikarui buidïrï xako sonoana kïïka go Arhi Kañiru tïgidukïdï. Mai bhaigakatadai tomarhi ïmadutai xi ïkaldagi go odami mos ïï muidukatai ïgai. Gukatadai odami bïïxi gïgïrï kiikiañdïrï óídakami tudu dai bïïxi go naana maaxi ñokadami saagidañdïrï dai gïn aadati ïgai yukuxi totoakami dai dagï guka ïgai soubarhi aagadï.

¹⁰ Dai gïgïrï iñakimi ïgai ami gukakatai daidi ikaitimi, —Aa gia gï agai xi xadutuada aatïmï Diuxi go gïï daikaruana dakïdï dai go Arhi Kañiru agaikïdï ïpï. Ïgai tudu ïgai dai kïïgakïrï gïr bubaitu— ikaitimi.

¹¹ Dai nïidi aanï bïïxi go Diuxi tïtïañikaru ix makïdï ami xikorhi guka xako darakatadai go bhaitï gukakami ïmadï go maakoba duduakakami ixtumaxi, nïidi aanï go tïtïañikaru xi bïïxkatai kuiki ami go gïï daikarui buidïrï xadutudaitai Diuxi.

¹² Daidi ikaitiña ïgai, —Kïïga ïr buaboi sai gï agai xi odami gï xadutuadagi aapi Diuxi. Gï agai xi odami oigïda ñokadagi gï buidïrï dai xi bhai gïn ïrhiadagi aapikïdï mos ïï gïdukatai aapi. Gï agai xi bhai aagagi odami sai aapi gï tïgibudaga adaama ïr saitudakami dai aapi adaama gatïanïi dai adaama ïr gubuakami. Gobai gia ïr buaboi— ikaitiña go tïtïañikaru.

¹³ Daidi ïmadutai go bhaitï gukakami pobai in tïtïdai, —¿Borai go totoa yukusukami dai baadïrï dada ïgai?— in tïtïdai ïgai.

¹⁴ Dai potïtïdai aanï, —Aapi bhaitï kïakami, aapi maatï xorai ïgai. Aanï gia xadïrï maatïkana— antïtïdai aanï. Daidi pobai in tïtïdai go bhaitï kïakami, —Gobai ïr go odami ix makïdï kabami soimaaxi taatamaiña buaboidaitai gobai go Arhi Kañiru tïgidukïdï. Kïïga bapakoi gobai yukuxidï dai totoatu ïradïkïdï go Arhi Kañiru ix makïdï itïiya ïrhidi sai kïïga buañidi bïïxi soimaaxi iibhïadïañdïrï— ikaiti.

¹⁵ —Kaxkïdï xibi Diuxi daikarudï buidïrï daraka gobai kïïga buaboidaitai. Dai ami Diuxi kiidïrï mai dagitokai xadutudai ïgai Diuxi modukai tasïrï dai tukarï. Dai Diuxi kïïga nukadakamu ïgai.

¹⁶ Kaxkïdï xibi ka mai bhiugikoñikamu ïgai tomarhi ïmo imidagai dai mai tonokoñikamu. Dai ka mai soimaaxi taatamu gobai tonorhigaikïdï.

¹⁷ Go Arhi Kañiru ix makïdï go gïï daikarui sonoana kïïka ïgai dai nukadakamu ïpïan dukai xi ïmo odami nukadai sosoigadï kañiñiru. Bhaitï imimu ïgai dai tïïgidamu xajadïrï busanïi go sudagi ixtukïdï kïïgakïrï óídakana odami bïïxkïrï bïïtarï. Dai Diuxi buañimu suañibharudï xi ka mai soi gïn ïrhiada ïgai tomarhi ïmo imidagai— ikaiti go bhaitï kïakami.