Apokalipsis 6 - Northern Tepehuan Bible

Go Arhi Kañiru agaikïdï upai naadami seyogadï go libro

¹ Dai bhodïrï nïidi aanï ïgai ix makïdï Arhi Kañiru tïgidu ix murhi dai upai ïmoko go seyo ixtukïdï kuupidi go libro. Dai kaï aanï ix kabami ño ïmadutai go maakoba duduakakami ixtumaxi. Ïpïan kaiti ïgai kobondami dai ñokidi ïgai ïmoko ix makïdï aanï mai kia nïiditadai daidi potïtïdai, —Gimi— itïtïdai.

² Dai gamo nïnïaba aanï dai tïï sai ami dibiatadai ïmo kabayo tojakami dai daama daitugai ïmo kokoadami biakami ux gatoi. Kïï gamaitïkïiña ïgai kokodiïrï. Dai gï maakiatu ïgai ïmo korona saidi ïr reykana ïgai. Dai jii ïgai abhiadïrï dai oijada agai kokodi dai apia gamaitikïda agai.

³ Dai bhodïrï ïgai ix makïdï Arhi Kañiru tïgidu upai ïpï ïmo seyogadï go libro. Dai aidï kaï aanï ïpï ïmadutai go duduakakami ixtumaxi ix ñokidi ïpï ïmai ix makïdï mai kia gï maaxitutadai daidi potïtïdai, —Gimi— itïtïdai.

⁴ Dai gamo nïnïaba aanï dai tïï xi abhiadïrï xako kïïka go gïï daikarui busai ïmo kabayo bïgikami dai Diuxi maatadai ïmo gïï maaxtai go makïdï daama daitugai go kabayo. Dai maatadai Diuxi sïïrhikami xi aipakoga kokoaturhiadagi ïgai oidigi daama óídakami sai gïn kodaiña ïgai aipakoga.

⁵ Bhodïrï upai go Arhi Kañiru ïpï ïmai seyugadï go libro dai aidï kaï aanï ïpï ïmai go duduakakami ixtumaxi dai ñokidi ïgai ïmai ix makïdï mai kia gï maaxitutadai daidi potïtïdai, —Gimi— itïtïdai. Dai gamo nïnïaba aanï dai tïï xi ami dibiatadai ïmo kabayo tukukami dai ix makïdï daama daitugai dagïka imïi ïmo bïtïdakarui ïkadïrï.

⁶ Dai kaï aanï ïmo ñokadami xi go maakoba duduakakami ixtumaxi saagidañdïrï ño daidi ikaiti, —Mosïkaxi ïmo litro tïrhigi xiïpï baika litro sebada gï maitïkïda agai ïmo tasai aaduindagaikïdï kabami tïsaidakai namïgadï. Dïï gia go asaiti ïmadï go bino maiti gï agai xi tïsaidagi namïgadï— ikaiti go ñokadami.

⁷ Bhodïrï go Arhi Kañiru upai ïpï ïmo seyogadï go libro dai aidïpïrï kaï aanï go gïmai duakakami ixtumaxi dai ñokidi ïgai ïmai ix makïdï mai kia gï maaxitutadai daidi potïtïdai, —Gimi— itïtïdai.

⁸ Dai gamo nïnïaba aanï dai tïï ïmo kabayo komaikami xi ami dibiatadai dai ix makïdï daama daitugai Mukigami tïgidu dai ïmai oiditadai ïpï ix makïdï Hades tïgidu. Dai Diuxi maa gubukarhigai go makïdï kabayo daama daitugai ïmadï go makïdï oidi sai kodana mui óídakami. Maa gubukarhigai sai kodana ïïmo odami xakoga maakuadukagi ïgai bai mos arhi babaika biyagi. Maa gubukarhigai sai kodana mui odami dukami xi oidakagi maakoba mirhi óídakami maa ïgai oigaragai sai kodana ïmo mirhi dai mos podukai bïï óídakami saagidañdïrï biakatadai ïgai oigaragai xi kodagi ïïmoko. Dai kodaiña ïgai kokodiïrï dai bhiugigaikïdï dai kokodagaikïdï dai naana maaxi kïkïixi oomarhigamikïdï ix makïdï oidigi daama ajiopai.

⁹ Dai bhodïrï upai go Arhi Kañiru ïpï ïmo seyugadï go libro dai aidïxi podui ïgai tïï aanï iibhïadï odami ix makïdï gïn koditu buaboidaitai ïgai Diuxi ñokidï dai aagaitai ïgai ixtumaxi ïr buaboi. Uta darakatadai ïgai go daxdakarui xako gï dadaxdi daxdaragai Diuxi.

¹⁰ Dai gïgïrï daanïiña ïgai Diuxi dai potïtïdaiña, —Gïr Nukadakami, aapi gia ïkobai daja go gaa óídakamiañdïrï dai buaboi ñokai aapi. Gïr aagidañi xïï tïbïpidamu ix aagagi aapi xorai biaka agai gïgïbidaragai dai xorai mai biaka agai. Ka tïbïpi nïnïra aatïmï xi gïgïbitulda aapi go odami ix makïdï gïr koi— itïtïdaiña.

¹¹ Dai ïmadutai ix makïdï ami dajatadai maa yukuxi totoakami go buaboitudadami iibhïadï dai potïtïdai, —Diuxi maatï xïïkiduka agai ix makïdï gïn kodituda agai ïpïan dukai aapimï buaboidaitai ïgai dai aagaitai ixtumaxi ïr buaboi dai mai kia ayi go kaaki— itïtïdai. —Kaxkïdï gï agai xi nïnïrakagi aapimï ïpï chïki tasai kia dai gïn iibhïxtagi asta xïxkadï gïr buidïrï bïïtïkamiga kodagi go kaaki buaboitudami— itïtïdai.

¹² Dai bhodïrï nïidi aanï aidïxi upasdi go Arhi Kañiru ïpï ïmo seyugadï go libro. Dai aidïpïrï kabami gigiburhi oidigi dai tukutu go tasai, ïpïamaaxi bii ïmo boopoi kostarhi tukukami. Dai go masadai kabami bïgitu, ïrai maaxi bii bïgikatai.

¹³ Dai aidïpïrï mui surhi xixabugai dïbïriana ïpï. Ïpïandukai xïxkadï daibuñagi ïbïrhi kabami dai surhigiagi igoxi ibhiadï mai kia bhajikami. Podukai surhi go xixabugai dïbïriana.

¹⁴ Dai gï kupioka go tïbagi ïrana dai aipakoga bhibioban dui ïpïan dukai ïmo paperhi dai mai tiputa. Dai bïïxi go tutubidakai maigobai xibhïako gukiba dai podukai ïpï bïïxi go arhi oidigi ix makïdï sudagi ïrana guka.

¹⁵ Dai bïïxi oidigi daama óídakami gïn ïjïxto tïtïjobiana dai baapaburhi uta, modukai gïgïrï dudunukami dai jaa tïtïanïdami dai ix makïdï kïïga gin bipidaka dai sandadaru tïtïanïdamigadï dai jaa gubukadagai bipiakami dai bïïxi go odami ix makïdï ïr pipioñi dai modukai ix makïdï maiti ïr pipioñi ïpï.

¹⁶ Dai bïïxkatai potïtïdaiña go tutubidakai dai go baapaburhi, —Surhigibïrai dai gïr iña bai maiti gïr nïijada ïgai ix makïdï go gïï daikaruana daja bai mai soimaaxi gïr taatamiturhiña go Arhi Kañiru tïgidukïdï. Ka arhiï bhaamu ïgai gïr bui

¹⁷ dai ka ayi ixtuigako gïr maakiagai gïgïbidaragai dai tipu xorai ixtutiadagi ïgai bui— ikaitiña.