Apokalipsis 4 - Northern Tepehuan Bible

Suxi Kristo tïtïgidi go Juan ix maaxi tïbagiana daidi go Juan oja ix tumaxi nïidi ïgai

¹ Dai gokiïrï ïpamu nïidi aanï ixtumaxi tïïtïkiïrï dukai. Nïidi aanï ïmo kuuparagai kupiokikami tïbagiana dai ïgai ix makïdï trompeta ïrhiadan kaiti gin ñokidi ïpamu dai pobai gin tïtïdai, —Gimi dai gï tïïgidamu aanï ixtumaxi daibuña agai gokiïrioma— gin tïtïdai ïgai.

² Dai mos potïi ïgai bai gin ayi gubukarhigadï Diuxi Ibhïadï. Dai Diuxi Ibhïadï gubukarhigadïkïdï tïï aanï ix tïbagiïrï kïïka ïmo gïï daikarui dai ami daikaruana daja Diuxi.

³ Kïï tiodi ïgai, ïpïan tiodi go ojodai namïakami jaspe dai kornalina tïtïgidukami. Dai bïï xikorhi dajatadai ïmo kijondarhi maaxkami ixtumaxi. Ïpïamaaxi gobai ïmai odai namïakami esmeralda tïgidukami.

⁴ Dai ami go gïï daikarui xikorhi gukatadai ïpï jaa daraikarui. Ïmokobhai dan maakoadu ïgai dai daama daraka go kaaki bhaitï gukakami totoaja yukusukami. Dai bïïxkatai gïn aadaka korona oro duñixikami.

⁵ Dai abhai go gïdukïdï daikaruañdïrï pïpïdokïi dai kobonïi. Dai go daikarui buitapi kïakatadai Diuxi Ibhïadï dai ïgai kubarakami kukudakarui maaxi.

⁶ Dai ami go daikarui buitapi kïï tïparhika dai ïmo gïï sudagi maaxi dai ïpïamaaxi ïmo gïï odai kristal tïgidukami dai kïï kaparakami ïpï. Dai ami go daikarui xikorhi gukatadai maakoba duduakakami ixtumaxi ix makïdï bïïxi aipadïrï tukugadïrï daraka bupuidï, modukai bhaitiakoga dai gokiamakoga.

⁷ Ïmoko ïpïamaaxi ïmo mabidi dai ïmai ïpïamaaxi ïmo turu, dai ïmai buibasodï ïpïamaaxi ïmo odami dai go gïmai ïpïamaaxi ïmo bhagai daigiadami.

⁸ Dai go maakoba duduakakïdï ixtumaxi naadami ajana ïïmoko. Dai damadïrï dai utadïrï ajanadï muidu bupuidï. Dai bïï maakoba mai dagitokai ñokaiña modukai tasïrï dai tukarï daidi ikaitiña, Aa gia ïr xadutudikami Diuxi ïkobai dajatai ïgai. Aa gia ïr xadutudikami Diuxi ïkobai dajatai ïgai. Adaama ïr Gatïanïdami Diuxi, kïïga adaama gubuakamikatai ïgai. Kaxi oidakatadai ïgai mai kia kïkibakai oidigi dai mai tipu ugitigadï, ikaitiña go maakoba duduakakami ixtumaxi.

⁹ Dai kïïga ñokaiña ïgai bïïtarï go ix makïdï go gïï daikaruana daja. Kïïga ñokaiña ïgai bïïtarï ix makïdï ïïki abhiadïrï oidakana dai tomax tuigako oidaka agai tudu. Xadutudaiña ïgai dai aagaiña xïïxi ïr gïdukami ïgai dai aagidiña xïï bhai gïn ïrhidi ïgaikïdï. Po buadana go maakoba duduakakami ixtumaxi tudu.

¹⁰ Daidi go ïmokobhai dan maakoba bhaitï gukakami tootonakïdï gukaiña buidïrï ïgai ix makïdï tomaxtuigako oidaga. Dai ami buidïrï darasaiña bïïxkatai ïgai kororonadï xadutudaitai daidi ikaitiña,

¹¹ —Aapi gïr Diuxiga ïr Gïr Nukadakami. Dai aapi kïïga gï ajïga xi odami aagagi xïïxi ïr gïdukami aapi gï xadutudaitai. Dai xi aagagi odami xïïxi ïr gubuakami aapi ïpï. Aapi ïgai dai bïïxi aïkatai idui ipïldakai aapi xi oidakagi ixtumaxi— ikaitiña go bhaitï gukakami.