Apokalipsis 22 - Northern Tepehuan Bible

Go Juan nïidi ix maaxi tïbagiana

¹ Dai bhodïrï go tïañikarudï Diuxi gin tïïgi go aki ami go gïï kiikiïrï xako mïrai go sudagi ixtukïdï kïïgakïrï óídaga odami. Kïï buañixi go sudagi. Ïpïamaaxi bidrio kïï buañixikatai. Go gïï daikaruañdïrï mïrai gobai xako daja Diuxi ïmadï go Arhi Kañiru tïgidukïdï.

² Dai go kaye ïrana ïxi mïrai go aki dai bïï goka padïrï guka go uxi ix makïdï ibhiadïkïdï kïïgakïrï óídaga odami. Dai sïïrhikïdï kïïga ibhiatai gobai. Bhaibuxtama dan gokoakoga ibhiatai gobai bïïxi umiïrï. Bïïxi masadai ibhiatai gobai ïpamu tudu. Dai aagadï kïïga duadigai óídakami oidigi daama bïïtarï.

³ Ami go gïï kiikiïrï mai tipukamu tomarhi ïmo ixtumaxi ix makïdï bia gïgïbidaragai abhana. Dai ami kïakamu go gïï daikarui xako darakatai gatïanïi Diuxi ïmadï go Arhi Kañiru tïgidukïdï. Dai ami go buaboitudadami xadutuadamu Diuxi

⁴ dai asta nïijadamu buibasodï. Dai Diuxi tïtiaragadï ojixikamu kokobadïrï buaboitudadami.

⁵ Dai ami ka mai tipukamu tukagi dai maiti gï agadamu tomarhi ïmo kudakarui dai tomarhi maiti gï agadamu tasai ami dakatai Diuxi Gïr Nukadakami. Ïgai tudu kudaidaka agai buaboitudadami. Dai go buaboitudadami bhïimu sïïrhikami dai bïïxkïrï bïïtarï gatïanïda agai.

⁶ Daidi bhodïrï go tïañikarudï Diuxi pobai in tïtïdai, —Kïïga ïr buaboi gobai bïïxi ixtumaxi kaï aapi dai nïidi. Gï agai xi buaboitudada aapi gobai— in tïtïdai ïgai. Diuxi Gïr Nukadakami ïgai dai aagidiña bïïxi go ñokituldiadamigadï ixtumaxi aagadagi ïgai. Dai xibi Diuxi otoi ïmo tïañikarudï sai tïïgidana ïgai go ñokituldiadamigadï ixtumaxi daibuña agai otoma. Kïïga ïr buaboi gobai tudu.

Juan pokaiti sai Suxi Kristo dibiagai ïpamu

⁷ Daidi Suxi Kristo ikaiti, —Gin kaïkabïrai, xibi otoma dibiamu aanï— ikaiti. —Dai xorai ïïgiadagi ojadï idi libro kïïga biaka agai bhai ïrhiaragai— ikaiti Suxi.

⁸ Aanï Juan tudu ïgai dai nïidi dai kaï ixtumaxi ojixi idi libroïrï. Dai nïiditai aanï dai kaïkatai gobai antai gin totonakïdï kïkiba dai xadutugi buidïrï go tïañikarudï Diuxi ix makïdï gin tïtïgidi go naana maaxi ixtumaxi.

⁹ Dïï gia pobai in tïtïdai ïgai, —Cho— in tïtïdai. —Maiti pobuada. Aanï ïr gï ïpïan dukai di. Aanï ïpï mos ïr pioñigadï Diuxi ïpïan dukai aapi ïmadï bïïxi go gaa ñokituldiadamigadï Diuxi. Ïpïan ïï namïakami bïïxkatai ix makïdï ïïgida kaïkana idi libro tudu. Gï agai xi mosïkaxi Diuxi xadutuada aapi podukai bhaiyoma— in tïtïdai.

Juan kugaitu ojadï

¹⁰ Daidi ïpïpï gin ñokidi go tïañikarudï Diuxi daidi pobai in tïtïdai, —Ka otoma daibuña agai bïïxi ixtumaxi ojixi idi libroana. Kaxkïdï maiti gï agai xi ïxtoagi gobai. Gï agai bhaiyoma xi odami maatïkagi ix kaiti ami.

¹¹ Dai xïïxkadï ka daibusai bïïxi ixtumaxi ojixi idi libroïrï aidï bhaitiakoga ka mos mo maaxkamu odami. Aidï gia odami ix makïdï mai sïïrhi ibuayi ka mos mai sïïrhi ibuadami bimu dai ix makïdï tukurakagi ibhïadï apia modukai tukurakami bimu. Dïï gia ix makïdï buañixi ibhïadï apia buañixikami dukai oidakamu. Dai ix makïdï ïr Diuxi ïko darasadï mos apia Diuxi bïïtarï óídaka agai. Ka mo maaxkamu odami ix maaxkagi ïgai xïïxkadï naatorhikami biiyagi bïïxi ixtumaxi ojixi idi libroïrï. Aidï bhaitiakoga ka mai ïmapïduñimu odami— ikaiti.

¹² Daidi Suxi Kristo ikaiti, —Otoma ayimu aanï dai bhïidatikamu aanï maitïkidï bïïxi óídakami. Maakimu aanï bïïxi odami ixtumaxi ajïakagi tudu, ïïgi ixdukatai aatadui ïgai.

¹³ Aanï tudu ïgai dai gatïanïiña bïïxi aïkatai tukamidïrï abhiadïrï dai apia gatïanïdamu aanï kia xïïxkadï ugitiagi oidigi. Aanï ka ïkioñdïrï oidakatadai mai kia kïkibakai oidigi tudu dai mai ugitimu aanï tomarhi ïmo imidagai— ikaiti.

¹⁴ Odami ix makïdï bapakoi yukuxidï dai ka bia oigaragai xi kukumiagi ibhiadï go uxi ixtukïdï kïïgakïrï óídaga odami, gobai gia bia ïmo gïdukami bhai ïrhiaragai. Bia ïgai oigaragai xi bapakïdagi go gïï utudui kiikiïrï tudu.

¹⁵ Dïï gia kidigamadïrï bimu bïïxkatai ix makïdï tukuraga iibhïadï mai buaboidaitai ïgai. Dukami taapïgami dai odami ix makïdï ïmadï bopoyiña jaa aipakoga dai gakodadami dai ix makïdï xadutudai uubixi dai ix makïdï yaataboga. Bïïxkatai ïgai kidigamadïrï bimu.

¹⁶ Daidi Suxi Kristo in tïtïdai, —Aanï Suxi Kristo ïgai dai otoi ïmo tïañikarudï Diuxi sai aituldana idi ñoki bïïxi buaboitudadami aipakoga gïn ïmpaidadami. Aanï ïr pipiixaradï go rey Dabidkaru dai aanï bhïiyi sïïrhikamigadï. Aanï ïr ïpïandukami go gïï xabugai ix makïdï tïbïpioma kudakana kiamoko. Gïdioma aanï xi toma xorai tudu— in tïtïdai Suxi.

¹⁷ Dai Diuxi Ibhïadï bapaidimi bïïxi óídakami. Dai go buaboitudadami ix makïdï ïr nobiagadï dukai go Arhi Kañiru bapaidimi bïïxi óídakami ïpï. —Gimibïrai dai gïr uraba— ikaitimi ïgai. Dai bïïxkatai xorai kaïkagi go ñoki idi libroañdïrï gï agai xi bapaidagi jaa dai abïnakiadagi sai urabana ïpï. Xorai tonokoñikagi gï agai xi dibiagi tudu dai iiyagi go sudagi ixtukïdï kïïgakïrï óídaga odami. Go sudagi ix makïdï gaoidi Diuxi tudu dai buaboikïdï ïr oidaragai.

¹⁸ Aanï Juan bia ïmo ñoki bïïxi odami bïïtarï ix makïdï kaïkagi ix kaiti idi libro. Daiñi, xi ïmadutai bïnaidagi jaa ñoki idi libro ix makïdï mai ojixi ami aidï gia Diuxi maakimu ï galbaaxi naana maaxi gïgïbidaragai ix makïdï ojixi go libroïrï.

¹⁹ Dai podukai ïpï ix ïmadutai maigobai darasagi ñoki idi libroañdïrï ix makïdï Diuxi ojiturhi odami aidï gia Diuxi mai maakimu oigaragai ïgai xi kukumiagi go uxi ibhiadï ixtukïdï kïïgakïrï oidaga odami. Dai mai maakimu oigaragai xi baakiagi go gïï kiikiïrï ïpï ix makïdï ojixi idi libroïrï.

²⁰ Dai Suxi Kristo ikaiti, —Kïïga ïr buaboi sai otoma dibiamu aanï— ikaiti. Suxi Kristo tudu ïgai dai aagidi go ñoki ix makïdï ojixi idi libroïrï. Dai aanï Juan pokaiti sai ïjï, sai pogïduna. Ipïrhidi aanï sai otoma dibiana Suxi Kristo Gïr Nukadakami.

²¹ Ipïrhidi aanï ïpï sai kïï tuigakana Suxi Kristo Gïr Nukadakami bïïxkatai aapimï gïn bïïtarï. Mosïkaxi.