Apokalipsis 21 - Northern Tepehuan Bible

Go Juan tïïtïkiïrï dukai nïidi go utudui Jerusalen

¹ Dai gokiïrï tïï aanï go utudui tïbagi ïmadï oidigi dai go ïkidadï tïbagi ïmadï oidigi ka ugida agaitadai ïmadï go gïï sudagi ïpï.

² Dai nïidi aanï xi tïbagiañdïrï tïbandimi go gïï kiiki ix makïdï ïr Diuxi ïko dasadï. Go utudukïdï Jerusalen tïgidu go gïï kiiki ïgai dai Diuxiañdïrï tïbañimi. Dai kïï xigiamaaxi kïï bhai duñixikatai gobai ïpïan dukai ïmo oki xuduku kunata agadagi.

³ Dai gïgïrï ño ixtumaxi mïï go gïï daikaruañdïrï daidi ikaiti, —Xibi gia odami saagida daja Diuxi kiidï. Xibi odami saagida oidaka agai ïgai dai kïïgakïrï ïr Diuxigadïka agai ïmadï dakatai.

⁴ Xibi Diuxi buana agai bïïxi odami suañibharudï. Xibi ka mai tipukamu mukigami tomarhi soigamudagai tomarhi suanïdagai tomarhi kokodagai. Bïïxi ixtumaxi ïkidadï ugiti agai tudu— ikaiti go ñoki.

⁵ Dai bhodïrï ño Diuxi ami go gïï daikaruana dakatai daidi ikaiti, —Xibi gia utudutuldamu aanï bïïxi aïkatai ixtumaxi— ikaiti. Dai bhodïrï pobai in tïtïdai ïgai, —Ojañi aapi idi ñoki ix makïdï gï aagidamu aanï. Kïïga ïr buaboi gobai— in tïtïdai.

⁶ Daidi bhodïrï gin aagidi Diuxi ixtumaxi ojana aanï daidi pobai in tïtïdai, —Ka naatorhi bii bïïxi ixtumaxi iduña iñagaitadai— in tïtïdai. —Daiñi— in tïtïdai, —aanï ïgai dai gatïanïiña bïïxi aïkatai tukamidïrï abhiadïrï dai apia gatïanïi aanï xibi kia ka ugitïkai oidigi. Aanï ka ïkioñdïrï oidakatadai mai kia kïkibakai oidigi tudu dai mai ugidamu aanï tomarhi ïmo imidagai. Dai aanï ïgai dai gaoidi sudagi xorai tonokoñikagi. Mai taanïitai gaoidi aanï sudagi tudu abhiadïrï xakoga busanïi sudagi ixtukïdï kïïgakïrï óídakana odami bïïxkïrï bïïtarï—.

⁷ —Daiñi, maakimu aanï ixtumaxi kïï namïakami xorai maitiagi go soimaaxkami. Maakimu aanï oigaragai xi aanï kïïgakïrï ïr Diuxigadïkana dai xi ïgai ïr gin maamarakana tudu.

⁸ Dïï jaa gia surhigimu aanï go gïï taiyïrï ix makïdï mïmïjïi asufrekïdï. Taiyïrï surhigimu aanï bïïxkatai ix makïdï dagito xi maitiagi duadimudagai tudu dai ix makïdï mai buaboitudai dai ix makïdï tukurhimagi ïïgi ibhïadï soimaaxi ibuadatai. Surhigimu aanï ix makïdï ïr gakodadami ïpï dai ix makïdï ïmadï bopoyiña jaa aipakoga dai taapïgami dai ix makïdï xadutudai uubixi dai ix makïdï ïr yaatabogami. Bïïxkatai ïgai gïn ajiagai xi go gïï taiyïrï surhigiagi. Gobai ïr go kugadïrï mukigami agaikïdï tudu— in tïtïdai Diuxi.

⁹ Dai bhodïrï gin ñokidi ïmo tïañikarudï Diuxi. Ïgai ïr ïmadutai go kubarakami Diuxi tïtïañikarudï ix makïdï bia kubarakami ajasokorhi biakami gïgïbidaragai. Pobai in tïtïdai ïgai, —Gimi, gï tïïgidamu aanï nobiagadï go Arhi Kañiru ix makïdï onta agai ïgai— in tïtïdai.

¹⁰ Daidi Diuxi Ibhïadï gubukarhigadïkïdï gin baidaja go Diuxi tïañikarudï ïmo gïï tubidaki daama. Ami gin tïïgidi ïgai go gïï kiiki Jerusalen tïgidukïdï ix makïdï ïr Diuxi ïkobai dasadï. Dai tïbañimi go Jerusalen abhiadïrï xako daja Diuxi tïbagiïrï.

¹¹ Kïïga xigiamaaxi gobai kudakatai Diuxi kudaigadïkïdï dai totoarïi ïpïan dukai ïmo odai kïï namïakami ix makïdï jasper tïgidu dai bidrio maaxi basudaga.

^12-13 Bïï xikorhi kuupikatadai go gïï kiiki ïmo kurarai kïï tïkabakami dai biakami bhaibuxtama dan goka kukuparadï. Biakatadai gobai baika kukuparagai xarhiamajadïrï dai ïpï baika norteamadïrï dai ïpï baika suramadïrï dai ïpï baika tasai dupikamadïrï. Dai bïïxi ïïmo kukuparadïana gukatadai ïïmo Diuxi tïtïañikarudï. Dai ami go tïtïañikaruana ojixitadai tïtiaradï go bhaibuxtama dan goka maamaradï go Israelkaru.

¹⁴ Dai nïidi aanï simientogadï go kurarai ïpï dai bhaibuxtama dan goka ojodaikïdï duñixi. Dai ami ojodiana ojixi go bhaibuxtama dan goka tïtiaradï go Arhi Kañiru ojotosadï. Suxi Kristo ojotosadï tudu.

¹⁵ Dai go tïañikarudï Diuxi ix makïdï gin aatagidi bhïkati ïmo ïpïabidakarui parï ïmo metro ïxi tïbïdukami dai ïgaikïdï ïpïabida agai go gïï kiiki ïmadï kuraradï dai kukuparadï.

¹⁶ Maakoba xixokami go gïï kiiki tudu dai ïmadugan buiduru bïï maakobapadïrï. Daidi go tïañikarudï Diuxi ïpïabidi gobai dai ajïga gomirhi dan gociento kilometro tïbïakoga dai gajiakoga dai go kaxi taiyakoga ïpï. Mos ïmadugan buiduru bïïxi aipadïrï tudu.

¹⁷ Dai bhodïrï ïpïabidi ïgai go gïï kuraradï go gïï kiiki sa xïï koboka dai ajïga baikobhai dan maakoba metro. Ïpïabidi ïgai odan ïpïabidakarudïkïdï tudu ix dukai ibuadana odami.

¹⁸ Jaspekïdï duñixi go kurarai. Gobai ïr ïmo odai kïï namïakami. Dai go gïï kiiki go ïï orokïdï duñixi. Kïï basudaga maaxi go oro buañixikatai. Mai biakatai ïma maaxi tudu.

¹⁹ Dai go bhaibuxtama dan goka ojodai ix makïdï ïr simientogadï go kurarai arastudi ojodai namïakami sai kïïga xigiamaaxkana. Ïmoko arastudi ïmo odai jaspe tïgidukami dai ïmai arastudi safiro dai ïmai ágate dai ïmai esmeralda

²⁰ dai ïmai ónice dai ïmai kornalina dai ïmai krisolito dai ïmai berilo dai ïmai topasio dai ïmai krisopraso dai ïmai Jacinto dai go gïmai amatista. Po tïtïgidu go ojodai ix makïdï arastudi go simiento tudu.

²¹ Dai go bhaibuxtama dan goka kukuparadï go kurarai perlakïdï duñixi. Ïïmo perlakïdï duñixi ïïmoko. Dai go kaye ami go gïï kiikiïrï go ïï orokïdï duñixi. Basudaka maaxi go oro kïï buañixikatai.

²² Dai ami go gïï kiikiïrï mai tïï aanï tomarhi ïmo kiupai. Ka mai biïga gobai tudu ami dakatai Diuxi Gïr Nukadakami ix makïdï bïïxi adaama ïr gubuakïdï dai ami dakatai go Arhi Kañiru tïgidukïdï ïpï.

²³ Ami maiti gï agai tasai dai tomarhi masadai. Diuxi ïgai daidi ïr kudagigadï kaxkïdï dai go Arhi Kañiru tïgidukïdï ïr kudakarudïka agai mos ïï kudagigakatai ïgai bïï gokatai.

²⁴ Podukai go gïï kiiki kudidamu bïïxi oidigi daama óídakami dai go gïgïr dudunukami bïïxi aipadïrï óídakami oidigi daama ami buapamu ixtumaxi namïakami biakagi ïgai dai ami gatïïgidamu.

²⁵ Dai kukuparadï go gïï kiiki bïïxkïrï kupiokiñikamu. Maiti kukupimu ïgai mai tipukatai tukagi ami.

²⁶ Dai ami buapamu odami bïïxi aipadïrï óídakami bïïxi ixtumaxi bia ïgai namïakami dai xigiamaaxkami.

²⁷ Dïï gia mai bakimu ami tomarhi ïmo ixtumaxi soimaaxkami dai tomarhi ïmo odami ix makïdï tukurhimagi ibhïadï soimaaxi ibuadatai xiïpï yaatagïitai. Ïgai tomarhi ïmo imidagai mai bapakimu ami. Mosïkaxi odami ix makïdï ojixi librogadïrï go Arhi Kañiru tïgidukïdï xako ojixi xorai bïïxkïrï bïïtarï óídaka agai. Ïgai gia bia oigaragai ix bapakïdagi ami.