Apokalipsis 20 - Northern Tepehuan Bible

Ïmo Tïañikarudï Diuxi bhïiyi go diabora dai maixa ïmo mirhi umigi bïïtarï

¹ Dai bhodïrï nïidi aanï xi tïbañimi ïmo tïañikarudï Diuxi tïbagiañdïrï. Bhïkati ïgai yabigadï go gïï dïgai tukabakami dai ïkadïrï bhïkati ïmo gïï kadena ïpï.

² Dai bhïiyi ïgai go gïï kooyi maaxkami kïixi ix makïdï ïïki abhiadïrï oidaga, go diabora tudu. Bhïiyi dai gia kadenakïdï dai ka maiti gï upasdamu ïgai ïmo mirhi umigi.

³ Dai bhodïrï go gïï dïgakïrï daitu ïgai dai kïïga kuu dai kïïga yabimagi go gïï dïgai. Podukai ka mai bhaigakatadai go diabora xi buirumadagi óídakami oidigi daama asta xïïxkadï daibuñagi ïmo mirhi umigi. Aidï gia gï aagadamu xi dagitoagi ïgai xi busiagi chïki tasai.

Gokaduka agai duduakaragai dai tami oja Juan ïmo ñoki aagaitai go odami ix makïdï duduaka agai ïpamu go ïpïgadï duakaragïrï

⁴ Dai bhodïrï nïidi aanï gïgïrï daraikarui dai daama daraja ix makïdï ïr Suxi Kristo darasadï dudunukami. Dai tïï aanï ïpï xi duduakatu mui koidadï. Gobai ix makïdï tïï aanï ïr go ïpïgadï duakaragai agaikïdï. Dai aidïpïrï duduakatu koidadï ix makïdï gïn guikomatu kuxibodï aagaitai ïgai Suxi ñokidï dai Diuxi ñokidï. Duduaka ix makïdï mai xadutugi go kïixi dai tomarhi mai xadutugi ubixigadï dai maiti gïn dagito ix gïn tïpaltudagi kokobadïrï xiïpï ïïkadïrï. Ïgai tudu duduakatu ïpamu dai bhïiyi sïïrhikami dai gatïanïda agai Suxi Kristo ïmadï ïmo mirhi umigi.

^5-6 Gobai ïr ïgai ix makïdï duduaka agai ïpamu go ïpïgadï duakaragïrï. Ïgai ïr Diuxi ïko bubaidadï dai gïïpi bia bhai ïrhiaragai. Ka mai koi agai ïgai ïpamu tudu daidi ïr ibuadamika agai daxdaragai Diuxi bïïtarï dai Suxi Kristo bïïtarï. Dai gatïanïda agai ïgai Suxi Kristo ïmadï ïmo mirhi umigi. Dïï gia go gaa koidadï mai duduaka agai asta ïmo mirhi umigikïdï kia.

Go diabora taata agai gïgïbidaragai bïïxkïrï bïïtarï

⁷ Dai amaxi ka aïkai ïmo mirhi umigi sai dagitomu Diuxi go diabora sai busaiña maixakaruañdïrï

⁸ xi ïgai aipakoga aimïrada agai oidigi daama dai bupuirumadada agai óídakami. Abïnakidamu ïgai mui óídakami sai urabana aidï. Aatïmï Gog dai Magog aagaiña go óídakami ïgai bïïxi oidigi daamaiñdïrï óídakami ix makïdï uraba agai go diabora. Dai go diabora ïmpaidamu ïgai ïmo gïï kokodi bïïtarï. Ïpïan ïïkiduka agai ïgai orai go gïï sudagi ugidïrï. Maiti ïr ïkaldakaruka agai tudu mos ïï muidukatai.

⁹ Bïïxi aipadïrï oidigi daamaiñdïrï dïgabuñimu ïgai tudu dai ayimu ami xikorhi go gïï kiiki xako óídaga Diuxi maamaradï. Ami ayimu ïgai xikorhi go gïï kiiki ix makïdï ïr Diuxi bhai ïrhiaradï tudu bui surhigi agaitai. Dïï gia tïbagiañdïrï gïximu táí dai bïïxi naato mïidamu.

¹⁰ Dai bhodïrï ïmo gïï taiyïrï daitudamu Diuxi go diabora ix makïdï gabuirumadatadai go óídakami. Ami gïximu ïgai xako daja go gïmai kïixi ix makïdï Diuxi ñokituldiadamigadï gï aagaiña ïïgi dai maiti ïr buaboi. Ami ïr go gïï taiyïrï xako asufrekïdï mïmïjïi. Dai ami bïïxkïrï bïïtarï apia soimaaxi taata agai táí dai mai tipukamu ibhïxtaragai ïgai bïïtarï.

Go Juan tïï go gïï daikarui xako ami daka agai Diuxi dai aagada agai ixtumaxi ajiagai go óídakami

¹¹ Dai bhodïrï nïidi aanï ïmo gïï daikarui tojakami dai ami daikaruana daja Diuxi. Dai maiti ixtui go oidigi dai go tïbagi xi ami dakagi Diuxi buitapi mos ïï gubuakamikatai ïgai dai mos ïï gïdukatai xi kaxkïdï mai tiputa go oidigi ïmadï tïbagi ami dakatai Diuxi.

^12-13 Dai bhodïrï nïidi aanï xi ami go gïï daikarui tojakami buidïrï gukatadai bïïxi koidadï. Ami gukatadai ix makïdï ïr gatïtïanïdamikatadai dai modukai ix makïdï mai gatïanïitadai toma lïïchi ïpï. Bïïxi koidadï ami gukatadai tudu. Ami gukatadai asta ix makïdï go gïï sudagiïrï koitadai ïmadï bïïxkatai ix makïdï Hadeana darakatadai xako bipiïyi bïïxi koidadï. Ami gukatadai ïgai go gïï daikarui buidïrï. Mïtai kupioka go lilibro xakoga ojixi ix tuma dui óídakami dai kupioka ïgai ïmai libro ïpï xako ojixi odami ix makïdï kïïgakïrï ïr duduakakami dai bïïxkïrï bïïtarï óídaka agai. Dai Diuxi aa bïïxi go koidadï bïïtarï ixtumaxi ajiagai ïïmoko nïiditai go lilibroïrï xako ojixi ixtuma dui ïgai.

^14-15 Dai bhodïrï go gïï taiyïrï daitu Diuxi go mukigami ïmadï koidadï kiidï xako darakatadai ïgai. Go koidadï kiidï Hades tïgidu. Dai bia Diuxi ïmo libro xako ojixi odami ix makïdï kïïgakïrï ïr duduakakami dai bïïxkïrï bïïtarï óídaka agai. Dai taiyïrï surhigi agai ïgai bïïxi odami ix makïdï mai ojixi ami. Gobai ïr go kugatïrï mukigami agaikïdï.