Apokalipsis 2 - Northern Tepehuan Bible

Suxi Kristo aagidi go Juan sai ojana ïmo ñoki go buaboitudadami bïïtarï ix makïdï gïn ïmpaidiña Efesoïrï

¹ Daidi go ix makïdï gin ñokidi dai odami maaxi gin tïtïdai, —Aapi Juan, aanï ïr ïgai ix makïdï dagïi go kubarakami xixabugai gin nobi sïïrhixapadïrïana dai saagida aimïrai aanï go kubarakami kukudagi dasakarui oro duñixikami—. Dai aanï aagai sai ojidana aapi ïmo ñoki go tïañikarudï Diuxi ix makïdï nukadai go buaboitudadami Efesoïrï. Dai adukai ojida aapi,

² —Aapimï buaboitudadami Efesoïrï óídakami, kïï maatï aanï xïï kabami gïn aaga aapimï ibuadatai naana maaxi gin bïïtarï. Dai maatï aanï xïï kïïga gïn kabakadai aapimï xïxkadï soimaaxi taatamaiña. Maatï aanï ïpï sai mai daadagitoi aapimï xi gïn uurapïkïdagi soimaaxi ibuadami. Maatï aanï sai oidaga ïïmoko ix makïdï pokaitiña saidi ïr Suxi Kristo ojotosadï dïï maiti ïr buaboi. Dai aapimï kïïga gïn tïgito kaï aatagidï dai nïidi oidakaradï dai máí ix ïr yaatabogami ïgai.

³ Maatï aanï sai apia buaboitudai aapimï tomaxi soimaaxi taatamaiña aapimï dai sai mai ojodatai aatabuayi aapimï gin bïïtarï.

⁴ Dïï bïïxkïrï mai bhai gin ïrhidi aanï maatïkatai sai mai kïï ibuayi aapimï ïmo ixtumaxiïrï. Ka mai kïïga gin oigïdai aapimï tudu ixdukai gin oigïdaiña aidïxi tukamïrï buaboitu aapimï. Gokïdï gia mai kïïga ibuayi aapimï.

⁵ Gï agai tudu xi kïïga gïn tïgitokagi ix dukatai gin oigïdaiña aapimï aidïxi mai kia koidamu dui gïn buaboidaraga. Daiñi, aapimï buaboitudadami ïr ïmo dasakarui kudagi dukai go gaa óídakami buitapi ami xako daraka aapimï. Dïï gia ix mai ïma dukai gïn tïtïgitoagi aapimï dai ïpamu gin oigïdadagi ixdukai ibuadana tukamïrï, aidï gia gïn dibidamu aanï otoma dai maigobai gïn darasamu abhiadïrï xako kukudadai aapimï óídakami. Maigobai gïn darasamu aanï ïpïan dukai xi ïmo odami maigobai dasagi ïmo kudagi dasakarui tudu.

⁶ Dïï bïïxkïrï ïmo ixtumaxiïrï gia kïïga ibuayi aapimï. Mai ojoidi aapimï ixtumaxi ibuayi oijadami go gïmai buaboidaragai ix makïdï nikolaitas buaboidaradï tïgidu tudu. Dai aanï ïpï mai ojoidi go buaboidaragai gobai.

⁷ Idi ïr go ñoki ix makïdï gamaakai Diuxi Ibhïadï go buaboitudadami bïïxi aipakoga ïmpaiñdadami. Kïïga abïr gïn tïgito kaïka gobai tudu. Ïgai ikaiti, Daiñi, maakimu aanï oigaragai xorai gamaitiagi soimaaxkami bui sai ugana ibhiadï go uxi ixtukïdï kïïgakïrï oidakana odami bïïxkïrï bïïtarï dai ix makïdï Diuxi ïxikamigadïana kïïka tïbagiana. Po tudu ikaiti Diuxi Ibhïadï—.

Suxi Kristo maa ïmo ñoki go Juan go buaboitudadami bïïtarï ix makïdï gïn ïmpaidiña Esmirnïrï

⁸ Daidi go ix makïdï gin ñokidi dai odami maaxi gin tïtïdai, —Ojidañi ïmo ojai go buaboitudadami nukadakamigadï Esmirnïrï. Dai adukai ojida aapi, Aanï ïgai dai ka ïkioñdïrï oidakatadai mai kia kïkibakai oidigi dai mai ugitimu aanï tomarhi ïmo imidagai. Aanï ïgai dai tomax tuigako oidaga tudu. Muu aanï ïmo imidagai dïï gia xibi ka duaka aanï dai bïïxkïrï bïïtarï oidaka iñagai. Dai aanï ikaiti sai,

⁹ Maatï aanï bïïxi ixtumaxi ibuayi aapimï. Kïï maatï aanï tudu xïï kabami soi taatamaiña aapimï dai xïïxi ïr soititigami aapimï ïpï mai biakatai bhaitoma ixtumaxi oidaga tami idi oidigi daama. Dïï gia bïïxkïrï ka bia aapimï mui namïakami ixtumaxi ix makïdï gïn maa Diuxi gïn ibhïdaga bïïtarï xi kaxkïdï gia ïr gïn bipidakami aapimï gïn ibhïdagakïdï. Maatï aanï ix makïdï pokaitiña sai kïïgakïrï ïr judidiu dai pokaitiña saidi ïr gin aaduñi dïï maiti ïr buaboi. Ïgai galnaaxi ñokai gin bui tudu pokaititai saidi ïr gin aaduñi. Urabaka ïgai go diabora bhaiyoma di.

¹⁰ Daiñi, ka miadaimi xi soimaaxi taatagi aapimï. Aidï go diabora gatïañi agai gïn maamaixaragai. Soimaaxi taatamu aapimï chïki tasai tudu nïidana sa bhai ïr buaboi xi gin buaboitudai aapimï. Dïï maiti abïr duduadikuda dai bhaiyoma abïr apia buaboitudada aapimï tomaxi gïn kodagi go jaa dai aanï gïn maakimu ïmo gïdukami maitïki. Gïn maakimu aanï xi kïïgakïrï óídakana aapimï bïïxkïrï bïïtarï tudu.

¹¹ Idi ïr go ñoki ix makïdï gamaakai Diuxi Ibhïadï go buaboitudadami bïïxi aipakoga ïmpaiñdadami. Kïïga abïr gïn tïgito kaïka gobai tudu. Daiñi, xorai gamaitiagi soimaaxkami bui tomaxi gï muatudagi ïgai mai taata agai mukigami ibhïgadï bïïtarï— ikaiti Diuxi Ibhïadï.

Suxi Kristo maa ïmo ñoki go Juan go buaboitudadami bïïtarï ix makïdï gïn ïmpaidiña Pérgamoana

¹² Dai bhodïrï ix makïdï gin ñokidi dai odami maaxi gin tïtïdai, —Ojidañi aapi ïmo ojai go buaboitudadami nukadakamigadï Pérgamoana. Dai adukai ojida aapi, Aanï ïgai dai bia go maxtai bïï goka padïrï mukadikami

¹³ dai maatï aanï sai go diabora ïgai dai gatïanïi ami go gïï kiikiïrï xako óídaga aapimï. Dai maatï aanï sai tomaxi tïanïi ïgai ami aapimï bïïxkïrï apia gin buaboitudai. Mai dagito aapimï gïn buaboidaraga tudu tomaxi ami xako óídaga aapimï gï muatu go kïïrhi Antipas tïgidukïdï ix makïdï sïïrhi ñokaiña gin bïïtarï aagaitai ixtumaxi ïr buaboi. Maiti gin dagito aapimï tomaxi ami gïn kiikiïrï oidaga go diabora tudu.

¹⁴ Dïï bïïxkïrï oidaga ixtukïdï mai bhai gin ïrhidi aapimïkïdï. Daiñi, oidaga ïïmoko gïn saagida ix makïdï mamaakai soimaaxi aatagi ïpïan dukai idui go kïïrhi Balaam tïgidukïdï ïïki. Kïï maatï aapimï tudu sai go Balaam maa ñoki go kïïrhi Balak tïgidukïdï dai aagidi ixdukatai gïpiïrï daitudana ïgai go Israelitas. Aagidi go Balaam go Balak sai abïnakidiña ïgai go Israelitas sai kuadana kuadagai ix makïdï gï dadaxditadai uubixi. Arhiïxi ïr soimaaxi gobai. Dai aagidi ïpï sai abïnakidiña ïgai go Israelitas sai ïmadï bopoiña jaa aipakoga ix makïdï maiti ïr aduñdï.

¹⁵ Dai podukai mamaakai aatagi ïïmadutai aapimï ïpï. Ïgai ix makïdï oidiña aatagidï go nikolaitas agaikïdï tudu. Ïgai abïnakidiña odami ïpïan dukai ibuadana go Balaam. Abïnakidiña ïgai sai buaboitudaiña uubixi tudu dai sai ïmadï bopoyiña jaa aipakoga. Dai gobai mai bhai ïrhidi aanï.

¹⁶ Kaxkïdï abïr ïma dukai gïn tïtïgitoda. Kaxi abïr mai dagito gïn aaduñi xi soimaaxi ibuadana podukai oiditai pomaaxi aatagi tudu. Ïma dukai otoma gamo imimu aanï dai kokodadamu go soimaaxi ibuadami gin maxtaigakïdï ix makïdï gin tïñiañdïrï busanïka.

¹⁷ Daiñi, idi ïr go ñoki ix makïdï gamaakai Diuxi Ibhïadï go buaboitudadami bïïxi aipakoga ïmpaiñdadami. Kïïga abïr gïn tïgito kaïka gobai tudu. Xorai gamaitiagi soimaaxkami bui maakimu aanï go kuadagai maná tïgidukïdï ix makïdï ïxtoki daja. Dai maakimu aanï ïmo odai tojakami ïpï xako ojixika agai ïmo tïtiaragai utudui. Dai jaa odami mai maatïkamu go tïtiaragai mosïkaxi ix makïdï maakiagi aanï— po tudu in tïtïdai Diuxi Ibhïadï.

Suxi Kristo maa go Juan ïmo ñoki go buaboitudadami bïïtarï ix makïdï gïn ïmpaidi Tiatirana

¹⁸ Dai bhodïrï ix makïdï gin ñokidi dai odami maaxi gin tïtïdai, —Ojidañi aapi ïmo ojai go buaboitudadami nukadakamigadï Tiatirana ïpï. Dai adukai ojida aapi, Aanï ïr Diuxi Maradï ix makïdï táí dukai bïpïdokïi gin bupuji dai gin ïïkaso ïpïamaaxi baiñomi kïï buañixikami.

¹⁹ Dai maatï aanï bïïxi ixtumaxi ibuayi aapi. Kïïga gin oigïdai aapimï dai kïïga gïn oigïdai aapimï aipakoga ïpï. Dai maatï aanï ix kïïga gin buaboitudai aapimï dai ix kïïga ibuayi gin aaduindaga. Maatï aanï sai mai daadagitoiña aapimï xi gïn maitiagi go soi ïrhiaragai. Dai maatï aanï ïpï sai bamioma ibuayi aapimï gin aaduindagai xibi ix bhai xi aidïxi tukamïrï buaboitu aapimï.

²⁰ Dïï bïïxkïrï oidaga ixtukïdï mai bhai gin ïrhidi aapimïkïdï. Daiñi, gïn saagida daja ïmo oki ïpïan tuigakami go oki Jezabel tïgidukïdï ix makïdï oidakatadai ïïki. Go ix makïdï gïn saagida daja pokaiti saidi ïr ïmo Diuxi ñokituldiadamigadï dai maiti ïr buaboi. Ga mamaakai ïgai ñoki gin pipioñi. Ga mamaakai ñoki buaboitudadami tudu dai abïnakidi sai aipako bopoiña jaa ïmadï dai sai kuadana kuadagai ix makïdï gï dadaxdi uubixi. Podukai buirumadai ïgai gin aaduñi ix makïdï gin buaboitudai. Dai aapimï daadagitoiña ix podukai gamaakada ïgai aatagi. Gokïdï mai bhai gin ïrhidi aanï.

²¹ Dai bia aanï ïmo ñoki go oki soimaaxi ibuadami bïïtarï. Daiñi, ka tïbïpi nïnïra aanï xi ïmadukai gï tïgitoagi ïgai dïï maiti ipïrhi xi dagitoagi soimaaxkamigadï.

²² Kaxkïdï xibi daitudamu aanï kokodagai abhana dai kabami soimaaxi taatamituldamu aanï bipiorhimadï ïpï ix mai ïma dukai gïn tïtïgitoagi dai ka mai pomaaxi ibuadagi.

²³ Dai kodamu aanï ix makïdï ïïgidi aatagidï ïpï. Aidï gia bïïxi go buaboitudadami ix makïdï aipakoga gïn ïmpaidiña maatï nïijadamu sai aanï bïïxi maatï ixtumaxi tïtïitoi odami dai ixtumaxi ibuada ïrhidiña ïpï. Dai maatïkamu ïgai xi aanï maakimu ixtumaxi ajïakagi bïïxi odami. Gobai ïr go ñoki ix makïdï bia aanï go soimaaxi ibuadami bïïtarï.

²⁴ Dai bia aanï ïmo ñoki aapimï gïn bïïtarï ix makïdï mai ïïgidi go soimaaxkïdï aatagi ami Tiatirana. Pokaitiña odami sai go aatagi gobai diaborañdïrï imïi dai sai mosïkaxi chïki odami maatï dai kaxkïdï ïmo kïï namïakami aatagi aagaiña ïgai. Dïï aapimï kïïga mai ïïgidi go aatagi gobai xi kaxkïdï bia aanï mos arhi ïmo ñoki gïn bïïtarï.

²⁵ Daiñi, mosïkaxi gïn tïanïi aanï mïsai oijada aapimï go buaboikïdï buaboidaragai ix makïdï ka bia aapimï. Gobai abïr oijada aapimï tudu asta xïxkadï ukami dibiagi aanï ïpamu.

²⁶ Dai odami ix makïdï gamaitiagi go soimaaxi bui dai apia gin ïïgiadagi asta xïxkadï mukiagi ukami, ïgai maakimu aanï sïïrhikami sai tïanïna bïïxi oidakami oidigi daama.

²⁷ Gin Oga gin maa sïïrhikami ansai tïanïna aanï oidigi daama óídakami tudu dai aanï maakimu oigaragai ix makïdï gamaitiagi soimaaxkami bui sai gatïanïna ïpï gin ïmadï. Daiñi go ïïkidadï ojai aagai ïmo ñoki aanïkïdï daidi ikaiti sai, Ïpïandukai xi ajayi maiti ixtutuidikïi ïmo odami bui podukai bamioma ixtuidimu aanï xi bhai go óídakami oidigi daama óídakïdï gatïanïitai aanï. Daiñi, ïmo ayi mai bhaiga xi daidagi ïmo odami xïïxkadï bïï naato taatasagi ajayi ïmo baiñomi gïitapakarukïdï. Dai podukai ïpï mai bhaigakamu odami xi gin daidagi mos ïï gubuakan dukai gatïanïitai aanï, ikaiti go ojai gin aagaitai gobai. Dai podukai gatïanïdamu ix makïdï maitiagi soimaaxi bui ïpï maakakai aanï sïïrhikami.

²⁸ Maitïmu ïgai go soimaaxi tudu. Dai maakimu aanï go xabugai ix makïdï busakïi ïïki kiamoko ïpï ïmo maaxidaragai dukai sai kaxi gamaitï ïgai soimaaxi bui.

²⁹ Idi ojai aagai go ñoki ix makïdï bia Diuxi Ibhïadï bïïxi go buaboitudadami aipakoga ïmpaiñdadami bïïtarï. Kïïga abïr gïn tïgito kaïka gobai tudu—.