Apokalipsis 19 - Northern Tepehuan Bible

Go Juan nïidi xi bhai gïn ïrhidi tïbagiana óídakami nïiditai xi Suxi Kristo maitï go buidïrï bïïtïkamigadï

¹ Dai gokiïrï kaï aanï xi gïgïrï ñokai sïïrhikïdï mui tïbagiïrï óídakami daidi ikaitimi, Aa gia gï agai xi aagadagi aatïmï xi ïr gïdukami gïr Diuxiga. Ïgai tudu ïr kïïgakïrï bubiadamigadï óídakami dai ïgai adaama ïr gïdukïdï dai adaama ïr gubuakïdï.

² Gïgïbiturhi ïgai go oki kïkïïlmïrhiakami tudu ix makïdï soi duiñturhi oidigi daama óídakami. Ka mui koi go oki pipioñigadï Diuxi di dai xibi Diuxi kaxi gï sïïrhiñtu ïgai ïmadï. Gia sïïrhi aatabuayi Diuxi gïgïbiditai go oki tudu. Bïïxkïrï gïgïbidi ïgai soimaaxi ibuadami ixdukatai ajïakagi, ikaiti.

³ Daidi ikaiti ïgai ïpï, Bïïxkïrï bïïtarï kubhusada agai go Babilonia gïgïbidakai Diuxi. Gia gï agai xi aagadagi aatïmï xi ïr gïdukami gïr Diuxiga, ikaiti.

⁴ Dai go ïmokobhai dan maakoba bhaitï gukakami ïmadï go maakoba duduakakami ixtumaxi totonakïdï gukatadai buidïrï mïï xako daja Diuxi go gïï daikaruana daidi ikaiti ïgai, —Ïjï— ikaiti. —Buaboi gobai— ikaiti. —Gia gï agai xi aagadagi aatïmï sai gia ïr gïdukami gïr Diuxiga— ikaiti xadutudaitai Diuxi.

⁵ Dai bhodïrï ami xako daja Diuxi daikaruana sai ño ixtumaxi dai ikaiti, —Bïïxi Diuxi maamaradï gï agai xi oigïda ñokada Diuxi bïïtarï dai aagadagi xïïxi ïr gïdukami ïgai. Bïïxkatai ix makïdï xadutudai ïgai tudu mai xudu xi ïr gatïanïdamikagi ïgai xi maiti ïr gatïanïdamikagi ïpï— ikaiti.

Juan pokaiti sai go buaboitudadami ïr nobiagadï go Arhi Kañiru

⁶ Dai bhodïrï kaï aanï ïpï ïmo ñoki dai ïpïan kaiti xi xixiokadan kaitiadagi mui odami. Ïpïan kaititadai ïpï xïxkadï gïï mïradagi sudagi. Gïgïrï kobondan duu kaiti gobai ïpï. Daidi ikaiti gobai, —Gia gï agai sai aagadagi aatïmï sai ïr gïdukami gïr Diuxiga. Kïïga gatïanïi ïgai tudu Gïr Nukadakamikatai ïgai dai Adaama Gubuakïdïkatai— ikaiti.

⁷ —Gï agai sai kabami bhai gïr ïrhiadagi aatïmï dai oigïda ñokadagi Diuxi bïïtarï aagaitai xi ïr gïdukami ïgai. Kaxkïdï tudu ka ayi ix tuigako go Arhi Kañiru ïmadï biiyagi nobiagadï. Dai nobiagadï ka bhai gï dui.

⁸ Diuxi maa oigaragai go nobia xi gï aadagi yukuxi tojakami dai kïï finuakami. Xi kaxkïdï kaxi gï ayi ïgai gobai dai ka mos totoarïi mos ïï tojakatai yukuxidï— ikaiti go gïgïrï ñokadami. Dai go nobia tudu ïr ïmo maaxidaragai aagaitai go buaboitudadami dai go yukuxi tojakïdï aagai xïï buañixikami aatadui go buaboitudadami.

⁹ Dai go tïañikarudï Diuxi pobai in tïtïdai, —Ojañi aapi adukai, Diuxi ikaiti sai, —Gia bhai gïn ïrhidi bïïxkatai ïgai ix makïdï ïr bapaidarxikami kunataradïrï go Arhi Kañiru— —Gobai ïr ïmo Diuxiañdïrï imïdami ñoki tudu dai kïïga ïr buaboi. Gobai oja aapi— in tïtïdai go tïañikarudï Diuxi.

¹⁰ Pobai in tïtïdai ïgai antai totonakïdï kïkiba ïkasodï sonoana xadutuda iñagaitai Diuxi dukai. Dïï mos ïgai pobai in tïtïdai aidï, —Maiti pobuada. Aanï ïpï mos ïr pioñigadï Diuxi ïpïan dukai aapi ïmadï bïïxi go gaa ix makïdï aipakoga aagaiña Suxi Kristo ñokidï. Daiñi, Diuxi ñokituldiadamigadï aatïmï tudu xïïxkadï aagagi aatïmï Suxi Kristo ñokidï. Kaxkïdï gï agai xi mosïkaxi Diuxi xadutuada aatïmï dai maiti gï agai xi Diuxi dukai gin nïijada aapi— in tïtïdai ïgai.

Go Juan oja ïmo ñoki aagaitai ix maaxika agai xïïxkadï dibiagi Suxi Kristo ïpamu

¹¹ Dai bhodïrï nïidi aanï ix gï kupiokatadai go tïbagi dai ami kïakatadai ïmo kabayo tojakami. Dai go kabayo daama daitugai ïgai ix makïdï bïïxkïrï ibuayi ixtumaxi aagagi dai bïïxkïrï aagai ixtumaxi ïr buaboi. Dai ïgai bïïxkïrï sïïrhi aatabuayi xïïxkadï gamaakadagi gïgïbidaragai dai xïïxkadï ibuadagi kokodi.

¹² Tai maaxi bupuidï dai modïana tutustugai mui korona. Kobadïrï ojixi ïmo tïtiaradï dïï mosïkaxi ïgai maatï ix kaiti go ojai.

¹³ Gï aadaka ïgai yukuxi ix makïdï ïraïrï gï baitadai. Diuxi Ñokidï tïgidu ïgai

¹⁴ dai sïïrhikïdï mui sandadaru oiditadai tïbagiañdïrï kapayo totoakami daama ïpï. Dai gïn aadatugai ïgai yukuxi kïï totoakami dai kïï buañixikami.

¹⁵ Dai ïgai ix makïdï Diuxi Ñokidï tïgidu tïñidïañdïrï busakïi ïmo maxtai kïï mukakami dai ïgaikïdï maiti agai oidigi daama óídakami. Dai bhïkati ïgai ïmo baiñomi uxiaragai ïpï. Gokïdï mai taata tïanïda agai ïgai. Ix dukai ïmo odami bakïsai uba baragadï podukai gubuakami dukai gatïanïda agai Diuxi óídakami mos ïï kabami bhamukatai Diuxi ïgai bui.

¹⁶ Dai ïgai ix makïdï Diuxi Ñokidï tïgidu bia ïpï ïmai tïtiaradï ix makïdï ojixi yukuxi kajidïrï. —Reygadï bïïxi rey dai Tïanïdamigadï bïïxi tïtïanïdami— podukai ojixi tïtiaradï tudu.

¹⁷ Dai bhodïrï tïïtïkiïrï dukai tïï aanï jaa ixtumaxi ïpï. Tïï aanï ïmo tïañikarudï Diuxi ix tasiana kïïka dai gïïgïrï iiña dai báí bïïxi go ujurugi ix makïdï ïbïltapi nïnïyi daidi potïtïdai, —Gimibïrai aapimï ujurugi dai abïr gïn ïmpaida ïmo gïï kuadagai bïïtarï ix makïdï Diuxi bhai duña agai.

¹⁸ Ami kuadagiïrï gaugimu aapimï bhabhiadï mui kapitañi dai mui tïtïanïdami. Ga ugimu aapimï bhabhiadï kapayo ïmadï modukai ix makïdï daama daitugaitadai ïpï. Bïïxi gaugimu aapimï ix makïdï ïr pipioñikatadai dai ix makïdï maiti ïr pipioñikatadai. Ga ugimu aapimï tïtïanïdami dai ix makïdï mai tïanïiña ïpï— ikaiti.

¹⁹ Dai nïidi aanï ïpï xi gïn ïmpaiditadai go gïï kïixi ix makïdï sudagiañdïrï busaitadai ïmadï bïïxi go gïgïr dudunukami ix makïdï oidaga oidigi daama dai ïmadï sandadarugadï. Gïn ïmpaiditadai ïgai bui surhigi agaitai go ix makïdï kabayo tojakami daama daja dai ïmadï sandadarugadï.

²⁰ Dai ami kokodiïrï gï bhïitu go gïï kïixi modukai ïmadï go gïmai ix makïdï Diuxi ñokituldiadamigadï gï aagaiña ïïgi dai maiti ïr buaboi. Ïgai tudu ïgai dai ibuadana naana maaxi maaxidaragai soikïitai go kïïxi sai odami buaboitudaiña. Podukai bupuirumadaiña ïgai mui óídakami. Bupuirumadaiña ïgai ix makïdï gïn dagito ix gïn tïpaltudagi tïtiaradïkïdï go kïïxi tudu dai ix makïdï xadutudaiña go kïixi maaxkami ubixi. Gï bhïitu tudu go gïï kïixi ïmadï modukai go gïmai bupuirumadami óídakami dai apia dukai duduakakami gïn surhitu ïgai go gïï taiyïrï xako asufrekïdï mïmïjïi táí.

²¹ Dai ïgai ix makïdï kabayo tojakami daama daitugai bïïxi naato koda sandadarugadï go kïixi. Koda ïgai go maxtaikïdï ix makïdï tïñidïañdïrï busanïi. Dai bïïxi go ujurugi kïïga tataxkobai ugakai tukugadï go sandadaru.