Apokalipsis 18 - Northern Tepehuan Bible

Diuxi gïgïbitulda agai go oki kïkïïlmïrhiakami ix makïdï ïr ïmo maaxidaragai go gïï kiiki Babilonia tïgidukïdï bïïtarï

¹ Dai gokiïrï tïï aanï ïpï ïmai tïañikarudï Diuxi ix tïbai tïbagiañdïrï. Ïmo gïdukami sïïrhikami biakami ïgai. Dai kïï kabami kudaka maaxi ïgai. Kïïga maaxtu ïgai oidigi aipakoga kudakatai kudaigadï.

² Daidi gïgïrï iñakimi ïgai daidi ikaitimi, —Ka xia tui go gïï kiiki Babilonia tïgidukïdï. Xibi ïr diabora tïtïañikarudï kiidï gobai dai ïr kiidï ujurugi tukurakami dai soimaaxkami.

³ Ami Babiloniïrï óídakami bapaidiña go gaa óídakami aipakoga oidigi daamaiñdïrï sai urabana soimaaxkamiïrï. Ïpïan buadana ïgai oki kïkïïlmïrhiakami ix makïdï nabaamutudai kïkïïrhi iidagaikïdï dai bhodïrï bapaidiña sai ïmadï bopoiya. Dai go gïgïrï dudunukami oidigi daama óídakami bïïxi urabakana go Babiloniïrï óídakami soimaaxi ibuadatai ïgai ïmadï. Go Babiloniïrï óídakami bhaibitukami biaka ïrhidiña go naana maaxi ixtumaxi ix maaxi biakana gïn bipidakami dai gïïpi xia buadana tuminxi gaagaitai gobai. Kaxkïdï gïn bipidakami bii go gaagaradami aipakoga oidigi daama— ikaiti go Diuxi tïañikarudï gïgïrï iñakimikatai.

^4-5 Daidi kaï aanï ix ño Diuxi tïbagiañdïrï daidi ikaiti, —Gin aaduñi, sïïrhikïdï naana maaxi soimaaxi ibuayi go Babiloniïrï óídakami dai nïidi aanï bïïxi ixtumaxi ibuayi ïgai dai xadïrï maiti tïgitokana bïïxi ixtumaxi ibuayi ïgai ïpï. Kïïga gïgïbituldamu aanï tudu. Dïï aapimï gia ïr gin aaduñi kaxkïdï abïr bubuaki abhiadïrï go Babilonïrï óídakami saagidañdïrï dai abïr mai uraba ïgai soimaaxi ibuadatai— ikaiti. —Daiñi, xi soimaaxi ibuadagi aapimï ïpïan dukai ibuadana ïgai aidï gia taatamu aapimï gïgïbidaragai ïpïan dukai ïgai ïpï.

⁶ Gï agai tudu xi bamioma soimaaxi taatagi ïgai xi xïï soimaaxi taataturhi ïgai jaa. Gï agai xi ïpï kaxi bamioma soimaaxi taatagi ïgai tudu. Dai jaa taata bhamudadï go Babiloniïrï óídakami soi buididitai ïgai kaxkïdï gï agai xi go Babiloniïrï óídakami gokoakoga daamarhikami taatagi gin bhamudaga xïxkadï gïgïbituldagi aanï— ikaiti Diuxi.

⁷ —Daiñi— ikaiti. —Go Babiloniïrï óídakami ikaitiña sai, —Aatïmï bhai gïr ïrhidi tïtïanïdami dukai darakatai. Maiti ïr bipiudu aatïmï dai tomarhi ïmo imidagai maiti gïr ayimu xi soi gïr ïrhiadagi ix dukai soi gïn ïrhidiña bipiudu,— ikaitiña. Dïï gia ix xïïxi pokaitiña ïgai sai bhai gïn ïrhidiña dai saidi ïr gïgïrdukami pokaxi kabami gï agai xi soi gïn ïrhiadagi tudu.

⁸ Aanï Diuxi ïr gïn Tïanïdamiga dai gïgïbitulda iñagai go Babiloniïrï óídakami tudu dai aanï sïïrhikïdï gubuka. Kaxkïdï mos arhi ïmo tasaikïdï aituldamu aanï naana maaxi soi ïrhiaragai go Babiloniïrï óídakami. Ayimu kokodagai dai soigamudagai dai bhiugigai. Bïïxi gobai taatamu ïgai ïmo tasïrï dai gï mïimu go gïï kiiki Babilonia tïgidukïdï ïpï. Kïï gubuka aanï di Diuxikatai aanï. Kaxkïdï mai xijaiga in bïïtarï xi ïmo tasaikïdï aituldagi podukai naana maaxi gïgïbidaragai— ikaiti.

⁹ Daidi suanïdamu bïïxi go gïgïr dudunukami oidigi daama oidakami ix makïdï urabaiña go Babiloniïrï óídakami ibuadatai soimaaxi dai ibuadatai ïïgi ixtumaxi bhai ïrhidi ïgai. Suanïdamu ïgai nïiditai go kubhuxi xïïxkadï mïiyagi go gïï kiiki.

¹⁰ Mïkaxdïrï gukakamu ïgai duadimukatai tïïgakai ixdukatai gïgïbiturhi Diuxi go Babiloniïrï óídakami daidi pokaitadamu, —Aiji, sogigi aapimï Babiloniïrï óídakami. Gia ïr gïdukamikatadai gïn kiiki dai aipako gatïanïiña aapimï. Dïï bïïxkïrï xibi todian dukai gïn ayi gïgïbidaragai— ikaitidamu go gïgïr dudunukami.

¹¹ Aidï go gaagaradami bïïxi oidigi daamaiñdïrï soi gïn ïrhiadamu ïpï dai suanïdamu tïïgakai ix mïjïi go Babilonia. Ka mai tipuka agai xorai sabïadagi ixtumaxi kukuspïiña ïgai kaxkïdï.

¹² Naana maaxi kukuspïiña ïgai tudu gagara bïïtarï. Kukuspïiña ïgai oro dai plata dai perla dai ojodai kïï namïakami dai ikuxi namïakami moraduakami dai bïgikami dai seda ikuxi dai jaa naana maaxi ikuxi namïakami dai naana maaxi uxi kïï fifinuakami dai naana maaxi elefante taatamudïkïdï duñixikami dai namïakami uxi duñixikami dai bhronse dai jaa papaiñomi duñixikami dai marmol. Gobai kukuspïiña ïgai Babiloniamu tudu dai xibi ka mai tipuka agai xorai sabïadagi ami.

¹³ Dai kukuspïiña ïgai naana maaxi xigian ubadami ix makïdï odami gïn tïkidiña dai ix makïdï mïidiña odami sai xigian ubadagi kubhiadï dukami Kanela dai kubhimadarhi dai perfume. Bïïxi gobai kukuspïiña gaagaradami. Dai kukuspïiña bino dai olibo asaitigadï dai arina dai tïrhigi. Dai kukuspïiña naana maaxi buxtaki ïpï dukami bapakaxi dai kañiñiru dai kapayo dai kapayo kareretagadï dai pipioñi gagara bïïtarï buxtaki dukai. Bïïxi gobai kukuspïiña go gaagaradami gamoakoga dïï xibi ka mai tipuka agai xorai sabïadagi mïïkai go Babilonia.

¹⁴ Daidi go gaagaradami aagamu ïmo ñoki aagaitai go Babiloniïrï óídakami daidi ikaitidamu, —Sogigi aapimï. Go bhai ïrhiaragai ix makïdï biaka ïrhidiña aapimï ka mai tiputa. Ka ugidagai bïïxi ixtumaxi ixtukïdï gïn bidakami dukai óídakaiña aapimï tudu dai mai tipu xorai tïïgiagi ïpamu— ikaitadamu.

¹⁵ Daidi go gaagaradami ix makïdï gïn bipidakami bii gagaraitai naana maaxi ixtumaxi ami Babilonïrï mïkaxdïrï gukakamu ïbhïiditai gïgïbidaradï go Babiloniïrï óídakami. Suanïdamu ïgai nïiditai

¹⁶ dai pokaitada agai, —Aiji, sogigi go gïï kiikiïrï óídakami. Kïïga gïn aadakaiña ïgai yukuxi kïkïïgadukami moraduakami dai bïpïgikami. Dai gïn aadakaiña oro naanakagi dai oro bhaibukai dai ojodai kïï namïakami.

¹⁷ Dïï gia xibi todian dukai xia gï dodai bïïxi go ixtumaxi namïakami— ikaitidamu ïgai. Daidi bïïxi go sosoigakami gïgïr barkos ïmadï bïïxi go barkoana paxaradami dai aatabuadami dai ïmadï bïïxi go gïï sudagiana aatabuadami bïïxkatai mïkaxdïrï nïijada agai gïgïbiditai Diuxi go Babilonia.

¹⁸ Nïijadamu ïgai go kubhuxi mïïkai gobai daidi ikaitidamu, —Go Babilonia bïïxi aipako gatïanïiña. Mai tipu ïmai gïï kiiki po maaxkami— ikaitadamu.

¹⁹ Daidi gïn mataimada agai momodïrï soigamukai dai suanïdamu daidi ikaitadamu, —Aiji, sogigi go gïï kiiki. Ami tudu didibaiña barkos sosoigadï gaagaradami dai go gaagaradami gïn bipidakami bii ami mos ïï tuminxigakatai óídakami. Dïï xibi todian dukai xia tui go gïï kiiki ka maiti bhaigakamu xi gaagaragi ixtumaxi ami— ikaitadamu ïgai.

²⁰ Daidi ikaitadamu go nïijadami ïpï, —Bhaigabïnïrhiada bïïxkatai aapimï tïbagiana óídakami. Aapimï buaboitudadami tudu dai aapimï ix makïdï ïr Diuxi ñokituldiadamigadï dai aapimï ojotosadï Suxi Kristo. Bhaigabïnïrhiada aapimï bïïxkatai. Xibi Diuxi iduña agai ixtumaxi ïr sïïrhi aapimï gïn bïïtarï dai maaki agai gïgïbidaragai go Babiloniana óídakami mos ïï kabami soi gïn buididitai ïgai— ikaitadamu.

²¹ Daidi ïmo gïï tïañikarudï Diuxi kïï gubuakami bañigi ïmo gïï odai dai go gïï sudagiïrï daitu. Daidi go tïañikarui ikaiti, —Ix duu ka mai tiputa go odai dai odami ka mai nïijadamu gobai ïpamu podukai ïpï mai tiputa agai go Babilonia dai ka mai tïigimu odami ïpamu.

^22-24 Go gaagaradami ami óídakami sïïrhikïdï gïgïrdukïdï gïn ïrhidiña ïïgi dai bupuirumadaiña bïïxi oidigi daama óídakami taapïiditai. Ami Babiloniana aaxi ïgai ïradï Diuxi ñokituldiadamigadï tudu dai ïradï buaboitudadami kodaitai ïgai. Kaxkïdï ka maiti gï kaidatumu ami harpa iibaradï tomarhi flauta tomarhi trompeta. Dai ka mai tipukamu ami aatabuadami dai maiti gï kaidatumu tomarhi tutakarui. Dai ka mai kukudakïdamu ami kudakarui dai ka maiti gï kaidatumu bagimigadï kukuntadami. Bïïxi gobai ka mai tipukamu ka bïïxi xatuidïkai go Babilonia aïkai gïgïbidaradï— ikaiti go tïañikarudï Diuxi .