Apokalipsis 17 - Northern Tepehuan Bible

Go Juan oja ïmo ñoki aagaitai ïmo oki kïkïïlmïrhiakami. Go oki ïr ïmo maaxidaragai aagaitai ïmo gïï kiiki ix makïdï taata agai gïgïbidaragai kabami soimaaxi ibuadamikatai óídakami ami

¹ Daidi bhodïrï ïmadutai go kubarakami Diuxi tïtïañikarudï ix makïdï bia go ajasokorhi ayi ami xako dajatadai aanï daidi pobai in tïtïdai, —Gimi dai gï tïïgidamu aanï ix dukatai gïgïbituldamu Diuxi go oki kïkïïlmïrhiakami. Ïgai ïr ix makïdï bïïxi odami maatï dai gatïanïi ïgai go gïï sudagi daama dakatai.

² Go gïgïr dudunukami ix makïdï tïanïi tami oidigi daama ïr bipiorhimadï dai bïïxi go oidigi daama óídakami gïn bupuirutu urabatai soimaaxkamigadï go oki. Gïn bupuirutu ïpïan dukai ïmoko ix makïdï gïïpi iiyagi xibukami iidagai tudu urabatai soimaaxkamigadï go oki— in tïtïdai ïgai.

³ Daidi bhodïrï Diuxi Ibhïadï gin tïanïitadai dai gin tïtïgidi naana maaxi. Diuxi Ibhïadï gubukadadïkïdï gin baidaja ïmo Diuxi tïañikarudï oidigamu tudu dai gin tïtïgidi ixtumaxi ami. Dai gin tïtïgidi ïgai go oki xi daama daitugai ïmo gïï kïixi bïgikami ix makïdï sudagiañdïrï busaitadai. Dai ojixitadai mui tïtiaragai tukugadïana go kïixi. Dai go naana maaxi tïtiaragai ix makïdï ojixi tukugadïana ïr galnaaxi buirudagai ñoki Diuxi bïïtarï. Dai kubarakami momokana ïgai dai bhaibuxtamadu aagadï.

⁴ Dai go oki gï aadaka yukuxi moraduakami dai bïgikami. Dai gï aadaka ïgai naana maaxi oro duñixikami dai biakami arhi ojodai namïakami ïpï, dukami go arhi perla tïgidukïdï ojodai. Dai ïkadïrï daagïka ïgai ïmo oro asokorhi sudakami naana maaxi galnaaxi buirudagai ix makïdï ibuadana ïgai mos ïï kïkïïlmïrhiakatai.

⁵ Dai kobadïrï biakatadai ïmo ojai ix makïdï ikaiti, Aanï ïr dïïdï bïïxi kïkïïlmïrhiakami oki dai aanïañdïrï bubuaka bïïxi galnaaxi buirudagai ix makïdï oidaga oidigi daama, ikaiti ojai go oki kobadïrï. Go ojai ïr tïtiaradï go oki dïï odami mai maatïkana ix tïiya ïrhidi.

⁶ Dai tïï aanï ïpï ix nabaamuka go oki ïradïkïdï buaboitudadami ix makïdï gïn koditu aagaitai Suxi Kristo. Dai ka mai tïtïïgaitadai aanï ixtumaxi gin tïgitoagi nïiditai.

⁷ Daidi go Diuxi tïañikarudï pobai in tïtïdai, —¿Tuipïxi mai tïtïgai aapi ixtumaxi gï tïgitoagi nïiditai gobai? Daiñi, odami mai maatï ix tïiya ïrhidi gobai ix makïdï nïidi aapi. Mai maatï ïgai ix tuma bïïtarï go oki tudu ix makïdï daama daitugai go gïï kïixi kubarakami momokami dai biakami bhaibuxtama aagadï. Dïï gia xibi gï aagidamu aanï ix tuma bïïtarï gobai— in tïtïdai.

⁸ —Daiñi— in tïtïdai. —Go kïixi ïr ïgai ix makïdï oidakatadai ïkioma dai xibi ka mai oidaga. Dïï gia xibi bhai otoma duakatumu ïgai ïpamu dai busaimu abhiadïrï xako bii ïgai mukukai. Busaimu ïgai go gïï tukabakami dïgaiñdïrï tudu. Dai busaikai ïgai go odami mai buaboitudadami mai tïïgimu ixtumaxi gïn tïtïgitoagi nïiditai ix duakatu go kïixi ïpamu. Go odami tudu ix makïdï mai ojixi go Arhi Kañiru librogadïrï. Mai ojixikana ïgai ïïki abhiadïrï aidïxi abhiadïrï xi kïkiba oidigi tudu. Dai busaimu go kïixi abhiadïrï go gïï dïgaiñdïrï dïï xibi gia imimu ïgai xako Diuxi gïgïbitulda agai bïïxkïrï bïïtarï— in tïtïdai go Diuxi tïañikarudï.

⁹ Dai apia gin aatagidimi go Diuxi tïañikarudï daidi in tïtïdai, —Gï agai xi kïïga gï tïgitokagi ïmoko dai maatïkagi ix tïiya ïrhidi ixtumaxi gï aagidamu aanï. Daiñi, go kubarakami momodï go kïixi ïr ïmo maaxidaragai aagaitai kubarakami gigidi xako daama dakamu go oki kïkïïlmïrhiakami.

¹⁰ Dai mai xu xi mosïkaxi gobai bïitarï ïr maaxidaragai go momo. Ïmo maaxidaragai gobai aagaitai kubarakami gïgïr dudunukami ïpï. Dai taamatai ïgai gatïanïiña ïïki dai xibi ka ugidagai sïïrhikamigadï. Dai ïmadutai go kubarakamiañdïrï gia gatïanïi xibi kia dai ïmai asta gokiïrioma dibiamu dai gatïanïdamu. Dïï gia ïgai ix makïdï mai kia gatïanïi mai xi tïbïpi gatïanïda agai dibiakai— in tïtïdai.

¹¹ —Dai go gïï kïixi ix makïdï oidakatadai ïkioma dai xibi ka mai oidaga dai ix makïdï bhai otoma duakatumu ïpamu, ïgai ïr ïmo gïï dunukami ïpï dai ïr aduñdï go gaa kubarakami dudunukami. Ïgaikïdï kaxi mamaakuadukamu go dudunukami. Dai Diuxi gïgïbitulda agai ïgai bïïxkïrï bïïtarï— in tïtïdai.

¹² —Dai go aagaikïdï ix makïdï tïï aapi bhaibuxtama ïr ïmo maaxidaragai aagaitai bhaibuxtama gïgïrï dudunukami. Mai kia buiyi ïgai sïïrhikami dïï gia gokiïrioma gatïanïda agai ïgai. Ïmapi buimu ïgai sïïrhikami ïmadï go kïixi ix makïdï sudagiañdïrï busai dai ïmo gïï dunukami dukaikamu. Dïï gia tomarhi ïmadutai go gaa bhaibuxtama mai tïbïpi gatïanïda agai.

¹³ Ka bhai dui ïgai ñoki tudu dai otoma tïïgida agai gïn sïïrhikamiga go gïï kïixi xi ïgai buiyi agai. Go gïï kïixi bïïtarï tudu gaataduña agai go bhaibuxtama dudunukami ïgai— in tïtïdai.

¹⁴ —Daidi go bhaibuxtama gïgïrï dudunukami ïmadï go gïï sudagiañdïrï busaikïdï kïixi bui surhigi agai go Arhi Kañiru xi go Arhi Kañiru maitïmu. Ïgai tudu ïr adaama Tïanïdami dai adaama ïr Rey. Kaxkïdï maitïmu ïgai go bhaibuxtama gïgïrï dudunukami dai go kïixi. Dai odami ix makïdï Diuxi báí dai ïko darai dai ix makïdï mai dagitokai buaboitudai, uraba darakamu go Arhi Kañiru aidï kokodiïrï— in tïtïdai go Diuxi tïañikarudï.

^15-18 Daidi bhodïrï go Diuxi tïañikarudï oidi aatagidï dai pobai in tïtïdai, —Xibi gï aagidamu aanï ix tïiya ïrhidi gobai ix makïdï nïidi aapi— in tïtïdai. —Daiñi— in tïtïdai. —Gobai ix makïdï nïidi aapi ïr ïmo maaxidaragai dai naana maaxi aagai gobai. Dukami go oki kïkïïlmïrhiakami aagai ïmo gïï kiiki. Dai go gïï sudagi xako daama daja ïgai ïr bïïxi odami aipakoga oidagi daamaiñdïrï óídakami dai naana maaxi ñokadami ix makïdï tïanïi ïgai— in tïtïdai. —Dai go bhaibuxtama aagai ïr gïgïrï dudunukami. Dai ïgai ïmadï go gïï kïixi kïïdada agai go oki. Popoidamu ïgai buxtuidadï kïïdaitai dai mai yukusukami biamu dai asta ugimu tukugadï dai mïidamu. Podukai maakimu Diuxi tïgibudagai sai pobuadana ïgai go oki saidi podukai ïpï gï duna ixdukatai gï tïgitotadai Diuxi ïkioñdïrï. Diuxi maakimu tïgibudagai go bhaibuxtama gïgïrï dudunukami sai soiñana ïgai go gïï kïixi. Dai tïïgidamu ïgai gïn sïïrhikamiga go kïïxi ix makïdï bhïitadai ïgai dudunukamikatai. Podukai soiñamu ïgai asta xïïxkadï ukami bïïxi po gï duñagi ixdukatai ka ïkioñdïrï aagai Diuxi— in tïtïdai go Diuxi tïañikarudï. —Dai go oki ïr maaxidaragai go gïï kiiki soimaaxi ibuadami bïïtarï dai tïanïi ïgai bïïxi go gupudagai bipiakami ix makïdï oidaga tami oidigi daama— in tïtïdai.