Apokalipsis 16 - Northern Tepehuan Bible

Go Juan oja ïmo ñoki aagaitai go kubarakami ajasokorhi susudakami gïgïbidaragai

¹ Daidi bhodïrï kaï aanï ix gïgïrï ñokai ixtumaxi Diuxi kiupaigadïañdïrï dai ñokidi ïgai go kubarakami Diuxi tïtïañikarudï ix makïdï bia go ajasokorhi. Susudaga go ajasokorhi Diuxi bhamudadï dai gïgïbidaragai. Dai ix makïdï ñokai potïtïdai go tïtïañikaru, —Imibïrai dai mïï oidigi daama abïr aaxta go ajasokorhiañdïrï go bhamudagai dai gïgïbidaragai ix makïdï bia Diuxi óídakami bïïtarï— itïtïdai.

² Daidi jii go ïpïgadï tïañikarudï Diuxi dai oidigi daama aaxi go gïgïbidaragai ix makïdï ami asokorhidï ïrana daja. Dai mïï aaxi ïgai bai kabami oidi kabusurhi bïïxi go óídakami ix makïdï gïn tïpaltu go gïï kïixi tïpakarudïkïdï dai ix makïdï xadutudaiña go ubixi ix makïdï gatïjai go kïixi kïïsaragai.

³ Dai bhodïrï ïpï ïmai tïañikarudï Diuxi aaxi ix tumaxi asokorhiïrï biakatadai. Go gïï sudagiïrï aaxi ïgai bai ïrai gï nato go sudagi dai aramatu ïpïan dukai koidadï ïradï. Daidi koi bïïxi aïkatai go sudaïrï óídakami. Dai gokïdï kaxi gokadu go tïtïañikaru ix makïdï daitutadai gïgïbidaragai.

⁴ Dai bhodïrï ïpï ïmai tïañikarudï Diuxi aaxi ixtumaxi asokorhiïrï biakatadai ïpï. Bïïxi go akiïrï aaxi ïgai dai bapabikiïrï xajadïrï busanïi sudagi bai ami ïpï ïrai gï naato go sudagi.

^5-6 Daidi go Diuxi tïañikarudï ix makïdï tïanïi go sudagi potïtïdai Diuxi, —Aa gia sïïrhi aatabuayi aapi Diuxi. Mosïkaxi aapi tudu ïkobai daja soimaaxkamiañdïrï. Go oidigi daama óídakami aaxtaiña ïradï go buaboitudadami tudu ïmadï ix makïdï ïr gï ñokituldiadamiga. Dai xibi ka aa noraidi aapi go óídakami pomaaxi ibuadatai ïgai dai ïrai naatorhi aapi sudagi sai gobai yïïdagi ïgai xibi. Kïïga gïn ajïga ïgai xi podukai gïgïbituldagi aapi tudu. Gia sïïrhi aatabuayi aapi Diuxi— itïtïdai.

⁷ Dai kaï aanï ix ño ixtumaxi go daxdakaruañdïrï. Gïgïrï ño ïgai daidi ikaiti, —Aa gia ïr buaboi ix duu aagai go Diuxi tïañikarudï— ikaiti. —Aapi gïr Diuxiga dai Gïr Nukadakami, aapi bïïxi adaama ïr gubuakïdï dai kïï idui aapi dai podukai gïgïbiturhi go óídakami. Kïïga gïn ajïakatadai ïgai ix podukai taatagi gïgïbidaragai di— ikaiti go ñoki. Dai gokïdï kaxi baikadukatadai go tïtïañikaru ix makïdï daitutadai gïgïbidaragai.

⁸ Dai bhodïrï ïpï ïmai tïañikarudï Diuxi aaxi ixtumaxi bia asokorhidïrï ïpï sa bhai ïma dukai gïn tïtïgitoagi odami. Tasiana aaxi ïgai daidi go tasai bhïiyi gubukarhigai ix mïïdagi odami kabami toñikatai.

⁹ Kabami mïmïji tudu dïï modukai maiti ipïrhi odami xi ïma dukai gïn tïtïgitoagi dai aagagi xïïxi ïr gïdukami Diuxi. Dai bhaiyoma galkaiti ïgai buidïrï Diuxi aagaitai buirudagai ïgai bui. Kïïga maatïkatadai ïgai sai Diuxi gatïjaitadai gïgïbituldagi kaxkïdï. Dai gokïdï kaxi maakoadu go tïtïañikaru ix makïdï daitutadai gïgïbidaragai.

^10-11 Dai bhodïrï ïpï ïmai tïañikarudï Diuxi aaxi ixtumaxi biakatadai asokorhiïrï. Dai aaxi ïgai go daikaruana xako dakatai gatïanïiña go gïï kïixi ix makïdï sudagiañdïrï busai. Daidi tukamutu bïïxi aipakoga xako gatïanïi ïgai dai kabami kokotu go óídakami ix makïdï gatïanïi ïgai ïpï. Oidi iipoidagai kabami daidi go odami ïïgi gïn kïkïiyiña nïnïdï mos ïï kabami kokokatai. Dai bhakoi ïgai Diuxi bui go kokodagaikïdï dai xigarhi kaitiña ïgai bui aagaitai buirudagai. Mai ïma dukai gïn tïtïgito ïgai toma lïïchi dai bhaiyoma apia ïxi oidi soimaaxkamigadï. Dai gokïdï kaxi taamadu go tïtïañikaru ix makïdï daitutadai gïgïbidaragai.

¹² Daidi ïpï ïmai tïañikarudï Diuxi aaxi ixtumaxi biakatadai ïgai ïmo asokorhiïrï ïpï. Aaxi ïgai go gïï akiïrï Eufrates tïgidukïdï bai gakixa gobai. Pobï gï dui gobai sai ami gakikïrï dïgabununa go reyes xarhi utamajadïrï óídakami ïmadï sandadarugadï.

¹³ Dai tïï aanï baika diabora tïtïañikarudï ïpï dai arhiï galnaaxi ïgai. Ïpïamaaxi bhaabhadai. Dai bubuaka ïgai tïñidïañdïrï go gïï kooyi maaxkïdï kïixi dai tïñidïañdïrï go gïmai kïixi ïpï ix makïdï ïr bupuirumadami odami dai dïbïraiñdïrï busaitadai.

^14-16 Ix makïdï bubuaka tïñidïañdïrï go kïkïixi ïr diabora tïañikarudï tudu. Dai kïïga biakana gubukarhigai ïgai dai ibuadana naana maaxi maaxidaragai. Dai daibidiña ïgai bïïxi go gïgïrï tïtïanïdami oidigi daama óídakami dai ïmapidi xakoga Armagedón tïgidu oidigi Hebreokïdï. Ami ïmpagi ïgai dai abïnaki sai bui surhigïna ïmo gïï kokodiïrï Gïr Nukadakami, sai bui surhigïna ïgai Diuxi ix makïdï bïïxi adaama ïr gubuakïdï tudu. Dai aidï gïn ïmpaidakai ïgai todian dukai gïn ayimu gïgïbituldaragai Diuxiañdïrï. ¿Mai ix pokaiti Diuxi ojadïrï? Ami ikaiti sai, —Todian dukai ayimu aanï ïpïan dukai ïmo ïxibugami todian dukai ajïi ïmo kiiyïrï. Kaxkïdï bhai gïn ïldamu odami ix makïdï kïïga bhai gïn dukagi gin nïnïrakatai. Ix makïdï mai kosokatai gin nïnïrakagi tudu kïïga gïn aadatikatai yukuxi. Ïgai gia mai xaïradamu nïiditai jaa. Dïï gia ix makïdï mai bhai gïn dukagi dibiakai aanï gia xaïradamu— ikaiti go ojai. Dai gokïdï kaxi naadamikatadai go tïtïañikaru ix makïdï daitutadai gïgïbidaragai.

Ïmo tïañikarudï Diuxi aaxi ïmo asokorhiañdïrï go kugatïrï gïgïbidaragai

¹⁷ Dai bhodïrï go gïmai tïañikarudï Diuxi ïbïltapi aaxi ixtumaxi biakatadai asokorhiïrï. Daidi gï kaidatu ïmo gïï ñoki go kiupiañdïrï dai go gïï daikaruañdïrï daidi gïgïrï ikaiti, —Idikïdï kaxi gï kugaida agai go gïgïbidaragai— ikaiti.

¹⁸ Daidi pïpïdokïi oidigi aidï dai kopobïrhi. Dai sïïrhikïdï kabami gigiburhi oidigi ïpï. Mai nïidiña óídakami ix pokaxi gubuakami gigiburhiagi oidigi tomarhi ïmo imidagai aidï abhiadïrï xi kïïkiba oidigi tudu.

¹⁹ Dai go gïï kiiki Babilonia tïgidukïdï baikapïrï taatapai dai ïjïkobai bii mos ïï kabami gigiburhikai oidigi. Dai go gïgïrï kiiki aipako oidigi daama gukakïdï bïïxi surhi bhaabhakidï ïpï. Podukai gïgïbiturhi Diuxi go Babiloniïrï óídakami dai dagito ix kïïga taatana ïgai xïï kabami bhamuka Diuxi ïgai bui.

²⁰ Dai go aarhi dïdïbïrai ix makïdï sudagi ïrana guka bïïxi mai tiputa ïmadï bïïxi go tutubidakai ïpï. Mai tiputa ïgai bhamudagadïkïdï Diuxi.

²¹ Dai surhi tïayi ïpï kabami gïgïrdukami. Asta gokobhai kilo bïïtïkana ïïmoko dai maaji óídakami. Daidi go odami xigarhi kaitiña buidïrï Diuxi aagaitai buirudagai ïgai bui. Pokaitiña ïgai go tïayikïdï mos ïï bïïtïkatai gïgïbidaradï. Dai gokïdï kaxi kubarakamikatadai go tïtïañikaru ix makïdï daitutadai gïgïbidaragai.