Apokalipsis 14 - Northern Tepehuan Bible

Go Juan oja ix tumaxi tïï ïgai tïïtïkiïrï dukai. Tïï ïgai ïmo ciento dan gokobhai dan maakoba mirhi odami ix makïdï aagaiña ixtumaxi ïr buaboi

¹ Dai bhodïrï tïï aanï go Arhi Kañiru agaikïdï xi kïïka go gidiana xako Sión tïgidu gidi. Dai ïmadï gukatadai mui odami ix makïdï kokobadïrï ojixi tïtiaradï go Arhi Kañiru dai tïtiaradï Ogadï ïpï. Ïmo ciento dan gokobhai dan maakoba mirhikatadai ix makïdï ami guka.

² Daidi kaï aanï xi tïbagiañdïrï ño ixtumaxi dai ïpïan kaiti xïxkadï gïï mïradagi sudagi dai kobondan kaiti go ñoki ïpï. Kïï xigian kaiti ïpïan kaiti xïïxkadï mui odami gaiibadagi arpa.

³ Ami gukatadai ïgai go Arhi Kañiru ïmadï tudu dai ganïyitadai ïmo nïidagai utudui ami buidïrï xako daja Diuxi go gïï daikaruana. Dai ami gukatadai go maakoba duduakakami ixtumaxi ïpï ïmadï go bhaitï gukakami dai kaïkana go nïidadï. Ïmo ciento dan gokobhai dan maakoba mirhikatadai go nïdami ami tudu dai ïgai ïr kïïgakïrï bubaidadï go Arhi Kañiru. Go nïdami ïr odami ix makïdï sabïrhitadai go Arhi Kañiru go gaa óídakami saagidañdïrï. Dai ïgai tudu ganïyiña ami Diuxi buidïrï dai jaa maiti ixtutuidikïiña xi maatiagi go nïidadï.

⁴ Go nïdami ïgai ïr kïkïïrhi ix makïdï mai ïmadï dïgabusai oki dai kïï buañixikatadai ibhïadï. Kïïga ïïgidiña ïgai go Arhi Kañiru dai aipakoga oidiña. Ïgai ïr Diuxi ïkobai bubaidadï tudu ix makïdï Diuxi sabïrhi go gaa óídakami saagidañdïrï go Arhi Kañiru ïradïkïdï. Go nïdami ïgai ïr daxdaragai dukai ïpï ïpïan dukai go daxdaragai ix makïdï ibuadana aatïmï judidiu. Aatïmï xïïxkadï gayoba agadagi gïr ïxi ibuadana aatïmï daxdaragai Diuxi bïïtarï tudu. Dadaxdiña aatïmï Diuxi go gïr ïxi ibhiadï ix makïdï ïpïgioma yoobagi aatïmï dai ix makïdï bamioma kïkïïgadu. Pomaaxi go kïkïïrhi ïgai. Ïmo daxdaragai dukai ïgai Diuxi bïïtarï kïï buañixikatai ïgai dai ïko darakatai ïgai Diuxi bïïtarï.

⁵ Kïïga mai yaatabogakana ïgai dai mai tipukatadai ixtukïdï gïpiïrï bupadagi jaa.

Go Juan tïï baika Diuxi tïtïañikarudï otïrhi iimïdami

⁶ Dai bhodïrï tïï aanï ïmo Diuxi tïañikarudï xi tïkabi tïbagiañdïrï daigigi. Mïkadïrï imïdami ïgai dai aitulda agai ïmo bhai ïrhiaragai ñoki go óídakami oidigi daama. Aitulda agai go ñoki bïïxi go naana maaxi ñokadami ix makïdï bïïxi aipakoga oidaga oidigi daama tudu. Dai go ñoki ix makïdï aagai ïgai bïïxkïrï bïïtarï kïïgaduka agai.

⁷ Dai gïgïrï ñokimi aagaitai sai, —Xadutuadabïrai Diuxi mos ïï gïdukatai ïgai. Dai abïr aagada xïïxi ïr gïdukami ïpï. Karhioga ayi ix tuigako Diuxi maakiagai gïgïbidaragai soimaaxi ibuadami tudu. Dai kaxkïdï abïr oigïda ñokada Diuxi bui aagaitai xïï kïï tuiga. Ïgai tudu idui tïbagi dai oidigi dai go gïgïrï susudagi dai asta bïïxi go bapabiki xajadïrï busanïi go sudagi. Bïïxi aïkatai idui ïgai tudu kaxkïdï gï agai xi odami xadutuadagi ïgai— ikaitimi go Diuxi tïañikarudï.

⁸ Daidi gokiïrï imïi ïpï ïmai tïañikarudï Diuxi dai idi gïgïrï ñokai ïpï daidi ikaitimi, —Ka xia tui go gïï Babilonia kiiki. Ami óídakami gia pupuirugakana. Sïïrhikïdï ojoidi ïgai xi adaimudagi soimaaxi dai abïnakidiña odami bïïxi apakoga oidigi daama óídakami sai urabana soimaaxi ibuadatai. Ïpïan buadana ïgai ïmo iitïrakami xïxkadï abïnakidada ïgai jaa sai soiña yïïdana iidagai— ikaitimi ïgai.

^9-10 Dai gokiïrï imïi go kugatïrï tïañikarudï Diuxi dai ïgai gïgïrï ñokai ïpï daidi ikaitimi, —Diuxi kabami gïgïbitulda agai xorai xadutuadagi go gïï kïixi xiïpï go ubixi ix makïdï ïpïamaaxi go kïixi. Gïgïbituldamu ïgai xorai gï dagitoagi xi gï tïpaltudagi kobadïrï xiïpï ïkadïrï. Diuxi soimaaxi taatamitulda agai ïgai kabami bhamukatai ïgai bui. Kïïga taatamu ïgai Diuxi bhamudadï tudu. Dai Diuxi bhamudadï mai biïna imimu toma lïïchi bhai ïrhiaragai aidï. Ïpïan taadakamu gobai xïïxkadï ïmo odami biakagi ix iiyagi ïmo iidagai kabami xibukami mai bïnaidikami toma lïïchi yoobikami. Kïïga taatamu ïgai Diuxi bhamudadï tudu. Diuxi soimaaxi taatamitulda agai táíkïdï dai asufre mïjïdamikïdï. Dai Diuxi tïtïañikarudï ïmadï go Arhi Kañiru bïïxi nïijadamu.

¹¹ Ami xako soimaaxi taatamitulda agai ïgai mos apia kubhusai bïïxkïrï bïïtarï. Dai ami mai tipu ibhïxtaragai. Apia imïdamu gïgïbidaradï bïïxkïrï bïïtarï tudu. Po maaxi ïgai bïïtarï ix makïdï xadutuadagi go kïixi xiïpï go ubixi ïpïamaaxkami go kïixi dai xorai gïn dagitoagi ix tïpaltudagi ïpï tïtiaradïkïdï xiïpï numerogadïkïdï— ikaitimi. Podukai aiturhi ñoki tïañikarudï Diuxi go óídakami aipakoga oidigi daama.

¹² Dai go buaboitudadami óídaga saagida go gaa ix makïdï xadutudai go kïixi dai kaxkïdï gï agai buaboitudadami xi bhai gïn dukagi dai gïn kabakadagi sai mai dagitokai ïïgiada ïgai Diuxi dai sai apia buaboitudada ïgai Suxi Kristo.

¹³ Daidi kaï aanï xi ño ixtumaxi tïbagiañdïrï daidi pobai in tïtïdai, —Iduindañi ïmo ojai dai adukai oja, —Xibi bhaitiakoga kïïga bhai gïn ïrhiadamu odami ix makïdï koiyagi bïïna darakatai Suxi Kristo, podukai oja aapi— antïtïdai. Dai Diuxi Ibhïadï ikaiti, —Ïjï kïïga ïr buaboi gobai. Ix makïdï koiyagi bïïna darakatai Suxi Kristo kaxi gïn iibhïxta agai. Ka mai tipukamu bïïtïkami aaduindagai ïgai bïïtarï. Kaxi aatadui ïgai tudu dai buimu ïgai go aaduindagai maitïkidï. Ka maiti gï agadamu bamioma aaduindagai tudu— ikaiti Diuxi Ibhïadï.

Go Juan nïidi sai odami ïr Diuxi ïïxidï tïrhigi dukai dai ïïxidï uba dukai ïpï dai ayimu ixtuigako yoobamu Diuxi

¹⁴ Dai bhodïrï tïï aanï ïmo ikomai tojakami dai ami ikomai daama dajatadai ïmoko dai ïpïamaaxi go ix makïdï kïïgakïrï odami busai. Modïrï kïïsaka ïgai ïmo oro korona dai ïkadïrï dagïi ïmo os kïï mukakami.

¹⁵ Daidi busai ïmo Diuxi tïañikarudï Diuxi kiupaigadïañdïrï ix makïdï tïbagiana kïïka dai gïgïrï iñakidi ïgai go kïïrhi ikomai daama dakïdï daidi potïtïdai, —Ka bhaji ïxikami oidigi daama— ikaiti. —Ka ayi kaduku xi gï aga yoobagi aapi. Yoobañi gï oskïdï tudu— ikaiti.

¹⁶ Daidi go makïdï ikomai daama daja gï aga yooba ïïxidï go oskïdï bïïxi oidigi daamaiñdïrï.

¹⁷ Daidi busai ïpï ïmo Diuxi tïañikarudï Diuxi kiupaigadïañdïrï dai bhïkati ïmo os kïï mukakami ïpï.

¹⁸ Dai oidakatadai ïpï ïmai tïañikarudï Diuxi ïpï ix makïdï tïanïi go táí. Dai busai ïgai go daxdakaruañdïrï xako gï dadasai go daxdaragai dai gïgïrï iñakidi ïgai go os biakami daidi potïtïdai, —Go oidigi ïr ïmo uba dïïdï dukai dai ka kïï bhaji ibhiadï. Kïïga mukaga gï os tudu, yoobañi gokïdï— ikaiti.

¹⁹ Dai go Diuxi tïañikarudï ix makïdï bia go os gï aaga yooba go uba ïxikami bïïxi oidigi daamaiñdïrï. Yooba ïgai dai ïmo gïï pilana tua. Go pila ïr ïmo maaxidaragai aagaitai Diuxi bhamudadï bhamukatai ïgai soimaaxi ibuadami bui. Dai go uba ïr ïmo maaxidaragai dukai aagaitai óídakami.

²⁰ Ïmo gïï kiiki maigobai kidigamadïrï kïïka go pila dai ami ïrana tuiyi ïgai go uba bai abhai pilañdïrï busai baragadï. Go baragadï ïr ïmo maaxidaragai odami ïradï bïïtarï ix makïdï taata gïgïbidaragai bhamukatai Diuxi ïgai bui. Gïïpi mïï ïradï tudu gïgïbaitai Diuxi. Ajïi gobai kapayo kuxibodïana ukami dai parï baika ciento kilometro abhiadïrï pilañdïrï kia mïraiña.