Apokalipsis 13 - Northern Tepehuan Bible

Go Juan tïïtïkiïrï dukai tïï xi go gïï sudagiañdïrï busai ïpï ïmo gïï kïixi

¹ Dai bhodïrï tïïtïkiïrï dukai tïï aanï ïpï ïmo ixtumaxi. Tïï aanï xi go gïï sudagiañdïrï busai ïmo gïï kïixi kubarakami momokami dai bhaibuxtama aagakami. Dai gï kïsaka ïgai ïïmo arhi korona bïïxi bhaibuxtama aagadïrï. Dai momodïrï ojixi kubarakami tïtiaradï dai go tïtiaradï ïr parunaragai Diuxi bui.

² Ïmo dïdïbïrhi maaxi go kïixi dai taataradï ïpïamaaxi boji taataradï dai usudï ïpïamaaxi mabidi. Gubuakami dukai gatïanïiña ïgai aipakoga dai go gïmai kïixi ix makïdï gïï kooyi maaxi namïaturhi sïïrhikamigadï dai mamaakaiña gubukarhigai ixtukïdï gatïanïda ïgai.

³ Dai tïgito nïidi aanï ïmo modï go kïixi kubarakami momokami ix makïdï sudagiañdïrï busai dai nïidi aanï sai ïmo modï saasakika maaxi. Mai dodiada maaxi muraidikatai. Dai tomax dukai bïïxkïrï duayitadai ïgai ïpamu. Dai bïïxi aipakoga oidigi daama óídakami nïidiña ix pomaaxi ïgai dai mai tïtïgaiña ix dukatai gïn tïtïgitoagi nïiditai. Dai buaboitudaiña ïgai go kïixi dai xadutudaiña pobïnïrhiditai ix ïr ïmo gubuakami.

⁴ Dai xadutudaiña ïgai go gïmai kïixi ïpï ix makïdï kooyi maaxi maakakai ïgai mos ïxi gubukarhigai go kubarakami momokami. Pokaitiña ïgai sai, —Xorai ixtutuidïna idi kïixi bui— ikaitiña. —Mai tipu xorai ïpïan ïxi gubuakagi— ikaitiña aagaitai go gïï kooyi maaxkami kïixi.

⁵ Dai Diuxi maa oigaragai go kooyi ix naana maaxi aagaiña. Dagito Diuxi xi galnaxi ñokada ïgai Diuxi buidïrï tudu ïmo gïdukami gï aagaitai ïïgi. Dai Diuxi dagito sai oijada ïgai aaduindadï baika umigi dan tajukami.

⁶ Naana maaxi galnaaxi ñoki aagai go gïï kïixi tudu aagaitai Diuxi dai aagaitai tïtiaradï dai aagaitai ïpï oidagadï go tïbagiïrï óídakami. Galnaaxi ñoki aagai ïgai aagaitai tïbagiïrï óídakami tudu. Ami óídakami ïmadï oidaga Diuxi kaxkïdï.

⁷ Dai Diuxi maa oigaragai go kïixi xi bui gïxiagi ïgai Diuxi aaduñdï dai sai maitïna. Dai Diuxi maa oigaragai ïpï xi tïanïda ïgai bïïxi go naana maaxi ñokadami ix makïdï oidaga oidigi daama.

⁸ Dai bhaitoma bïïxi oidigi daama óídakami xadutuada agai go kïixi Diuxi dukai. Dïï gia go odami ix makïdï ojixi go libroïrï ix makïdï bia go Arhi Kañiru ïgai gia mai xadutuada agai go gïï kïixi. Go Arhi Kañiru ïgai makïdï gï muatu dai bia ïmo libro xako ojixi odami ix makïdï bïïxkïrï bïïtarï óídaka agai. Aidï abhiadïrï xi mai kia kïkibatadai oidigi biakana ïgai go libro tudu. Dai odami ix makïdï ojixi ami libroïrï gia mai xadutuada agai go gïï kïixi.

⁹ Kïïga abïr gïn tïgito kaïka idi ñoki.

¹⁰ Daiñi, ka podukai dáí Diuxi sai ïgai aa noraidamu odami ix makïdï soi buidadagi buaboitudadami. Diuxi maixatuda agai xorai gamaixagi dai xorai gakodagi maxtaikïdï podukai biakamu xi mukiagi ïpï. Ka podukai dáí Diuxi kaxkïdï. Dai kaxkïdï gï agai xi buaboitudadami gïn kabakadagi dai apia buaboitudadagi tomaxi soi buidadagi jaa. Kïïga gï maatï sai Diuxi aa noraidamu ixtumaxi idui ïgai kaxkïdï.

Go Juan oja ïmo ñoki aagaitai ïpï ïmo gïï kïixi ix makïdï dïbïrai utamajadïrï busai

^11-12 Dai bhodïrï tïïtïkiïrï dukai tïï aanï ïpï ïmo kïixi ix makïdï dïbïrai utamajadïrï busai. Dai ix makïdï tïï aanï gokadu aagadï ïpïandukai kañiru dai ïpïamaaxi ñokai go gïmai kïixi ix makïdï muraiditadai dai duayi. Dai idi kïixi ix makïdï dïbïriañdïrï busai gaatabuadana go gïmai kïixi bïïtarï ix makïdï gï muraiditadai modï dai duayi. Ix makïdï duayi maakaiña gubukarhigadï tudu. Dai go gubukadakïdï tïanïiña ïgai bïïxi óídakami sai xadutuadana go gïmai kïixi ix makïdï duayi.

¹³ Idi kïixi ix makïdï aagai aanï ibuadana naana maaxi maaxidaragai buitapi go gïmai kïixi ix makïdï duayi sai buaboitudaiña odami nïiditai. Asta tïanïiña ïgai táí sai gïsïna tïbagiañdïrï.

¹⁴ Diuxi maa ïgai oigaragai saidi ibuadana maaxidaragai podukai dai bupuirumadaiña ïgai bïïxi oidigi daama óídakami ibuadatai naana maaxi maaxidaragai ami buitapi go kïixi ix makïdï ka duayi. Dai tïjai ïgai óídakami saidi ibuadana ïmo ubixi ïpïamaaxkami go kïixi ix makïdï gï muragi dai duayi. Po buadana ïgai ipïrhiditai xi odami xadutuadagi ïgai.

¹⁵ Daidi idunakai ïgai go gïï kïixi maaxkïdï ubixi sai go kïixi ix makïdï gatïjai duñaragai biatu oigaragai dai gubukarhigai xi duakaltudagi go ubixi dai ñokitudagi. Dai ix makïdï tïjai duñaragai go ubixi biakatadai oigaragai ïpï xi gatïanïda kodaragai bïïxi óídakami ix makïdï mai xadutuadagi go ubixi.

^16-17 Dai go kïixi ix makïdï dïbïrai utamajadïrï busai gatïjai ïpï tïpaltudagi bïïxi óídakami kokobadïrï xiïpï ïïkadïrï. Tïpaltu ïgai tïtiaradïkïdï go kïixi ix makïdï sudagiañdïrï busai. Tïtiaradïkïdï go kïixi ix makïdï duayitadai tudu xiïpï numerogadïkïdï. Tïpaltu ïgai bïïxi óídakami tudu, modukai arhi dai gïïgïr óídakami dai soititigami ïmadï gïn bipidakami. Tïpaltu ïgai bïïxkatai. Dai gatïjai ïgai sai mosïkaxi gïn tïpaltudakai óídakami biakagi oigaragai ix gasabïadagi xiïpï xi gagaagarïdagi ixtumaxi. Gï agaitadai xi gïn tïpaltudagi ïgai tïtiaradïkïdï go gïï kïixi tudu xiïpï numerogadïkïdï.

¹⁸ Dai numerogadï ïr naadami ciento dan baikobhai dan naadami. Gï agai xi kïï sïïrhi gï tïgitokagi ïmoko dai maatï kaïkagi ix tïiya ïrhidi numerogadï go gïï kïixi omarhigakïdï. Numerogadï gobai ïr ïmo odami numerogadï tudu.