Apokalipsis 12 - Northern Tepehuan Bible

Tïïtïkiïrï dukai tïï Juan ïmo oki nonoakami ix makïdï karhioga duayitadai dai tïï ïgai ïmo kïixi ix makïdï ïr bui kaatïkamigadï go oki

^1-2 Dai bhodïrï tïï aanï xi tïbagiana gï maaxitu ixtumaxi ix makïdï odami mai nïidiña. Gï maaxitu ïmo oki nonoakami dai masadai daama kïïka dai go tasa gï bhixaka ïgai yukuxidï dukai. Dai gï kïïsaka ïgai ïmo korona ix makïdï bia bhaibuxtama dan goka xixabugai. Dai gïgïrï aijiïgïi ïgai kokokatai karhioga buapa agaitai ïmo arhi odami.

³ Dai bhodïrï tïbagiana gï maaxitu ïpï ïmo ixtumaxi ix makïdï odami tomarhi ïmo imidagai mai nïidiña. Gï maaxitu ïmo gïï kïixi omarhigami dai bïgikami tudu kubarakami momoakami. Momodïrï gï kïïsaka ïgai kubarakami arhi korona dai bia bhaibuxtama aagadï ïpï.

⁴ Dai nïidi aanï xi bhajidïkïdï bui ïgai bhaitoma tajukami go xixabugai tïbagiana dai oidigi daama surhi. Dai bhodïrï buidïrï kïkiba ïgai go oki nonoakïdï. Nïnïraka ix busiagi go arhi odami dai ugiagai.

⁵ Daidi bua go oki ïmo arhi gïrhi ix makïdï kïï gubuakami dukai tïanïda agai bïïxi oidigi daama. Dai otoma baidaja Diuxi ïgai tïbagiamu xako go gïï daikarui daama dakatai gatïanïi Diuxi.

⁶ Daidi go oki daibuna mïï oidigamu dai ayi ïmapïkïrï xako ka bhaiduitadai Diuxi ïgai bïïtarï sai ami nukadakana Diuxi baika umigi dan tajukami.

⁷ Dai bhodïrï oidatu ïmo kokodi tïbagiana. Go Diuxi tïañikarudï Migirhi tïgidukïdï ïmadï jaa mui Diuxi tïtïañikarudï bui surhi go gïï kïixi omarhigami dai modukai tïtïañikarudï ïpï.

⁸ Dai go gïï kïixi ïmadï tïtïañikarudï maiti ixtui Diuxi tïtïañikarudï bui dai ka mai bhaigakatadai xi ami biiyagi tïbagiana.

⁹ Daidi Diuxi maigo surhi go gïï kïixi tïbagiañdïrï modukai tïtïañikarudï. Podukai bhaigobai oidigi daama surhi go kïixi ix makïdï diabora tïgidu dai satanás tïgidu ïpï. Ïgai tudu ïr go gïï kooyi agaikïdï ix makïdï ïki abhiadïrï ajiopaiña tami oidigi daama dai bupuirumadaiña óídakami. Tami oidigi daama gï surhitu ïgai tudu ïmadï modukai tïtïañikarudï maitïkai Diuxi tïtïañikarudï ïgai bui.

¹⁰ Daidi bhodïrï kaï aanï ïmoko ix makïdï gïgïrï iñakimitadai tïbagiana daidi ikaiti, —Xibi gia ka kïïgakïrï bubuaka Diuxi maamaradï. Ka busaitu Diuxi go diabora tïbagiañdïrï tudu dai ka mai bia ïgai oigaragai xi ami aiyagi xako daja Diuxi. Podukai mamaaxidi gïr Diuxiga xïïxi ïr gubuakami ïgai dai sai adaama gatïanïi ïgai. Podukai mamaaxidi ïgai ïpï sai Suxi Kristo ix makïdï ïr Diuxi dasadï Gïr Nukadakami ka bhïiyi agai sïïrhikamigadï. Ka bubaitu ïgai go diabora tïbagiañdïrï di. Go diabora tudu ïgai dai mïï kïakana Diuxi buitapi dai mai dagitokai gïpiïrï gïr bupaiña. Gïpiïrï bupaiña buaboitudadami tudu.

¹¹ Dai go buaboitudadami maitï go diabora mukukai go Arhi Kañiru agaikïdï dai aaxtakai ïgai ïradï ïmo daaxdaragai dukai. Ga maitï ïgai buaboidaitai go bhai ïrhiaragai aatagi. Gobai ïr ï galbaaxi aatagi ix makïdï bïïxi aipakoga aagaiña ïgai tudu. Dai mai buamï ïrhidiña ïgai tomaxi jaa kodaiña buaboidaradïkïdï.

¹² Gia bhai ïrhiaraga gobai tudu. Asta go Diuxi tïtïañikarudï bïïxi bhai gïn ïrhidiña nïiditai sai go buaboitudadami mai buamï ïrhidi tomaxi jaa kodagi kïïga buaboidaitai ïgai. Dïï gia xibi gï busaitu go diabora tïbagiañdïrï dai ka ayi oidigi daama óídakami saagida. Dai sïïrhikïdï bhamu maatïkatai sai ka mai xii tïbïpi bhaigakamu xi gaatabuadagi. Kabami bhamu ïgai tudu xi kaxkïdï sogigi bïïxi go oidigi daama óídakami dai go sudagiïrï óídakami ïpï— ikaiti go makïdï gïgïrï ñokai tïbagiana.

Go gïï kïixi omarhigami kïïdai go oki dai mua ïrhidi

¹³ Dai aidïxi maatï tïï go gïï kïixi omarhikïdï sai Diuxi ka daitutadai oidigi daama sai bhodïrï aadaji ïgai go oki ix makïdï maaratadai ïmo arhi gïrhi.

¹⁴ Dïï gia Diuxi aanatu go oki ïmo gïï bhagai dukai dai daa ïgai dai daibuna jii oidigamu. Ami ayi ïgai ïmapïkïrï xako bhaiduitadai Diuxi ïgai bïïtarï. Dai ami nukagi Diuxi baika umigi dan tajukami. Mai bhaigakatadai go gïï kïixi kooyi maaxkami xi aiyagi ami.

¹⁵ Xi kaxkïdï go kooyi gïïpi aaxi sudagi tïñidïañdïrï sa bhai ïgaikïdï biñana go oki.

¹⁶ Dïï gia go oidigi soi go oki dai gïï tapai xi ami baa go sudagi ix makïdï busaitadai go gïï kooyi tïñidïañdïrï.

¹⁷ Xi kaxkïdï bamioma bhamu go kooyi mai aïkai go oki dai jii dai kokoda agai maamaradï go oki. Maamaradï go oki ïr go odami ix makïdï ïïgidi Diuxi dai mai daadagitoi Suxi Kristo ñokidï. Ïgai buidïrï tudu kokoda agai go gïï kooyi.

¹⁸ Mar ugidana kïakatadai go gïï kooyi aidï ka kokoda agaitai ïgai go oki maamaradï.