Apokalipsis 11 - Northern Tepehuan Bible

Go Juan aagai ïmo ñoki aagaitai goka ojotosadï Diuxi ix makïdï aitulda agai ïmo Diuxiañdïrï imïdami ñoki go odami

¹ Bhodïrï ïmadutai ix makïdï ami dakatadai gin maa ïmo bougïadï ïpïabidakarui bïïtarï daidi bhodïrï pobai in tïtïdai Diuxi, —Ïpïabidañi gin kii ïmadï go daxdakarui ami kïakïdï ix makïdï ïr ïmo daxdakarui bïïtarï dai ïkaldañi go odami ix makïdï gin xadutudai ami.

² Dïï gia maiti ïpïabida kidigamadïrï go kii. Maiti ïpïabida tuixikigadï tudu. Gobai ïkobai bimu dai dagitomu aanï xi go gaa óídakami ix makïdï maiti ïr judidiu galbuadagi ami gatïanïitai ïgai ami. Ga tïanïdamu ïgai baika umigi dan tajukami ami gin tuixikigana dai bïïxi tukurhimadamu ïgai.

³ Go Jerusalen ïgai daidi ïr gin tuixiki dukai tudu dai dagitomu aanï xi ïmo mirhi dan goka ciento dan baikobhai tasai gatïanïdagi go mai judidiu ami. Dïï gia otosamu aanï goka kïkïïrhi dai maakimu aanï gubukarhigai sai aagana gin ñoki ami. Dai ix xïïki tasai gatïanïdagi go gaa odami ix makïdï maiti ïr judidiu ami Jerusalenïrï po kaaki tasai maakimu ñoki gin ojotosa. Dai gin ojotosa soi gïn ïrhiadamu nïiditai ixtuma buayi go mai judidiu ami dai gïn aadatikamu ïgai soimaaxi yukuxi kostarhi duñixikami soigamukatai— in tïtïdai Diuxi.

⁴ Daiñi, ïmo Diuxi ñokituldiadamigadï pokaiti ïïki sai Diuxi buitapi guka goka uxi olibo dai goka kukudakarui. Dai ï goka uxi olibo ïmadï ï goka kukudakarui ïr maaxidaragai ï goka ojotosadï Diuxi bïïtarï ix makïdï Jerusalenïrï aitulda agai ïmo ñoki Diuxiañdïrï.

⁵ Dai sïïrhikïdï gupuka agai ïgai dai mai bhaigakamu odami xi kodagi. Ix koda ïrhiada ixtumaxi ïgai mos buxtamu táí tïñidïkïdï dai kodamu buidïrï bïïtïkamigadï. Podukai táíkïdï gï agadamu xi koiyagi xorai soi buada ïrhiada ï goka ojotosadï Diuxi.

⁶ Dai ix xïï tïbïpi ñokadagi ïgai Diuxi bïïtarï po kaxi tïbïpi biakamu ïgai gubukarhigai ix sobhidagi duki xi mai dudukiagi oidigi. Dai biakamu ïgai gubukarhigai ïpï xi tïanïdagi sudagi sai ïrai gï natona. Dai bhaigakamu ïgai xi naana dukai soi maaxi taataturhiadagi tomax makïdï óídakami xïïxkadï ipïrhiadagi ïgai.

⁷ Dïï gia xïïxkadï ka naato aagagi ïgai go ñoki Diuxiañdïrï imïdami bai go gïï tukabakami dïgaiñdïrï busaimu go gïï kïixi omarhikïdï. Bui gïximu ïgai ï goka ojotosadï Diuxi dai maitïmu. Kodamu ïgai ami Jerusalenïrï.

⁸ Ami tudu ïr xakoga Sodoma dai Ejipto aagaiña odami mos ïï soimaaxi ibuadamikatai óídakami. Ami Jerusalenïrï gï xixatu kuruxiana Gïr Nukadakami tudu. Dai ami apia dukai kayana bïïtïkamu tukugadï ï goka ojotosadï Diuxi baika tasai dan tajukami.

⁹ Dai bïïxi aipadïrï óídakami nïijadamu tukugadï ami. Bïïxi aipadïrï go gïgïrï kiikiañdïrï óídakami ix makïdï ïr naana maaxi ñokadami bïïxi nïijadamu tukugadï ix ami bïïtï baika taasai dan tajukami dai mai dagitomu ïgai xi gïn yaasatudagi.

¹⁰ Kabami soi maaxi taatamiturhiña go Diuxi ojotosadï go óídakami ix makïdï mai buaboitudai xi kaxkïdï bhai gïn ïjïldamu óídakami kokai ïgai dai ibuadamu bagimi dai asta gïn oidada agai oidaragai aipakoga bhai gïn ïrhiditai.

¹¹ Dïï gia nïidi aanï tïïtïkiïrï dukai sai baika tasai dan tajukami abhiadïrï xi koi ï goka ojotoxikami bai Diuxi duduakaturhi dai ïpamu ibhïiba gukiba ïgai. Dai mui odami nïiditadai dai kabami duduadimu.

¹² Dai bhodïrï ï goka ojotoxikami kaï ix gïgïrï kaiti ïmo ñoki tïbagiañdïrï daidi ikaiti, —Gimibïrai bhaigobai— ikaiti. Dai tïbagiamakoga iji ïgai ïmo ikomai saagida dai buidïrï bïïtïkamigadï mos tïïgigimi.

¹³ Dai taiyako iimïkai ïgai bai kabami gigiburhi oidigi dai mui surhi bhaabhaki. Parï bhabaixtama surhi ïïmo ciento saagidañdïrï dai kubarakami mirhi óídakami koi. Dai go odami ix makïdï bii sïïrhikïdï duduadimuka dai aagaiña xïïxi ïr gïdukami Diuxi gatïanïitai ïgai tïbagiañdïrï.

¹⁴ Podukai daibusai ïpï ïmo soi ïrhiaragai dïï gia otoma ayi agai ïpï ïmai kia.

¹⁵ Dai bhodïrï tïïtïkiïrï dukai tïï aanï xi iba go kugatïrï tïañikarudï Diuxi trompetagadï. Taidi gïgïrï ñiño ixtumaxi tïbagiana daidi ikaiti, —Xibi gia ka ayi xi tami oidigi daama gatïanïdagi Diuxi Gïr Nukadakami ïmadï Kristo ix makïdï ïr Diuxi dasadï rey. Xibi ka bhïiyi ïgai sïïrhikami xi tïanïdagi bïïxkïrï bïïtarï— ikaiti.

¹⁶ Daidi go ïmokobhai dan maakoba bhaitï gukakami ix makïdï Diuxi buitapi daraja bïïxkatai xadutudai Diuxi buidïrï kuikïskïitai.

¹⁷ Daidi ikaitiña ïgai, —Gia bhai gïr ïrhidi aatïmï aapikïdï gïr Diuxiga dai Gïr Nukadakami. Aapi ïgai dai adaama ïr gubuakami dai aapi bïïxkïrï oidakaiña dai bïïxkïrï bïïtarï oidaka agai. Dai xibi ka bhïiyi aapi gï sïïrhikamiga dai kaxi gï aaga gatïanïi aapi. Kaxkïdï bhai gïr ïrhidi aatïmï.

¹⁸ Go odami ix makïdï gï buidïrï bïïtïkana bhakoikana gï bui aapi Diuxi. Dïï gia xibi ka ayi xi aapi gïgïbituldagi bhamukatai aapi ïgai bui. Xibi aagamu aapi ix tumaxi ajiagai koidadï. Dai xibi ka ayi xi naato kodagi aapi bïïxkatai ïgai ix makïdï soi buadana óídakami oidigi daama dai kodaiña. Dai xibi maakimu aapi ïmo kïïgadukami maitïki gï ñiñokituldiadamiga gï pipioñigakatai ïgai. Dai podukai ïpï maakimu aapi ïmo kïïgadukami maitïki bïïxi go buaboitudadami ix makïdï gï xadutudai. Bïïxkatai ïgai maakimu aapi maitïkidï mai xudu ix maiti ïr gatïanïdamikagi ïgai xi gïgïrï gatïanïdamikagi ïpï bïïxkatai tomax dukai buimu maitïkidï. Kaxkïdï bhai gïr ïrhidi aatïmï aapikïdï gïr Diuxiga— ikaitiña go bhaitï gukakami ami tïbagiana.

¹⁹ Daidi tïï aanï xi gï kupioka Diuxi bakidï ix makïdï tïbagiïrï kïïka. Dai ka maaxi kïïka ami ïrana go kajoñi xadutudikïdï xako bhai dasaka go ñoki ix makïdï bhaiduitadai Diuxi odami ïmadï. Daidi mos kupiokai Diuxi bakidï bai kabami bïpïdorhi oidigi dai kokobïrhi dai gigiburhi dai gïïpi gïi tïayi.