Apokalipsis 10 - Northern Tepehuan Bible

Ïmo tïañikarudï Diuxi kïï gubuakami tïbai tïbagiañdïrï dai maa ïgai go Juan ïmo arhi libro dai potïtïdai sai Diuxi ka nato agai aaduindadï

¹ Dai bhodïrï tïïtïkiïrï dukai tïï aanï xi tïbagiañdïrï tïbandimi ïmo tïañikarudï Diuxi kïï gubuakami. Ïmo ikomaiñdïrï imïi ïgai dai modï daama kïïka ïmo kijondarhi. Dai buibasodï kabami kukudakïi ïpïan dukai tasai dai ïïkasodï ïpïamaaxi táí.

² Dai ïkadïrï bhïkati ïgai ïmo arhi libro bhibhiobidikami ix makïdï ka kupiokiñitadai dai kïkiba ïgai tami oidigi daama. Dai ïkasodï sïïrhixapadïrïkïdï kïixora go gïï sudagi dai go gïmai ïkasodïkïdï gakikïrï kïixora dïbïrai.

³ Dai gïgïrï iiña ïgai, ïpïan kaiti ïmo gïï mabidi xïxkadï kujudagi dai bhodïrï kubarakamioko kokobïrhi oidigi dai aa noraidan dui ñokidï go Diuxi tïañikarudï.

⁴ Kubarakamioko kokobïrhi tudu aagaitai ïmo ñoki dai aanï oja iñagaitadai ix kaiti ïgai dïï kaï aanï ïpï ïmai ñoki tïbagiañdïrï dai pobai in tïtïdai, —Maiti oja ix kaiti go kobondami. Maiti gï agai xi odami maatïkagi gobai— in tïtïdai go tïbagiañdïrï ñokadami.

^5-6 Dai bhodïrï go tïañikarudï Diuxi ix makïdï tïïtadai aanï ix gokapïrï kïixaka sudagi daama dai dïbïriana táí bañigi ïkadï sïïrhixapadïrï daidi ikaiti, —Diuxi ïgai dai idui go tïbagi dai go oidigi dai go gïï sudagi ïmadï bïïxi aïkatai ixtumaxi oidaga ami. Dai ix xïïxi ïr buaboi sai oidaga Diuxi, po kaxi ïr buaboi ïpï sai xibi otoma kugaida aagai Diuxi aaduindadï— ikaiti.

⁷ —Daiñi— ikaiti. —Ka naadami tïañikarudï Diuxi iba trompeta dai xibi mosïkaxi ïmoko biïga xi ibagi. Dai xïïxkadï ka naato ibagi ïgai ka natorhi bimu ixtumaxi aagidi Diuxi go ñiñokituldiadamigadï ïïki. Natorhikami bimu ixtumaxi gï tïgito Diuxi ïïki dai tomarhi ïmadutai mai maatïkana aidï. Diuxi maatï saidi ïr buaboi ix duu aagai aanï tudu— ikaiti go Diuxi tïañikarudï. Ïgai tudu ïgai ix makïdï nïiditadai aanï xi sudagi daama dai dïbïriïrï kïixaka dai bia ïmo arhi libro bhibhiobidikami.

⁸ Dai bhodïrï ïpamu kaï aanï go ñokadami ix makïdï gin ñokidi tïbagiañdïrï daidi pobai in tïtïdai, —Mïïka bhïiyi go arhi libro kupiokiñikami ix makïdï bia go tïañikarui sudagi daama dai dïbïrai daama kïakïdï— in tïtïdai.

⁹ Antai mïï gatáí go Diuxi tïañikarudï go libro bai pobai in tïtïdai ïgai, —Bhïiñi dai uga gobai— in tïtïdai. —Kïï yoobikamu gobai gï tïñiïrï dïï gia bhaakai aapi gï oidamu ïïkorhigai gï bokïrï— in tïtïdai.

¹⁰ Daidi bhïiyi aanï go arhi libro ix makïdï biakatadai go Diuxi tïañikarudï dai kïï yoobikami dukai dïïka aanï dïï gia bhaakai aanï kokoturhi gin boka ïïkotuldakai gobai.

¹¹ Dai bhodïrï kaï aanï ïmo ñokadami daidi in tïtïdai, —Aagañi aapi ïpï ïmo ñoki Diuxiañdïrï imïdami aagaitai bïïxi go oidigi daama óídakami. Aagañi ïmo ñoki aagaitai bïïxi go naana maaxi óídakami tudu dai bïïxi go naana maaxi ñokadami ix makïdï oidaga dai aagaitai óídakami tïtïanïdamigadï ïpï— in tïtïdai ïgai.