Apokalipsis 1 - Northern Tepehuan Bible

Go Juan aagidi go buaboitudadami ix ixtumaxi aagai idi ñoki dai aagidi xajadïrï dibia gobai

¹ Aanï ïr Juan dai oja idi libro pioñigadïkatai aanï Diuxi. Idi libroïrï oja aanï ïmo ñoki ix makïdï tïtïgidi Diuxi go Suxi Kristo. Tïtïgidi ïgai ïmo ñoki aagaitai ix tuma otoma daibuña agai tudu saidi go Suxi utioma gatïtïïgidiña ïgai go buaboitudadami xi ïgai maatïkana ixtumaxi daibuña agai ïpï. Gobai ïr go ñoki ix makïdï oja aanï idi libroïrï. Suxi Kristo otoi ïmo tïañikarudï xi ïgai gin tïïgi go ñoki pioñigadïkatai aanï Suxi.

² Dai tami idi libroïrï oja aanï bïïxi ixtumaxi gin tïtïgidi ïgai dai ix makïdï gin tïtïgidi ïgai ïr ïmo ñoki Diuxiañdïrï imïdami dai aagai gobai go Suxi Kristo. Gobai tudu ïr go ñoki ix makïdï oja aanï idi libroïrï.

³ Dai otoma pomaaxi daibuña agai ixdukatai aagai idi libro xi kaxkïdï gï agai xi aagagi ix kaiti bïïxi go buaboitudadami buitapi sai ïgai kaïkana dai ïïgidiña. Dai Diuxi maakimu bhai ïrhiaragai xorai nïidagi ojadï idi libro dai aagagi ix kaiti dai Diuxi maakimu bhai ïrhiaragai xorai ïïgiadagi kaïkatai ïpï.

Go Juan biaturhi buaboitudadami ix makïdï aipakoga kubarakamiapïrï gïn ïmpaiñdiña dai aagidi sai idi ojai ïr ïgai bïïtarï

⁴ Aapimï buaboitudadami Asiana óídakami, aanï ïr Juan dai gïn ojidi idi ojai. Gïn ojidi aanï aapimï tudu ix makïdï kubarakami gïgïrï kiikiïrï óídaga aipakoga ami Asiana. Ipïrhidi aanï sai Diuxi ïmadï Diuxi Ibhïadï ïmadï Suxi Kristo kïï tuigakana gïn bïïtarï dai sai gïn maakana ibhïxtaragai gïn ibhïdagïrï. Diuxi tudu ïgai dai ka oidakatadai mai kia kïkibakai oidigi dai tomarhi ïmo imidagai mai ugiti agai. Dai Diuxi Ibhïadï ïgai dai buidïrï kïïka Diuxi daikarudï dai ami gamamaaxidi xïïxi ïr gubuakami ïgai dai ix mai biïga tomarhi ïmo ixtumaxi.

⁵ Dai Suxi Kristo ïgai dai kïïga aagai ixtumaxi ïr buaboi dai ïgai ïr ïpïgadï ix makïdï muu dai ïpamu duakatu dai ka mai muki agai ïpamu. Dai ïgai ïr Tïanïdamigadï bïïxi gupudagai bipiakami oidigi daama óídakami. Suxi Kristo kïïga gïr oigïdai. Daiñi, aaxi ïgai ïradï mukukai dai podukai kïïgakïrï gïr bubaitu gïr soimaaxkamiañdïrï.

⁶ Podukai bhai dui ïgai sai gatïanïna aatïmï ïgai ïmadï xïxkadï gatïanïdagi ïgai dai sai ïr dadaxdadamikana aatïmï ïpï ibuadatai daxdaragai Ogadï bïïtarï. Diuxi bïïtarï tudu. Pomaaxi idui Suxi Kristo xi kaxkïdï gï agai xi xadutuada aatïmï bïïxkïrï bïïtarï adaama Tïanïdamikatai ïgai. Gobai gia ïr buaboi.

⁷ Kïïga gï tïgito kaïka idi ñoki, daiñi, ayimu ixtuigako dibiamu Suxi Kristo iikomai saagida imïitai dai bïïxi óídakami nïijadamu. Asta go odami ix makïdï sïi kuruxiana xixakai bïïxi nïijadamu ïpï. Dai bïïxi oidigi daama óídakami kabami suanïdamu nïiditai. Kïïga ïr buaboi xi pobai gï duñagai gobai.

⁸ Dai Diuxi Gïr Nukadakami ix makïdï bïïxi adaama gubuka ikaiti sai, —Aanï Diuxi ïgai dai bïïxi aïkatïrï gatïanïiña aanï tukamidïrï abhiadïrï dai apia gatïanïdamu aanï kia xïïxkadï ugitiagi oidigi. Aanï ka ïkioñdïrï oidakatadai mai kia idunakai go oidigi tudu dai mai ugidamu aanï tomarhi ïmo imidagai— ikaiti Diuxi.

Go Juan aagai ix tïï ïgai Suxi Kristo tïïtïkidïrï dukai dïï mos nïadatai

^9-10 Gin aaduñi, kïï maatï aanï sai soimaaxi gïn taatamiturhiña jaa bïïna darakatai aapimï Suxi Kristo dai aanï ïpï taataiña xi soimaaxi gin taatamiturhi jaa bïïna dakatai aanï Suxi Kristo ïpï. Ïmo xïgïmï aatïmï tudu soimaaxi gïr taatamiturhitai jaa aatïmï bïïxkatai. Dïï gia ïmaduga Gïr Nukadakami dai ïgai ïr Suxi Kristo. Dai bïïna darakatai aatïmï ïgai buyiña aatïmï gubukarhigai ixtukïdï gïr kabakadagi go soi ïrhiaragai bui. Gïn aagidamu aanï ix dukatai gin daibusai ïmo imidagai tumiñoko. Ïmo arhi oidigana dajatadai aanï aidï ix makïdï go gïï sudagi ïrana kaatï. Patmos tïgidu go arhi oidigi ïgai. Ami gin maixatutadai jaa aagaitai aanï Diuxi ñokidï dai aagaitai Suxi Kristo. Ami dajatadai aanï tudu dai ïmo imidagai gin tïanïitadai Diuxi Ibhïadï dai aanï kïïga ïïgidimi bai todian dukai ïgai gubukadadïkïdï kaï aanï ix gïgïrï ño ïmoko gin gokiañdïrï. Po ïrhiadan kaiti trompeta.

¹¹ Dai pobai gin tïtïdai ïgai, —Ojañi aapi ïmo libroïrï pïx tumaxi kaïkagi dai nïijadagi dai bhodïrï otosañi go ojai Asiamu go buaboitudadami ix makïdï kubarakami gïgïrï kiikiïrï gïn ïmpaidiña ami. Otosañi ix makïdï gïn ïmpaidiña Efesoïrï tudu dai Esmirnïrï dai Pérgamoïrï dai Tiatirïrï dai Sardixiïrï dai Filadelfiïrï dai Laodisiïrï— ikaiti go ñoki.

¹² Dai aa nïnïaba aanï nïida iñagai xorai ñokai dai tïï aanï kubarakami kukudagi darasakarui orokïdï duñixikami xi ami guka.

¹³ Dai ami go kubarakami darasakarui kudagi saagida kïakatadai ïmoko ix makïdï odami maaxi. Gï aadaka ïgai yukuxi kïï tïbïdukami, ajïi asta mïï tana dïbïriana ukami bhaitoma dai taagiïrï buraka ïmo orokïdï duñixikami giburai.

¹⁴ Kuupadï kïï toja, ïpïamaaxi boopoi tojakami xiïpï kïbai. Dai bupuidï kabami bïpïdokïi táí dukai.

¹⁵ Dai ïïkasodï ïpïamaaxkana baiñomi xïxkadï kabami gï toñitudagi gobai taiyïrï. Dai gïgïrï ñokai ïgai. Kïï gubuakan kaiti ñokidï ïpïan dukai xïïxkadï gïï daibuñagi sudagi akiana.

¹⁶ Dai ïkadï sïïrhixapadïrï dagïka ïgai kubarakami xixabugai. Dai tïñiañdïrï busanïka ïmo maxtai bïï gokapadïrï mukadikami. Dai buibasodï kabami totobikïi ïpïan dukai tasai. Pomaaxkatadai ïgai ix makïdï tïï aanï.

¹⁷ Dai tïïgakai aanï ïmo mukiadï duu gïi ïïkasodï abhana. Dïï mos gin daama dáí ïgai ïkadï sïïrhixapadïrï dai pobai gin tïtïdai, —Maiti duadikuda. Aanï ïgai dai ka ïkioñdïrï oidakatadai mai kia kïkibakai oidigi dai mai ugitimu aanï tomarhi ïmo imidagai.

¹⁸ Aanï ïgai dai tomax tuigako oidaga tudu. Muu aanï ïmo imidagai dïï gia xibi ka duaka aanï dai bïïxkïrï bïïtarï oidaka iñagai. Dai bia aanï bamioma gubuka xi bhai go mukigami dai gobai bhaiga xi aiyagi mosïkaxi asta xako ukami dagitoagi aanï. Dai bia aanï gubukarhigai xi gatïanïdagi ami xakoga daraka koidadï ïpï— in tïtïdai.

¹⁹ Daidi in tïtïdai ïgai ïpï, —Tïïgimu aapi naana maaxi. Ojañi tudu pïx tumaxi tïïgimu aapi. Tïïgimu aapi ixtumaxi ïpïbujimi xibi dai ixtumaxi ïpï gï duñagai gokiïrioma ïpï. Bïïxi gobai oja aapi— in tïtïdai.

²⁰ —Daiñi— in tïtïdai, —Gï aagidamu aanï xibi ix tïiya ïrhidi go kubarakami xixabugai ix makïdï ka nïidi aapi gin ïka sïïrhixapadïrïana dai ix tuma bïïtarï go kubarakami darasakarui kudagi orokïdï duñixikami ïpï. Go xixabugai ïr ïmo maaxidaragai bïïtarï kubarakami gin tïtïañikaruga ix makïdï otoxi aanï sai nukadakana go buaboitudadami ix makïdï kubarakami gïgïr kiikiïrï gïn ïmpaidiña. Dai go kubarakami darasakarui kudagi ïr ïmo maaxidaragai aagaitai go buaboitudadami— ikaiti go makïdï gin ñokidi.