2 Timoteo 4 - Northern Tepehuan Bible

Pabora tïjai sai aipakoga aagaiña Timoteo Diuxi ñokidï

^1-2 Aapi Timoteo, gï tïanïi aanï pïsai gatïtïïgiada aapi Diuxi ñokidï. Gï agai xi apia gatïtïïgidiña aapi tomax tuigako, tomaxi po ïrhiada maaxkagi ïïmo imidagai ix maiti gï agai ix gatïtïïgiadagi, aapi mos apia gatïtïïgiada gobai tomax dukai. Gï agai xi mamaakada aapi ñoki go gaa sai maatïkana xïïxkadï mai kïïga ibuayi. Dai gï agai xi bui ñokada aapi dai asta bhagaidadagi ix makïdï soimaaxi ibuadagi ïpï. Dïï gia tomaxi gï agadagi xi bhagaidagi maiti gï agai xi ojodada aapi. Gï agai xi apia tïtïgiada aapi ñoki dai abïnakiadagi ïgai bhaiyoma. Daiñi, kïï maatï aapi sai xïxkadï dibiagi Suxi Kristo gatïanïda agaitai sai aagadamu ïgai xorai kïïga idui dai xorai mai kïïga idui dai ix tuma ajiagai odami. Aagadamu bïïxkatai bïïtarï tudu, koidadï bïïtarï dai ïpï ix makïdï kia duduakagi dibiakai ïgai. Dai kaxkïdï xibi gï tïanïi aanï gin kaïkatai Diuxi ïmadï Suxi Kristo pïsai kïïga tïtïgiada aapi Diuxi ñokidï.

³ Ayimu ixtuigako go odami mai kaïka ïrhiadamu go buaboikïdï aatagi tudu dai bhaiyoma ibuada ïrhiadamu ïïgi ixtumaxi ipïrhiadagi. Dai kaxkïdï gaagadamu ïgai mui maakadami aatagi sai biakana xorai aagidagi ixtumaxi kaïka ïrhiadagi ïgai.

⁴ Gajiadïrï biamu ïgai ix makïdï kïïga ïr buaboi aidï dai bhaiyoma kaïka ïrhiadamu odami aatagidï maaxi ixtumaxi maiti ïr buaboi.

⁵ Dïï gia aapi maiti gï agai ix pobuadagi. Gï agai xi kïïga sïïrhi gï tïgitokagi aapi bhaiyoma dai mai dagitoagi ix gï maitiagi soi ïrhiaragai gï kabakadaitai aapi xïïxkadï soimaaxi taatakagi. Mos sai aapia aagada aapi go bhai ïrhiaragai aatagi aipakoga daidi kïïga ibuada gï aaduindaga ix makïdï gï maa Diuxi.

^6-7 Podukai ibuada aapi tudu. Aanï ka mai xii tïbïpi dakamu tami oidigi daama tudu dai kaxkïdï gï agai aapi xi kïïga oijadagi go aaduindagai. Daiñi, kïï maatï aapi ixdukai ibuayi aatïmï judidiu iidagaikïdï gadadaxditai aatïmï iidagai Diuxi. Bïï naato aaxtaiña aatïmï daxdakaruana tudu. Dai aanï podukai aaxtan dui gin ibhïdaga Diuxi bïïtarï, bïï naato xia buayi aanï gin gubukarhiga oidakatai aanï ïgai bïïtarï tudu. Gobai ïr go daxdaragai ix makïdï ibuayi aanï. Bïïxi gin gubukarhigakïdï oidiña aanï Suxi Kristo tudu ïpïandukai xi bïïxi gubukarhigadïkïdï mïmïraiña mïrhikaruana ïmo odami. Dai ïpïan dukai ïmo mïradami aïjïi mïrhikaru kugatïrï aanï podukai ka ayi kugatïrï go aaduindagai ix makïdï gin maa Diuxi. Tomarhi ïmo imidagai mai gajiadïrï bia aanï gïr buaboidaragai tudu. Dai xibi ka ayi xi imiagi aanï tabhiadïrï idi oidigi daamaiñdïrï.

⁸ Dai kïï maatï aanï sai sïïrhi aatabuayi ïgai ix makïdï aagada agai ix bhai kïï idui aanï. Dai kïï maatï aanï ïpï sai bhai dasakami bia ïgai gin maitïki kïï sïïrhi oidakatai aanï. Dai mai xu xi mosïkaxi aanï gin maakimu ïgai maitïki ïpï. Bïïxi ix makïdï bhai ïrhiarakïdï nïnïraka ix dibiagi ïgai buimu maitïki ïpï.

Pabora aagidi go Timoteo sai buapidana ixtumaxi

⁹ Gï aagañi aapi Timoteo dai otoma dibiakai gin nïida.

¹⁰ Bhaitoma ïïgi bii aanï tanai kaxkïdï. Kaxi gin dagito go Demas tudu dai jii Tesalonikamu gaagaitai bhai ïrhiaragai ixtumaxiïrï oidaga tami oidigi daama. Dai go Kresente jii Galasiamu dai go Tito jii Dalmasiamu.

¹¹ Mosïkaxi go Lukas gin ïmadï daja xibi. Kaxkïdï ipïrhidi aanï sai otoma bhaigobai dibiana aapi. Dai ipïrhidi aanï sai buapana aapi go Markos ïpï. Maatï aanï sai ïgai kïïga gin soiñamu gin aaduindagïrï kaxkïdï.

¹² Baasïkioma gin soikïiña go Tikiko dïï ka otoi aanï Efesoamu.

¹³ Pïxïxkadï dibiagi gin buapida go baasaragai ix makïdï mïï Troasana bia aanï kiidïrï go Karpo. Dai gin buapidañi go lilibro ïmadï go papeperhi ix makïdï mïï bia aanï ïpï. Go papeperhi ïgai dai bamioma gï agai ix gin buapida aapi tudu.

^14-15 Gï nukadakañi aapi go Alejandro bui. Ïgai ix makïdï ibuayi baiñomi uubixi tudu. Ïgai sïïrhikïdï bui kaatïkana go bhai ïrhiaragai aatagi dai soimaaxi gin buididiña sobhida ïrhiditai go bhai ïrhiaragai aatagi. Gï agai ix kïïga gï nukadakagi ïgai bui tudu dai Diuxi ïgai dai bhai duñimu ix tumaxi ïgai ïmadï.

¹⁶ Baasïkioma aidïxi tukamïrï gïpiïrï gin bupaiña go jaa dudunukamiana, aidï gin dagito bïïxi gin aaduñi dai biakatadai aanï ix ïïgi ñokadagi dai gin soiñagi ami. Gin dagito gin aaduñi tudu dïï maiti ipïrhidi aanï xi maakiagi Diuxi gïgïbidaragai gokïdï.

¹⁷ Dai tomaxi jaa gin dagito mai ïïgi bii aanï ami. Diuxi gin ïmadï dajatadai dai gin maa gubukarhigai sai bïïxi aagaiña aanï go bhai ïrhiaragai aatagi ami dudunukami bui. Dai gin soi ïgai xi aiturhi aanï go aatagi mui odami ix makïdï maiti ïr judidiu ïpï. Go dudunukami maiti ïr judidiukatadai di dai go gaa ix makïdï gin kaïkana ami maiti ïr judidiu ïpï. Kïïga gin soi Diuxi ami tudu dai kïïgakïrï gin busaitu sai mai tïañiagi gin muaragai go dudunukami aidï.

¹⁸ Dai kïï maatï aanï ïpï sai gin busaidamu Diuxi bïïxi go soimaaxkamiañdïrï dai kïïgakïrï gin baidakamu tïbagiamu xako gatïanïi ïgai. Ïgai gï agai tudu xi xadutuada aatïmï bïïxkïrï bïïtarï.

Pabora biaturhi go buaboitudadami

¹⁹ Diuxkïdï biatulda go Prisila dai go Aquila dai go aaduñdï Onesiforo.

²⁰ Xibi ka maiti gin ïmadï daraka go Erasto dai Trofimo. Go Erasto mïï Korintoana bii dai go Trofimo oidi kokodagai aidïxi mïï Miletoana darakatadai aatïmï xi kaxkïdï tudu amaxi bia aanï.

²¹ Gï obaidañi tudu aapi dai bhaigobai dibia mai kia aïkai toomoko. Diuxkïdï gï biaturhi Eubulo dai Pudente dai Rhino dai Klaudia dai bïïxkatai go gaa gïr susukurhi tami ïpï.

²² Daanïi aanï Gïr Nukadakami sai gï soiñana gï ibhïdagïrï aapi Timoteo. Dai daanïi aanï ïpï sai maatï taatana aapimï bïïxkatai xïï kïï tuiga Suxi Kristo gïn bïïtarï. Mosïkaxi.