2 Timoteo 3 - Northern Tepehuan Bible

Pabora aagidi go Timoteo sai daibuña agai naana maaxi soimaaxkami mai kia dibiakai Suxi Kristo ïpamu

¹ Ipïrhidi aanï sai maatïkagi aapi Timoteo sai xïïxkadï ka karhioga ugiti agadagi oidigi sai xijiakamu oidakaradï odami.

² Amaxi óídakami mai buamï gïn ïrhiadamu jaa bïïtarï ïïgi gïn bïïtarï tïgitokatai ïgai kaxkïdï. Maiti gï agai ix urapïkïda aapi odami ix makïdï po tutiakagi tudu. Ïgai go ïï tuminxi bïïtarï óídakamu aidï dai aipako ajiopadamu dai aagadamu xïïxi ïr gïgïrdukami. Gïgïrdukïdï gïn ïrhiadamu ïgai tudu dai asta parunadamu ïgai Diuxi. Mai ïïgiadamu ïgai ojogadï. Dai bhaitoma mai maatïkamu ixdukatai aagadagi ïmo Diuxi atanamïidaragai. Dai mai xadutuadamu ïgai Diuxi ïpï.

³ Xïxkadï ka karhioga ugiti agadagi oidigi odami mai oigïdada agai tomarhi ïïgi aaduñdï dai xïïxkadï kïïdadagi ïgai jaa mai tipukamu ixdukatai oigïldagi ïgai ïpamu. Naana kaï nïijadamu ïgai jaa aipakoga dai gïpiïrï bupadamu ïgai jaa ïpï. Maiti ipïrhiadamu ïgai xi ïïgiadagi ixtumaxi ïr kïïga dai ipïrhiadamu bhaiyoma ix ïïgiadagi go soimaaxkami ix kaxkïdï mai bhaigakamu ïgai xi dagitoagi go soimaaxi tïgibudagai. Bui gukada agai ïgai bïïxi ixtumaxi kïïgadukami tudu.

⁴ Aidï óídakami tïtïgiada agai asta ïïgi aaduñdï sasayudï. Dai mai buamï ïrhiditai soimaaxi ibuadamu mos ïï namïakami gïn ïrhiditai ïïgi. Mai oigïdadamu ïgai Diuxi dai bhaiyoma ojoidadamu xi adaimuagi ïïgi bhai ïrhiaradï.

⁵ Ïgai po ïrhiada maaxkamu ix xadutudai Diuxi dïï maiti ïr buaboikamu. Bhaiyoma mai dagitomu ïgai xi aatabuadagi Diuxi gubukarhigadï abhana mai kïïgakïrï buaboidaitai ïgai. Maiti urapïkïda aapi ix makïdï po maaxi tutiakagi tudu.

⁶ Oidaga ïïmoko po maaxi tutiakami ix makïdï aipako kiikiïrï ajiopai gaagaitai ïïmadaragai óídakami ïmadï dai ka ïïmadatai sai bhodïrï yaatagikïdï gamamaakaiña ñoki dai bupuirumadaiña ïgai odami. Dai oki ix makïdï mai kapaka tïgibudadï ïïgidiña. Ïgai ïr oki ix makïdï naana maaxi soimaaxkami ibuadana dai soigakoñikana. Kaxkïdï oton ïïgidiña ïgai go bupuirumadami.

⁷ Dudatai kaïka ïrhidiña ïgai maatïtuldaragai utudui dïï bïïxkïrï mai mamaatïrïi ixtumaxi kïïgakïrï ïr buaboi.

⁸ Dai go kïkïïrhi ix makïdï buirumadai odami podukai arhiï soimaaxi tïgibudadï dai mai buaboikïdï buaboitudai. Ïgai bui bïïtïkana ixtumaxi ïr buaboi ïpïan dukai go Janes dai go Jambres ix makïdï bui bïïtïkana go Moises ïïki buirumadatai ïgai odami.

⁹ Dïï gia gokiïrï bïïxi odami maatï tïï xi ïr bupuirugami go Janes ïmadï Jambres dai po gï duñimu ïmadï go bupuirumadami ix makïdï oidaga xibi ïpï. Mai xii tïbïpi kïï imimu aaduindadï. Mui odami oton maatï nïijadamu xïï bupuiruga ïgai dai ami ukami ayimu aaduindadï tudu.

Pabora aagidi go Timoteo ix maatï sai ïgai kïïga ïïgidi maatïtuldaradï

¹⁰ Dïï aapi gia mai ïpïamaaxi go bupuirumadami. Aapi gia kïïga máí ixtumaxi gï tïtïgidiña aanï dai gin ïpïan dukai ibuayi ïpï. Kïï maatï aapi ixtumaxi bïïtarï oidaga aanï dai aapi pomaaxi bïïtarï oidaga ïpï. Kïï gï tïgito nïidiña aapi xïï kïïga buaboitudai aanï Suxi Kristo dai nïidi aapi ïpï ix mai daadagitoiña aanï ix gin maitiagi soi ïrhiaragai dai ix oigïdai aanï jaa. Nïidi aapi sai apia oidiña aanï gïr buaboidaraga tomaxi soi taatamaiña aanï. Bïïxi gobai gï tïgito nïidi aapi dai gin ïpïan dukai buayi.

¹¹ Kïï maatï aapi sai mui imidagai soi gin buididiña jaa. Soi gin buididi óídakami Antiokiana tudu dai Ikoniana dai Listrana. Dïï gia Diuxi kïïgakïrï gin busaitu abhiadïrï.

¹² Pomaaxkamu aatïmï gïr bïïtarï ix makïdï bïïna daraka Suxi Kristo dai ix makïdï kïïga xadutudaitai óídaka rïrhidi. Mai biïgaka agai xorai soi gïr buidadagi tudu.

¹³ Dai xibi bhaitiakoga apia bamioma xigarhi bujidamu go galtutuigakami ix makïdï bupuirumada agai óídakami. Ïgai apia tïtïïgiadamu ñoki go jaa yaatagikïdï dai podukai bupuirumadamu ïgai mui. Dai go ix makïdï ïr bupuirumadami jaa ïïgi kuga iimimu kaïkatai aatagi ix makïdï maiti ïr buaboi ïpï. Dai podukai apia bamioma kuga iimimu ïgai.

¹⁴ Dïï aapi Timoteo gia gï agai ix apia buaboitudada ixtumaxi máí aapi kïïga maatïkatai saidi ïr buaboi gobai. Kïï maatï aapi tudu sai mai yaatagïi aatïmï ix makïdï gï tïtïïgidi ñoki.

¹⁵ Dai arhidukatai abhiadïrï mamaatïrïiña aapi Diuxi ñokidï dai gobai gï maakai tïgibudagai ix makïdï kïïga ïr soiñi. Go tïgibudagai ix makïdï gamaakai Diuxi ñokidï gï soi tudu sai buaboitudaiña aapi Suxi Kristo dai sai kïïgakïrï busaiña aapi.

¹⁶ Bïï sudakami go Diuxi ñokidï ïr Diuxi tïgibudadï tudu. Ïgai podukai tïgitoturhi go ojadami Diuxi ñokidï sai podukai ojana ix dukai daja gobai. Bïïxi Diuxi ñokidï ïr soiñi tudu. Gïr mamaatïturhi gobai ixtumaxi ïr buaboi dai gïr mamaakai ñoki xïïxkadï mai kïï ibuadagi aatïmï. Dai gïr mamaakai ñoki xïïxkadï kuga iimiagi aatïmï mai kïïga buaboidaitai ïpï. Gïr mamaatïturhi gobai ixdukatai sïïrhi óídakagi aatïmï.

¹⁷ Diuxi gïr maa ñokidï aatïmï buaboitudadami gïr bïïtarï tudu sai ïgaikïdï bhai gïr dukana aatïmï dai ibuadana bïïxi ixtumaxi ïr kïïga. Sai ïgaikïdï biakana aatïmï bïïxi ixtumaxi ixtukïdï ibuadagi ixtumaxi Diuxi ipïrhidi tudu. Pomaaxi bïïtarï gïr maa Diuxi ñokidï.