2 Timoteo 2 - Northern Tepehuan Bible

Pabora aagidi go Timoteo ix dukatai aatabuadagi pioñigadïkatai ïgai Suxi Kristo

¹ Daiñi, gin maara dukai gï nïidi aanï, aapi Timoteo dai ipïrhidi aanï xi kïï gubuakagi aapi gï ibhïdagïrï. Ipïrhidi aanï xi gubuakagi aapi go gubukarhigaikïdï ix makïdï gï maakai Diuxi bïïna dakatai aapi Suxi Kristo.

² Aapi Timoteo kïïga kaïkana gin aatagi dai jaa mui kaïkana ïpï dai aagai saidi ïr buaboi. Dai xibi gï agai xi nukatulda aapi go aatagi jaa kïkïïrhi sai maigobioma aituldana ïgai ï galbaaxi aatagi. Gï agai xi nukatulda aapi jaa ix makïdï sïïrhi aatabuayi tudu sai mai sarabidagi gobai ïma maaxi aatagi. Dai Diuxi gï maakimu gubukarhigai idi aaduindagai bïïtarï.

³ Aapi Timoteo gï agai ix gï kabakadagi ïmo sandaru dukai sai maiti gï maitïna go soi ïrhiaragai xïïxkadï daibuñagi soimaaxi. Gï aagidamu aanï maaxidaragaikïdï ix maaxi gobai. Daiñi, kïï maatï aapi sai aanï maiti gin daadagitoiña ix gin maitiagi soi ïrhiaragai dai bhaiyoma gin kabakadaiña xïïxkadï soimaaxi taatagi aanï. Dai podukai aapi ïpï gï agai ix gï kabakadagi ïmo sandarugadï dukaikatai aapi Suxi Kristo dai kïïga ïïgiditai ïgai.

⁴ Kïï maatï aapi sai ïmo sandaru mai bhïbhïjïi ïma maaxi aaduindagai dai bhaiyoma mosïkaxi sandaru aaduindadïrï aatabuayi sai kïïgakïrï nïijadana tïanïdamigadï. ¿Maiti xi ïr buaboi gobai? Podukai gï agai xi gaatabuadagi aapi tudu sandarugadïkatai aapi Suxi Kristo.

⁵ Dai gï agai xi ïpïan buadagi aapi xïïxkadï tïtïïbiïrï mïradagi ïmoko biakatai sayudï. Ïgai bia xi mïradagi ix dukai darai go ibuadami go tïtïïbigai ¿aba? Ïmadukai xadïrï maitïna ïgai ixtumaxi.

⁶ Dai aapi gï agai ix bhïiyagi maitïki natokai gï aaduindaga. Gï agai xi ïpïamaaxkagi aapi ïmo gaïsadami ïpï. Ïmo gaïsadami ix makïdï kabami gaatadui gaïsaitai bamioma bia oigaragai xi buiyagi yoobaradï dai jaa mai bia oigaragai ix pokaxi buiyagi. Dai podukai ïpï aapi gï agai xi buiyagi maitïki gï aaduindagakïdï.

⁷ Kïï gï tïgito kaïka idi aatagi tudu dai Gïr Nukadakami gï maakimu tïgibudagai sai kïïga maatï kaïkana aapi.

⁸ Kïï maatï aapi sai Suxi Kristo ïr pipiixaradï go rey Dabidkaru. Dai kïï maatï aapi ïpï sai muu Suxi Kristo dai sai ïpamu duakatu. Gobai tudu ïr go bhai ïrhiaragai aatagai ix makïdï aagidiña aanï go óídakami.

⁹ Dïï gia oidaga odami ix makïdï soimaaxi gin taatamiturhi gin sobhida ïrhiditai sai mai aagana aanï go bhai ïrhiaragai aatagi. Ïgai asta gin buu kadenakïdï ïmo soimaaxi ibuadami dukai dai gin maixa gin sobhida ïrhiditai. Dïï gia mai tipu xorai kadenakïdï burhiagi Diuxi ñokidï sai maiti ibuada gobai aaduindadï. Mai bhaiga ix sobhidagi gobai tudu.

¹⁰ Dai kaxkïdï bhai aagaiña aanï xi soiñagi go odami ix makïdï Diuxi ïko bubaitu tomaxi naana dukai soimaaxi taatamaiña aanï soikïitai. Soiña in ïrhidi buaboitudadami tudu sai bïïxkïrï bïïtarï biakana ïgai gïïpi bhai ïrhiaragai bïïna darakatai ïgai Suxi Kristo.

¹¹ Daiñi, bïïna daraka aatïmï Suxi Kristo kaxkïdï ïr buaboi idi ñoki ix makïdï ikaiti sai, Kïïga gï maatï sai koi aatïmï aidïxi muu Suxi Kristo bïïna darakatai aatïmï ïgai. Kaxkïdï gï maatï ïpï sai óídakamu aatïmï ïmadï ïpï xïïxkadï dibiagi ïgai.

¹² Xibi gïr kabakadai aatïmï dai maiti gïr daadagitoi ix gïr maitiagi go soi ïrhiaragai xïïxkadï soimaaxi taatamadagi aatïmï. Dai kaxkïdï gï maatï sai gokiïrï gatïanïdamu aatïmï Suxi Kristo ïmadï ïpï dibiakai ïgai. Dïï gia ix potïiyagi ïmoko xibi sai mai maatï Suxi Kristo aidï gia dibiakai Suxi Kristo ïgai po tïimu ïpï sai maiti ïr aaduñdï ix makïdï potïi sai mai maatï Suxi Kristo.

¹³ Dïï gia tomaxi mai kïï ibuadagi aatïmï ix dukatai aagagi aatïmï ïgai gia bïïxkïrï ibuayi ix dukatai gïr aagidi. Ka pomaaxi tuigakami ïgai tudu kaxkïdï xadïrï maiti iduna ix tumaxi ix makïdï gïr aagidi.

Pabora aagidi go Timoteo ix dukatai gï agai ix oidakagi odami ix makïdï ibuayi Diuxi aaduindadï

¹⁴ Aapi Timoteo soiñañi go buaboitudadami sai tïgito ajiopaiña ïgai idi ojai. Dai tïañiñi sai maiti gïn bupui ñokaiña ïgai aipakoga aagaitai ix tïiya ïrhidi go aatagi xïïxkadï mai xii maatï kaïkagi ïgai. Aagidañi sai Diuxi kïïga tïgito nïidiña ixtumaxi ibuadagi go buaboitudadami ix kaxkïdï maiti gï agai ix gïn bupui ñokada ïgai aipakoga. Maiti ïr soiñi tudu ix gïn bupui ñokada ïgai podukai dai bhaiyoma sobhikïiña gobai odami sai mai kïïga buaboitudaiña.

¹⁵ Kïïga gï aaga aapi Timoteo ibuadatai gï aaduindaga. Dai kïï sïïrhi gatïtïïgiada Diuxi ñokidï kïïga ïr buaboi Diuxi ñokidï tudu. Ïmo aatabuadami aapi tudu dai kaxkïdï ibuada aapi ix dukai aagai aanï sai podukai mai tipukagi xaïraragai gï bïïtarï gï nïiditai Diuxi.

¹⁶ Dai maiti urapïkïda aapi odami ix makïdï aatagaiña naana maaxi ix makïdï maiti ïr soiñi, ix makïdï ïr go ïï odami tïgibudadï tudu. Pomaaxkami aatagi maiti ïr soiñi ixtumaxi kïïgadukami bïïtarï dai mosïkaxi soikïi gobai odami sai mïkaxioma iimïiña Diuxiañdïrï.

¹⁷ Kïï maatï aapi sai naana maaxi oidaga aatagi ix makïdï soi buayi odami. Dai gï aagidamu aanï ix maaxi ibuayi gobai. Daiñi, ix dukai ibuayi ïmo tojarhigai odami tukugadïana dai bïïxi kokortudai tukugadï podukai ibuayi go aatagi ix makïdï maiti ïr buaboi odami iibhïadïrï. Mui soi duadaiña gobai ix makïdï ïïgiadagi. Go Himeneo dai Fileto ïr kïkïïrhi pomaaxi aatagadami ixtumaxi mai kïïgadu.

¹⁸ Ïgai ka kuga iji dai ka dagito ixtumaxi ïr buaboi tudu. Pokaiti ïgai sai ka daibusai duakaragai koidadï bïïtarï dai sai ka mai tipukamu gobai bamioma. Soi maaxi aatagi gobai. Dai ïgaikïdï xia dodai ïgai buaboidaradï ïïmo buaboitudadami.

¹⁹ Dïï gia tomaxi oidaga odami ix makïdï aatagai ixtumaxi maiti ïr soiñi bïïxkïrï Diuxi ñokidï gia ïr buaboi dai mai ïmapïbuayi. Ïmo simiento dukai kïï kabakami Diuxi ñokidï gïr buaboidaraga bïïtarï. Diuxi ñokidïkïdï tudu kïï kabakami kïïka go buaboidaragai ix makïdï gïr maa Diuxi. Dai ami Diuxi ñokidïrï ikaiti sai, —Diuxi maatï xorai ïr maamaradï— Dai, —Odami ix makïdï pokaitadagi sai buaboitudai Diuxi gï agai ix gajiadïrï biagi go soimaaxkami— ikaiti Diuxi ñokidï.

²⁰ Gï aagai tudu xi buañixikagi aapi ïko dasakamikatai aapi Diuxi aaduindadï bïïtarï. Maiti ïr tomax tuma aaduindagai ibuadami aapi tudu. Gï aagidamu aanï ïmo maaxidaragai ajasokorhikïdï pai maatïkana ix maaxi gobai. Daiñi, naana maaxi oidaga aatabuadami dai ïïmoko ïr tomax tuma aaduindagai ibuadami dai jaa ïr mosïkaxi namïakami aaduindagai bïïtarï. Ïpïan dukai gobai kiidïrï ïmo gï bidakami. Ami oidaga naana maaxi ajasokorhi. Ïïmoko ïr tomax tuma aaduindagai bïïtarï dai mai namïakamikïdï duñixi, dukami ïïmoko uxi xi ïpï bhidai duñixi. Dïï gia oidaga jaa ix makïdï namïakami aaduindagai bïïtarïkana. Ïgai oro dai plata duñixi. Ïgai gia maiti ïr tomax tuma aaduindagai bïïtarï. Mosïkaxi namïakami aaduindagai bïïtarï ïgai.

²¹ Dai pomaaxi aapi ïpï. Aapi bhaiga xi ïko dakagi dai mosïkaxi ïmo namïakami aaduindagai bïïtarïkagi ïpï ïpïan dukai go ajasokorhi namïakami. Bhaiga aapi xi mosïkaxi Diuxi aaduindadï bïïtarïkagi tudu. Dïï gia ix ipïrhiadagi aapi ix ïr mosïkaxi Diuxi aaduindadï bïïtarïkagi gï agai ix ïkobai dakagi aapi go soimaaxkamiañdïrï buañixikami dukai oidakatai. Ix pobuadagi aapi aidï gia kïï bhaiduñixikamu aapi Diuxi aaduindadï bïïtarï. Aidï gia kïïga ïr soiñikamu aapi bïïxi kïïgadukami aaduindagai bïïtarï ix makïdï tañiagi Gïr Nukadakami.

²² Kaxkïdï gï agai xi ïkobai aimïrada aapi bïïxi go soimaaxkamiañdïrï ix makïdï ibuada ïrhidiña utu iimïdami. Gï agai bhaiyoma xi ipïldagi aapi xi kïï sïïrhi oidakagi, dai ix kïïga kabakami dukai buaboitudagi, dai ix kïïga oigïdada jaa mai bui ñokaitai aapi jaa aipakoga. Urabañi aapi go ix makïdï tanïiña soiñi Gïr Nukadakami kïï buañixikatai ibhïadï tudu.

²³ Dïï gia mai bapakïda aapi go aatagiïrï xako gïn bupui ñokadagi odami aagaitai naana maaxi ixtumaxi ix makïdï maiti ïr soiñi. Kïïga maatï aapi sai abhiadïrï daibïi go kokodi tudu.

²⁴ Daiñi, aapi ïr aatabuadami Diuxi bïïtarï. Dai odami ix makïdï ibuayi Diuxi aaduindadï maiti gï agai ix kokoadagi dai bhaiyoma gï agai ix kïï tutiakagi buidïrï jaa. Gï agai xi maatïkagi ïgai ix dukatai tïtïïgiadagi ñoki jaa dai gï aagai ix mai oton bhamuakagi xïïxkadï soi buidadagi jaa ïpï.

²⁵ Ïmoko ix makïdï ibuayi Diuxi aaduindadï gï agai ix kïïga oigïdaitai maakiagi ñoki go odami ix makïdï soi dukai nïidiña Diuxi ñokidï. Sa bhai podukai soiñana Diuxi sai ïma dukai gïn tïtïgitoagi ïgai dai maatiagi ïgai ixtumaxi ïr buaboi.

²⁶ Xibi maamaixapikami dukai bia go diabora ïgai ix makïdï soi dukai nïidi Diuxi ñokidï dai bia ïgai ix ïïgiadagi go diabora. Kaxkïdï gï agai xorai maatïtai maakana ñoki sai ïma dukai gïn tïtïgitoda ïgai. Dai ix ïma dukai gïn tïtïgitoagi ïgai aidï gia bhïimu ïgai go sïïrhi tïgibudagai dai ka mai gïpiïrï surhigimu go diabora.