2 Timoteo 1 - Northern Tepehuan Bible

Pabora biaturhi go Timoteo

^1-2 Bhaiga Timoteo. Aanï ïr Pabora dai gï otoxdi aanï idi ojai otosadïkatai aanï Suxi Kristo. Diuxi ïgai daidi ipïrhidi xi ïr otosadïkana aanï Suxi Kristo tudu dai ïgai gin otoi an sai aagana go utudui oidakaragai ix makïdï bia bïïxkatai aatïmï ix makïdï bïïna daraka Suxi Kristo. Aapi Timoteo, gin maara dukai gï nïidi aanï kïïga gï oigïdaitai aanï dai daanïi aanï Diuxi gïr Oga ïmadï Suxi Kristo Gïr Nukadakami gï bïïtarï. Daanïi aanï sai apia kïï tuigakana ïgai gï bïïtarï dai sai soi gï ïlda gï nïijadana ïgai dai sai gï maakana ibhïxtaragai gï ibhïdagïrï.

Pabora abïnakidi go Timoteo sai apia kïïga buaboitudaiña

³ Kïïga maatï aanï sai xadutudaitai aanï Diuxi ix dukai ibuadana gin piipixara ïïki dai kaxkïdï kïïga buañixikan taadaga gin ibhïdaga. Dai dudatai aagidiña aanï ïmo Diuxi atanamïidana Diuxi gï tïgitokatai aapi Timoteo.

⁴ Gï tïgitokana aanï ix xïï soi gï ïldatu aapi dai asta suanïitadai aidïxi gïr ïjïkobagi baasïki. Dïï gia kïï maatï aanï sai bhai gin ïrhiadamu aanï xïïxkadï gïr tïïgiagi aatïmï ïpamu.

⁵ Maatï aanï sai kïïga buaboitudai aapi tudu ïpïandukai ix gï daada ïmadï gï urhi buaboidaiña ïpï.

⁶ Gï tïgitoñi tudu sai Diuxi ïkobai gï busaitu dai gï maa ïmo gubukarhigai. Pobï gï idui gobai aidïxi gï daama darai aanï gin noonobi baasïkioma. Kïïga aatabuada tudu sai bamioma gïrana go gubukarhigai ix makïdï gï maa Diuxi aidïxi gï daama darai aanï gin noonobi.

⁷ Dai maiti gï agai ix duadikudagi aapi gaatabuadatai. Daiñi, maiti gïr maa Diuxi tïgibudagai ix duadikudagi aatïmï dai bhaiyoma gïr maa ïgai Diuxi Ibhïadï. Dai Diuxi Ibhïadïkïdï biakana aatïmï gubukarhigai sai gïr oigïdaiña aatïmï aipakoga dai sai mai dagitona aatïmï ix gïr tïanïdagi ïïgi gïr tïgibudaga. Gobai gïr maa Diuxi.

⁸ Maiti gï agai xi xaïrada aapi aagaitai ix tuma maatï Suxi Kristokïdï tudu. Dai maiti xaïrada aanïkïdï ïpï tomaxi gin maixatu aanï aagaitai aanï Suxi Kristo. Daiñi, oidaga ix makïdï soi gïr buidada ïrhidi oiditai aatïmï Suxi Kristo dai kaxkïdï gï agai xi Diuxi gubukarhigadïkïdï kabakadagi aapi gï ibhïdaga dai bhai gï dukagi ix gin urabagi soimaaxi taatamaitai gin ïmadï.

⁹ Daiñi, Diuxi kïïgakïrï gïr bubaitu dai gïr báí saidi ïr ïko darasadïkana aatïmï. Dai mai xu ix kïïga idui aatïmï xi kaxkïdï ïkobai gïr bubaitu ïgai dai bhaiyoma kïï tuiga dai ïgai podukai gï tïgito ïïki mai kia tipukatai oidigi. Kaxkïdï kïïgakïrï gïr bubaitu ïgai.

¹⁰ Dai xibi dibiakai Suxi Kristo gïr maaxitu ïgai xïï kïï tuiga Diuxi. Suxi Kristo bamioma ixtui ix bhai go mukigami tudu dai gïr aagidi sai xorai buaboitudagi go bhai ïrhiaragai aatagi kïïgakïrï oidaka agai bïïxkïrï bïïtarï.

¹¹ Dai Diuxi gin maa sïïrhikami ansaidi ïr otosadïkana aanï Suxi Kristo sai aagaiña aanï go bhai ïrhiaragai aatagi dai sai maatïtuldana mui odami aipakoga óídakami.

¹² Dai xibi maixapi aanï ibuadatai go aaduindagai ix makïdï gin maa ïgai dïï mai xaïrai aanï gokïdï. Kaxkïdï tudu kïïga maatï aanï ix tuiga Suxi Kristo ix makïdï buaboitudai aanï dai gobai ïr ïmo abïnakidaragai gin ibhïdaga bïïtarï. Kïïga buaboitudai aanï tudu dai asta nukaturhi aanï gin ibhïdaga. Kaxkïdï tudu kïï maatï aanï sai ïgai bia gubukarhigai ix gin nukadakagi asta xïïxkadï dibiagi ïgai ïpamu.

¹³ Aapi Timoteo, baasïki abhiadïrï gï tïtïïgidiña aanï ñoki ix makïdï kïïga ïr sïïrhi dai xibi gï agai ix kïïga gï tïgito nïijada aapi dai bïïxkïrï gatïtïïgiadagi ï galbaaxi ñoki ix makïdï gï tïïgi aanï. Kïï sïïrhi maakada aapi aatagi tudu. Kïïga bia aapi gubukarhigai bïïna dakatai aapi Suxi Kristo di xi kaxkïdï apia buaboitudada aapi dai kïïga oigïdada jaa ïpï.

¹⁴ Daiñi, Diuxi gï nukaturhi go kïïgadukïdï aatagi kaxkïdï maiti gï dagitoda aapi ix kuga imiagi gï aatagi xïïxkadï gatïtïïgiada aapi ñoki. Kïï sïïrhi aagada tudu. Dai Diuxi Ibhïadï ix makïdï gïr ïmadï daja gï soiñamu sai podukai kïï nukadakana aapi go aatagi.

¹⁵ Kïï maatï aapi Timoteo sai baasïkioma gin dagito go Figelo dai Hermogenes ïmadï bhaiton bïïxi go gaa buaboitudadami Asiañdïrï ïpï. Bïïxkatai ïgai gin dagito bhaitoma.

^16-17 Dïï gia go Onesiforo gia mai podui. Kaxkïdï ipïrhidi aanï ix kïï tuigakagi Gïr Nukadakami go Onesiforo kiidïrï óídakami bui. Mai xaïraiña go Onesiforo ix gin dibidagi tudu tomaxi maixapi aanï dai bhaiyoma gin abïnakidiña gin didibiditai tami Romïrï. Dai aidïxi tukamïrï dibia ïgai tami Romïrï aipakoga gin gaa ïgai asta xïxkadï gin tïï.

¹⁸ Kaxkïdï ipïrhidi aanï sai kïï tuigakagi Gïr Nukadakami ïgai bïïtarï asta xïïxkadï dibiagi ïgai ïpamu tami oidigi daama. Sïïrhikïdï kïïga gin soi ïgai tudu tami Romïrï maixapikatai aanï dai ïkobïrakoga gin soi ïgai aidïxi amïï Efesoana dakatadai aanï ïpï. Aapi kïï maatï xïï kïïga gin soi ïgai amïka tudu.