2 Tesalonicenses 2 - Northern Tepehuan Bible

Pabora aagidi go buaboitudadami ixtumaxi po gï duñagai xïxkadï dibia agadagi Suxi Kristo

¹ Gïr susukurhi, xibi gïn aagida rïrhidi ix tuma daibuña agai xïïxkadï dibiagi Suxi Kristo Gïr Nukadakami ïpamu. Aidï ïmpaidamu ïgai bïïxkatai aatïmï buaboitudadami sai mïï buidïrï aïna.

² Kaxkïdï ix gïn aagidagi jaa sai ka dibia Suxi Kristo ïpamu maiti gï agai ix buamï gïn ïrhiada aapimï. Tomaxi gïn aagidagi ïgai sai Diuxi Ibhïadïkïdï ñokai ïgai maiti gï agai ix buaboitudada aapimï. Dai tomaxi pokaitadagi ïgai sai bia ïmo ojai ix makïdï aatïmï idui dai ix makïdï ikaiti sai ka dibia Suxi Kristo ïpamu maiti ïr buaboi dai maiti gï agai xi buamï gïn ïrhiada aapimï. Ix pokaitadagi ïgai sai ka dibia Suxi Kristo ïpamu maiti abïr buaboitudada tudu.

³ Maiti gï agai ix gïn dagitoagi aapimï sai gïn bupuirumadagi jaa tudu. Daiñi, dibiagai Gïr Nukadakami dïï mos gokiïrioma kia. Ïpïgioma bhaitoma bïïxi óídakami bui surhigi agai Diuxi. Dai ïpïgioma dibiagai ïmo kïïrhi ïpï ix makïdï adaama ïr soimaaxi buadamika agai dai ix makïdï Diuxi maaki agai gïgïbituldaradï bïïxkïrï bïïtarï.

⁴ Go kïïrhi ïgai gï dasamu ïïgi saidi ïr bhaitï kïakamigadïkana bïïxi óídakami dai asta ipïldamu ïgai ix odami Diuxi dukai nïijada ïgai. Dai asta daidamu ïgai odami ix Diuxi dukai xadutuadagi ïmai kaxkïdï tudu ipïldamu ïgai ix mosïkaxi ïgai gï xadutuadagi. Dai asta baakimu ïgai kiupaigadïrï Diuxi Jerusalenïrï dai parunadamu Diuxi. Ami daibamu ïgai dai pokaitadamu saidi ïgai ïr Diuxi.

⁵ ¿Mai ix podukai gïn aagidiña aanï baasïkioma aidïxi gïn ïmadï dakatadai aanï?

⁶ Kïï maatï aapimï tudu sai oidaga ixtumaxi ix makïdï mai dagitoimi xi gï maaxitudagi go soimaaxi buadami ïgai. Kaxkïdï maiti gï maaxitudamu ïgai asta xïïxkadï dáí Diuxi ix gï maaxitudagi ïgai.

⁷ Xibi go soimaaxi buadami ïgai ïxtotai aatabuayi dai abïnakidimi odami xibi sai bui surhigïiña Diuxi. Dïï gia xïïxkadï maigobai imiagi ix makïdï sobhikïi

⁸ aidï gia kïïga gï maaxitudamu ïgai. Daidi dibiamu Suxi Gïr Nukadakami dai maitïmu go soimaaxi buadami xi mos nïidamu ïgai ix maaxi tiodi Suxi Diuxikatai ïgai dai amaxi ugitimu gubukarhigadï. Daidi buidïrï buxtamu Suxi go soimaaxi buadami ïgai xi mosïkaxikïdï mukimu.

⁹ Dïï gia mai kia mukukai go adaama soimaaxi buadami gaataduñimu ïgai go diabora gubukarhigadïkïdï dai iduñimu naana maaxi maaxidaragai ix makïdï odami maiti ixtutuidikïi xi buadagi. Podukai bupuirumadamu ïgai mui odami.

¹⁰ Naana maaxi soimaaxkami iduñimu ïgai tudu dai ïgaikïdï bupuirumadamu go odami ix makïdï taata agai gïgïbidaragai bïïxkïrï bïïtarï. Bupuirumadamu ïgai ix makïdï mai kïïgakïrï bubuaki agai tudu mai buaboituda ïrhiditai ixtumaxi ïr buaboi.

¹¹ Dai Diuxi nïidamu ix mai buaboituda ïrhidi ïgai ixtumaxi ïr buaboi ix kaxkïdï iduñimu ïgai sai gubuakami dukai aiyagi go buirumadaragai ibhïgadïrï saidi kïïgioma buaboitudaiña ïgai ix makïdï ïr go yaatagi.

¹² Podukai ïr sïïrhi ka agai ix potïimu Diuxi sai ajïga ïgai gïgïbidaragai. Ka maiti ipïrhi ïgai ix buaboitudagi ixtumaaxi ïr buaboi kaxkïdï dai bhaiyoma ojoidi ix ïïgiadagi go soimaaxkami.

Pabora abïnakidi go buaboitudadami sai kïï gubuakami dukai buaboitudaiña

¹³ Gïr susukurhi, kïïga gïn oigïdai Diuxi. Dai gïn aagida rïrhidi sai dudatai potïtïdaiña aatïmï Diuxi sai bhai gïr ïrhidi aapimïkïdï. Gï agai tudu ix podukai aagidagi aatïmï Diuxi kaxkïdï tudu aidï abhiadïrï xi gï aaga idui Diuxi go oidigi kaxi ïkobai gïn darai ïgai sai buaboitudaiña aapimï. Gïn darai ïgai sai ïïgi ïgai bïïtarïkana aapimï kïïga buaboitudaitai aapimï dai biakatai Diuxi Ibhïadï.

¹⁴ Gïn báí ïgai sai kïïgakïrï bubuakïna aapimï gïn aagidakai aatïmï go bhai ïrhiaragai aatagi. Dai xibi ka buaboitudakai aapimï gïn ajiagai xi urabagi Suxi Kristo xïïxkadï bhïiyagi ïgai gïdukami xadutudaragai gï maaxitudakai xïïxi ïr gïdukami. Aidï aapimï bui agai gïdukami xadutudaragai ïgai ïmadï ïpï.

¹⁵ Kaxkïdï abïr kïïga kabakami dukai buaboitudada maatïkatai sai gïn ajiagai go bhai ïrhiaragai dai xadutudaragai ix makïdï bia Suxi Kristo. Dai abïr tïgito ajiopada go maatïtuldaragai ix makïdï gïn biturhi aatïmï. Ïïmo maatïtuldaragai gïn aagidiña aatïmï aatagikïdï dai jaa ojaikïdï. Bïïxi gobai abïr mai gajiadïrï bia.

^16-17 Gïr susukurhi, gïn daanturhiña aatïmï sai gïn abïnakidiña Diuxi dai sai gupurtudana ïgai gïn buaboidaraga. Dai kïï gubuakatai gïn buaboidaraga aidï gia bïïxi ixtumaxi aagidagi aapimï jaa kïïga ibuadamu soiñi dai bïïxi ixtumaxi ibuadagi aapimï jaa bïïtarï kïïga ibuadamu soiñi ïpï. Suxi Kristo Gïr Nukadakami ïmadï Diuxi gïr Oga ïgai dai kïï tutuiga gïr bïïtarï tudu dai gïr oigïdai dai gïr maakai ibhïxtaragai ix makïdï mai ugiatïkïi dai gïr maakai ïmo nïnïraragai kïïgadukami ïpï.