2 Tesalonicenses 1 - Northern Tepehuan Bible

¹ Aanï ïr Pabora daidi gïn otoxdi idi ojai aapimï buaboitudadami ix makïdï Tesalonikana gïn ïmpaidiña. Dai tanai gin ïmadï daraka go Silbano ïmadï go Timoteo ïpï. Gin susukurhi, aanï ïmadï go Silbano dai go Timoteo maatï sai aapimï kïïga urabaka Diuxi gïr Oga ïmadï Suxi Kristo Gïr Nukadakami.

² Dai ipïrhidi aatïmï sai maatï taatagi aapimï xïï kïï tutuiga ïgai gïn bïïtarï dai sai gïn maakana ïgai ibhïxtaragai gïn ibhïdagïrï.

Pabora abïnakidi go buaboitudadami maatïkatai sai jaa soi buididi

³ Gïr susukurhi, dudatai aagidiña aatïmï Diuxi sai bhai gïr ïrhidi aatïmï ïgaikïdï maatïkatai sai kïïga buaboitudai aapimï. Kïïga ïr sïïrhi ix aagiada aatïmï Diuxi sai bhai gïr ïrhidi ïgaikïdï tudu. Kïï maatï aatïmï sai bamioma kabakami dukai buaboitudai aapimï xibi dai sai bïïxkïrï bamioma gïn oigïdai aapimï aipakoga ïpï. Kaxkïdï bia aatïmï sïïrhikami ix potïdagi aatïmï Diuxi sai bhai gïr ïrhidi ïgaikïdï.

⁴ Dai ojoidi aatïmï ix aagidagi go gaa buaboitudadami aipakoga óídakami xïï kïïga buaboitudai aapimï ïpï. Aagidiña aatïmï sai apia buaboitudai aapimï tomax dukai tomaxi soi taadakana aapimï dudatai soi gïn buididitai jaa. Podukai aagidiña aatïmï bïïxi go gaa buaboitudadami ix makïdï gïn ïmpaidiña aipakoga.

^5-6 Soimaaxi gïn taataturhi jaa tudu dïï ïgaikïdï maaxitudamu Diuxi xïï sïïrhi aatabuayi ïgai. Kaxkïdï tudu Diuxi gïgïbitulda aagai xorai ajïakagi gïgïbidaragai dai xorai mai ajïakagi gia cho. Podukai nïijadamu odami sai sïïrhi aatabuayi Diuxi. Daiñi, Diuxi ïgai daidi gïn tïanïi ix kaxkïdï gïn kïïdai go gaa dai soimaaxi gïn taatamiturhiña. Dai Diuxi ïgai daidi gïn darai sai biakana aapimï oigaragai ix gïn tïanïna ïgai.

⁷ Go gaa soimaaxi gïn taatamiturhi dïï Diuxi gïn maakai ïmo ibhïxtaragai gïn ibhïdagïrï. Dai gokiïrioma gïr maakimu ïgai ibhïxtaragai bïïxkatai aatïmï buaboitudadami xïïxkadï gï maaxitudagi Suxi Gïr Nukadakami dibiakai ïgai tïbagiañdïrï. Amaxi dibiamu ïgai ïmadï tïtïañikarudï kabami gupukami dai ïmadï imïdamu ïmo táí kabami gubuakami ïpï.

⁸ Dai aidï gï sïïrhiñdamu Suxi ïmadï go odami ix makïdï maiti ipïrhi ix urabagi Diuxi. Gïgïbituldamu ïgai tudu ix makïdï mai buaboitu go bhai ïrhiaragai aatagi ix makïdï aagai Suxi Kristo.

⁹ Ïkobai darasamu ïgai go ix makïdï mai buaboitudai Diuxiañdïrï bïïxkïrï bïïtarï. Ami mai nïijadamu ïgai tomarhi ïmo imidagai xïï xigiamaaxi gubukarhigadï Diuxi. Podukai soi taatamituldamu ïgai.

¹⁰ Gobai ïr gïgïbidaradï ix makïdï Suxi maakimu go ix makïdï mai buaboitudai dibiakai ïgai. Dai amaxi bïïxi go buaboitudadami xadutulda ñokadamu Suxi bïïtarï. Dai aapimï ami darakamu dai xadutulda ñokadamu ïgai bïïtarï ïpï. Aapimï kïïga buaboitu gïr aatagi di.

^11-12 Gïr susukurhi, dudatai daanïiña aatïmï Diuxi saidi kïï bhai dukai óídakana aapimï gubukarhigadïkïdï Diuxi bai podukai oidakana gïïpi xadutudaragai Suxi bïïtarï. Diuxi gïn báí tudu sai kïïga urabana aapimï ïgai. Dai kaxkïdï daanïi aatïmï Diuxi sai ibuadana ïgai aaduindagai aapimïrï saidi kïïgakïrï óídakaiña aapimï ixdukatai gï agai ix óídakagi uurapïkïdami Diuxi. Ix podukai óídakagi aapimï aidï gia kïïga oidakamu xadutudaragai Suxi bïïtarï. Kïïga buaboitudai aapimï tudu ix kaxkïdï naana maaxi kïïgadukami ibuada ïrhidiña aapimï. Dai daanïi aatïmï Diuxi saidi ïgai gubukarhigadïkïdï ïpïbuadagi bïïxi gobai ix makïdï ibuada ïrhidi aapimï, ix makïdï ïr kïïgadukami tudu. Dai pogïdunakai gobai aidï mui óídakami nïijadamu dai xadutuadamu Suxi Gïr Nukadakami nïiditai xïï naana maaxi idui ïgai aapimïkïdï. Daidi Suxi kïïga ñokadamu aapimï gïn bïïtarï aidï ïpï. Kïï tuiga Suxi Kristo gïr Diuxiga dai Gïr Nukadakami tudu ix kaxkïdï po gï duñimu bïïxi gobai ix makïdï gïn aagidi aanï.