2 Pedro 3 - Northern Tepehuan Bible

Ayimu ixtuigako Diuxi aagada agai xorai kïïga idui dai xorai mai kïïga idui

¹ Gin aaduñi Diuxi amadïrï, kïïga gïn oigïdai aanï. Dai idikïdï kaxi ïr gokadukamu go ojai ix makïdï gïn ojidi aanï. Ka gokoaja gïn ojidi aanï idikïdï tudu ipïrhiditai ix kïïga gïn tïtïgitoagi aapimï. Ipïrhidi aanï sai gïn tïgitokagi aapimï bïïxi gobai ix makïdï ka máí aapimï tudu.

² Kaxkïdï abïr gïn tïgitoka ixtumaxi gïr aagidiña go ñiñokituldiadamigadï Diuxi ïïki abhiadïrï ïkobubaidadïkatai ïgai Diuxi. Dai gïn tïgitobïrai ïpï ixtumaxi gïr tïjai Suxi Kristo Gïr Nukadakami ix makïdï ïr gïr kïïgakïrï bubiadamiga. Gïn tïgitobïrai ixtumaxi gïn aagidi aatïmï ojotosadï Suxi ïpï, aatïmï ix makïdï gïn tïtïïgidi ixtumaxi gïr tïjai ïgai tudu.

³ Gin aaduñi, sïïrhikïdï gï agai sai maatïkagi aapimï sai xïïxkadï karhioga dibia agadagi Suxi Kristo ïpamu sai oidaka agai odami ix makïdï adaimu agai ïïgi bhai ïrhiaradï ïïgiditai ïgai ïïgi soimaaxi tïgibudadï dai parunada agai ïgai gïr buaboidaraga.

⁴ Daidi ikaitidamu ïgai, —¿Tïdui dai mai kia dibia Suxi Kristo?— ikaitida agai. —Pokaitiña go Suxi sai buaboikïdï dibiagai ïpamu dïï mai kia dibia. Mo maaxkana oidigi aidï abhiadïrï xi idui Diuxi dai mai tipu maaxidaragai ix dibiagi Suxi Kristo ïpamu— ikaitidamu. —Go ïïki óídakami ka kïkïrhiokoi dai ka bïïxi koi dai modukai mai dibia go Suxi tudu— ikaitida agai ïgai gïn parunaitai.

⁵ Dïï gia maiti ïr buaboi sai mo maaxkana oidigi ïïki abhiadïrï. Daiñi, odami ix makïdï podukai parunadagi mai tïgitoka ïrhidi sai go ïïgi ñokidïkïdï idui Diuxi go tïbagi. Dai aidï sudaïrï kaatïkatadai go oidigi dai mos ño Diuxi dai sudagiañdïrï busaitu ïgai go dïbïrai gakikami saidi ïkobai biïna gobai go sudagiañdïrï. Dai bïï xikorhi kaatïkatadai go sudagi aidï.

⁶ Dai mai tïgitokana go odami sai gokiïrï xia dodai Diuxi go oidigi go sudagikïdï. Gïïpi ïma maaxtu go oidigi aidï.

⁷ Dai xibi go ñokidï gubukadadïkïdï nukadai ïgai go oidigi ïmadï tïbagi asta xïïxkadï bïïxi mïidagi ïgai táíkïdï. Po gï duñimu gobai xïïxkadï aiyagi ix aagadagi Diuxi xorai kïïga idui dai xorai mai kïïga idui tudu. Amaxi bïïxi nato xia duadamu ïgai go odami ix makïdï mai ïïgidi.

⁸ Gin aaduñi, gï agai sai gïn tïgitokagi aapimï sai Diuxi ïma dukai nïidi go tïbïragadï tasai dai mai xu ix dukatai aatïmï nïidi gobai. Ïgai bïïtarï ïmo tasai ïpïan tïbïraga ïmo mirhi umigi dai ïmo mirhi umigi ïpïan kaburhika ïmo tasai. Mos ïr ïgalbaaxi ïgai bïïtarï tudu.

⁹ Dai gobai itïiya ïrhidi sai maiti ïr buaboi ixdukai aagai ïïmo odami sai mai obaiga Gïr Nukadakami ix dibiagi ïpamu ixdukai gïr aagidi ïgai. Gia dibiamu ïgai tudu. Dïï mos nïnïrai kia gïn tïgitokatai ïgai aapimï. Mai otoma ojodai ïgai soimaaxi ibuadami tudu dai bhaiyoma mamaakai ïgai oigaragai bïïxkatai sai ïma dukai gïn tïtïgitokagi kia. Maiti ipïrhidi Diuxi sai xia gï duñagi tomarhi ïmo odami ibhïadï ïkobai biïkai ïgai Diuxiañdïrï dai kaxkïdï nïnïrai ïgai kia.

¹⁰ Dïï gia tomaxi maiti ipïrhidi Diuxi ix xia gïn buadagi óídakami bïïxkïrï todian dukai ayimu ixtuigako dibiamu Gïr Nukadakami. Todian dukai ayimu ïgai ixdukai daibïi ïïxibogami xïïxkadï odami mai nïnïrakagi tudu. Dai amaxi xia duadamu ïgai go tïbagi ïmo gïï táíkïdï. Gïgïr xixiokadan kaitidamu aidï gïï mïjïitai táí. Dai aidï kïïga maaxi kaatïkamu bïïxi go oidigi ïmadï bïïxi ixtumaxi idui óídakami ami dai Diuxi aagada agai ix bhai kïï idui ïgai ix cho ïpï.

¹¹ Ugida agai bïïxi aïkatai ixtumaxi nïidi aatïmï tudu. Kaxkïdï maatiga maaxi sai gï agai sai kïïga buañixikami dukai óídakagi aatïmï kïïga ïïgiditai aatïmï Diuxi.

¹² Gï agai sai bhai ïrhiarakïdï nïnïrakagi aatïmï ix aiyagi ix tuigako ugitituda agai Diuxi bïïxi aïkatai ixtumaxi. Aidï ïmo gïï táíkïdï ugiti agai go tïbagi dai bïïxi ixtumaxi ami oidaga mïi agai.

¹³ Po gï duñimu tudu. Dïï gia aatïmï nïnïraka ixtuigako iduña agai Diuxi ïmai tïbagi utudui ïmadï ïmo oidigi utudui ïpï ix dukai aagai Diuxi ïïki. Amaxi kaxi idunakai gobai bïïxi óídakami ibuadamu mosïkaxi ixtumaxi ïr sïïrhi ix dukai Diuxi ipïrhidi.

¹⁴ Gobai nïnïraka aapimï tudu gin aaduñi. Dai kaxkïdï abïr kabami gïn aga dai buañixikami dukai óídaka sai mai tipukagi ixtukïdï gïpiïrï gïn bupadagi jaa. Podukai abïr ibuada saidi kïïga xioma uraban dukai óídakana aapimï buitapi Diuxi.

¹⁵ Gïn tïgitobïrai tudu sai Gïr Nukadakami mai ojodatai nïnïrai kia dai mai kia xia dodai oidigi. Ipïrhidi ïgai sai go soimaaxi ibuadami biakana oigaragai xi kïïgakïrï bubuakiagi kaxkïdï. Podukai tudu gïn ojidi Pabora ïpï ix makïdï ïr ïmo gïr aaduñi Diuxi amadïrï dai ix makïdï kïïga oigïdai aatïmï. Dai kïïga gï maatï saidi ïr buaboi ixtumaxi gïn ojidi ïgai. Diuxi tïtïïgidiña ixtumaxi ojagi ïgai kaxkïdï.

¹⁶ Dai bïïxi ojadïrï go Pabora aagaiña ïgai ixdukatai gï agai sai óídakagi buaboitudadami nïnïrakatai aatïmï ix dibiagi Suxi Kristo ïpamu. Dïï gia ïïmo ojadï xijiakan kaiti dai jaa odami ix makïdï mai maatï ixtumaxi ïr buaboi dai mai kabaka buaboidaradï mai kïï sïïrhi tïtïïgidiña gobai mai maatï kaïkatai. Dai pobuayi ïgai bïïxi go Diuxi ñokidïkïdï ïpï, gajiadïrï imïiña aatagidï gatïtïïgiditai ïgai. Ïïgi xia gïn dodai ïgai pobuadatai tudu. Diuxi gïgïbitulda agai kaxkïdï.

Tami ka kugaida agai Piduru ojadï

¹⁷ Gin aaduñi, kïïga gïn oigïdai aanï. Dai xibi ka maatï aapimï sai oidaka agai tïtïïgiadami aatagi ix makïdï bupuirumadada agai óídakami. Kaxkïdï gïn nukadabïrai dai maiti abïr gïn dagito ix gïn bupuirumadagi ïgai. Ix oijadagi aapimï yaatagidï go soimaaxi ibuadami ïgai aidï gia ka mai kabakan duñimu gïn buaboidaraga dai bhaiyoma koidan imimu gobai.

¹⁸ Kïïga abïr óídaka bhaiyoma saidi podukai bïïx tasai bamioma maatï taatana aapimï xïï kïï tuiga Suxi Kristo Gïr Nukadakami gïn bïïtarï. Gïr kïïgakïrï bubiadamiga ïgai tudu dai gï agai sai bïïx tasai bamioma kïïga maatïkagi aapimï ïgai. Podukai bamioma kabakatudamu gïn buaboidaraga gin aaduñi. Ipïrhidi aanï sai bïïxi óídakami xadutuadana Suxi Kristo dai kïïga ñokadana ïgai bui bïïxkïrï bïïtarï. Sai pogïduna gobai tudu. Mosïkaxi.