2 Pedro 2 - Northern Tepehuan Bible

Gï agai go buaboitudadami ix gïn nukadakagi tadu buaboitu ïgai ñokidï go tïtïïgiadami yaatagi

¹ Ka agai aatïmï go ñiñokituldiadamigadï Diuxi ix makïdï óídakatadai ïïki saagida go Israelitas. Ïgai gatïtïïgidiña mosïkaxi ixtumaxi ïr buaboi. Dïï gia oidakatadai jaa ix makïdï ñokituldiadamigadï Diuxi gïn aagaiña ïïgi dïï maiti ïr ñiñokituldiadamigadï ïgai Diuxi. Ga tïtïïgidiña ïgai yaatagi bhaiyoma. Dai oidakamu pomaaxkami aapimï buaboitudadami gïn saagida ïpï. Oidaka agai tïtïïgiadami yaatagi ïpï tudu. Sastudakami dukai ñokadamu ïgai dïï gia ïxtotai dukai basamu ïgai yaatagi saagida aatagidï daidi aagada agai saidi Suxi Kristo maiti ïr ï Tïanïdami. Mai Tïanïdami aagamu ïgai Suxi Kristo tudu tomaxi Suxi ka dáí go namïgadï go kïïgakïrï bubaidaragai ixtukïdï kïïgakïrï bubuakiagi ïgai. Gajiadïrï bipiadamu ïgai Suxi Kristo tudu dai podukai ïïgi abhana aituldamu ïgai ïmo gïgïbidaragai ix makïdï todian dukai ayimu.

² Go tïtïgiadami ñoki ïgai ojoidi ix ibuadagi naana maaxi soimaaxi buirudagai tukugadïkïdï abhan bopodatai ïgai jaa ïmadï aipakoga dai mui óídakami ix makïdï buaboitudagi aatagidï ïpïan ibuadamu soimaaxi ïpï. Dai jaa óídakami gïn tïgito nïijadamu ix dukatai óídaga ïgai dai pogïnïrhiadamu sai ix makïdï pobuayi ïr aatïmï gïr aaduñi dai kaxkïdï pokaitadamu ïïmoko sai maiti ïr soiñi gïr buaboidaraga.

³ Koimudadï tutiaka agai go tïtïïgiadami ñoki ïgai tudu dai gïn bupuirumadamu ïgai muidutai aapimï aatagidïkïdï gïn popoida ïrhiditai gïn tuminxiga. Dïï gia ka aagai Diuxi ïïki sai gïgïbitulda agai ïgai dai otoma ayimu gïgïbidaradï.

⁴ Daiñi, Diuxi mai oigïrhi go tïtïañikarudï ix makïdï soimaaxi iduitadai ïïki dai bhaiyoma maigobai surhi ïgai tïbagiañdïrï mïï taana go gïï dïgakana xako kabami tukamuga. Ami nïnïraka ïgai sai Diuxi maakana go gïgïbidaragai ix makïdï ajïga ïgai soimaaxi ibuadamikatai ïgai tudu.

⁵ Dai mai oigïrhi Diuxi go soimaaxi ibuadami ix makïdï óídakatadai aidïxi sudaïrï dupiturhi ïgai oidigi ïpï. Aidï kïïgakïrï busaitu ïgai go Noé ix makïdï aagidiña go óídakami sai gï agaitadai xi kïï sïïrhi ibuadagi dai ïïgiadagi Diuxi. Dai kïïgakïrï bubaitu Diuxi kubarakami aaduñdï Noé ïpï dai mosïkaxi. Dai go gaa óídakami bïïxi bhaikoi go sudagiïrï ix makïdï otoi Diuxi bïïxi oidigi daama.

⁶ Dai xia dodai Diuxi go gïgïr kiiki Sodoma dai Gomora tïtïgidukami ïpï ïïki. Bïïxi nato mïji ïgai tudu asta xudu bïïxi nato matai bii ami. Podui ïgai saidi go óídakami soimaaxi ibuadami ix makïdï gokiïrioma dadiagi gïn tïgito nïijadana ix dukatai pogïdui.

^7-8 Dïï gia aidïxi xia dodai Diuxi go Sodoma dai Gomora bïïxkïrï kïïgakïrï busaitu ïgai go kïïrhi Lot tïgidukami ix makïdï ïr ïmo kïïga ibuadami. Go Lot kabami ojorhitadai nïiditai dai kaïkatai bïïx tasai go buirudagai ix makïdï ibuadana go soimaaxi ibuadami ami. Kabami soi gïrhidiña ïgai gokïdï tudu.

⁹ Diuxi kïïgakïrï busaitu ïgai tudu dai bhodïrï bïïxi naato xia dodai ïgai go soimaaxi ibuadami. Kaxkïdï gï maatï sai Diuxi kïïga ixtutuidikïi xi kïïgakïrï bubiadagi odami ix makïdï ïr kïïga ibuadami sai mai soimaaxi taatamaiña ïgai. Dai kïïga ixtutuidikïi xi apia soimaaxi taataturhiadagi soimaaxi buadami ïpï asta go kugatïrï tasïrï ukami xïxkadï aagada agai Diuxi ixtuma gïgïbidaragai aji agai ïgai.

¹⁰ Dai bamioma kïïga soimaaxi taataturhiada agai Diuxi go tïtïïgiadami yaatagi ïmadï aaduñdï ix makïdï adaimïi go soimaaxi ix makïdï tañiagi go soimaaxi tïgibudagai ix makïdï maiti ïr Diuxiamadïrï tïgibudagai tudu. Pobuayi go tïtïïgiadami yaatagi tudu dai mai xadutudai ïgai tomarhi Diuxi dai tomarhi ïmo sïïrhikami biakami. Ïgai mai buamï ïrhiditai ibuayi ïïgi ixtumaxi ipïrhiadagi dai asta mai duadikuitai parunai ïgai go tïtïañikarudï Diuxi ix makïdï Diuxi maa gubukarhigai sai gatïanïna tïbagiïrï.

¹¹ Kïïga gï maatï sai maiti gï agai gobai tudu. Daiñi, asta go tïtïañikarudï Diuxi ix makïdï gïïpi bamioma gupuka ix bhai odami mai soimaaxi ñokaiña buidïrï go tïtïanïdamigadï ami Diuxi buitapi darakatai. Dai odami mai ïpïan gupuka go tïtïañikarudï Diuxi xi kaxkïdï asta bamioma gï agaitadai ix mai parunadagi ïgai go tïtïanïdami ix makïdï tïbagiïrï gatïanïi. Kïïga maatiga maaxi gobai. Dïï gia go tïtïïgiadami yaatagi gia mai buamï gïn ïrhiditai parunai go tïtïanïdami tïbagiana.

¹² Daiñi, go tïtïïgiadami yaatagi ïgai parunaiña ixtumaxi mai maatï mai kïïga biakatai tïgibudagai. Naana maaxi soimaaxi buirudagai ibuayi ïgai mai kïïga gïn tïgitokatai ïpïan dukai go oidigana kïkïixi ix makïdï go óídakami buyiña dai kodaiña. Dai gïn kodituda agai ïgai ïpïan dukai kïkïixi ïpï.

¹³ Soi buididiña ïgai jaa yaatagiditai tudu dai kaxkïdï soimaaxi taatamada agai ïgai. Bhaitoma bïïxi soimaaxi ibuadami mosïkaxi tukarï ibuadana soimaaxigadï xïïxkadï jaa mai nïijadagi. Xaïraiña ïgai ix jaa nïijadagi kaxkïdï. Dïï gia go tïtïïgiadami yaatagi ojoidi xi asta tasïrï ibuadagi bïïxi go soimaaxi ix makïdï tañiagi tukugadï. Ïmo xaïraragai aapimï gïn bïïtarï ix gïn ïmadï darakagi ïgai tudu. Mai xaïraitai gïn urapïkïi ïgai dukami xi ïr kïïga ibuadamikamudai ïgai xïxkadï ïmapi gakuadagi aapimï dïï gia apia oidiña ïgai soimaaxkamigadï. Ïmo buirumadaragai dukai gobai dai kïïga ojoidi ïgai xi gïn bupuirumadadagi podukai.

¹⁴ Ïgai mos nïidiña oki dai ka ojiadan taadakana dai biaka ïrhidiña. Dai mai ibhiokorïi soimaaxi ibuadatai. Abïnakidiña ïgai odami ix makïdï mai gupuka buaboidaradï sai soimaaxi ibuada dai podukai gïpiïrï daitudai dai sïïrhikïdï koimudadï tutuiga. Agia soimaaxi taatatulda agai Diuxi ïgai tudu.

¹⁵ Ka dagito ïgai go kïïgadukïdï boi tudu dai ïpïan buayi ïgai go maradï Beor ix makïdï Balaam tïgidu dai oidakatadai ïïki. Ïgai arhiï ojoiditadai tuminxi dai soimaaxi iduña agaitadai gamaitïkïda ïrhiditai.

¹⁶ Dïï gia go soigadï axñitu ño ïmo odami dukai dai bhagaidi xi kaxkïdï go Balaam ïmadukai gï tïgito dai dagito go buirudagai ix makïdï iduña agaitadai.

¹⁷ Go tïtïïgiadami yaatagi ïgai maiti ibuayi soiñi jaa bïïtarï toma lïïchi. Ïpïan dukami ïgai bapabiki ix makïdï ka gakixa dai mai bia sudagi óídakami bïïtarï. Dai ïpïan dukami ïgai ïpï iikomai ix makïdï otoma bhïï ajiopai ïbïrhi dai mai dukitudai oidigi. Maiti ibuayi ïgai soiñi tudu dai gokiïrï bii agai ïgai xako bïïxi adaama tukamuga.

¹⁸ Kïïga gïgïrdukami gïn aagai ïgai ïïgi dai ñokidï kïïga yoobikan kaiti dïï gia maiti ibuayi soiñi bïïtarï ix makïdï kaïkagi. Pokaiti ïgai sai bia aatïmï oigaragai xi ibuadagi ïïgi ixtumaxi ipïrhiadagi aatïmï, ixtumaxi gïr tanïdagi gïr tukuga tudu. Dai podukai abïnakidi ïgai odami sai soimaaxi ibuadagi. Podukai gïpiïrï surhigai ïgai odami ix makïdï utudami bhïjimi go kïïgadukïdï boi dai utudami ka mai uurapïkïi go soimaaxi ibuadami.

¹⁹ Go tïtïïgiadami yaatagi ïgai potïtïdaiña odami sai ix oijadagi ïgai aatagidï sai podukai bhaigakamu xi ibuadagi ïïgi ixtumaxi ipïrhiadagi ïgai mai biakatai ïmo tïanïdami. Dïï gia ïïgi go tïtïïgiadami yaatagi mai tïtïïgai ix dukatai dagitoagi go soimaaxkami ix makïdï ibuadana ïgai. Ïïgidiña ïgai go soimaaxkami tudu dai ka pipioñigadï dukai bipiïyi ïgai go soimaaxkami. Xibi go soimaaxkami ïr tïanïdamigadï dukai tudu. Dai kïïga gï maatï sai odami ix makïdï mai tïtïïgai ix dukatai dagitoagi go soimaaxkami kaxi ïr pipioñigadï dukai gobai. Go soimaaxkami ka aaduinturhimi tudu dai ka mai bhaigakana ïgai xi dagitoagi daidi iduñagi ixtumaxi buaboikïdï iduña ïrhidiña.

²⁰ Daiñi, ïïmo odami mamaatïrïi sai Suxi Kristo ïgai daidi ïr go Tïanïdami dai saidi ïr kïïgakïrï bubiadamigadï óídakami ïpï. Dai podukai mamaatïrïi ïgai ixdukatai bhaiga odami xi buañixikami dukai óídakagi Diuxi buitapi. Dai ka maatïkatai ïgai go Suxi ka daadagitoiña ïgai go soimaaxkami ix makïdï oidaga tami oidigi daama. Dïï gia xi gokiïrï gïn bapasadagi ïgai ïpamu go soimaaxkamiïrï dai gïn dagitoagi ix gïn tïanïdagi gobai asta xako ka mai tïtïïgai ïgai ix dukatai dagitoagi, aidï gia bamioma soimaaxi bipiïyi ïgai xi bhai xi aidïxi mai kia maatïkatadai ïgai Suxi.

²¹ Ka máí ïgai ix dukatai bhaiga odami xi buañixikami dukai óídakagi tudu dai gokiïrï ka mai ïïgidi ïgai go ñokidï Diuxi xako gïr tïjai ïgai sai ïgai bïïtarï óídakana aatïmï ïkobai darakatai aatïmï go soimaaxkamiañdïrï tudu. Xioma ïr kïïgaikamudai ïgai bïïtarï ix mai kia maatïkamudai ixdukatai buañixikami óídakagi tudu.

²² Ïpïan buayi ïgai go ñoki ix makïdï ikaiti sai, —Googoxi biotaiña dai ïpamu kuadana bioxidï. Dai go tataixorhi tomax kïïga gïn bapaïtïxdagi ïgai bïïxkïrï ïpamu gïn tukurhimadai ïgai bhidai saagida bapasaitai— ikaitiña odami. Po ïrhiadan buayi go odami ix makïdï dagitoagi go soimaaxkami dai gokiïrï ïpamu gïn bapasagi ami tudu.