2 Pedro 1 - Northern Tepehuan Bible

Biaturhi Piduru go buaboitudadami

¹ Bhaiga gin aaduñi Diuxi amadïrï. Aanï ïr Ximuñi Piduru dai ïmo pioñigadï aanï Suxi Kristo otosadïkatai aanï ïgai. Gïn ojidi aanï aapimï ix makïdï buaboitudai ïpïandukai aatïmï ix makïdï ïr ojotosadï Suxi Kristo. Suxi Kristo ïr gïr Diuxiga dai gïr kïïgakïrï bubiadamiga. Kïïga buañixikami dukai dai kïïga sïïrhi aatadui ïgai dai podukai aatadunakai ïgai gïn ayi aapimï oigaragai ix kïïgakïrï bubuakiagi aapimï.

² Gïn daanturhiña aanï saidi bamioma kïïga maatïkana aapimï Diuxi ïmadï Suxi Kristo Gïr Nukadakami, saidi podukai maatï taatana aapimï xïï kïï tuiga ïgai gïn bïïtarï dai sai kïïga ibhïxtakan taadakana gïn ibhïdaga.

Gï agai go buaboitudadami xi bïïx tasai bamioma bhai tutiakagi ïpïandukai ix tuiga Diuxi

³ Gin aaduñi, kaxi gïr maa Suxi Kristo bïïxi aïkatai ixtumaxi tïgito aatïmï buaboitudadami saidi bhaigakana aatïmï xi kïïga buañixikami oidakagi Diuxi buitapi. Podui ïgai ïïgi gubukarhigadïkïdï tudu Diuxikatai ïgai. Ka máí aatïmï Suxi Kristo tudu dai kaxkïdï gïr maa ïgai bïïxi ixtumaxi tïgito aatïmï. Gïr tïtïgidi ïgai xïïxi ïr gïdukami ïgai tudu dai xïïxi kïï tuiga ïpï dai ka maatïkatai aatïmï gobai ka ipïrhi aatïmï xi oijadagi. Gïr tïtïïgidi ïgai xïïxi ïr gïdukami ïgai dai xïï kïï tuiga dai gobai ïr ïmo abïnakidaragai dukai gïr bïïtarï ix urabagi aatïmï. Podukai gïr abïnaki ïgai ix urabagi aatïmï tudu.

⁴ Dai gïr aagidi Suxi mui ñoki kïïga gupukami dai kïïga namïakami ïpï dai ïgaikïdï gï báí ïgai saidi gïr maaki agai naana maaxi kïkïïgadukami ixtumaxi. Sïïrhikïdï gubuka ïgai tudu dai kïï tuiga dai kaxkïdï gïr aagidi ïgai go naana maaxi namïakami ñoki gobai. Dai go ñoki ix makïdï gïr aagidi ïgai gïr maakai tïgibudadï Diuxi saidi ka biakatai aatïmï tïgibudadï Diuxi ka ïpïan tutiakana aatïmï ïgai. Kaxkïdï tomaxi soimaaxi iduña ïrhidi go óídakami ix makïdï mai buaboitudai dai naana maaxi oidaga soimaaxkami tami oidigi daama bïïxkïrï kïïgakïrï bubuakïi aatïmï go soimaaxkamiañdïrï.

⁵ Kaxkïdï ka maatïkatai aapimï ixtumaxi idui Diuxi gïr bïïtarï gï agai sai kabami gïn aajagïdagi aapimï dai apia oijadagi gïn buaboidaraga kïïga buaboitudaitai aapimï Suxi Kristo. Dai bhodïrï ka kïïga buaboitudaitai aapimï gï agai ïpï sai kabami gïn aajagïdagi dai kïï bhai tutiakagi ïpï mai soimaaxi ibuadatai. Dai bhodïrï ka kïï bhai tutiakatai aapimï gï agai ïpï sai kabami gïn aajagïdagi dai bamioma mamaatïrdagi ixtumaxi ïr buaboi.

⁶ Dai bhodïrï gï agai sai maatiagi aapimï ixdukatai gïn nukadakagi ïpï sai maiti ibuada aapimï soimaaxkami ix makïdï gïn tanïdagi ïïgi gïn tïgibudaga. Dai bhodïrï gï agai sai apia buaboitudada aapimï ïpï xïïxkadï soimaaxi taatamadagi aapimï. Dai gï agai ïpï sai ïïgiada aapimï Diuxi bïïxi aïkatïrï ixtumaxi ibuadagi aapimï.

⁷ Dai bhodïrï ka kïïga ïïgiditai aapimï Diuxi gï agai ïpï mïx kïïga oigïdadagi aapimï gïn aaduñi Diuxi amadïrï ïmo gïn xïgïmï dukai. Dai bhodïrï gï agai sai oigïdada aapimï bïïxi go gaa óídakami ïpï. Podukai abïr óídaka tudu maatïkatai ixtumaxi idui Diuxi gïr bïïtarï.

⁸ Daiñi, ix bïïx tasai bamioma po tutiakagi aapimï ix dukatai ojixi tami, gobai gïn soiñamu sai bamioma kïïga ïmadagi aapimï Suxi Kristo Gïr Nukadakami. Dai kïïga ibuadamu aapimï naana maaxi ixtumaxi kïkïïgadukami ïpï ka kïïgioma ïmadatai aapimï Suxi.

⁹ Odami ix makïdï mai po tutiakagi ix dukai gïn aagidi aanï, ïgai maiti gïn tïgito nïidiña ixtumaxi ïr kïïgadukami. Ïpïan ibuadami ïgai ïmoko ix makïdï mai kïïga nïayi dai mosïkaxi nïidi ixtumaxi miadïrï dakagi. Mosïkaxi tïtïitoiña ïgai ixtumaxi nïidi ïgai tami oidigi daama tudu dai mai tïgito ajiopaiña ïgai go naana maaxi namïakami ñoki ix makïdï gïr aagidi Diuxi. Dai mai tïtïitoiña ïgai ïpï sai Suxi Kristo ka buañixikami bia soimaaxkamigadï ix makïdï ibuadana ïgai.

¹⁰ Maiti abïr pobuada aapimï gin aaduñi dai bhaiyoma abïr kabami gïn aaga daidi kïï bhai tutiaka ix dukai aagai idi ojai. Podukai maatiga maaxkamu sai buaboikïdï ïr ïko bubaidadï aapimï Diuxi. Ix kabami gïn aagagi dai kïï bhai tutiakagi ix dukai aagai aanï aidï gia tomarhi ïmo imidagai mai gïpiïrï surhigimu aapimï.

¹¹ Dai kïïga bhai ïrhiarakïdï gïn maakimu Diuxi bakigai xako bïïxkïrï bïïtarï gatïanïi Suxi Kristo ix makïdï ïr Gïr Nukadakami dai kïïgakïrï gïr bubiadamiga.

Piduru idui idi ojai ipïrhiditai sai gokiïrï xïïxkadï ka mai tipukagi ïgai sai go buaboitudadami apia gïn tïgitoagi ixtumaxi ïr buaboi

¹² Gin aaduñi, ka kïïga maatï aapimï ixtumaxi ïr buaboi, ixtumaxi gïn aagidimi aanï idi ojiïrï tudu. Dai ka buaboitudai aapimï gobai. Dïï gia bïïxkïrï apia dudatai gïn aagidamu aanï ïpamu dai podukai gïn tïgituldiadamu aanï gobai.

¹³ Po in ïrhidi aanï tudu saidi kïïgadu xi podukai dudatai gïn mamaakadagi aanï ñoki asta xïïxkadï ukami oidakagi aanï tami oidigi daama kia.

¹⁴ Kaxi gin maatïturhi Suxi Kristo Gïr Nukadakami sai ka otoma mukia iñagai aanï tudu.

¹⁵ Kaxkïdï kabami gin aajagïi aanï gïn soiña ïrhiditai saidi gïn tïgitokagi aapimï ixtumaxi gïn aagidiña aanï. Dai kaxkïdï gïn ojidi aanï xibi saidi ka ojixikami biakagi aapimï gobai xïïxkadï ka mai tipukagi aanï tami oidigi daama.

¹⁶ Kaxi gïn aatagidiña aatïmï ix makïdï ïr ojotosadï Suxi Kristo dai gïn aagidiña aatïmï saidi kïïga gubuakami dukai aatabuayi Suxi Kristo Gïr Nukadakami tudu dai gïn aagidiña aatïmï ïpï sai ïpamu dibiagai ïgai tami oidigi daama. Kïïga ïr buaboi gobai tudu. Mai xu xi ïr buirumadaragai gobai dai maiti ïr yaatagi. Mai xu xi ïmo odami podukai gï tïgito dai gïr aagidi sai podukai aatabuayi Suxi Kristo tudu. Dai bhaiyoma aatïmï ix makïdï ïr ojotosadï kïïga nïidi gubukadadï Suxi aidïxi aimïraitadai ïgai tami oidigi daama.

^17-18 Nïidi aatïmï gubukadadï aidïxi go tubidaki daama darakatadai aatïmï ix makïdï ïr ïko busaidadï Diuxi go tubidaki tudu. Dai ami darakatadai aatïmï dai nïidi ix Diuxi gïr Oga kïïga ño Suxi bïïtarï dai nïidi aatïmï xïï kabami xigiamaaxi totoarïi Suxi Diuxikatai ïgai. Kaï aatïmï ix Diuxi gïr Oga ño tïbagiañdïrï aidï daidi ikaiti sai, —Go Suxi ïr gin Maara ix makïdï oigïdai aanï. Gobai ïr gin bhai ïrhiaraga— ikaiti Diuxi.

¹⁹ Bïïxi gobai ka ïïki abhiadïrï ka aagaiña go ñiñokituldiadamigadï Diuxi tudu dai xibi ka nïidi aatïmï dai kaï aatïmï bïïxi gobai. Dai kaxkïdï xibi asta bamioma kïïga buaboitudai aatïmï go ñoki ix makïdï aagaiña go ñiñokituldiadamigadï Diuxi ïïki. Dai kaxkïdï ïpï gï agai aapimï ix kïïga gïn tïgito kaïkagi ix kaiti ojadï ïgai ïpï. Ïgai ojadï soikïi odami sai maatiagi ixtumaxi ïr buaboi tudu. Ïpïan dukami gobai ïmo kudakarui ix makïdï kïïga maaxtudai xako tukamugakagi. Gobai kudidi tïgibudadï odami ix makïdï tukamugan duu tudu. Dai apia kudaidakamu gobai asta xïïxkadï ïpamu dibiagi Suxi Kristo. Ïmo xarhigai dukaikamu gobai gïn iibhïdaga bïïtarï aidï xïïxkadï dibiagi ïgai. Amaxi ka ugitimu go tukamudagai tudu.

²⁰ Daiñi, gï agai sai maatïkagi aapimï sai bïïxi go Diuxiañdïrï ñoki ix makïdï oja go ñiñokituldiadamigadï Diuxi ïïki maiti ïr ïïgi go ñiñokituldiadami tïgibudadï gobai.

²¹ Maiti ïr odami tïgibudadï gobai tudu. Dai bhaiyoma Diuxi Ibhïadï ïgai dai tïgitoturhi ïgai saidi ñokadana ïgai Diuxi bïïtarï. Kaxkïdï sïïrhikïdï gï agai ix kïïga gïn tïgito kaïkagi ix kaiti ïgai ojadï.