2 Korintios 9 - Northern Tepehuan Bible

Pabora aagidi go buaboitudadami sai ïkiaxdïrï bhai buadana ïgai go oidaragai go soititigami bïïtarï mai kia imïkai ïgai

^1-2 Gin aaduñi, kïï maatï aanï sai aapimï buaboitudadami Gresiïrï óídakami bhai gïn ïrhiarakïdï otosda ïrhidi ïmo oidaragai go buaboitudadami Jerusalenïrï bïïtarï. Kaxkïdï ka mai bia aanï xi bamioma gïn ojidagi gokïdï. Ka aagidi aanï go buaboitudadami tami Masedoniïrï sai ka baasumiïrï abhiadïrï ka soikïda ïrhidiña aapimï go buaboitudadami Jerusalenïrï tudu. Dai kaxkïdï ïpï go buaboitudadami ix makïdï gïn ïmpaidi aipakoga tami Masedoniïrï bhai duña ïrhidi ïmo oidaragai ïgai bïïtarï ïpï.

³ Dai kïïga maatï aanï sai aapimï ïmpaiñda ïrhidi ïmo oidaragai go soititigami amïka Jerusalenïrï bïïtarï ïpï. Dïï gia bïïxkïrï otosamu aanï go baika kïkïïrhi sai gïn soiñana ix bhai duña aapimï gobai. Kaxi aagidi aanï go Masedoniïrï óídakami sai bhai duña agai aapimï ïmo oidaragai go gaa buaboitudadami bïïtarï tudu dai maiti ipïrhidi aanï xi ïmo yaatabogami dukai biiyagi. Kaxkïdï otosamu aanï go kïkïïrhi sai gin soiñana

⁴ tadu mai kia bhai duñixikagi go oidaragai xïïxkadï ami aji aanï. Imimu aanï gokiïrioma tudu dai gin oijada agai chïki tami Masedoniïrï óídakami ïpï. Dai amaxi ix mai kia bhai duñixikagi go oidaragai aidï gia xaïrada antaada aanï dai aapimï ïpï. Ka aagidi aanï tami go buaboitudadami sai aapimï kïïga soiña ïrhidi gïr aaduñi soititigami Jerusalenïrï tudu.

⁵ Kaxkïdï podukai gin tïgito aanï dai bhaitïki otoi aanï go kïkïïrhi. Ipïrhidi aanï sai ka bhai duñixikagi go oidaragai xïxkadï amïka aiyagi aanï kaxkïdï. Ka podukai aagai aapimï saidi gamaakia ïrhidi aapimï ïmo kïïgadukami oidaragai tudu. Dïï gia daiñi, maiti abïr po gïn ïrhiada sai gogoamikïdï dukai bia aapimï ix gamaakadagi go soiñi. Ipïrhidi aanï sai bïïxi gïn bhai ïrhiarakïdï gamaakadagi aapimï bhaiyoma.

⁶ Kïïga bhai gïn ïrhiarakïdï dai bhai gïïpi abïr gamaakada tudu. Daiñi, xïxkadï gamaakadagi aapimï soiñi jaa gobai ïpïan buayi xïïxkadï ïmo odami gaïsadagi. Ix mosïkaxi lïïchi ïsadagi ïgai aidï gia mosïkaxi lïïchi yoobaiña ïpï. Dïï gia xi bhai gïïpi ïsadagi ïgai aidï gia bhai gïïpi yoobaiña ïgai ïpï.

⁷ Maiti gï agai aapimï xi po gïn ïrhiada sai gubuakïdï bia xi gamaakadagi soiñi ïpï. Gïn tïgitobïrai ïïgi aapimï xïïxi gï agai sai gamaakadagi aapimï dai pokaxi abïr gamaakada. Dai maiti gï agai sai soi gïn ïrhiadagi aapimï gamaakaitai oidaragai ïpï. Daiñi, Diuxi kïïga bhai ïlda nïidi odami ix makïdï bhai ïrhiarakïdï gamamaakadagi oidaragai.

⁸ Dai kïï bhaiga ïgai xi bïïxi aïkatai gïn maakadagi ixtumaxi tïgito aapimï kïï tuigakatai ïgai gin bïïtarï. Dai kïï bhaiga ïgai xi gïn maakadagi asta bhaibitukami ixtumaxi ïpï saidi podukai kïïga biakagi aapimï ixtukïdï soikïdagi jaa.

⁹ Daiñi, Diuxi ñokidïrï adukai ojixi, Ix odami ix makïdï kïïga xadutudai Diuxi, kïïga takoidi soiñi dai soikïi soititigami. Dai bïïxkïrï bïïtarï gï tïgitoka agai Diuxi go odami ïgai ix tuma idui ka kïï idunakai, ikaiti Diuxi ñokidïrï.

¹⁰ Daiñi, Diuxi ïgai dai muiduturhi ixtumaxi saidi podukai biakagi odami ixtumaxi tïgitokagi. Dukami, xïxkadï gaïsadagi odami Diuxi ïgai dai muidutudai go ïxtokai saidi biakana go odami ixtuma ugiagi dai ixtuma ïsadagi ïpamu. Kïï bhaiga Diuxi ix gïn maakadagi asta bhaibitukami ixtumaxi tudu saidi kïïga ibuada aapimï oiditai soiñi jaa.

¹¹ Diuxi gïn maakimu ixtukïdï kïïga soikïdagi aapimï jaa tudu bai podukai ix makïdï soi aapimï bhai gïn ïrhiadamu Diuxi ïmadï.

¹² Go buaboitudadami soititigami ix makïdï Jerusalenïrï óídaga ka kïïga biaka agai bïïxi ixtumaxi tïgito ïgai maakakai aapimï soiñi tudu. Dai ïkobïrakoga kïïga bhai gïn ïrhiadamu ïgai Diuxi ïmadï ïpï soikïitai aapimï.

¹³ Daiñi, xïïxkadï aapimï kïïga mai tudadan dukai gamaakadagi soiñi jaa, gïn tïgito nïijadamu go jaa sai buaboikïdï ïïgidi aapimï go bhai ïrhiaragai aatagi. Maatï nïijadamu ïgai sai aapimï kïïga ïïgidi go bhai ïrhiaragai aatagi ix makïdï aagaiña aapimï aipakoga aagaitai Suxi Kristo tudu. Gïn tïgito nïijadamu ïgai xïï kïïga mai tudayitai gamamaakai aapimï soiñi dai kïïga ñokadamu ïgai Diuxi bïïtarï nïiditai gobai tudu.

¹⁴ Dai ix makïdï soi aapimï gïn daanturhiadamu ïpï dai gïn oigïdadamu nïiditai ïgai xïï kïï tuiga Diuxi ïgai bïïtarï soikïitai aapimï.

¹⁵ Kïïga gï maatï tudu sai Diuxi otoi go Suxi Kristo dai bhai dui go kïïgakïrï bubaidaragai gïr bïïtarï dai gobai ïr ïmo gïdukami oidaragai bïïxkatai aatïmï buaboitudadami gïr bïïtarï. Gïr tïgibudaga mai ajïi ix gïr tïgitokagi xïï kïï tuiga Diuxi tudu dai mai tïtïgai aatïmï ñoki ixdukatai aagada aatïmï xïï kïï tuiga ïgai ïpï.