2 Korintios 8 - Northern Tepehuan Bible

Go Pabora abïnaki go buaboitudadami Korintoana óídakami saidi kïïga maakana ïgai soiñi go buaboitudadami soititigami Jerusalenïrï óídakami

^1-2 Gin aaduñi, ipïrhidi aanï sai maatïkagi aapimï sai tomaxi soi dukai dïgabuskïi go buaboitudadami aipakoga Masedonia munisipiïrï dai tomaxi ïr soititigami ïgai, tomax dukai bïïxkïrï kïïga bhai gïn ïrhidiña ïgai dai kïïga mui tuminxi ïmpagi dai mai tudayitai soikïi ïgai jaa. Diuxi ïgai dai podukai aatadui ïgai ïmadï kïï tuigakatai Diuxi ïgai bïïtarï tudu.

³ Aanï ïr nïijadami tudu sai asta bhaibitukami gamamaakaiña ïgai ixtumaxi bia soikïitai jaa. Ga mamaakaiña ïgai tomaxi ïgai mai bipiadagi ïïgi oidakaradï bïïtarï. Bïïxi bhai ïrhiaradïkïdï gamamaakaiña ïgai tudu.

⁴ Dai dudatai gïr aagidiña ïgai sai maakana aatïmï oigaragai ix otosdagi ïgai soiñi go buaboitudadami Jerusalenïrï.

⁵ Kïïga abokan dukai ibuadana ïgai ïïgiada ïrhiditai Gïr Nukadakami dai gïr ïïgida ïrhiditai aatïmï ïpï. Kaxkïdï kïïga gïïpi ïmpagi ïgai soiñi tomaxi aatïmï bhaiton mai buaboidaitadai ix pokaki ïmpaidagi ïgai.

⁶ Go Tito ïgai ix makïdï tukamïrï soi go buaboitudadami Masedoniïrï óídakami saidi ïmpaidiña ïgai soiñi. Dai kaxkïdï abïnaki aatïmï sai gamo Korintoamu imïna ïgai ïpamu dai sai aapimï gïn soiñana ïgai ïpï saidi gï naato ïmpaidagi go soiñi ix makïdï gïn aaga ïmpagi aapimï baasïkioma. Saidi naato ïmpaidana aapimï go soiñi go buaboitudadami amïka Judea munisipioana bïïtarï tudu.

⁷ Daiñi, aapimï kïï bhai maaxi ibuayi mui naana maaxi ixtumaxiïrï, dukami kïïga buaboitudai aapimï, dai kïïga saitudaga gïn tïgibudaga dai kïïga gatïtïïgidi aapimï ñoki. Bïïxi gïn bhai ïrhiarakïdï ibuayi aapimï ixtumaxi, dai kïïga gïr oigïdai aapimï. Bïïxi gobiïrï kïïga ibuayi aapimï tudu. Mosïkaxi biïga ix pokaxi kïïga ibuadagi aapimï gaïmapaiditai soiñi gïr aaduñi soititigami bïïtarï dai ix bïïxi gïn bhai ïrhiarakïdï gamaakadagi aapimï ïpï.

⁸ Maiti abïr po gïn ïrhiada sai kabami gïn tïanïda in ïrhidi aanï dai podukai gïn mamaakai ñoki. Dai bhaiyoma ipïrhidi aanï ix kïïga maaxtudagi aapimï xïï kïïga oigïdai aapimï jaa. Daiñi, gïr aaduñi buaboitudadami Masedoniïrï óídakami ka ïmpagi soiñi gïr aaduñi Jerusalenïrï óídakami bïïtarï kïïga oigïdatai ïgai. Dai xibi ipïrhidi aanï sai pobuadagi aapimï ïpï saidi gï maatïkana sai aapimï buaboikïdï oigïdai go jaa buaboitudadami ïpï.

⁹ Kïï maatï aapimï sai gïr Suxi Kristo Tïanïdamiga kïïga gïn oigïdai dai kïïga gïn tïtïïgidi ïgai ix xïï kïï tuiga ïgai gïn bïïtarï gïn oigïdatai. Kïïga biakatadai ïgai naana maaxi ixtumaxi kïïga namïakami mai kia dibiakai tami oidigi daama tudu. Dïï gia dagito ïgai bïïxi gobai dai ïmo soitigami bii. Po dui ïgai saidi biakana aapimï naana maaxi ixtumaxi kïïga namïakami gïn iibhïdaga bïïtarï tudu.

¹⁰ Gin aaduñi, baasumiïrï aapimï Korintoïrï óídakami ïgai ix makïdï ïpïgioma ipïrhi xi ïmpaidagi soiñi gïr aaduñi soititigami Jerusalenïrï bïïtarï. Dai ïpïgioma gïn aaga aapimï ïmpagi soiñi xi bhai jaa buaboitudadami xibhïako óídakami. Dai xibi aanï pobai in ïrhidi saidi kïïgadukamu aapimï gïn bïïtarï ix naatoagi aapimï go aaduindagai ix makïdï gïn aaga idui aapimï baasumiïrï. Ix naato ïmpaidagi aapimï go soiñi go buaboitudadami Jerusalenïrï bïïtarï tudu.

¹¹ Kïïga gïn bhai ïrhiarakïdï gïn aaga ïmpagi aapimï soiñi baasïkioma tudu. Dai xibi gï agai sai naato ïmpaiñdagi aapimï gobai. Maakabïrai xïïxi ixtutiadagi aapimï tudu.

¹² Diuxi kïï bhai ïlda nïidi ïmo odami xïïxkadï bhai ïrhiarakïdï gamaakadagi xïïxi ixtutiadagi tudu tomaxi mai xi gïïpi ixtutiadagi ix gamaakadagi ïgai.

¹³ Dai maiti gï agai sai gamaakadagi aapimï asta xako ukami ka mai biakagi aapimï ixtumaxi tïgito aapimï. Gï agai bhaiyoma sai bïïxkatai aapimï biakagi ixtumaxi tïgito oidakaradï bïïtarï.

¹⁴ Daiñi, xibi bhaibitukami bia aapimï ixtukïdï óídakagi dai bhaiga aapimï xi soikïdagi gïr aaduñi soititigami. Dai podukai xïduñada gokiïrï bhaibitukami biakagi ïgai bhaigakamu ïgai xi aadïrï gïn soikïdagi xïïxkadï aapimï tïgitokagi ïpï. Podukai bïïxkatai biakamu aapimï ixtumaxi tïgito.

¹⁵ Dai aidï gia po gï duñimu ixtumaxi ojixi Diuxi ñokidïrï xako aagai gobai go Israelitas aidïxi ïmpaidiña ïgai go maná. Ami ikaiti go ojai sai, Go odami bïïxkatai ampanïxi biakatadai. Ix makïdï kïïga gïïpi ïmpagi kuadagai bïïxkïrï mai bhaibitukami biakatadai ka óíditai ïgai jaa. Dai ix makïdï lïïchioma ïmpagi kuadagai bïïxkïrï mai biïgakatadai, ikaiti go ojai.

Ïpamu gamo Korintoamu otosa agai Pabora go Tito ïmadï jaa kïkïïrhi kïï tutiakami ïpï

^16-17 Gin aaduñi, gïn dibida rïrhidi aatïmï amïka Korintoana. Dïï gia aagidi aatïmï go Tito saidi gïr bhaitï imïna sai gïn ïmadï dakana amïka. Dai kïïga bhai gin ïrhidi Diuxikïdï maatïkatai sai podukai tïgitoturhi ïgai go Tito saidi gïn oigïadagi ïgai ïpïan ïxi xi dukai aanï gïn oigïdai. Dai kaxkïdï bïïxi bhai ïrhiaradïkïdï bhai aa go Tito dai gamo imi agai.

¹⁸ Ipïrhidi aanï sai maatïkagi aapimï ïpï sai otosa ragai ïmai gïr aduñi go Tito ïmadï ïpï. Mui buaboidadami aipako óídakami ikaitiña sai kïï sïïrhi aatabuayi go kïïrhi ix makïdï otosa ragai tudu. Kïïga gatïtïïgidiña ïgai ñoki aipakoga aagaitai go bhai ïrhiaragai aatagi tudu.

¹⁹ Dai go buaboitudadami ix makïdï tami miadïrï gïn ïmpaiñdi aagidi ïgai saidi gïr oidana daidi gïr soiña tïïgidana go tuminxi gïr aaduñi Jerusalenïrï xïïxkadï gamo iimiagi aatïmï. Go buaboitudadami ipïrhidi saidi go kïïrhi ïgai gïr soiñana idi kïï bhai maaxkami aaduindagïrï ix makïdï ibuayi aatïmï tudu gaïmpaiditai aatïmï tuminxi gïr aaduñi bïïtarï. Ibuayi aatïmï idi aaduindagai ïmo xadutudaragai dukai Diuxi Gïr Nukadakami bïïtarï tudu. Dai pobuayi aatïmï saidi gïr aaduñi Jerusalenïrï maatïkana sai bhai ïrhiarakïdï ipïrhidi aatïmï xi soikïdagi ïpï.

²⁰ Ipïrhidi aanï ïpï sai maatïkagi aapimï ix tuixidï gïr oijada agai go kïïrhi ïgai ïmadï go Tito. Gïr oijada agai ïgai sai mai ñokadagi odami no xibhïakoga. Saidi mai pokaitada odami sai mai kïï idui aatïmï go tuminxikïdï ix makïdï ïmpagi go buaboitudadami kïï tutiakatai ïgai jaa bïïtarï tudu.

²¹ Ipïrhidi aatïmï sai nïijadagi Diuxi sai kïï sïïrhi ibuayi aatïmï gïr aaduindaga tudu dai sai go odami nïijadagi ïpï.

²² Gïr aaduñi, gï agai sai maatïkagi aapimï ïpï saidi otosa ragai ïpï ïmai kïïrhi go Tito ïmadï ïpï. Idi kïïrhi ix makïdï aagai aanï xibi ka naana dukai gï mamaaxidi sai kïï sïïrhi aatabuayi ïpï. Kïïga buaboitudai ïgai saidi kïïga ïmpaidamu aapimï go soiñi gïr aaduñi soititigami bïïtarï ix dukatai gï agai. Kaxkïdï bhai ïrhiarakïdï ipïrhidi ïgai sai gamo imi agai dai gïn soiñagi. Oijada agai ïgai go Tito ïmadï go gïmai kïïrhi tudu dai baikatai iimïda agai ïgai.

²³ Go Tito kaxi gin ïmadï gaatabuadana ïkioma abhiadïrï dai kaxkïdï gïn otoxdi aanï ïgai. Gin ïmadï gaatabuadana ïgai baasïkioma aidïxi gïn soikïiña aatïmï amïka tudu. Dai go gaa goka kïkïïrhi ix makïdï oijada agai ïr ojotosadï go buaboitudadami ix makïdï gïn ïmapidiña tami Masedoniïrï. Ïgai bïï gokatai kïïga xadutudai Suxi Kristo bïïxi aïkatïrï ixtumaxi ibuadagi ïgai.

²⁴ Kïïga abïr ïmpaiñda soiñi tudu go buaboitudadami soititigami bïïtarï sai podukai maatïkana ïgai sai buaboikïdï oigïdai aapimï. Dai sai maatïkana ïgai ïpï ix tuixi bhai gïr ïrhidiña aatïmï aapimïkïdï mos ïï kïïga oigïdatai aapimï jaa.