2 Korintios 7 - Northern Tepehuan Bible

Go Pabora kïïga sïïrhi maa ñoki go Korintoïrï óídakami kïïga oigïdatai ïgai

¹ Aapimï gin aaduñi ix makïdï kïïga oigïdai aanï, kaxi gïr aagidi Diuxi saidi gïr saagida oidaka agai ïgai. Kaxkïdï tïtai maigobai dasa bïïxi aïkatai go soimaaxkami ix makïdï gïr tukurhimadagi gïr tukuga ïmadï gïr ibhïdaga. Tïtai ïkobai óídaka bïïxi go soimaaxkamiañdïrï tudu dai go ïïgi Diuxi bïïtarï óídaka kïïga xadutudaitai aatïmï.

² Gin aaduñi, ipïrhidi aatïmï xi kïïgioma gïr oigïada aapimï dai ix kïïga gïr ïmadagi aapimï ïpï. Aatïmï ka naana dukai mamaaxidi sai gïn oigïdai aatïmï tudu. Daiñi, tomarhi ïmo imidagai maiti soimaaxi gïn duñi aatïmï dai maiti gïn bupuirumagi aatïmï toma lïïchi ïpï gïn oigïdatai aatïmï.

³ Idi maiti ïr ïmo bhagaidaragai dukai dai bhaiyoma ipïrhidi aanï sai maatïkagi aapimï sai gïn oigïdai aatïmï. Dai apia kïïga gïn oigïdadamu aatïmï asta xïïxkadï ukami óídakagi aatïmï tami oidigi daama.

⁴ Kïïga gïn ïïmadai aanï aapimï gin aaduñi dai kaxkïdï kïï sïïrhi gïn ñokidiña aanï. Aapimï ïr ïmo gïdukami abïnakidaragai dai ïmo bhai ïrhiaragai gin bïïtarï tomaxi naana dukai soimaaxi taatamaiña aanï tudu.

Pabora pokaiti sai kïïga bhai gï ïrhidi ïgai maatïkatai sai ka ïmadukai gïn tïtïïgito go buaboitudadami Korintoana

⁵ Gin aaduñi, ipïrhidi aanï sai maatïkagi aapimï sai aidï abhiadïrï xi ayi aanï ïmadï gin aaduñi tami Masedoniïrï naana maaxi taatamaiña aatïmï soi ïrhiaragai. Kabami ibhiokoiña aatïmï tudu mai tipukatai ibhïxtaragai gïr bïïtarï. Bïïxi aipakoga xako ajiopadagi aatïmï mai biïgakana xorai gïr bui bïïtïkagi tudu. Dai ïkobïrakoga sïïrhikïdï buamï rïrhidiña aatïmï bïïxi go buaboitudadami bïïtarï ix makïdï gïn ïmpaidiña bïïxi aipakoga.

⁶ Po taadakana aatïmï tudu. Dïï gia Diuxi ïgai dai bhai ïrhiatudai buaboitudadami xïïxkadï soi gïn ïrhiadagi ïgai. Dai kïïga bhai gïr ïrhiatu Diuxi baasïki bhaigobai otosakai ïgai go Tito.

⁷ Dai mai xu xi mosïkaxi gokïdï bhai gïr ïrhidi aatïmï gïr ïmadï dakatai go Tito. Daiñi, kïïga bhai gï ïrhiatugai go Tito aapimïkïdï dibiakai ïgai tami dai gobai ïr ïmo bhai ïrhiaragai aatïmï gïr bïïtarï ïpï. Gïr aagidi go Tito sai gin tïtïitoi aapimï dai gin nïijada ïrhidi aapimï ïpamu. Pokaiti ïgai ïpï sai sïïrhikïdï soi gïn ïrhidi aapimï go soimaaxkamikïdï ix makïdï oidakatadai gïn saagida dai sai kïïga buamï gïn ïrhidi aapimï gin bïïtarï ïpï. Bïïxi gobai ïr ïmo gïdukami bhai ïrhiaragai aanï gin bïïtarï.

^8-9 Gin aaduñi, kïï maatï aanï sai soi gïn ïrhiatu aanï go gïmai ojaikïdï ix makïdï gïn otoxdi aanï baasïki. Kabami gïn ñokidi aanï go ojiïrï kaxkïdï. Dai tukamïrï soi gin ïrhiditadai aanï ïpï gokïdï. Dïï gia xibi ka mai soi gin ïrhidi aanï. Mai xii tïbïpi soi gïn ïrhiditadai aapimï nïiditai go ojai kaxkïdï. Dai xibi aanï aagai sai kïi dui sai soi gïn ïrhiatu aapimï lachi. Gï agaitadai gobai tudu. Xibi maatï aanï sai gïn soi go soi ïrhiaragai sai podukai otoma ïma dukai gïn tïtïïgito aapimï dai dagito aapimï go soimaaxi ix makïdï ibuadatadai aapimï. Dai gokïdï kïïga bhai gin ïrhidi aanï xibi. Diuxi ipïrhi sai soi gïn ïrhiadagi aapimï lachi tudu sai ïma dukai gïn tïtïïgitoagi aapimï. Dai gobai itïiya ïrhidi sai aidïxi soi gïn ïrhiditadai aapimï go ojaikïdï ix makïdï gïn otoxdi aatïmï gobai mai soi gïn dodai dai bhaiyoma idui gobai soiñi gïn bïïtarï.

¹⁰ Daiñi, xïïxkadï gïr aiyagi go soi ïrhiaragai ix makïdï Diuxi ipïrhidi xi taatagi aatïmï, xïïxkadï soi gïr ïrhiadagi aatïmï tïtïitoitai go soimaaxkami ix makïdï idui aatïmï tudu, gobai gïr soikïi sai ïma dukai gïr tïtïïgitoagi aatïmï. Gïr soikïi gobai tudu sai kïïgakïrï bubuakïna aatïmï go soimaaxkamiañdïrï dai xadïrï soi gïr ïrhidiña aatïmï ka kïïgakïrï bubuakïkai. Dïï gia xorai soi gï ïrhiadagi ix dukai soi gïn ïrhidiña go óídakami ix makïdï mai buaboitudai mai ïma dukai gïn tïtïïgitokatai tudu, aidï gia go soi ïrhiaragai maiti ibuayi soiñi dai bhaiyoma ïr mukigami dukai ibhïadï bïïtarï.

¹¹ Dïï aapimï gia kïïga gïn tïgito nïidiña ix kaiti go ojai ix makïdï gïn otoxdi aanï baasïkioma. Soi gïn ïldatu aapimï ix dukatai Diuxi ipïrhidi ix soi gïr ïrhiadagi aatïmï xïïxkadï oidakagi soimaaxi ibuadami gïr saagida tudu. Dai xibi ipïrhidi aanï ix tïtïgitoagi aapimï go naana maaxi kïkïïgadukami soiñi ix makïdï idui Diuxi gïn iibhïdagïrï go soi ïrhiaragaikïdï gobai. Kabami soi gïn ïrhiditadai aapimï oidakatai ïmo soimaaxi ibuadami gïn saagida tudu dai kabami gïn aaga ibuadatai ixtumaxi Diuxi ipïrhidi. Kïïga ipïrhiditadai aapimï xi ibuadagi ixtumaxi ïr kïïga tudu. Asta bhakoikan taadatu aapimï go soimaaxkami buidïrï dai kabami buamï gïn ïrhiditadai aapimï xi duñada apia imïdagi go soi soimaaxkami gïn saagida. Kaxi gïgïbiturhi aapimï go soimaaxi ibuadami ix dukai gïn aagidi aanï tudu. Podukai gïn maaxiturhi aapimï saidi ka mai tipu ixtukïdï gïpiïrï gïn bupadagi jaa. Kïïga gïn soi go soi ïrhiaragai ix ïmadukai gïn tïtïgitoagi aapimï tudu.

¹² Gin aaduñi, kïïga ïr buaboi sai kïï sïïrhi gïn ojidi aanï baasïkioma aagaitai go soimaaxi ibuadami ix makïdï gïn saagida dakatadai. Dïï gia mai mosïkaxi buamï in ïrhiditadai aanï bïïtarï gobai ix makïdï soimaaxi ibuadatadai. Dai mai mosïkaxi buamï in ïrhiditai aanï gobai bïïtarï ix makïdï soi gï duiñturhi ïpï. Bamioma buamï in ïrhiditadai aanï aapimï gïn bïïtarï bhaiyoma. Ipïrhiditadai aanï sai ïma dukai gïn tïtïgitoagi aapimï sai podukai gïn tïïgidana Diuxi ix xïï kïïga gin xadutudai aapimï dai xïï kïïga gin ïïgidi ïpï ïmo sïïrhikami biakamikatai aanï. Kaxkïdï kabami gïn ñokidi aanï go ojiïrï ix makïdï gïn otoxdi aanï baasïkioma.

¹³ Kïïga gin ïïgidi aapimï tudu kïïga gin xadutudaitai dai gokïdï ka maigobai jii gin soi ïrhiaraga dai soi ïrhiaradï gobai ix makïdï gin ïmadï daraka ïpï. Kïïga bhai gïr ïrhidi aatïmï tudu. Dai asta bamioma bhai gïr ïrhidi maatïkatai xïï kïïga bhai gï ïrhiatu go Tito aapimïkïdï.

¹⁴ Baasïkioma mai kia imïkai go Tito gamo gïn dibidamu kaxi aagiditadai aanï sai kïïga gin ïïgiada agai aapimï. Dai kïïga podui aapimï. Maiti gin xaïrogidi aapimï tudu kïïga gin ïïgiditai aapimï. Kïïga ïr buaboi go ñoki ix makïdï aagidi aanï go Tito gïn aagaitai aanï aapimï tudu. Kïïga ïr buaboi gobai ïpïan dukai bïïxi go ñoki ix makïdï gïn tïtïïgidiña aanï tukamïrï abhiadïrï tudu.

¹⁵ Gin aaduñi, ipïrhidi aanï sai maatïkagi aapimï sai go Tito kïïga gïn oigïdai. Ka kïïga gïn oigïdaiña ïgai aidï abhiadïrï xi amïka gïn ïmadï dakatadai ïgai tudu. Dai xibi asta bamioma gïn oigïdai ïgai tami dakatai, gï tïgitokatai ïgai ix kïïga ïïgidi aapimï ñokidï dai ix kïïga xadutudaitai miadïgi aapimï amïï aïkai ïgai baasïki ïpï.

¹⁶ Dai aanï kïï bhai gin ïrhidi aapimïkïdï ïpï. Kïïga buaboitudai aanï saidi iduñimu aapimï bïïxi ixdukatai Diuxi ipïrhidi kaxkïdï.