2 Korintios 6 - Northern Tepehuan Bible

¹ Gin aaduñi, aanï aatabuayi Diuxi ïmadï ibuadatai aaduindadï dai gin soikïi jaa buaboitudadami ïpï. Dai xibi bïïxi gïr ibhïdagakïdï gïn maakai aatïmï ñoki idi ojiïrï. Gïn tïgitobïrai xïï kïï tuiga Diuxi aapimï gïn bïïtarï gïn maakakai ïgai ix dukatai kïïgakïrï bubuakiagi aapimï tudu. Diuxi gïn maa ïmo kïïgadukami oidaragai tudu. Dai xibi kabami gïn abïnakidimi aatïmï sai kïïga óídakagi aapimï ixdukatai gï agai maamaradïkatai aapimï Diuxi. Ïma dukai maiti ibuadamu soiñi gïn bïïtarï bïïxi gobai ix makïdï gïn maa Diuxi.

² Daiñi, Diuxi ikaiti ïïki sai, Aidïxi ayi ixtuigako kïïgakïrï bubuakiagi aapimï óídakami kïïga gïn kaï aanï gin daanïitai aapimï. Dai amaxi gïn soi aanï, ikaiti Diuxi. Kïïga abïr kaïka ixtumaxi gïn aagidimi aatïmï tudu. Daiñi, Diuxi ka bhaigobai otoi gïr kïïgakïrï bubiadamiga dai gïr maaki ïrhidi go kïïgakïrï bubaidaragai. Gobai itïiya ïrhidi sai Diuxi ka bhai dui bïïxi aïkatai ix tumaxi gï agai saidi kïïgakïrï bubuakïna bïïxi óídakami tudu.

Go Pabora ïmadï aaduñdï kïïga sïïrhi ibuadana aaduindadï ipïrhiditai ix jaa buaboitudagi ñokidï

³ Gin aaduñi, aanï ïmadï go gaa ix makïdï gin ïmadï aatabuayi kïï sïïrhi ibuadana gïr aaduindagai sai mai tipukana tomarhi ïmo sobhidaragai ix go odami buaboitudagi gïr ñoki.

⁴ Ipïrhidi aatïmï sai go óídakami kïïga maatïkana ibhïgadïrï sai buaboi aagai aatïmï tudu ojotosadïkatai aatïmï Diuxi. Gïr kabakadaiña aatïmï tudu daidi apia kïïga ibuadana gïr aaduindaga tomaxi naana dukai soimaaxi taatamaiña aatïmï.

⁵ Ïïmo imidagai gïr gïikarsaiña jaa dai ïïmo imidagai gïr maamaixapaiña ïpï. Ïïmapïkïrï gïr bupui surhigïiña mui óídakami dai gïr iñakidiña gïr kïïdaitai. Sïïrhikïdï biakana aatïmï xi kabami aatabuadagi dai mui tukagi mai kokosïiña aatïmï dai taatamaiña bhiugigai ïpï.

⁶ Aatïmï naana dukai mamaaxidi go óídakami buitapi sai sïïrhi aatabuayi aatïmï tudu. Daiñi, go óídakami kïïga nïidiña sai bïïxi ixtuma ibuadagi aatïmï kïïga buañixi Diuxi bïïtarï. Dai kïïga nïnïidiña ïgai ïpï sai aatïmï kïïga maatï dai kïïga oidiña ixtumaxi ïr buaboi. Mai bhakoikana aatïmï buidïrï jaa dai bhaiyoma kïï tutiakana aatïmï jaa bïïtarï. Diuxi Ibhïadï gubukarhigadïkïdï óídaga aatïmï tudu dai kïïga oigïdaiña aatïmï bïïxi óídakami.

⁷ Dai Diuxi gubukarhigadïkïdï gatïtïïgidi aatïmï ñoki ix makïdï ïr buaboi Diuxi Sandadarugadï dukai gaatabuadatai aatïmï tudu. Dai bui gugukaiña aatïmï go odami ix makïdï buidïrï bïïtï Diuxi dai maiti ixtutuidiña ïgai gïr bui kïïga buañixikatai gïr oidakaraga. Kïïga buañixikami óídaga aatïmï tudu dai gobai gïr soikïi xïïxkadï gïr bui ñokadagi jaa. Gobai gïr soikïi sai mai biakagi ïgai ixtukïdï gïr bui ñokadagi tudu.

⁸ Dïï gia tomaxi gïr bui ñokadagi óídakami gobai mai xii ïr ixtumaxi gïr bïïtarï. Tomax dukai aatïmï bïïxkïrï ïr pipioñigadï Diuxi. Mai xudu ix kïïga ñokadagi óídakami gïr bïïtarï xi gïpiïrï gïr bupadagi ïgai ïpï. Daiñi, aatïmï bïïxkïrï kïïga aagaiña ixtumaxi ïr buaboi dïï gia go óídakami yaatabogami gïr aagaiña tomax dukai.

⁹ Mui óídakami gajiadïrï gïr bipiada ïrhidiña maiti gïr ïïgiada ïrhiditai tomaxi kïïga maatïkana ïgai saidi aatïmï ïr ojotosadï Suxi. Mui imidagai bhaitoma koi aatïmï soimaaxi taatamaitai dïï gia bïïxkïrï asta xibi ukami kia tami daraka aatïmï. Muiyoko imidagai gïr gïbaiña óídakami dïï gia mai kia koi aatïmï.

¹⁰ Tomaxi naana maaxi dïgabuskïi soi ïrhiaragai bïïxkïrï aatïmï bhai gïr ïrhidiña. Dai tomaxi ïr soititigami aatïmï bïïxkïrï kïïga soikïiña aatïmï jaa sai biakana ïgai naana maaxi kïïga namïakami ixtumaxi iibhïadïrï bïïtarï. Bhaitoma mai bia aatïmï ixtumaxi tami oidigi daama tudu dïï gia bïïxkïrï bhai gïr ïrhidiña ïpïan dukami ix biakamudai aatïmï bïïxi aïkatai ixtumaxi oidaga. Podukai óídaga aatïmï tudu dai kaxkïdï kïïga gï maatï saidi ïr buaboi gïr ñoki ojotosadïkatai aatïmï Suxi.

^11-12 Gïr aaduñi Korintoïrï óídakami, kïï sïïrhi gïn ñokidi aatïmï idi ojiïrï dai maiti gïn ïxtokidi aatïmï toma lachi gïn oigïdatai aatïmï. Daiñi, naana maaxi ibuadana aatïmï gïn bïïtarï dai kïïga gïn mamaakaiña aatïmï ñoki ïpï ipïrhiditai ix maatïka aapimï xïï kïïga gïn oigïdai aatïmï. Kïïga gïn oigïdai aatïmï bïïxi gïr ibhïdagakïdï tudu. Dïï aapimï gia mai aadïrï gïr oigïdai podukai.

¹³ Ipïrhidi aatïmï sai gïr oigïadagi aapimï bïïxi gïn ibhïdagakïdï ix dukai aatïmï gïn oigïdai tudu. Daiñi, ipïrhidi aanï ix maatïkagi aapimï sai aanï in bïïtarï aapimï ïr gin maamara dukai dai kaxkïdï kïïga gïn oigïdai aanï.

Maiti gï agai ix urabagi aatïmï go soimaaxkami ka bïïna darakatai aatïmï Suxi Kristo

¹⁴ Daiñi gin aaduñi, kïïga maatï aapimï sai xïïxkadï gï burhiagi ïmo boixi kïï tuigakami ïmadï ïmai ix makïdï mai maatï bapainxarïi podukai mai sïïrhi bapainxarïi ïgai. Xadïrï kïï sïïrhi imïdana go aaduindagai ix po buadagi ïmoko tudu. Dai podukai ïpï aapimï maiti abïr bhai buada ñoki dai gïn bapasada ïmadï ïmo odami ix makïdï mai buaboitudai. Gobai ïr ïpïan dukami xi gï burhiagi ïgai ïmadï tudu. Maiti gï agai gobai. Daiñi, xadïrï ïmaduga maaxkana ix makïdï kïïga ibuayi ïmadï ix makïdï soimaaxi ibuayi ¿aba? Dai go kudagi xadïrï gï ïmapidana ïmadï go tukamudagai ïpï. Gïn bupui bïïtïkan duu ïgai kaxkïdï.

¹⁵ Dai podukai ïpï Suxi Kristo ïmadï go diabora xadïrï bhai aagana xi ïmapi aatabuadagi ¿aba? Dai kaxkïdï ïmo buaboitudadami xadïrï ïmadugan dukai biakana tïgibudagai ïmadï ix makïdï mai buaboitudai ïpï.

¹⁶ Daiñi, kïïga maatï aapimï sai maiti gï agai aapimï xi go gïï kiupaigadïrï Diuxi tutusadagi uubixi dai Diuxi dukai xadutuada agadagi aapimï ïgai ami. Soimaaxi gobai tudu. Ïmo tukuragai gobai. Dai podukai ïpï aatïmï buaboitudadami maiti gï agai ix gïr bapasïdagi ïmadï ix makïdï mai buaboitudai. Gobai ïr ïpïan dukami xi kiupaigadïrï Diuxi bapasadagi aapimï ubixi. Ïmo tukugai gobai tudu. Diuxi gïr saagida oidaga kaxkïdï. Dai kaxkïdï Diuxi maa ñoki gïr aaduñi ïïki daidi potïtïdai, Ayimu ixtuigako gin aaduñi saagida oidakamu aanï Aanï ïr Diuxigadïkamu aidï dai ïgai ïr gin maamaraka agai.

¹⁷ Maiti abïr urapïkïda go óídakami ix makïdï mai buaboitudai dai soimaaxi ibuayi. Maiti gï agai tomarhi xi taatagi aapimï go naana maaxi soimaaxkami ix makïdï ibuayi ïgai tudu. Dai ix ïko darakagi aapimï go soimaaxkamiañdïrï, aidï gia kïïgakïrï gïn nïijadamu aanï.

¹⁸ Aidï gia gïn nukadamu aanï gïn Ogakatai aanï Dai aapimï ïr gin maamarakamu aidï, ikaiti Gïr Nukadakami ix makïdï bïïxi adaama gubuka.