2 Korintios 5 - Northern Tepehuan Bible

Bïïxi go buaboitudadami bhïiyi agai tukugai utudukami

¹ Kïïga maatï aatïmï tudu sai gïr tukuga ix makïdï bia aatïmï tami oidigi daama mai tïbïpi kabaka agai. Idi tukugïrï mosïkaxi chïki tasai óídaka ragai ïmo urhiñaragai dukai. Dai xïxkadï ugitiagi idi gïr tukuga aidï gia buimu aatïmï ïmai tukugai tïbagiañdïrï ix makïdï Diuxi idui dai mai xu ix makïdï odami idui. Dai gïr tukuga utudui ix makïdï bhïimu aatïmï gobai gia mai ugiti agai tomarhi ïmo imidagai.

² Aijiïgïiña aatïmï gïr tukugïrï ix makïdï bia aatïmï tami idi oidigi daama tudu dai tïtïitoi aatïmï ix xïïxkadï ka bhïiya ragai gïr tukugai utudui tïbagiañdïrï.

³ Maiti gï agai sai po gïn ïrhiadagi aapimï sai ka mai tukugaka ragai xïïxkadï ugitiagi gïr tukuga ix makïdï bia aatïmï xibi tudu. Bhïimu aatïmï gïr utudui tukugai tïbagiañdïrï kaxkïdï.

⁴ Maiti ipïrhidi aatïmï ix mai tukugakatai óídakagi aatïmï dïï gia aijiïgïitai óídaga aatïmï xibi mos ïï bïïtïkatai gïr oidakaraga tami oidigi daama. Ka otoma biaka rïrhidi gïr utudui tukugai tudu saidi ka mai tipukagi go mukigami ka kïïgakïrï óídakatai aatïmï bïïxkïrï bïïtarï.

⁵ Dai Diuxi ka bhai dui ix dukatai biakagi aatïmï gïr tukugai utudui. Asta gïr maa ïgai ïïgi Ibhïadï sai gïr ïmadï dakana tudu. Kaxkïdï kïïga maatï aatïmï saidi iduñimu Diuxi ixtumaxi gïr aagidi. Kïïga maatï aatïmï sai buaboikïdï gïr maaki agai gïr tukugai utudukami tudu. Ïma dukai xadïrï gïr maakimudai ïgai Ibhïadï sai gïr ïmadï dakana tudu.

⁶ Kaxkïdï mai buamï rïrhidi aatïmï tomarhi ïmo imidagai, ka maatïkatai sai iduñimu Diuxi ixtumaxi gïr aagidi ïgai. Kaxi gïr maa ïgai Ibhïadï tudu dai kaxkïdï maatï aatïmï saidi iduñimu ïgai ixtumaxi gïr aagidi. Dïï gia maatï aatïmï ïpï sai mai kia ïmadï daraka ragai Gïr Nukadakami, asta xïïxkadï ka ugitiagi gïr tukuga ix makïdï bia aatïmï xibi. Kia nïnïraka aatïmï gïr utudui oidakaraga Gïr Nukadakami ïmadï tudu.

⁷ Xibi apia oidiña aatïmï ixtumaxi buaboitudai aatïmï, tomaxi mai maaxi gïr bupuji bïïtarï. Podukai óídaga aatïmï xibi dai mai xu xi oidiña aatïmï mosïkaxi ixtumaxi maaxkagi gïr bupuji bïïtarï.

⁸ Daiñi, tïtïitoi aatïmï Gïr Nukadakami, ïmadï óídaka rïrhiditai tïbagiana dai kaxkïdï mai buamï rïrhiditai óídaga aatïmï tami oidigi daama. Asta ka bhai duka aatïmï ix dagitoagi gïr tukuga ipïrhiditai ix ïmadï darakagi Suxi Kristo tïbagiana tudu.

⁹ Dai kaxkïdï tomax xako darakagi aatïmï xi tïbagiana xi tami oidigi daama ïpï tomax dukai ipïrhidi aatïmï xi ibuadagi ixtumaxi bhai ïrhidi Suxi, maatïkatai sai ïmadï daraka ragai.

¹⁰ Kïïga maatï aatïmï tudu saidi biakamu aatïmï bïïxkatai xi amïka baan gukibagi buidïrï Suxi. Ami buidïrï gukibamu aatïmï tudu xako aagada agai Suxi ix bhai kïïgadu ix makïdï idui aatïmï tami oidigi daama xiïpï ix mai kïïgadu ïpï dai gïr maakimu ïgai ixtumaxi gïr ajïakagi bïïxkatai aatïmï.

Po kaiti Pabora sai ka ïmapïdui gïr oidakaraga biakatai aatïmï ïmo sïïrhikami Diuxiamadïrï

¹¹ Sïïrhikïdï gïr tïgito ajiopaiña aatïmï sai ayi agai ixtuigako aagada agai Gïr Nukadakami ix tumaxi ajïaka agai bïïxi óídakami tudu. Dai kaxkïdï kabami abïnakidiña aatïmï óídakami saidi buaboitudaiña ïgai gïr ñoki. Diuxi kïï maatï ix tutuiga aatïmï dai ix mai yaatagïi aatïmï gatïtïïgiditai ñoki. Dai ipïrhidi aatïmï sai aapimï ïpï maatïkana gïn iibhïdagïrï ix tutuiga aatïmï dai sai mai yaatagïi aatïmï.

¹² Daiñi gin aaduñi, maiti ipïrhidi aatïmï xi kïïga ñokadagi ïïgi gïr bïïtarï dai kïï tutiakami gïr aagadagi ïïgi aatïmï. Dïï kaxi gïn aagidi aatïmï sai kïï sïïrhi aatabuayi aatïmï aagaitai mosïkaxi ixtumaxi ïr buaboi. Dai tomaxi podukai ibuayi aatïmï bïïxkïrï oidakana odami ix makïdï gïr bui ñokaiña. Ïgai mosïkaxi buamï gïn ïrhidiña ix kaitiadagi óídakami dai mai xii buamï gïn ïrhidiña ix bhai buañixi ïgai iibhïadï tudu. Kaxkïdï ipïrhidiña aatïmï ix maatïkagi aapimï sai sïïrhi aatabuayi aatïmï sai podukai kïïga gïn tïgitona aapimï gïr bïïtarï dai biakana aapimï ixtukïdï kïïga ñokadagi gïr bïïtarï ïpï xïïxkadï gïr bui ñokadagi jaa.

¹³ Gï agai sai maatïkagi aapimï sai Diuxi bïïtarï aatabuayi aatïmï dai mosïkaxi buamï rïrhidi aatïmï ix kaitiadagi Diuxi gïr aagaitai. Mai buamï rïrhidi ix kaitiadagi óídakami tudu. Ix pokaitadagi óídakami sai pupuiruga aatïmï mai xudu. Ix pokaitadagi ïgai sai kïï sastudaga gïr tïgibudaga mai xudu gobai ïpï. Tomax dukai ibuayi aatïmï gïr aaduindaga gïn soiña rïrhiditai dai mai buamï rïrhidi ix kaitiadagi óídakami.

^14-15 Tomaxi naana kaitiadagi jaa, aatïmï bïïxkïrï kïïga maatï sai Suxi Kristo gïr oigïdai dai kaxkïdï sïïrhikïdï ipïrhidi aatïmï xi ibuadagi ixtumaxi bhai ïrhidi ïgai. Suxi Kristo muu bïïxkatai aatïmï gïr bïïtarï tudu dai gïr maa ïmo utudui oidakaragai. Xibi ka mai bia aatïmï xi ïïgiadagi gïr ïïkidadï oidakaragai. Ka koidadï duu bii aatïmï gïr ïïkidadï oidakaragai bïïtarï tudu. Daiñi, Suxi muu bïïxkatai aatïmï gïr bïïtarï dai gïr maa go utudui oidakaragai sai ka mai ïïgi gïr bïïtarï óídakagi aatïmï, sai ka maiti ibuadagi aatïmï mosïkaxi ixtumaxi bhai ïrhiadagi aatïmï tudu. Ipïrhidi ïgai sai ïgai bïïtarï óídakagi aatïmï bhaiyoma ibuadatai aatïmï ixtumaxi ïgai ipïrhidi. Suxi ka taata go mukigami gïr bïïtarï sai ka mai biakagi aatïmï ix taatagi gobai dai ïko biiyagi Diuxiañdïrï. Dai gï duakatu ïgai ïpamu gïr bïïtarï ïpï sai aatïmï biakana go kïïgakïrï oidakaragai ix makïdï ïgai bia ïpï urabakatai aatïmï Diuxi. Kaxkïdï gï agai sai ïgai bïïtarï óídakagi aatïmï xibi. Sïïrhikïdï kïïga gïr oigïdai ïgai kaxkïdï.

¹⁶ Kïïga maatï aatïmï xibi sai Suxi Kristo muu bïïxi óídakami bïïtarï tudu dai kaxkïdï ka ïma dukai nïidi aatïmï óídakami dai mai xu ixdukatai nïidiña aatïmï ïkioma. Ka ïmai tïgibudagaikïdï nïidi aatïmï odami tudu dai mai xu xi go tïgibudadïkïdï ix makïdï go gaa oidigi daama óídakami oidiña. Dai xibi ka ïma dukai nïidi aatïmï Suxi Kristo ïpï. Ïkioma mai kïïgakïrï nïidiña aatïmï ïgai. Ïkioma nïidiña aatïmï ixdukai go ix makïdï mai buaboitudai nïidi tudu. Dïï xibi gia ka buaboitudakai aatïmï ka gïïpi ïma dukai nïidi aatïmï go Suxi.

¹⁷ Daiñi, odami ka ïmapïbuayi xïïxkadï urabagi ïgai Suxi Kristo ïpï. Diuxi utuduturhi ïgai kaxkïdï. Dai amaxi ka buaboitudakai ïgai ka ugiatïkïi go ïïkidadï oidakaradï dai aidï abhiadïrï ka biakana ïgai ïmo utudui oidakaragai.

¹⁸ Diuxi ïgai dai gïr maakai gïr utudui oidakaragai ïmo oidaragai dukai. Suxi Kristo ka bhai dui bïïxi aïkatai ixtumaxi gï agaitadai gïr utudui oidakaragai bïïtarï kaxkïdï. Ka bhai dui ïgai ix dukatai biakagi aatïmï urabaragai Diuxi ïmadï tudu. Dai xibi gïr maa ïgai sïïrhikami sai soikïdagi aatïmï jaa óídakami sai ïgai ïpï biakana urabaragai Diuxi ïmadï.

¹⁹ Suxi Kristokïdï ka bhai dui Diuxi ix dukatai oigïldagi ïgai soimaaxkamigadï bïïxi óídakami tudu sai óídakami biakagi oigaragai ix urabagi Diuxi. Dai gïr maa ïgai sïïrhikami ix tïtïïgiadagi aatïmï óídakami ix dukatai biakagi ïgai urabaragai Diuxi ïmadï ïpï.

²⁰ Gobai itïiya ïrhidi saidi aatïmï ïr ñokituldiadamigadï Suxi Kristo ojotosadïkatai aatïmï. Dai ñokiturhimi aatïmï Diuxi ïpï. Dai Diuxi kabami buamï ïrhidi aapimï gïn bïïtarï. Kaxkïdï xibi kabami gïr aajagïi amïï dai gïn aagidimi aatïmï sai buaboitudaitai bhïna aapimï go oidaragai ix makïdï gïn maakai Diuxi sai biakana aapimï urabaragai ïgai ïmadï.

²¹ Gïn aagidamu aanï ïmo ixtumaxi aagaitai aanï go oidaragai ix makïdï gïr maakai Diuxi tudu. Daiñi, Diuxi dáí go Suxi ïmo daxdaragai dukai sai buanana gïr soimaaxkamiga mai soimaaxi ibuadamikatai ïgai toma lïïchi. Po dui ïgai saidi ka bïïna biiyagi aatïmï Suxi Kristo sai podukai buañixikami biiyagi aatïmï ïpïan dukai Diuxi. Gobai tudu ïr go gïï oidaragai ix makïdï gïr maakai Diuxi.