2 Korintios 4 - Northern Tepehuan Bible

¹ Xigian kaiti go utudui sïïrhikami tudu dai Diuxi kïï tuiga dai gïr maa oigaragai ix gatïtïïgiadagi aatïmï gobai aipakoga. Kaxkïdï mai ojodatai gatïtïïgidi aatïmï ñoki

² aagaitai ixtumaxi ïr buaboi. Oidaga jaa ix makïdï ïxtotai dukai ibuadana naana maaxi xaïrarakami dai bupuirumadai ïgai óídakami mai sïïrhi aagaitai ïgai Diuxi ñokidï. Dïï gia aanï ïmadï ix makïdï gin soikïi gin aaduindagïrï mai pobuayi. Aatïmï bhaiyoma aagai mosïkaxi ixtumaxi ïr buaboi gïr nïiditai Diuxi. Pobuayi aatïmï saidi bïïxi óídakami kïïga maatïkana iibhïadïrï sai mai yaatagïi aatïmï.

³ Daiñi, xi oidakagi xorai mai maatï kaïkagi gïr ñoki maiti ïr aatïmï gïr duñi gobai. Ïmo maaxidaragai gobai ix gïpiïrï bïïtïkami ïgai bhaiyoma dai ix taata agai gïgïbidaragai bïïxkïrï bïïtarï.

⁴ Go diabora ïgai dai gatïanïi tami idi oidigi daama tudu. Dai maatiga maaxi sai buirumadai ïgai go óídakami ix makïdï mai maatï kaïkagi gïr aatagi mai buaboitudaitai ïgai ixtumaxi ïr buaboi. Maiti ipïrhidi go diabora ix óídakami maatï kaïkagi go bhai ïrhiaragai aatagi aagaitai Suxi Kristo tudu. Maiti ipïrhidi ïgai ix maatïkagi óídakami xïï kïï tuiga dai xïï gubuka Suxi Kristo Gïr Nukadakami. Suxi ïmadï Diuxi kïïga ïmadugan maaxi dai ïmadugan tutuiga tudu.

⁵ Daiñi, aatïmï mai gïgïr tïtïanïdami dukai gïr aagaiña xïïxkadï gatïtïïgiadagi aatïmï ñoki. Gïn pipioñi dukai aatabuadana aatïmï bhaiyoma ibuadatai aaduindagai ix makïdï ïr soiñi aapimï gïn bïïtarï. Pobuayi aatïmï kïïga xadutuada rïrhiditai Suxi. Podukai mamaaxitudai aatïmï óídakami buitapi sai Suxi Kristo bïïxi adaama ïr Tïanïdami tudu.

⁶ Daiñi, Diuxi ño ïïki aidïxi kia tukamukatadai oidigi daidi itïi ïgai, Ipïrhidi aanï sai oidakana kudagi, itïi ïgai. Dai ka oidatu kudagi dai ka kudidikami bii oidigi. Dai xibi ka kudidakan dukai bia ïgai gïr iibhïdaga ïpï gïr tïtïïgiditai ïgai ixtumaxi ïr buaboi. Po dui ïgai sai ka maatïkana aatïmï xïïxi ïr gïdukami ïgai dai xïï xigian tuiga. Gïr tïgito nïiditai aatïmï Suxi Kristo podukai kïïga mamaatïrïi aatïmï xïïxi ïr gïdukami Diuxi dai xïï xigian tuiga ïgai tudu.

⁷ Gin aaduñi, go bhai ïrhiaragai aatagi ix makïdï gïr nukaturhi Diuxi kabami namïga. Bamioma namïga gobai xi bhai gïïpi tuminxi tudu. Dai Diuxi kïï gubuakami dukai aatabuayi iibhïadïrï óídakami kaïkatai ïgai go bhai ïrhiaragai aatagi. Dïï gia aatïmï mai gupuka dai mai xii kabami ïr namïakami aatïmï. Ïpïan dukami aatïmï ajayi mai xii namïakami dïï biakami tuminxi ïrana. Tomaxi mai namïga aatïmï dïï gia bia aatïmï go bhai ïrhiaragai aatagi dai gobai gia namïga. Podukai gï tïgito Diuxi tudu dai gïr nukaturhi go bhai ïrhiaragai aatagi tomaxi mai gupuka aatïmï. Podui ïgai sai bïïxi óídakami maatïkana sai ïïgi aatïmï mai bia gubukarhigai dai sai bhaiyoma Diuxi ïgai dai ibuayi aaduindadï aatïmïkïdï kïïga gubuakatai ïgai.

⁸ Gin aaduñi, aatïmï naana dukai soimaaxi taatamaiña dïï bïïxkïrï kïïga maatïkana aatïmï sai oidaga soiñi gïr bïïtarï. Ïïmo imidagai mai tïtïgaiña aatïmï ix dukatai iduñagi dai gïr soiñagi ïïgi aatïmï dïï gia Diuxikïdï tïtïgaiña aatïmï ixdukatai kïïgakïrï bubuakiagi.

⁹ Soi gïr buididiña jaa dïï gia xadïrï ïïgi gïr biana Diuxi. Tomaxi gïr bui susurhigïi jaa dïï gia Diuxi mai daadagitoi ix gïr kodagi ïgai.

¹⁰ Daiñi, oijadami aatïmï Suxi Kristo dai kïïga maatï aatïmï sai go óídakami mua go Suxi. Dai aatïmï bhai aagai ix apia oijadagi go Suxi tomaxi bïïx tasai gïr koda ïrhiadagi óídakami oiditai aatïmï ïgai. Podukai óídaga aatïmï tami oidigi daama tudu gubukadadïkïdï Suxi Kristo. Dai toma xako ajiopadagi aatïmï kïïga nïidiña go óídakami saidi ïr duakakami go Suxi dai sai aatïmï bïïna daraka ïgai. ¿Ïma dukai dukatai óídakana aatïmï gubukadadïkïdï Suxi Kristo ix maiti ïr duakakami ïgai tudu?

¹¹ Mai biïga ixdukatai gïr aiyagi mukigami oiditai aatïmï Suxi tudu. Dai ïkobïrakoga kïkïrhiokorïi aatïmï ïpï. Pomaaxi gïr oidakaraga tami oidigi daama. Dïï gia gobai gïr maakai oigaragai saidi Suxi gubukarhigadïkïdï óídakagi aatïmï, mai gupukatai aatïmï tudu. Dai podukai mui óídakami nïijadamu sai Suxi gubukarhigadïkïdï óídaga aatïmï dai maatïkamu ïgai sai kia oidaga Suxi, ïgai gubukarhigadïkïdï óídakatai aatïmï tudu.

¹² Soimaaxi taatamai aatïmï dai asta koi antaada aatïmï gïn aiturhitai go bhai ïrhiaragai ñoki. Soimaaxi taatamaiña aatïmï gïn soiña rïrhiditai mïsai aapimï kïïgakïrï óídakana tudu.

¹³ Aatïmï buaboitudai ïpïandukai ïmo ojadami Diuxi ñokidï ix makïdï oidakatadai ïïki tudu. Ïgai oja sai, buaboitudai ïgai Diuxi dai kaxkïdï aagaiña ïgai Diuxi buidïrï jaa. Dai aatïmï buaboitudai ïpïandukai ïgai ïpï dai kaxkïdï mai ugutai gatïtïïgidiña aatïmï Diuxi ñokidï.

¹⁴ Kïïga maatï aatïmï sai Diuxi duakaturhi go Suxi ïpamu mukukai ïgai. Dai buaboitudai aatïmï sai aatïmï gïr duduakatulda agai ïgai ïpï ïmadï aapimï ïpï. Dai maatï aatïmï ïpï sai baan gïr tutusa agai ïgai amïka xako daja ïgai, bïïxkatai aatïmï ix makïdï ïr buaboitudadami tudu.

¹⁵ Gin aaduñi, gïn tïgitobïrai xïï kïï tuiga Diuxi gïn bïïtarï dai gïn aiturhi go bhai ïrhiaragai aatagi. Podui ïgai tomaxi gï agaitadai ix soimaaxi taatagi aatïmï gïn aiturhitai gobai tudu dai gobai ïr ïmo maaxidaragai sai gïn oigïdai Diuxi dai sai kïï tuiga ïgai gïn bïïtarï. Diuxi ipïrhidi sai aapimï ïmadï jaa mui óídakami aipakoga óídakami maatïkagi xïï kïï tuiga ïgai gïn bïïtarï tudu saidi podukai bhai gïn ïrhiadagi aapimï Diuxi ïmadï dai bïïx tasai bamioma kïïga ñokadagi aapimï ïgai bïïtarï ïpï. Buaboikïdï ipïrhidi Diuxi ix maatïkagi aapimï ixtumaxi ïr buaboi tudu dai kaxkïdï asta dagito ïgai ix soimaaxi taatamadagi aatïmï gïn aiturhitai Diuxi ñokidï.

¹⁶ Sïïrhikïdï kïï tuiga Diuxi gïn bïïtarï tudu daidi ibuayi naana maaxi gïn bïïtarï ipïrhiditai ix oijadagi aapimï ixtumaxi ïr buaboi. Kaxkïdï apia gatïtïïgidimi aatïmï go bhai ïrhiaragai aatagi tomaxi soimaaxi taatamai aatïmï dai maiti gïr daadagitoi xi gïr maitiagi go soi ïrhiaragai toma xïïxi kabami soimaaxi taatamai aatïmï. Apia gatïtïïgidi aatïmï go bhai ïrhiaragai aatagi aipakoga tomaxi bïïx tasai bamioma ugitimi gïr tukuga tudu dïï gia bïïxkïrï bïïx tasai bamioma utudutuimi gïr iibhïdaga.

¹⁷ Go soi ïrhiaragai ix makïdï taatamai aatïmï xibi mai xii kabami bïïtï tudu daidi otoma daibuskïi. Dai gokiïrï gïr buapidamu gobai go bhai ïrhiaragai ix makïdï bïïxi adaama bhai ïrhiaraga dai bïïxkïrï bïïtarïka agai gobai.

¹⁸ Kaxkïdï mai buamï rïrhidi aatïmï ixtumaxikïdï ix makïdï nïidi aatïmï, ix makïdï kïïga maaxi gïr bïïtarï tudu. Ka otoma ugiti agai bïïxi gobai tudu. Bhaiyoma tïtïitoi aatïmï ixtumaxi mai maaxi ix makïdï bïïxkïrï bïïtarï kabaka agai.