2 Korintios 3 - Northern Tepehuan Bible

Go Pabora aagai go utudukami ñoki ix makïdï bhai dui Diuxi odami ïmadï

¹ Gin aaduñi, kaxi gïn aagidi aatïmï saidi gaatabuayi aatïmï gubukadadïkïdï Diuxi, aanï ïmadï go Tito dai go Silas tudu. Dïï gia maiti abïr po gïn ïrhiada sai gïn aagidi aatïmï sai podukai aatabuayi aatïmï ipïrhiditai sai gïgïrdukïdï dukai gïr nïijadagi aapimï. Daiñi, oidaga jaa aatabuadami ix makïdï bukatikana ïmo ojai dudunukamiañdïrï xako aagai sai kïï tutuiga ïgai dai sai sïïrhi aatabuayi ïgai. Dïï aatïmï gia mai aagai ïmo paperhi ojikami podukai ixtukïdï maatïkagi aapimï ix tuiga aatïmï dai ix dukatai aatabuayi aatïmï. Dai mai tïgito aatïmï sai gïr duiñdagi aapimï ïmo ojai ixtuma tïïgidagi jaa saidi maatïkana ïgai ix dukatai aatabuayi aatïmï ïpï.

² Toma xorai ix makïdï maatïka ïrhiadagi ix maaxi aatabuayi aatïmï mosïkaxi bia xi nïñiadagi ix dukatai óídaga aapimï dai gokïdï maatïkamu ïgai sai sïïrhi aatabuayi aatïmï. Gin aaduñi, gïn tïïtïitoi aatïmï toma xakoga ajiopadagi aatïmï. Aapimï ïr go paperhi ojixikami gïn dukami tudu gïr bïïtarï ixtukïdï kïïga mamaatïrïi óídakami ix bhai kïïga aatabuayi aatïmï. Kïïgakïrï óídaga aapimï ïïgiditai gïr ñoki tudu dai gobai ïr ïmo maaxidaragai sai kïïga aatabuayi aatïmï.

³ Daiñi, Suxi Kristo ipïrhidi sai bïïxi óídakami maatïkagi sai go aaduindagai ix makïdï idui aatïmï gïn saagida kïïga idui soiñi aapimï gïn bïïtarï. Mai aagai aatïmï ïmo paperhi xiïpï ïmo odai kaparakami xako ojixikagi lapixikïdï sai namïga gïr aaduindagai tudu. Dai bhaiyoma xibi Diuxi Ibhïadï gïn soi gïn iibhïdagïrï sai ïma dukai óídakana aapimï dai gobai ïgai dai maaxitudai sai namïga gïr aaduindaga. Diuxi Ibhïadï idui ïmo aaduindagai gïn iibhïdagïrï gïn nukadakatai aatïmï dai gïn tïtïgiditai aatïmï ñoki tudu. Ka ïma dukai óídatu aapimï dai kaxkïdï kïïga maatiga maaxi sai Suxi Kristo idui ïmo kïïgadukami aaduindagai aapimïrï kaïkatai aapimï gïr ñoki. Dai gobai ïr ïmo maaxidaragai saidi ïr ojotosadï aatïmï Suxi Kristo dai sai namïga gïr aaduindagai.

⁴ Aanï ïmadï go Silas dai go Tito kïïga buaboitudai sai namïga gïr aaduindagai Diuxi bïïtarï tudu. Suxi Kristo ïgai dai gïr namïaturhi gïr aaduindagai kaxkïdï.

⁵ Aatïmï xadïrï po gïr ïrhidiña sai ïïgi gïr gubukarhigakïdï ixtutuidïna xi ibuadagi Diuxi aaduindadï. Diuxi ïgai dai gïr maakai gubukarhigadï bhaiyoma.

⁶ Diuxi gïr maa go gubukarhigai saidi gatïtïïgiada aatïmï go utudui sïïrhikami ix makïdï bhai dui ïgai óídakami ïmadï tudu. Dai go utudui sïïrhikami mai ïpïamaaxi go ïïkidadï sïïrhikami ix makïdï maa Diuxi go Moiseskaru ïïki. Go ïïkidadï sïïrhikami ïr ïmo ojixikami ix makïdï biakatadai ix ïïgiadagi go óídakami. Dïï maiti idui soiñi gobai go óídakami bïïtarï dai bhaiyoma go ïïgi gïgïbidaragai dai mukigami buapidi gobai óídakami. Dïï gia go utudui sïïrhikami ix makïdï gïr maakai Diuxi xibi bhobai aagai sai gïr maakai Diuxi ïïgi Ibhïadï. Dai kaxkïdï xibi ka kïïgakïrï óídaga aatïmï bïïxkïrï bïïtarï gïr maakakai Diuxi ïïgi Ibhïadï.

⁷ Gin aaduñi, gïn tïgitobïrai xïïxi xigian dui aidïxi Diuxi maa go ïïkidadï sïïrhikami ojodiana ojixikami go Moises. Kïïga totoarïitadai buibasodï go Moises gubukadadïkïdï Diuxi aidïxi tïïgi ïgai go sïïrhikami go Israelitas tudu. Dai go Israelitas mai bhaigakatadai xi sïïrhi buijako nïñiadagi go Moises mos ïï kabami totoarïitai buibasodï gubukadadïkïdï Diuxi. Mai bhaigakatadai ïgai xi sïïrhi buijako nïñiadagi tomaxi kïï dukai otïrhioma totoarïitadai buibasodï go Moises. Dai go óídakami ix makïdï biakatadai go ïïkidadï sïïrhikami ka mos gïpiïrï surhigïiña mai ïïgiditai gobai. Kïïga gubuakami dukai dui go ïïkidadï sïïrhikami tudu.

⁸ Dïï gia go utudui sïïrhikami gïïpi bamioma gubuakami dukai dai xigiamaaxkami dukai ibuayi gubukadadïkïdï Diuxi. Xibi go utudui sïïrhikamikïdï gïr maa Diuxi ibhïadï tudu dai ïgai gïr maakai gubukarhigai sai kïïgakïrï óídakana aatïmï bïïxkïrï bïïtarï. Kïïga maatiga maaxi sai gïïpi bamioma xigian buayi go utudui sïïrhikami xi bhai go ïïkidadï tudu.

⁹ Go ïïkidadï sïïrhikami xigian dui tudu tomaxi ïgaikïdï gïpiïrï surhigïiña go odami mai ïïgidakai. Dai kaxkïdï kïïga gï maatï sai go utudui sïïrhikami gïïpi bamioma xigian buayi. Gokïdï kïïga buañixikami bipiïyi aatïmï Diuxi buidïrï saidi biakana aatïmï urabaragai ïgai ïmadï tudu.

¹⁰ Dai xibi go ïïkidadï sïïrhikami ka mai xii xigiamaaxi gïr bïïtarï ka biakatai aatïmï go utudui sïïrhikami ix makïdï bamioma xigiamaaxi.

¹¹ Go ïïkidadï sïïrhikami kïïga xigian dui dïï ka daibusai gobai dai xibi go utudui sïïrhikami ix makïdï gïr maa Diuxi gobai gia bïïxkïrï bïïtarï namïaka agai. Xïïxi bamioma xigian buayi gobai xi bhai go ïïkidadï tudu.

¹² Kïïga maatï aatïmï sai go utudui sïïrhikami ix makïdï gïr maa Diuxi bïïxkïrï bïïtarï namïaka agai dai kaxkïdï mai xaïraitai dai mai duduadikuitai aagai aatïmï gobai aipakoga. Kïïga maatigian kaiti go ñoki ix makïdï aagidiña aatïmï go óídakami tudu sai kïïga maatï kaïkagi ïgai.

¹³ Mai ïxtotai dukai ñokaiña aatïmï tudu. Mai ïpïan buayi aatïmï go Moiseskaru ix makïdï ïxtokaiña buibasodï ïmo ikuxikïdï saidi mai kabami nïnïidiña go Israelitas ix totoarïitadai buibasodï. Po dui ïgai tomaxi ka otïrhioma totoarhimitadai gobai. Ka daibuskimitadai ix tuigako totoarïdagi buibasodï kaxkïdï. Dai podukai ïpï xibi ka daibusai go ïïkidadï sïïrhikami.

^14-15 Daiñi, ka ïïki abhiadïrï kaapakana momodï go Israelitas dai mai maatï kaïkana ïgai go ïïkidadï sïïrhikami. Dai xibi apia kia xïxkadï kaïkagi ïgai go ojadï go Moises apia kia mai maatï kaï ïgai. Ix dukai iñana go Moises buibasodï ïïki ïmo ikuxikïdï sai mai nïijadagi go Israelitas podukai iñapikan duu tïgibudadï go Israelitas xibi dai gobai sobhikïi ix maatï kaïkagi ïgai. Dïï gia xïïxkadï ka bïïna dakagi ïmoko Suxi Kristo aidï gia maigobai aimïrai ixtumaxi sobhikïitadai ix maatïkagi ixtumaxi ïr buaboi. Ka mai iñapikan dukai tïgibudadï tudu.

¹⁶ Xïïxkadï ïmo odami buaboitudagi Gïr Nukadakami aidï ka maigobai aimïrai ixtumaxi sobhikïitadai tïgibudadï ix maatïkagi ïgai ixtumaxi ïr buaboi tudu.

¹⁷ Diuxi Ibhïadï ïgai ix makïdï aagai aanï dai ïr Gïr Nukadakami tudu. Dai xibi ka mai kuupidikan duu gïr tïgibudaga gïr ïmadï dakatai Diuxi Ibhïadï.

¹⁸ Ïpïan dukami gobai xïïxkadï maigobai gï dasagi ïmo ikuxi gïr bupuji buidïrï. Xibi ka kïïga maatï nïidi aatïmï xïïxi bhaibitukami xigiamaaxi Suxi Kristo dai xïï xigian tuiga ïgai. Diuxi Ibhïadï ïgai daidi gïr tïtïïgidi ix maaxi dai ix tuiga Suxi Kristo tudu. Dai Diuxi Ibhïadï aatabuayi aatïmïrï dai gïr soikïi saidi kïï dukai ïma dukai óídakagi aatïmï. Xibi gïr tïanïi Diuxi Ibhïadï dai aatabuayi ïgai gïr ïmadï sai bamioma ïpïan tutiakagi aatïmï Suxi Kristo dai bamioma ïpïan maaxkagi aatïmï.