2 Korintios 2 - Northern Tepehuan Bible

¹ Pobai gin tïgito aanï tudu sai mai kia gïn dibida iñagai ïpamu. Ix gïn dibidamudai aanï aidï gia gï agadamudai ix gïn bhagaidagi aanï. Dai maiti ipïrhidi aanï xi oidakagi soi ïrhiaragai xïïxkadï gïn dibidagi aanï ïpamu.

² Daiñi gin aaduñi, aapimï ïr gin bhai ïrhiaraga dai kaxkïdï maiti ipïrhidi aanï ix kabami gïn ñokidagi xïïxkadï gïn dibidagi aanï tadu soi gïn ïrhiatu aanï. Ix gïn soi ïrhiatudagi aanï gïn dibidakai aidï gia aanï soi gin ïrhiadamu ïpï. Ka aagai aanï saidi aapimï ïr gin bhai ïrhiaraga di.

³ Xïïxkadï bhai gïn ïrhiadagi aapimï aanï bhai gin ïrhidiña ïpï tudu. Maiti ipïrhidi aanï ix soi gïn ïrhiadagi xïïxkadï gïn dibidagi aanï tudu. Dai kaxkïdï ïkiaxdïrï gïn otoxdi aanï go gïmai ojai baasïki dai ami ojiïrï gia kabami gïn ñokidi aanï. Po dui aanï saidi ka maiti gï agadagi ix kabami gïn ñokidagi aanï ïpamu xïïxkadï amïka dibiagi aanï. Po dui aanï saidi mai tipukana bamioma soi ïrhiaragai xïxkadï gïn dibidagi aanï tudu.

⁴ Baasïkioma gia kabami soi gin ïrhiditadai aanï dai asta suakaitadai ibuadatai go gïmai ojai xako kabami gïn ñokidi aanï. Dïï gia gï agai sai maatïkagi aapimï sai maiti ipïrhiditadai aanï sai soi gïn ïrhiatudagi go ojaikïdï dai bhaiyoma ipïrhiditadai aanï sai maatïkagi aapimï xïï kïïga gïn oigïdai aanï.

Pabora aagidi go buaboitudadami sai oigïldana ïgai ïmoko ix makïdï soimaaxi iduitadai

⁵ Dïï gia kabami soi gïr ïrhiatu go kïïrhi ix makïdï soimaaxi idui. Kïï maatï aapimï xorai aagai aanï. Soi gïr dodai ïgai tudu, aanï ïmadï aapimï. Dïï gia kabamioma soi gïn dodai ïgai aapimï ix bhai aanï. Mosïkaxi aagai aanï ixtumaxi ïr buaboi tudu dai mai bhaibitukami ñokada in ïrhidi ïgai buidïrï.

⁶ Dai maatï aanï saidi ka buidïrï ño aapimï ïgai ix makïdï soimaaxi idui. Dai kïïga idui aapimï podukai ñokiditai. Bhaitoma bïïxkatai aapimï ka buidïrï ño ïgai tudu dai ka soimaaxi taataturhi aapimï dai xibi ka ïma dukai gï tïgito ïgai. Kaxkïdï ka maiti gï agai sai bamioma buidïrï ñokada aapimï ïgai.

⁷ Dai bhaiyoma gï agai sai oigïldagi aapimï dai bhai ïrhiatudagi ïgai. Tadu maitï go soi ïrhiaragai dai dagito ïgai go buaboidaragai.

⁸ Sïïrhikïdï gï agai sai oigïldada aapimï tudu sai maatïkana ïgai xïï kïïga oigïdai aapimï kia tomaxi soimaaxi iduitadai ïgai.

⁹ Gin aaduñi, gïn otoxdi aanï ïmo ojai baasïkioma dai gïn aagidi mïsai bhagaidana go soimaaxi ibuadami. Gïn ojidi aanï podukai maatïka in ïrhiditai ix bhai gin ïïgiadagi aapimï. Dai kïïga gin ïïgidi aapimï. Bhagaidi aapimï go soimaaxi ibuadami tudu.

¹⁰ Dai kaxkïdï kïïga buaboitudai aanï saidi gin ïïgiada agai aapimï xibi ïpï daidi oigïlda agai aapimï go soimaaxi ibuadami. Aanï ka oigïrhi ïpï maatïkatai sai aapimï oigïldamu. Aanï bia ïmo sïïrhikami Suxi Kristo amadïrï dai ka oigïrhi aanï go soimaaxi ibuadami tudu. Kaxkïdï gï agai ix oigïrhiada aapimï ïpï. Aanï ka oigïrhi buamï in ïrhiditai aapimï gïn bïïtarï tudu.

¹¹ Maiti ipïrhidi aanï sai tïïgiagi go diabora ixtukïdï soimaaxi gïr buidadagi mai oigïldakai aatïmï go soimaaxi ibuadami kaxkïdï. Kïï maatï aatïmï sai podukai aatabuayi go diabora tudu soi gïr duada ïrhiditai ïgai.

^12-13 Gin aaduñi, kabami gïn tïtïitoi aanï dai buamï in ïrhidi gïn bïïtarï. Kaxkïdï baasïki aidïxi ayi aanï Troasïrï maiti ipïrhi aanï xi ami biyagi. Mai bhai taadagatadai gin bïïtarï xi ami biyagi tudu tomaxi kïïga gin maatadai Diuxi oigaragai xi oijadagi aanï aaduindadï ami. Kïïga mui óídakami ami bhai aatadai ix kaïkagi gin ñoki tudu. Dïï gia tomaxi kïï imïitadai gin aaduindaga bïïxkïrï gïn tïgito aimïraitadai aanï kabami buamï in ïrhiditai gïn bïïtarï. Maiti gin ibhïxtakan taadatugaiña aanï kabami buamï in ïrhiditai gïn bïïtarï tudu. Dai nïnïrakatadai aanï go Tito xi ami dibiagi dai gin aagidagi ix maaxi daraka aapimï amïka Korintoana. Dïï modukai mai ayi ïgai xi kaxkïdï otoma diosagi aanï go óídakami ami Troasana dai jii aanï Masedoniamu nïnïaba iñagaitai go Tito.

¹⁴ Kïïga ïr buaboi tudu sai mai ibhïxtakan taadakana aanï mos ïï buamï in ïrhiditai gïn bïïtarï. Dïï gia gï agai sai maatïkagi aapimï sai mai soi gin ïrhidi aanï dai bhaiyoma bhai gin ïrhidi Diuxikïdï maatïkatai sai ka urabaka aatïmï Suxi Kristo dai maatïkatai ïpï sai xibi Diuxi gïr bhaitï imïi toma xako ajiopadagi aatïmï ka maitïkai ïgai go buidïrï bïïtïkamigadï. Dai xibi aatïmïkïdï aatabuayi Diuxi saidi óídakami aipakoga maatïna xorai go Suxi Kristo. Dai gobai kïïga bhai ïrhiaraga, xïïxkadï óídakami ka kïïga maatïkagi Suxi Kristo tudu. Ïpïan bhai ïrhiaraga gobai xïïxkadï po gï buadagi ïmo daxdaragai kïï xigian ubadami Diuxi bïïtarï. Kïïga bhai ïrhiaraga gobai.

^15-16 Aatïmï ïr ïmo gïdukami bhai ïrhiaragai Diuxi bïïtarï tudu aipakoga mamaatïturhitai aatïmï óídakami xorai go Suxi Kristo. Diuxi gïr nïidi ïpïan dukai go daxdaragai ix makïdï idui Suxi Kristo dai Diuxi kïïga bhai ïlda nïidi gobai. Go daxdaragai ix makïdï idui ïgai ïr ïmo kïïga bhai maaxi ubadami dukai Diuxi bïïtarï tudu. Dai xibi kïïga buaboitudaimi go óídakami ix makïdï bhai maaxi dukai gïr nïidi dai ka kïïgakïrï bubuakimi ïgai. Ïmo xigian ubadami dukai aatïmï ïgai bïïtarï ix makïdï buaboitudai tudu dai ïmo duakaragai dukai gïr nïidi ïgai ïpï. Dïï gia mai xu xi bïïxi óídakami podukai gïr nïidi. Go óídakami ix makïdï mai buaboitudai dai biaka agai gïgïbidaragai go gïï taiyïrï, ïgai gia ïmo mukiadï dubarhigadï dukai gïr nïidi. Mai bhai ïrhiarakïdï gïr nïidi ïgai tudu. Sïïrhikïdï gïïdu go aaduindagai ix makïdï gïr maa Diuxi ix maatïtulda aatïmï bïïxi óídakami xorai go Suxi. ¿Dai xorai ixtutuidïna xi ïïgi gubukarhigadïkïdï ibuadagi gobai? Mai tipu xorai. Mosïkaxi Diuxi.

¹⁷ Diuxi ïgai dai gïr maa ïmo sïïrhikami tudu. Dai kaxkïdï Diuxi gubukarhigadïkïdï aatabuayi aatïmï dai kïïga sïïrhi ñokai aatïmï ojotosadïkatai aatïmï Suxi Kristo. Dai mai xu xi tuminxikïdï gaatabuayi aatïmï gatïtïïgiditai Diuxi ñokidï aipakoga. Jaa gia go ïï tuminxikïdï gatïtïïgidiña ñoki dïï aatïmï gia cho. Kïïga maatï aatïmï sai Diuxi bïïxi nïidi ixtuma ibuadagi aatïmï kaxkïdï.