2 Korintios 13 - Northern Tepehuan Bible

Pabora aagidi go buaboitudadami sai ïma dukai gïn tïtïïgitoagi ïgai sai podukai mai biakagi Pabora ix bhagaidadagi xiïpï gïgïbituldagi xïxkadï amïka dibidagi ïgai

¹ Gin aaduñi, ka gokoako gïn dibiji aanï dai otoma gïn dibidamu aanï ïpamu. Dai xibi gïn aagidamu aanï ïpï ïmo ñoki. Daiñi, Diuxi ojadïrï ikaiti sai, Xi oidakagi ïmoko xorai gïpiïrï bupada ïrhiada ïmai dai pokaitadagi ïgai sai nïidi ix soimaaxi idui ïgai, aidï gia gï agai sai oidakagi ïpï ïmoko xiïpï goka nïijadami ix makïdï podukai aagagi ïpï. Ïbogiami podukai namïga ñokidï, ikaiti Diuxi ñokidïrï.

² Daiñi, idikïdï kaxi ïr baikojoka agai sai amïka gïn dibidagi aanï dai kaxkïdï idikïdï kaxi ïr baika nïijadami dukaika agai ix bhai kïïga ibuayi aapimï. Kaxi gïn aagidi aanï aidïxi gïn dibiji aanï baasïkioma mïsaidi kïïga gïn tïgitoka aapimï dai kïïga ibuada tadu gïn maa aanï gïgïbidaragai. Dai xibi ïkiaxdïrï gïn aagidimi aanï ïpamu ïgalbaaxi ñoki kia mïkaxdïrï dajatai aanï. Daiñi, bïïxkatai aapimï ix makïdï soimaaxi ibuadatadai baasïkioma dai aapimï ïpï ix makïdï apia kia soimaaxi ibuayi, mai kïïga gïn ïldamu xïïxkadï gïn dibidagi aanï ïpamu.

³ Aapimï ikaitiña saidi maatïka ïrhidi ix bhai buaboikïdï ïr otosadï aanï Suxi Kristo. Dai xïïxkadï amïka gïn dibidagi aanï ïpamu aidï gia nïijadamu aapimï saidi buaboikïdï ïr ñokituldiadamigadï aanï Suxi Kristo. Daiñi, Suxi ka kïïga gï maaxiturhi ix kabami gubuka ibuadatai ïgai aaduindadï aapimïrï. Kaxkïdï gï maatï sai kabami gïgïbituldamu ïgai ix makïdï ïr soimaaxi ibuadamikagi ïpï mos ïi kabami gubuakatai ïgai.

⁴ Mai gubuaka maaxkatadai ïgai aidïxi kuruxiana muu ïgai dïï gia kïïga ïr duakakami ïgai xibi gubukarhigadïkïdï Diuxi. Dai aatïmï ïpï mai gupuka ïpïandukai aidïxi kuruxiana nagiïkatadai go Suxi Kristo. Dïï gia bïïna daraka aatïmï Suxi Kristo xibi dai kaxkïdï Diuxi gubukarhigadïkïdï ibuayi aatïmï bïïxi ixtumaxi ibuadagi aatïmï aapimï gïn bïïtarï.

⁵ Daiñi, aapimï ikaitiña sai maatïka ïrhidi ix bhai bia aanï ïmo sïïrhikami Diuxi amadïrï. Dïï gia gï agaitadai bhaiyoma saidi ïïgi gïn tïgitokagi aapimï ix bhai kïïgakïrï buaboitudai aapimï. ¿Mai ix gïn ïmadï daja Suxi Kristo? Ïjï tudu. Dai gï agai sai kïïga maatïkagi aapimï gobai. Ix maiti gïn ïmadï dakagi ïgai aidï gia gobai itïiya ïrhidi sai mai urabaka aapimï ïgai tudu.

⁶ Dïï gia aanï kïïga buaboitudai sai ix kïïga gïn tïgito nïidagi aapimï aidï gia maatïkamu aapimï sai gia urabaka aapimï Suxi Kristo. Dai pobai in ïrhidi aanï ïpï sai amaxi kïïga maatï nïijadamu aapimï sai aanï ïr otosadï ïgai.

⁷ Gin aaduñi, gïn daanturhiña aatïmï ipïrhiditai ix gïn soiñana Diuxi sai mai soimaaxi ibuadagi aapimï. Ipïrhidi aatïmï sai mai soimaaxi ibuada aapimï saidi kïïgakïrï óídakana aapimï tudu dai mai xu xi ipïrhidi aanï sai kïïga ñokada jaa gïr bïïtarï kïïga ibuadatai aapimï. Mosïkaxi ipïrhidi aatïmï sai kïïga ibuada aapimï tudu dai mai buamï rïrhiditai ix kaitiadagi jaa gïr bïïtarï. Ix kïïga ibuadagi aapimï aidï gia mai xudu aatïmï gïr bïïtarï tomaxi pokaitadagi jaa sai mai kïïga ibuayi aatïmï gïr aaduindaga tudu.

⁸ Dai tomax dukai gï agai xi kïïga ibuadagi aatïmï gïr aaduindaga ojotosadïkatai aatïmï Suxi Kristo. Mai bhaiga aatïmï xi ibuadagi tomarhi ïmo ixtumaxi ix makïdï sobhidagi odami ix kaïkagi go bhai ïrhiaragai aatagi ix makïdï kïïga ïr buaboi tudu. Dai bhaiyoma aatabuayi aatïmï sai muiyoma óídakami kaïkagi ixtumaxi ïr buaboi.

⁹ Kaxkïdï bhai gïr ïrhidiña aatïmï xïïxkadï kïïga gubuakan dukai buaboitudagi aapimï. Bhai gïr ïrhidi aatïmï gokïdï tomaxi mai gupukami dukai gïr nïijadagi jaa. Aatïmï ïgai dai gïn tïtïïgidiña ñoki tudu. Dai kaxkïdï gïn daanturhiña aatïmï saidi bïïx tasai apia bamioma kabakatuna gïn buaboidaraga asta xako ukami maiti gïn biïgakagi ixtumaxi. Gobai tudu ïr gïr bhai ïrhiaraga ix makïdï gaagai aatïmï dai aatabuayi.

¹⁰ Xibi gïn aagidamu aanï ix tuixi ïkiaxdïrï gïn otoxdi aanï idi ojai mai kia imïkai aanï gamoko. Ipïrhidi aanï xi gïn soiñagi idi ojai ix kïïga ibuadagi aapimï tudu. Maiti ipïrhidi aanï xi gïn maakadagi gïgïbidaragai amïka aïkai aanï kaxkïdï. Suxi Kristo gin maa sïïrhikami saidi gïn soikïdagi aanï tudu dai mai xu xi gin maa ïgai sïïrhikami ix soi gïn duadiagi aanï ibuadatai gin aaduindaga.

¹¹ Mosïkaxi ïpï ïmo ñoki gïn aagidamu aanï xibi gin aaduñi. Bhaiga abïr gïn ïrhiada tudu daidi iduñi ixtumaxi biïga sai kïïga oijada aapimï gïn buaboidaraga. Ïmo tïgibudagai abïr biaka bïïxkatai aapimï dai kïï xioma abïr gïn uurapïkïda aipakoga. Aidï gia gïn ïmadï dakamu Diuxi. Gïn oigïdai ïgai tudu dai ïgai ïr ix makïdï gïn mamaakai ibhïxtaragai gïn iibhïdagïrï.

¹² Kïïga abïr gïn bipiaturhiada aipakoga aaduñdïkatai aapimï Suxi Kristo.

¹³ Bïïxkatai go buaboitudadami tami óídakami gïn otoxdi ïmo biatuldaragai ïpï.

¹⁴ Gin aaduñi, ipïrhidi aanï sai kïï taatana aapimï xïï kïï tuiga Suxi Kristo Gïr Nukadakami gïn bïïtarï dai sai taatana aapimï xïï kïïga gïn oigïdai Diuxi ïpï. Dai ipïrhidi aanï sai gïn soiñana Diuxi Ibhïadï sai kïïga biakagi aapimï urabaragai Diuxi ïmadï dai gïn aaduñi Diuxi amajadïrï ïmadï ïpï. Mosïkaxi.