2 Korintios 12 - Northern Tepehuan Bible

Go Pabora aagidi go buaboitudadami saidi gïn tïgito nïidiña bïïxi go tïtïïgiadami ñoki ix bhai kïïga sïïrhi ibuayi sai podukai maatïkana ix bhai buaboikïdï ïr sïïrhikami bipiakami ïgai

¹ Gin aaduñi, aanï maiti ipïrhidi xi ïmo gïdukami dukai gin aagadagi aanï ïïgi aagaitai ixtumaxi ibuadana aanï dai ixtumaxi daibusai aanïkïdï. Maiti ïr soiñi in ïrhidi aanï xi podukai ñokada aanï tudu. Dïï gia aapimï bhaitoma gubuakïdï gin aagidimi sai podukai ñokada aanï. Ïma dukai maiti gin buaboitudai aapimï sai ïr otosadï aanï Suxi Kristo. Aapimï buaboitudai go yaatabogami ix makïdï gin bui ñokaiña bhaiyoma. Kaxkïdï biakamu aanï ix gïn aagidagi ixtumaxi gin tïtïïgidi Gïr Nukadakami ïmo imidagai tïïtïkiïrï dukai sai podukai gin buaboitudana aapimï ix ïr otosadï aanï Suxi.

² Daiñi, maiti ipïrhidi aanï xi aapimï ïmo gïdukami dukai gin nïijadagi ixtumaxikïdï ix makïdï gïn aagida iñagai xibi. Dïï gia gï agai sai maatïkagi aapimï saidi ïmo imidagai gin baidakatu aanï maigo daana tïbagiamu xako tïkabioma bipiïyi tïbagiana. Kaxi ïpïdui bhaibuxtama dan maakoba umigi.

^3-4 Gin baidakatu aanï tïbagiamu xako bipiïyi buaboitudadami xïïxkadï koiyagi ïgai, xako kïï xioma óídaga ïgai tudu. Dai ïïgi Diuxi maatï ix bhai gin tukugakïdï jii aanï ix mai tukugakïdï ïpï. Dai ami tïbagiïrï kaï aanï ixtumaxi ix makïdï odami mai ajïi tïgibudadï ix aagagi dai tomarhi ïmo odami mai bia oigaragai ix aagagi ixtumaxi kaï aanï ïpï.

⁵ Maiti ipïrhidi aanï xi ïmo gïdukami dukai gin nïijadagi aapimï gïn aagidakai aanï naana maaxi ixtumaxi ix makïdï ibuadana aanï tudu. Ipïrhidi aanï bhaiyoma ix maatïkagi aapimï xïïxi mai gubuka aanï.

⁶ Ix ipïrhiadamudai aanï xi ïmo gïdukami dukai gin aagadagi aanï ïïgi aidï gia kïïga bhaigakamudai aanï xi gïn aagidagi naana maaxi ixtumaxi ix makïdï tïï aanï. Dai maiti ïr buirudagaikamudai gobai ixtumaxi gïn aagidamudai aanï. Kïïga ïr buaboikamudai gobai tudu. Dïï ka maiti gïn aagidamu aanï bamioma ix tumaxi tïï aanï. Ipïrhidi aanï sai maatïkagi aapimï ix tuiga aanï nïiditai mosïkaxi ix tumaxi buadana aanï dai ix dukatai oidakaiña aanï dai kaïkatai gin aatagi ix makïdï gatïtïïgidiña aanï ïpï. Dai mai xu xi ipïrhidi aanï ix kïï tuigakami dukai gin nïijada aapimï ixtumaxikïdï tïï aanï tïïtïkiïrï dukai tudu.

⁷ Kaxi gïn aagidi aanï saidi ipïrhidi aanï ix maatïkagi aapimï xïïxi mai gubuka aanï tudu. Kaxkïdï gïn aagidamu aanï ïpï ïmo ixtumaxi ix makïdï taatamaiña aanï. Daiñi, kïïga ïr buaboi sai Diuxi gin tïïgi naana maaxi xigiamaaxkami tïbagiïrï dïï gia gin nukadai ïgai dai maiti ipïrhidi ix ïmo gïdukami dukai gin ïrhiadagi aanï ïïgi. Kaxkïdï dagito Diuxi saidi gin ajiagi ïmo ixtumaxi diabora amadïrï ix makïdï bïïx tasai gin tomituskïi ïmo sïïxigai dukai gin tukugïrï. Diuxi dagito saidi gin ajiagi gobai sai podukai mai ïmo gïdukïdï dukai gin ïrhiadagi aanï ïïgi tudu.

⁸ Baikojo imidagai táí aanï Gïr Nukadakami sai maigobai imitudana ïgai go soimaaxi gobai gin tukugañdïrï dïï bïïxkïrï mai maigobai jii gobai.

⁹ Dai bhaiyoma pobai in tïtïdai Diuxi sai, —Maiti an maigo imituda iñagai gobai— in tïtïdai ïgai. —Dïï gia kïï tuiga aanï gï bïïtarï dai gï maakimu aanï gubukarhigai saidi gï kabakadagi aapi go soimaaxi taataragai bïïtarï. Mosïkaxi gobai tïgito aapi tudu. Xïïxkadï mai gubuakagi aapi amaxi kïïga maaxkana gin gubukarhiga gï soikïitai aanï tudu— in tïtïdai ïgai. Kaxkïdï kïïga bhai ïrhiarakïdï aagaiña aanï xïïxi mai gubuka aanï. Bhai gin ïrhidiña aanï maatïkatai sai podukai kïïgioma maaxkana gubukarhigadï Suxi Kristo gin abhana gaatabuadatai ïgai tudu.

¹⁰ Kaxkïdï bhai gin ïrhidiña aanï xïïxkadï mai gubuakan taadakagi aanï, dai xïïxkadï soimaaxi ñoki gin buidïrï surhigidagi óídakami, dai xïïxkadï soimaaxi taatamadagi aanï ïpï dai xïïxkadï gin bui surhigiagi óídakami dai naana dukai xijiakagi gin oidakaraga oiditai aanï Suxi Kristo. Bïïxi gobaikïdï bhai gin ïrhidiña aanï tomaxi mai gubuka aanï. Kïïga maatï aanï sai xïïxkadï mai gubuaka antaadakagi aanï ïïgi amaxi bamioma gubuakana aanï gubukarhigadïkïdï Suxi Kristo tudu.

Go Pabora ipïrhidi sai go buaboitudadami Korintoana óídakami kïïga oigïdana ïgai sai podukai xïïxkadï gamo imiagi biakagi ïgai ïmo kïïgadukami urabaragai ïgai ïmadï

¹¹ Gin aaduñi, ka bhaitoma ïmo buirugami dukai ñokai aanï mos ïï dudatai aagaitai aanï ixtumaxi ibuadana aanï. Dïï aapimï ïr gïn duñi ix podukai ñokai aanï. Ix kïïga ñokadamudai aapimï gin bïïtarï aidï gia maiti gï aagadamudai xi kïïga ñokadagi aanï ïïgi gin bïïtarï. Bia aanï xi ïïgi ñokadagi gin bïïtarï sai podukai maatïkagi aapimï sai buaboikïdï ïr otosadï aanï Suxi Kristo tudu. Go odami ix makïdï gïn tïtïïgidiña ñoki pokaitiña saidi kïïgioma ïr ojotosadï ïgai Suxi xi bhai aanï dai ix bhai tomax makïdï ïmai ïpï. Daiñi, kïïga ïr buaboi sai aanï maiti ïr ïmo gïdukami ixtumaxi namïakami. Dïï gia bïïxkïrï mai otïrhioma namïga aanï xi bhai ïgai ix makïdï gïn tïtïïgidiña ñoki.

¹² Aidïxi gïn ïmadï dakatadai aanï baasïkioma kïïga gin mamaaxiditadai aanï sai ïr otosadï aanï Suxi Kristo tudu. Kïïga mai ojodatai aatabuadana aanï aidï tudu daidi ibuadana naana maaxi maaxidaragai ix makïdï odami ïïgi maiti ixtutuidikïi xi ibuadagi. Kïïga xigian buadana aanï ibuadatai gin aaduindaga tudu ibuadatai aanï naana maaxi ix makïdï ïbogiami Diuxi gubukarhigadïkïdï ixtutuidi ïmoko xi ibuadagi.

¹³ Mosïkaxi ïmo ixtumaxi maiti idui aanï aidïxi gïn ïmadï dakatai aanï. Maiti gïn dagito aanï ix soi gïn buadagi aapimï gin soikïitai gïn tuminxigakïdï tudu. Dai bhaiyoma daadagitoiña aanï jaa buaboitudadami xibhïakoga óídakami saidi soi gïn buadagi gin soikïitai. Pomaaxi gobai tudu. Maiti gïn dagito aanï xi xia buadagi aapimï gïn tuminxiga gin soikïitai. Gin oigïdabïrai ix mai kïï dui aanï mai xia dunakai gïn tuminxiga tudu.

¹⁴ Gin aaduñi, otoma gïn dibidamu aanï ïpamu dai idikïdï kaxi ïr baikojoka agai xi gïn dibidi aanï. Dai xibi ïpï maiti ipïrhidi aanï xi soi gïn buada aapimï gïn dibidakai aanï. Maiti gïn tañimu aanï soiñi tudu. Mai aagai aanï gïn tuminxiga tudu dai bhaiyoma mosïkaxi ipïrhidi aanï ix gin oigïadagi aapimï. Aanï ïr gïn oga gin dukami tudu Diuxi amadïrï. Dai ïmo gaoga maiti gï agai xi maamaradïañdïrï oidakagi dai bhaiyoma gamamaakaiña ïgai ix tukïdï óídakagi maamaradï.

¹⁵ Kaxkïdï bïïxi gin bhai ïrhiarakïdï bhai aagai aanï ix gïn bïïtarï xia duadiagi bïïxi xïïxi bia aanï dai asta bïïxi gin gubukarhiga ïpï mos ïï kïïga gïn oigïdatai aanï. Daiñi, aanï gia kïïga gïn oigïdai. Asta bamioma gïn oigïdai aanï xibi ix bhai ïkioma tudu. Dïï gia aapimï ka mai xii kïïga gin oigïdai. Kïïgioma gin oigïdaitadai aapimï baasïkioma tudu. ¿Bhai ix ïr sïïrhi podukai?

¹⁶ Daiñi, ïïmadutai aapimï gia ikaitiña saidi ïr buaboi sai maiti gïn tanïiña aanï soiñi. Dïï gia bïïxkïrï jaa ikaitiña saidi gïn bupuirumadaiña aanï dai gïn popoidiña aanï gïn tuminxiga.

¹⁷ Gin aagidabïrai tudu ix dukatai gïn popoidiña aanï gïn tuminxiga. ¿Go kïkïïrhi ix makïdï gïn otoxdi aanï baasïkioma ix bhai gïn popoki ïgai tuminxi? Cho ¿aba?

¹⁸ Buaboi tudu sai abïnaki aanï go Tito sai gamo imïna dai gin dibidana dai abïnaki aanï ïmai kïïrhi ïpï sai oidiña. ¿Dai go Tito ix bhai gïn bupuirumagi dai gïn táí tuminxi? Xadïrï. Ïmadugan dukai aatabuayi aatïmï tudu aanï ïmadï Tito, mos ïmo tïgibudagai biakatai aatïmï tudu. Kaxkïdï xadïrï gïn popoidana ïgai gïn tuminxiga.

¹⁹ Gin aaduñi, kïïga gï maatï sai oidaga odami ix makïdï gin bui ñokaiña. Dïï gia maiti gï agai sai po gïn ïrhiada aapimï sai idui aanï idi ojai ïïgi gin soiña ïrhiditai buidïrï ïgai. Gï agai bhaiyoma sai maatïkagi aapimï sai bïïxi aïkatai ixtumaxi ibuadana aatïmï ïr gïn soiñaragai bïïtarï sai bamioma kabakana gïn buaboidaraga. Kaxkïdï kïïga gïn mamaakaiña aatïmï ñoki kïïga urabakatai aatïmï Suxi Kristo dai maatïkatai sai gïr nïidi Diuxi ix tuma buayi aatïmï.

²⁰ Ibuayi aanï idi ojai gïn soikïda in ïrhiditai tudu. Ipïrhidi aanï ix kïïga ibuada aapimï xïïxkadï amïka gïn dibiagi aanï, tadu soi gin ïrhiadagi aanï gïn nïiditai ix mai kïï ibuada aapimï. Xïduñada gïn bupui ñiñokadagi aapimï aipakoga aidï dai koimudadï gïn tutiakagi ïpï. Dai gïn bupui bhakoñikagi aapimï ïpï dai gïpiïrï gïn bupadagi aapimï aipakoga dai naana kaitiadagi aapimï dai gïgïrdukïdï gïn ïrhiadagi aapimï ïpï dai ka mos xixiokïdankaitiadagi aapimï amïka aïkai aanï. Maiti ipïrhidi aanï xi pomaaxi darakagi aapimï tudu xïïxkadï amïka dibiagi aanï dai kaxkïdï gïn otoxdi aanï idi ojai gïn soiña in ïrhiditai.

²¹ Aapimï ïr gin maamara dukai dai kaxkïdï buamï in ïrhidi aanï tadu xaïradagi aanï Diuxi buidïrï ix apia kia soimaaxi ibuadagi aapimï xïïxkadï amïka dibiagi aanï. Soigamu antaada aanï ix mai ïmadukai gïn tïtïgitoagi aapimï tudu. Xïïxkadï amïka dibiagi aanï maiti gï agai ix apia ibuada aapimï go tukurakami maaxkami, dukami maiti gï agai ix aipako gaïmadï boopodagi tudu. Gï agai bhaiyoma ix dagitoagi aapimï go soimaaxi tïgibudagai ix makïdï gïn bapaidi xi ibuadagi pomaaxkami soimaaxi. Maiti ipïrhidi aanï xi tïïgiagi gobai xïxkadï amïka dibiagi aanï tudu.