2 Korintios 11 - Northern Tepehuan Bible

Go Pabora potïtïdai go buaboitudadami Korintoana sai mai ïïgiada ïgai jaa ix makïdï mai buaboikïdï ïr ojotosadï Suxi Kristo

¹ Gin aaduñi, gïn aagidamu aanï xibi ïpï jaa aatagi dai maatï xi buirudagai dukai kaïka antaada aapimï dïï gia maiti abïr ojodatai kaïka gobai tomax dukai.

² Daiñi gin aaduñi, gï agai sai maatïkagi aapimï sai ix xïïxi buamï ïrhidi Diuxi gïn bïïtarï po ïxi buamï in ïrhidi aanï gïn bïïtarï ïpï. Kabami buamï in ïrhidi aanï tudu sai kïïga buañixikagi aapimï Suxi Kristo bïïtarï oiditai aapimï mosïkaxi ïgai dai mai xu xi oiditai aapimï tomarhi ïmo ïmai. Ïpïan dukami gobai ïmo gaoga xïïxkadï bhai duñagi ñoki bïïtarï ïmo maradï oki xïxkadï ïmadï bii agadagi ïmo kïïrhi. Kïïga nukadaiña ïgai maradï tudu sai mai daibuskïda ïgai ïmadï ïmai kïïrhi. Nïnïraka ïgai kia ix ïmadï biiya ïgai ix makïdï ïr kunadïka agai. Podukai gïn nukada in ïrhidi aanï tudu dai buamï in ïrhidi ipïrhiditai ix kïï buañixikagi aapimï maatïkatai saidi Suxi Kristo ïr gïn kuna dukaika agai. Gï agai sai kïïga buañixikagi aapimï ïgai bïïtarï tudu ïpïan dukami ïmo arhi oki ix makïdï kïï tuiga mai kia ïmadï biïkai tomarhi ïmo kïïrhi.

³ Buamï in ïrhidi gïn bïïtarï sai maiti gïn bupuirumadagi jaa ïpïan dukai ix dukai go diabora buirumagi go Eba ïïki tudu. Maiti ipïrhidi aanï sai kuga imïdagi gïn buaboidaraga tadu oijadagi aapimï ïmai dai mai mosïkaxi Suxi Kristo oijadagi aapimï. Gobai ïbhïidi aanï tudu.

⁴ Daiñi, kïï maatï aanï sai mai kïïga gïn nukadai aapimï dai asta bhai ïrhiarakïdï miadïgidiña aapimï tomax makïdï tïtïïgiadami ñoki ix makïdï gïn dibidagi. Kaïkana aapimï jaa ix makïdï ïma maaxi gïn tïtïïgidiña ñoki. Kaïkana aapimï ix makïdï ïma dukai aagaiña go Suxi Kristo tudu. Kaïkana aapimï tomaxi maiti ïr ïgalbaaxi aatagikagi ix makïdï gïn tïtïïgidiña aatïmï. Daiñi, ka bia aapimï Diuxi Ibhïadï gïn ïmadï dai ka buaboitu aapimï go bhai ïrhiaragai aatagi. Dïï gia bïïxkïrï kaïkana aapimï gamaakadami aatagi ix makïdï ïma dukai aagaiña Diuxi Ibhïadï dai ix makïdï ïma dukai aagaiña go bhai ïrhiaragai aatagi ïpï. Gatïtïïgidiña ïgai ïma maaxi ñoki tudu dai aapimï bïïxkïrï daadagitoiña ix gïn maakadagi ïgai ñoki dai bhai ïrhiarakïdï kaïkana aapimï. Mai kïï ibuayi aapimï pobuadatai.

⁵ Daiñi gin aaduñi, ïgai ix makïdï ïma maaxi gatïtïïgidiña ñoki pokaitiña sai ïgai ïr go adaama namïakami ojotosadï Suxi Kristo. Dïï gia aanï aagai sai aanï toma lïïchi mai otïrhioma namïga xi ïgai.

⁶ Tomaxi mai xii saitudaga aanï gatïtïïgiditai ñoki ïmpaiñdaragiana dïï gia kïïga maatï aanï go aatagi ix makïdï gïr biturhi Diuxi. Kïïga maatï aapimï saidi ïr buaboi gobai. Kïïga máí aapimï sai gia maatï aanï ixtumaxi ïr buaboi tudu nïiditai aapimï gin aaduindagai dai kaïkatai gin aatagi ïpï.

⁷ Gin aaduñi Korintoïrï óídakami, ¿Bhai ix ïr buaboi sai mai kïïga idui aanï maiti gïn taanïkai aanï tuminxi aidïxi gïn tïtïïgidi aanï go bhai ïrhiaragai aatagi?

⁸ Daiñi, aidï xibhïadïrï óídakami buaboitudadami ïgai dai gin soi tuminxikïdï sai biakagi aanï ixtukïdï oidakagi dai podukai ixtui aanï ix gïn tïtïïgiadagi ñoki.

⁹ Aidïxi gïn ïmadï dakatadai aanï mai dagito aanï ix xia buadagi aapimï gïn tuminxiga gin bïïtarï. Dai bhaiyoma go buaboitudadami Masedoniïrï óídakami gin buapi tuminxi aidïxi ka mai biakatadai aanï ixtukïdï oidakagi. ¿Ïmo soimaaxkami ix dukai mïx nïidi aapimï ix maiti gïn dagito aanï ix soi gïn buadagi aapimï? Xadïrï soimaaxkana gobai. Tomarhi ïmo imidagai maiti ipïrhidi aanï sai xia buadagi aapimï gïn buxtuidaga gin bïïtarï tudu.

¹⁰ Daiñi, Suxi Kisto kïïga maatï sai buaboi aagai aanï sai tomarhi ïmo imidagai maiti gïn taanïi aanï tuminxi. Podukai aagidamu aanï go óídakami bïïxi aipakoga amïka xako óídaga aapimï, amïka xako ukami Akaya tïgidu oidigi tudu. Aagidamu aanï sai maiti gïn taanïi aanï dai sai kïï ibuayi aanï maiti gïn taanïitai ïpï. Mai tipu xorai gin daidagi xi podukai aagidagi aanï óídakami tudu.

¹¹ Dïï gia maiti gï agai sai po gïn ïrhiada aapimï sai maiti gïn oigïdai aanï mai taanïitai aanï tuminxi. Maiti ipïrhidi aanï ix soi gïn buada aapimï bhaiyoma. Gïn oigïdai aanï kaxkïdï. Diuxi maatï sai buaboikïdï gïn oigïdai aanï tudu.

¹² Daiñi, kïï maatï aanï sai oidaga yaatabogami ix makïdï gïgïrdukïdï gïn aagaiña ïïgi dai pokaitiña saidi ïr ojotosadï Suxi Kristo gin ïpïan dukai. Dai pokaitiña ïgai sai gin ïpïan dukai aatabuayi ïpï. Dïï ïgai gia gataanïi tuminxi xïïxkadï gatïtïïgiadagi ñoki. Kaxkïdï apia modukai oijadamu aanï gin aaduindaga maiti gïn taanïitai toma lïïchi sai kïïga gïn mamaaxitudana go gaa ix yaatagïi ïgai. Pokaitiña ïgai sai gin ïpïan dukai bia sïïrhikami dai gin ïpïan dukai aatabuayi dïï gia ïgai gataanïi tuminxi dai aanï gia cho.

¹³ Yaatabogami tudu ïgai dai Suxi ojotosadï gïn aagaiña dïï maiti ïr buaboi. Mos yaatagidiña ïgai óídakami dai bupuirumadaiña tudu.

¹⁴ Gin aaduñi, kïïga maatiga maaxi ix tuixi podukai buirumada ïrhidiña ïgai óídakami. Go diabora ïgai daidi ïr tïanïdamigadï kaxkïdï. Dai kïï maatï aatïmï sai go diabora ïmo tïañikarudï Diuxi dukai gï dadasai buirumada ïrhiditai ïgai go óídakami.

¹⁵ Go yaatabogami ïgai ïr pipioñigadï go diabora tudu. Kaxkïdï kïïga bhai maaxi ibuadami dukai gïn dadasai ïgai. Dïï gia taata agai ïgai go gïgïbidaragai ix makïdï ïr ajïakami ïgai soimaaxi ibuadamikatai ïgai. Gïgïbidaragai amakoga iimïdami ïgai tudu.

¹⁶ Gin aaduñi, kaxi gin aagidi aanï naana maaxi ixtumaxi ix makïdï ibuadana aanï sai maatïkana aapimï sai kïïga ibuayi aanï Diuxi aaduindadï. Dai xibi gïn aagida iñagai ïpï lachi bamioma tomaxi buirudagai dukai kaïka antaada aapimï. Dïï gia gin kaïkabïrai tomax dukai.

¹⁷ Suxi Kristo Gïr Nukadakami xadïrï podukai ñokaiña ix dukai gïn aatagidimi aanï xibi ïïgi gin aagaitai aanï ix kïïga buayi aanï gin aaduindaga tudu. Bhaitoma ïmo buirudagai dukai aagai aanï tudu. Dïï gia gin kaïkabïrai tomax dukai.

^18-19 Daiñi, aapimï po gïn ïrhidiña sai kïïgadu gïn tïgibudaga dïï gia bhai ïrhiarakïdï kaïkana aapimï bupuirugami. Kïïga kaïkana aapimï bupuirugami ix makïdï gïn aatagidiña mosïkaxi ixtumaxi ibuadana ïgai ïïgi gubukarhigadïkïdï tudu. Dai kaxkïdï xibiki gïn aagidamu aanï ixtumaxi ibuadana aanï ïpï.

²⁰ Daiñi, aapimï kïïga mai ojodatai kaïkana jaa tomaxi gïn bui ñokaiña ïgai dai tomaxi kabami gïn tïanïiña ïgai pipioñigadï dukai dai asta gïn kaitïskïiña ïgai gïn buibasana. Dai bïïxi gobai mai buamï ïrhidiña aapimï dai bhaiyoma bhai ïrhiarakïdï kaïkana aatagidï. Gïn bupuirumadaiña ïgai tudu dai gïn popoidiña gïn buxtuidaga dai bhodïrï abhiadïrï gïn buxtuidagañdïrï óídakaiña ïgai. Gïgïrdukïdï gïn ïrhidiña ïgai tudu dai kabami gïn bhagaidiña kabami gïn tïanïda ïrhiditai.

²¹ ¿Ipïrhidi mïxi ix podukai kabami gïn tïanïdagi aatïmï ïpï? ¿Po gïn ïrhidi mïxi ïpï sai mai kïïga ibuayi aatïmï mai kabami gïn tïanïitai ix dukai ibuayi go gaa? Daiñi, ïgai ix makïdï gin bui ñokaiña mai xaïraitai gïgïrdukïdï gïn aagaiña ïïgi. Naana maaxi aagaiña ïgai maaxituda ïrhiditai saidi bia ïmo kabami namïakami sïïrhikami tudu. Dïï gia aanï aagai sai kïïga ixtutuidi aanï xi naana maaxi aagagi podukai ïpï mai xaïraitai.

²² Ïgai pokaitiña saidi ïr namïakami ïgai judidiukatai ïgai dai Israelitakatai ïpï. Dai aanï bhaiga ix potïiyagi ïpï. Aanï ïpï ïr judiu dai Israelita tudu. Ïgai pokaitiña saidi ïr piipixaradï go Abraamkaru dai kaxkïdï pokaitiña sai bamioma ïr namïakami ïgai. Dïï aanï ïr pipiixaradï go Abraamkaru ïpï di.

²³ Go ix makïdï gin bui ñokaiña gïn aagidiña sai kïïga aatabuadana ïgai Suxi Kristo bïïtarï ïpï. Dïï gia, daiñi, kïïga maatï aanï sai ïmo buirudagai dukai ikaidaga ixtumaxi gin aagida iñagai xibi dïï bïïxkïrï ïr buaboi sai aanï bamioma kïïga aatadui Suxi bïïtarï ix bhai ïgai. Kabamioma gaatabuadana aanï ix bhai ïgai tudu. Muiyoma imidagai gin maixatu aanï ibuadatai aanï Suxi aaduindadï dai muiyoma imidagai gin gïïgïtu aanï ïpï. Mai bhaiga aanï xi gin tïgitoagi xïïki imidagai gin gïïgïtu aanï tudu. Dai mui imidagai bhaitoma muu aanï ibuadatai aaduindadï Suxi ïpï.

²⁴ Taama imidagai gin maa gïgïbidaragai go tïtïanïdamigadï go judidiu ikixanaikïdï. Dai bïïxi go taamako gin gïbaiña ïgai ïmo kobhai dan bhaibuxtama dan tuxtama imidagai.

²⁵ Dai ïpï baika imidagai uxikïdï gin gïïgï ïgai. Ïmo imidagai gin maikakarai ïgai. Dai baika imidagai sudaïrï dudupi go barko ix makïdïrï imïitadai aanï. Ïmo imidagai sudagi ïrana bii aanï ïmo tasai dai ïmo tukagi ïmo uxiañdïrï nagiïkatai bhai mïkaxi go sudagi ugidïañdïrï ïpï.

²⁶ Dudatai mïkaxi aimïraiña aanï ibuadatai Suxi aaduindadï ïpï dai dudatai naana maaxi daibuskïiña aanï duadimudagai. Dukami, daibuskïiña aanï duadimudagai daibuskïitai gïgïr akiana dai daibuskïiña aanï duadimudagai gin sobhidakai ïïxibogami ïpï. Gin bui susurhigïiña gin aaduñi judidiu dai gin bui susurhigïiña xibhïadïrï óídakami ix makïdï maiti ïr judidiu ïpï. Tuma xakoga aimïraiña aanï ibuadatai gin aaduindaga daibuskïiña aanï duadimudagai xi gïgïr kiikiana aimïrdagi aanï xi oidigana xi go gïgïr sudagiana ïpï. Dai ïkobïrakoga gin bui susurhigïiña go odami ix makïdï pokaitiña saidi ïr buaboitudadami dai mai buaboikïdï ïr buaboitudadami ïgai.

²⁷ Kabami soimaaxi taatamaiña aanï gaatabuadatai tudu. Mui imidagai mai kokosïiña aanï dai bhibhiuguiña dai tonomokïrïiña ïpï. Dudatai mai biakana aanï kuadagai dai ïbamukurïiña ïpï mai biakatai kïïga yukuxi ixtukïdï gin ukadagi.

²⁸ Bïïxi gobai taatamaiña aanï tudu. Dai ïkobïrakoga bïïx tasai buamï in ïrhidiña tïtïitoitai go buaboitudadami ix makïdï gïn ïmpaidiña aipako. Kïïga bïïtï gobai tudu.

²⁹ Xïïxkadï ïmo buaboitudadami mai gubuakagi buaboidaradï aanï taatakana ïpï. Dai xïïxkadï ïmo buaboitudadami gïpiïrï gïxiagi oiditai ixtumaxi maiti ïr buaboi, aanï kabami buamï in ïrhidiña ïgai bïïtarï ïpï.

³⁰ Mai ojoidi aanï xi gïdukïdï dukai gin aagadagi ïïgi aanï xiïpï xi aagadagi ix kïïga ibuayi aanï gin aaduindaga. Dïï gia ix gï agadagi ix gin aagadagi aanï ïïgi aidï gia mosïkaxi aagada in ïrhidi aanï ix tumaxi daibusai aanïkïdï ix makïdï mamaaxidi sai mai gubuka aanï.

³¹ Daiñi, bïïxkïrï bïïtarï kïïga ñokada ragai Diuxi bïïtarï ix makïdï ïr Ogadï Suxi Kristo Gïr Nukadakami. Dai ïgai kïïga maatï saidi ïr buaboi ixtumaxi gïn aagida iñagai xibi. Dai gobaikïdï ix makïdï gïn aagida iñagai aanï gobaikïdï kïïga maatïkamu aapimï sai mai bia aanï gubukarhigai xi ïïgi ibuadagi gin aaduindaga.

³² Ïmo imidagai amïka dakatadai aanï xako Damasko tïgidu ïmo gïï kiiki. Dai ami go gïï kiiki kïïga kuupidi ïmo gïï tïkabakami bhidabiki kurarai. Daidi go kaigi ami gin bhïiya ïrhiditadai dai gatïjai ïgai sandadarugadï saidi nukadakana ami baakigïrï go gïï kiikiana saidi gin bhïna ïgai xuduku busiagi aanï. Aidïpïrï go kïïrhi Areta tïgidukïdï ïr gïï reykatadai ami.

³³ Gin bhïiyi agaitadai go sandadaru ami tudu dai biakatadai aanï xi daibuna mïrhiagi abhiadïrï. Dai oidagatadai ïmo dïgai kïïga tïkabi go gïï bhidabikiana dai ami sïïrhi gin busaitu gin aaduñi ïmo gïï asariïrï antai kïïgakïrï busai aanï.