2 Korintios 10 - Northern Tepehuan Bible

Go Pabora pokaiti sai kïïga bia ïgai sïïrhikami xi maakadagi ñoki go buaboitudadami Korintoana óídakami

¹ Gin aaduñi, pokaitiña ïïmo odami sai xïïxkadï gïn ïmadï dakagi aanï sai kïï tuigakami dukai gïn mamaakaiña aanï ñoki maiti gïn bhagaiditai. Dai pokaitiña ïgai sai mosïkaxi xïïxkadï mïkaxi dakagi aanï dai gïn ojidagi sai aidï gia bhagaidadan kaitiña gin oja. Pokaitiña ïgai gin aagaitai aanï Pabora tudu ix makïdï ibuayi idi ojai. Dïï gia gïn aagidamu aanï ïmo ñoki dai gï agai sai maatïka aapimï sai ñokiturhimi aanï Suxi Kristo aagaitai idi ñoki. Daiñi, kïï tuiga Suxi dai kaxkïdï kïï bhai maaxkami dukai gïn maakimu aanï ñoki. Kïï bhai dukai gïn aagidimi aanï mïsai gin ïïgiada aapimï tudu ñokiturhitai aanï go Suxi Kristo.

² Daiñi, pokaitiña ïïmoko sai aanï mai aatabuayi Diuxi gubukarhigadïkïdï. Pokaitiña ïgai sai ïïgi aanï ibuayi gin aaduindaga ïpïan dukai tomax makïdï oidigi daama oidakami tudu. Dai xibi kabami gïn taanïi aanï bïïxi gin ibhïdagakïdï mïsai ka mai dagitona aapimï ix apia podukai ñokada ïgai. Ïma dukai kïï maatï aanï sai xïïxkadï amïka aiyagi aanï kabami bhagaidamu aanï go ix makïdï podukai ñokai.

³ Mai ïïgi gïr gubukarhigakïdï óídaga aatïmï buaboitudadami tudu. Daiñi, kïïga ïr buaboi saidi ïr odami aatïmï ïpïandukai toma xorai. Dïï gia gïr iibhïdagïrï ïmo kokodiïrï dukai óídaga aatïmï. Kokoadami duu aatïmï tudu dai buidïrï kaatï aatïmï bïïxi gobai ix makïdï buidïrï kaatï Diuxi. Maiti gakokodai aatïmï gïr tukugakïdï ix dukai ibuayi go gaa óídakami ix makïdï maiti ïr buaboitudadami.

⁴ Dai bhaiyoma Diuxi gïr mamaakai gubukarhigai sai buidïrï gukibana aatïmï go soimaaxkami. Diuxi gubukarhigadïkïdï maitiña aatïmï bïïxi go soimaaxkami ix makïdï bamioma xijaiga ix maitiagi ïmoko.

⁵ Maitïkïi aatïmï bïïxi go tïgibudagai ix makïdï sobhikïi odami ix maatiagi Diuxi tudu. Dai maigobai ïkobai bipiayi aatïmï bïïxi go tïgibudagai ix makïdï gïr sobhikïdagi ix ïïgiadagi aatïmï Suxi Kristo ïpï. Po buayi aatïmï saidi bhodïrï bïïxkatai aatïmï bhïna mosïkaxi go tïgibudagai ix makïdï ipïrhidi Suxi Kristo xi oijadagi aatïmï.

⁶ Oijadabïrai Suxi Kristo tudu dai buaboikïdï abïr ïïgiada ïgai. Dai xïïxkadï ka kïïga ïïgiadagi aapimï aidï gia maatiga maaxkamu gïr bïïtarï ix makïdï odami maiti ipïrhi ix ïïgiadagi dai aidï gia gïgïbituldamu aatïmï.

Go Pabora maaxi aa agai sai ïgai bia ïmo sïïrhikami otosadïkatai ïgai Suxi Kristo

⁷ Gïn aaduñi, xïïxkadï nïijadagi aapimï ïmo odami maatïka ïrhiditai ix bhai bia ïgai ïmo sïïrhikami Diuxi amadïrï mosïkaxi nïidiña aapimï tukugadï ix maaxi dïï mai nïidiña aapimï ix maaxi ibhïgadï. Daiñi, oidaga ïïmo odami ix makïdï ikaitiña sai ïgai ïïgi kïï maatï saidi ïr ojotosadï ïgai Suxi Kristo. Ïïgi namïatudan buayi ïgai ïïgi sïïrhikamigadï tudu dai maiti gï agai gobai. Dai ïkobïrakoga pokaitiña ïgai sai aatïmï ix makïdï buaboikïdï ïr ojotosadï Suxi Kristo, sai aatïmï mai bia ïmo sïïrhikami Suxi Kristo amadïrï. Dïï gia aanï aagai sai gï agai ix maatïkagi ïgai sai aatïmï buaboikïdï ïr ojotosadï Suxi Kristo.

⁸ Daiñi, aanï gin bïïtarï mai xudu tomaxi po gïn ïrhiadagi aapimï sai bhaibitukami gïn aagidiña aanï sai aanï ïr ïmo sïïrhikami biakami. Suxi Kristo kaxi gin maa ïmo sïïrhikami ansaidi soiñana aanï gïn buaboidaragai sai bamioma gubuakana tudu. Dai mai xu xi gin maa ïgai sïïrhikami saidi sobhidagi aanï gïn buaboidaraga. Gin maa ïgai gin ïmo sïïrhikami saidi gïn soiñana aanï tudu dai kaxkïdï dudatai mai xaïraitai aagai sai namïga gin sïïrhikamiga.

⁹ Gï agai sai maatïkagi aapimï ïpï sai maiti ipïrhidi aanï ix duduadikudagi aapimï gin ojakïdï.

¹⁰ Kïï maatï aanï tudu sai pokaitiña ïïmoko sai xïïxkadï ojidagi aanï buaboitudadami sai kabami bhagaididan kaitiña gin oja. Dai pokaitiña ïgai ïpï sai xïïxkadï gïn ïmadï dakagi aanï sai aidï gia duadimukan dukai ñokaiña aanï dai pokaitiña ïgai sai mai maatïkatai gamamaakai aanï ñoki. Po tudu ikaitiña ïïmoko.

¹¹ Dïï gia gï agai sai maatïkagi ïgai sai motuigakamu aanï ix mïkaxdïrï gïn otosdagi aanï ojai ix gïn ïmadï dakagi aanï ïpï.

¹² Gin aaduñi, oidaga odami ix makïdï ïïgi kïï tutiakami gïn aagaiña po gïn ïrhiditai sai bamioma kïï tutuiga ïgai xi jaa. Pokaitiña ïgai sai jaa mai ïpïan ïxi kïï tutuiga tudu dai kaxkïdï kïï tutiakami gïn aagaiña ïgai ïïgi. Dai aatïmï pokaiti sai gobai ïr buirudagai xorai podukai ñokadagi.

¹³ Daiñi, aatïmï mai podukai aagaiña sai bia aatïmï oigaragai ix gatïanïdagi maigobioma xako maiti gïr maa Diuxi sïïrhikami ix gatïanïdagi aatïmï. Mosïkaxi xako ukami gïr maa oigaragai Diuxi ix gaatabuada aatïmï mosïkaxi ami ukami gatïanïiña aatïmï. Mai gïgïrdukïdï gïr aagai aatïmï ïïgi tudu podukai. Dai maiti gïr bapasai aatïmï aaduindadïrï jaa ïpï. Aatabuayi aatïmï mosïkaxi xako gïr aagidagi Diuxi tudu. Dai Diuxi gïr aagidi sai ibuadana aatïmï ïgai aaduindadï aapimï gïn saagida.

¹⁴ Aatïmï ïgai dai ïpïgioma gïn aiturhi go bhai ïrhiaragai aatagi aagaitai Suxi Kristo tudu. Kaxkïdï kïïga bia aatïmï sïïrhikami xi oijadagi Diuxi aaduindadï aapimï gïn saagida ïpï. Maiti gïr bapasaimi aatïmï aaduindadïrï jaa tudu gaatabuadatai gïn saagida.

¹⁵ Daiñi, kaxi gïn aagidi aanï sai aatïmï mai pokaitiña sai bia aatïmï oigaragai ix gatïanïdagi maigobioma xi xako gïr maa oigaragai Diuxi ix gaatabuadagi aatïmï. Dai kïïga ibuayi aatïmï gïr aaduindaga tudu dïï mai xu xi ipïrhiditai ix kïï tutuigakami gïr aagagi ïïgi aatïmï. Bhaiyoma gïn soikïda rïrhidi aatïmï sai kïïga kabakan imïna gïn buaboidaraga. Podukai gia gïr soiña antaada aapimï sai mïkaxioma aituldana aatïmï go bhai ïrhiaragai aatagi jaa óídakami saagida tudu.

¹⁶ Podukai gia bhaigakamu aatïmï xi maigobioma aituldagi go bhai ïrhiaragai aatagi mïkaxioma xi xako óídaga aapimï. Aituldamu aatïmï xako mai kia tipu jaa xorai ami aituldagi go ñoki tudu. Podukai mai aataduñimu aatïmï xako kaxi gaatadui jaa. Dai podukai xïïxkadï gaatagada aatïmï dai aagadagi xïï kïi gï idui gïr aaduindaga mosïkaxi aagadamu aatïmï ixtumaxi aatïmï idui dai mai xu xi ixtumaxi idui jaa.

¹⁷ Diuxi ïgai daidi aatabuayi aatïmïkïdï daidi ibuayi aaduindadï tudu. Dai aatïmï ipïrhidi saidi gï ibuadagi ixdukatai aagai Diuxi ojadïrï. Ami ojadïrï ikaiti sai, Xïïxkadï ïmo odami aaga ïrhiadagi ïmo aaduindagai ix makïdï kïï gï dui gï agai sai mosïkaxi aagagi ïgai ixtumaxi Diuxi Gïr Nukadakami idui dai mai xu ixtumaxi ïïgi idui ïgai, po tudu ikaiti Diuxi ojadïrï.

¹⁸ Diuxi mai kïïgakïrï nïidi odami ix makïdï pokaitadagi sai ïïgi kïïga idui tudu. Dai bhaiyoma mosïkaxi Diuxi ïgai dai bhaiga xi aagadagi xorai kïïga idui dai xorai kïïga nïijada agai ïgai.