2 Korintios 1 - Northern Tepehuan Bible

Go Pabora biaturhi go buaboitudadami

¹ Aanï ïr Pabora dai gïn otoxdi aanï idi ojai otosadïkatai aanï Suxi Kristo. Aanï ïr ïmo sïïrhikami biakami otosadïkatai Suxi Kristo tudu. Diuxi podukai ipïrhi kaxkïdï. Dai tami gin ïmadï daja Timoteo ix makïdï ïr gïr sukurhi Diuxi amadïrï ïpï dai gin soikïi gobai ibuadatai aanï idi ojai. Idi ojai ïr bïïtarï bïïxkatai aapimï buaboitudadami ix makïdï gïn ïmpaidiña ami Korintoïrï dai bïïxkatai go gaa buaboitudadami bïïtarï ix makïdï bïïxi aipako óídaga amïka Gresiïrï ïpï. Idi ojai ïr bïïxkatai aapimï gïn bïitarï ix makïdï ïr ïko bubaidadï Diuxi tudu. Ïmo biatuldaragai bïïxkatai aapimï gïn bïïtarï.

² Ipïrhidi aatïmï sai taatana aapimï xïïxi kïïga tuiga Diuxi gïr Oga ïmadï Suxi Kristo Gïr Nukadakami dai sai gïn maakana ïgai ibhïxtaragai gïn iibhïdagïrï.

Diuxi ïgai dai bhai gïr ïrhiatudai xïïxkadï soimaaxi taatagi aatïmï

³ Gïr aaduñi, mosïkaxi Diuxi ïgai ix makïdï bïïxkïrï soi gïrhidi aatïmï gïr bïïtarï dai bhai gïr ïrhiatudai xïïxkadï soimaaxi taatamadagi aatïmï. Ïïgi potuiga ïgai kaxkïdï. Dai kaxkïdï gï agai sai kïïga ñokada aatïmï ïgai bïïtarï. Ïgai bïïtarï ix makïdï ïr Ogadï Suxi Kristo Gïr Nukadakami tudu.

⁴ Daiñi, Diuxi ïgai dai gïr bhai ïrhiatudai xïïxkadï taatagi aatïmï tomax makïdï soi ïrhiaragai. Dai kaxkïdï bhaiga aatïmï xi soikïdagi jaa xïïxkadï soimaaxi taatagi ïgai sai bhai gïn ïrhiadagi ïgai ïpï go galbaaxi bhai ïrhiaragaikïdï ix makïdï gïr mamaakai Diuxi xïïxkadï soimaaxi taatagi aatïmï.

⁵ Daiñi, toma xïï kabami soimaaxi taata aatïmï oiditai Suxi Kristo, pokaxi gïr mamaakai Diuxi gubukarhigai dai bhai ïrhiaragai ïpï. Ka bïïna daraka aatïmï Suxi Kristo kaxkïdï. Dai kaxkïdï maiti gïr maitiña go soi ïrhiaragai xïïxkadï soimaaxi taatagi aatïmï.

⁶ Kïïga gïr bhai ïrhiatudai Diuxi tomaxi soimaaxi taatamai aatïmï tudu dai podukai mamaatïrïi aatïmï ix dukatai gïr kabakadagi go soi ïrhiaragai bïïtarï. Dai gokiïrioma bamioma kïïga bhaigakana aatïmï ix gïn soiñagi sai aapimï ïpï gïn kabakatudagi xïïxkadï soi dukai dïgabuñagi aapimï. Daiñi gïr aaduñi, aapimï nïidiña sai bhai gïr ïrhidiña aatïmï Diuxikïdï tomaxi soimaaxi taatagi aatïmï dai gobai ïr soiñi aapimï gïn bïïtarï. Podukai mamaatïrïi aapimï ix dukatai gïn kabakadagi go soi ïrhiaragai buidïrï dai ix apia bhai gïn ïrhiadagi xïïxkadï soi dukai dïgabuñagi aapimï ïpï tudu. Dai podukai gïn soikïi aatïmï sai aapimï ïpï bhai gïn ïrhiadagi Diuxikïdï gïr ïpïan dukai.

⁷ Dai kaxkïdï kïïga buaboitudai aatïmï sai xïïxkadï soi gïn ïrhiadagi aapimï soimaaxi taatamaitai gïr ïpïan dukai sai aidï taatamu aapimï go bhai ïrhiaragai gïr ïpïan dukai ïpï gïr soikïitai Diuxi bïïxkatai aatïmï.

⁸ Gïr aaduñi, ipïrhidi aatïmï sai maatïkagi aapimï xïïxi kabami soimaaxi taatamaiña aatïmï baasïkioma amïka Asiana ajiopaitai. Sïïrhikïdï bïïtïkatadai go soi ïrhiaragai ix makïdï gïr ayi ami tudu. Maiti ixtuidiadan taadatugaiña aatïmï mos ïï bïïtïkatai gobai dai asta koiyadan antaadatugaiña aatïmï go soi ïrhiaragaikïdï.

⁹ Kïïga po gïr ïrhiditadai aatïmï saidi koi ïragaitadai tudu. Dïï gia ïïgi Diuxi ïgai dai dagito sai pomaaxi taatagi aatïmï sai ka maiti gïr soikïda ïrhiada aatïmï ïïgi gïr gubukarhigakïdï. Podukai máí aatïmï sai mosïkaxi Diuxi ïgai daidi ïr gïr soikïdami. Maatï aatïmï sai ïgai gia gubuka dai asta kïïga duduakatudai ïgai koidadï tudu.

¹⁰ Dai kïïga gïr soi ïgai aidï sai maiti gïr aïna go mukigami. Dai kïïga buaboitudai aatïmï ïpï sai xïduñada koiyadan taadakagi aatïmï ïpamu sai aidï apia kïïga gïr soiñamu Diuxi dai kïïgakïrï gïr bubiadamu.

¹¹ Dai aapimï gïr soiñamu ïpï gïr daanturhiditai aapimï. Dai podukai mui óídakami nïijadamu xïï kïïga gïr soi Diuxi gïr daanturhiditai aapimï dai bhai gïn ïrhiadamu ïgai Diuxi bïïtarï nïiditai gobai.

¹² Gin aaduñi, aanï ïmadï Timoteo kïïga maatï gïr ibhïdagïrï sai tomarhi ïmo imidagai mai yaatagidi aatïmï go óídakami dai mai buirumagi aatïmï. Kïïga ibhïxtakan taadaga gïr iibhïdaga kïï sïïrhi ibuadatai aatïmï óídakami bïïtarï tudu gïr soikïitai Diuxi. Dai asta bamioma kïïga ibuadana aatïmï aapimï gïn bïïtarï gïr aaduñikatai aapimï Diuxi amadïrï. Kïïga sïïrhi ibuadana aatïmï tudu oiditai Diuxi tïgibudadï dai mai xu xi oidiña aatïmï go oidigi daama óídakami tïgibudadï. Dai pokaiti aatïmï sai gobai gia kïïga namïga, sïïrhi ibuadatai aatïmï tudu.

^13-14 Daiñi, asta gïr oja ix makïdï gïn otoxdiña aatïmï, kïïga sïïrhi aagai gobai. Kïïga maatigian kaiti bïïxi gobai tudu. Dai ïkioma palïpi maatï kaïkana aapimï dïï gia xibi nïnïraka aatïmï saidi bïï sudakami kïïga maatï kaïkagi aapimï go ojai ix makïdï gïn otoxdiña aatïmï dai sai maatï nïijadana aapimï bïïxi ixtumaxi ibuadana aatïmï ïpï. Dïï gia biïga kia ix maatï kaïkagi aapimï ïïmo ixtumaxi. Dïï gia gokiïrï xïïxkadï dibiagi Suxi Kristo ïpamu aidï gia ka bïïxi sudakami maatï kaïkamu aapimï ixtumaxi ïr buaboi. Dai aidï gia kïïga ñokadamu aapimï gïr bïïtarï dai pokaitadamu sai kïï idui aatïmï gïn soikïitai ix kïïga maatï kaïkagi aapimï. Dai aidï aatïmï ïpï pokaitadamu sai kïï idui aapimï ïpï kïïga maatï kaïkatai aapimï dai ïïgiditai aapimï ixtumaxi ïr buaboi. Kïïga bhai gïr ïrhiadamu aatïmï xïïxkadï dibiagi Suxi Gïr Nukadakami ïpamu tami oidigi daama tudu.

¹⁵ Aanï ïmadï aapimï kïïga gïr ïmadai tudu maatïkatai sai oidiña aatïmï ixtumaxi ïr buaboi. Dai kaxkïdï gokoako gïn dibida in ïrhiatugaiña aanï mïsai bïï gokoako bhai gïn ïrhidiña aapimï.

¹⁶ Gïn dibida in ïrhiditadai aanï aidïxi Masedoniamakoga imiagi aanï dai ïpïpï aidïxi aa gïxiagi aanï mïkadïrï. Ix poduñimudai aanï aidï gia bhagakamudai aapimï xi gin maakiagi soiñi gin imidaga bïïtarï Judea munisipiamu tudu.

¹⁷ Dïï gia ïma dukai gin tïgito aanï dai ka maiti gïn dibiji aidï. Dïï maiti gï agai mïsai po ïrhiada aapimï sai mos ïgikïdï ïma dukai gin tïgito aanï. Cho. Kïïga biakatadai aanï ix tuixi ka mai jii aanï gamo gïn dibidamu tudu. Daiñi, aanï mai ïpïan tuiga jaa óídakami ix makïdï ïïgi oidiña tïgibudadï dai yaatagïiña. Pokaitiña ïgai saidi iduña agaiña ixtumaxi dai gokiïrï mai buamï ïrhiditai ïma dukai gïn tïtïitoiña dai ka maiti ibuadana. Xïïxkadï pokaitadagi ïgai saidi iduña agaiña ixtumaxi gobai itïiya ïrhidi sai maiti iduña agaiña bhaiyoma.

¹⁸ Dïï gia aanï mai potuiga. Gokïdï bhaiyoma ïpïan tuiga aanï Diuxi. Diuxi gia mai yaatagïi dai bhaiyoma ibuayi ixtumaxi aagadagi tudu dai aanï podukai ibuayi ïpï.

¹⁹ Daiñi, aanï ïmadï go Silbano dai go Timoteo ïr oijadami Suxi Kristo. Dai Suxi Kristo mai ïma dukai gï tïtïitoi xïïxkadï pokaitadagi saidi iduña agai ixtumaxi. Bïïxkïrï ibuayi ïgai ixtumaxi aagadagi tudu. Mai yaatagïi ïgai. Kaxkïdï gï maatï sai aatïmï mai yaatagïi ïpï gïn tïtïgiditai aatïmï ñoki aagaitai Suxi Kristo. Oijadami aatïmï Suxi Kristo kaxkïdï. Ïpïan buayi aatïmï ïgai tudu dai ïgai mai yaatagïi.

²⁰ Daiñi, Suxi Kristo bïïxi sudakami idui ixtumaxi gïr aagidi Diuxi saidi iduña agai gïr bïïtarï. Kïïga ïr gobai buaboi tudu. Kaxkïdï gïn aagidiña aatïmï sai Diuxi ka buaboikïdï idui bïïxi ixtumaxi gïr aagidi. Dai kaxkïdï kïïga ñokaiña aatïmï Diuxi bïïtarï ïpï.

²¹ Diuxi ïgai daidi ibuayi ïmo aaduindagai aapimïrï tudu dai aatïmïrï ïpï saidi kaxkïdï kïïga gubuakami gukana aatïmï bïïna darakatai aatïmï Suxi Kristo. Diuxi ïgai daidi gïr maa ïmo sïïrhikami

²² dai gïr maa Ibhïadï ïpï dai ïgaikïdï gïr tïpaltu ïgai. Dai Diuxi ibhïadï ix makïdï gïr ïmadï daja ïr ïmo maaxidaragai dukai sai aatïmï ïr ïko bubaidadï Diuxi. Diuxi gïr maa Ibhïadï tudu dai kaxkïdï xadïrï maiti gïr maakana ïgai bïïxi go gaa ixtumaxi ix makïdï ka bhai duñixikami bia ïgai gïr bïïtarï ïpï.

²³ Xibi gïn aagidamu aanï ix tuixidï maiti gïn dibiji aanï gamo Korintoïrï baasïki. Dai Diuxi ïr nïijadami sai buaboi aagai aanï. Maiti ipïrhiditadai aanï sai kabami gïn bhagaidagi kaxkïdï mai jii aanï gamoko baasïki.

²⁴ Daiñi, kïï maatï aanï sai aapimï kïïga buaboitudai Suxi Kristo. Dai maiti gï agai ix po gïn ïrhiada aapimï sai kabami gïn tïanïda in ïrhidi gïn aagidakai aanï ix dukatai oijadagi gïn buaboidaraga. Dïï gia mai kïïga ibuayi aapimï dai kaxkïdï maiti gïn dibiji aanï ïpamu kia. Kabami gïn bhagaida antaada aanï tudu dai maiti ipïrhidi aanï xi gïn bhagaidadagi dai bhaiyoma gïn soikïda in ïrhidi ix kïïgakïrï bhai gïn ïrhiadagi aapimï ïmo maakaragai ñoki dukai. Kaxkïdï maiti gin dibiji aanï ïpamu kia.