1 Tomoteo 6 - Northern Tepehuan Bible

Pabora aagai ïmo ñoki pipioñi bïïtarï

¹ Xibi aagamu aanï go pipioñi. Daiñi, xi ïmo buaboitudadami ïr pioñigadïkagi ïmai soigaxikami dukai gï agai xi kïïga xadutuadagi ïgai amudï. Kaxkïdï tudu ix mai xadutuada ïgai amudï aidï gia jaa ix makïdï mai buaboitudai bui ñokada antaada Diuxi. Pokaitada antaada sai maiti ïr soiñi gïr buaboidaraga nïiditai ix ïmo buaboitudadami mai xadutudai amudï.

² Dai xi ïr buaboitudadamikagi amudï ïmo pioñi aidï gia maiti gï agai go pioñi xi soi dukai nïijadagi amudï poïrhiditai sai ïïpïan namïga ïgai buaboitudadamikatai bïï gokatai. Bhaiyoma ïmo pioñi bia sïïrhikami xi bamioma ïïgiadagi dai xadutuadagi amudï xi ïr buaboitudadamikagi ïgai. Ïmo xïgïmï ïgai ïmadï amudï di. Dai kaxkïdï go pioñi gï agai xi kïïgioma gaatabuadagi dai ibuadagi soiñi xïgidï bïïtarï oigïdaitai ïgai. Gï agai xi gatïtïïgiada ñoki aapi Timoteo idikïdï ix makïdï gï aagidimi aanï. Tïañiñi bïïxi go buaboitudadami sai ïïgiada gobai.

Pabora aagai gatïtïïgiadami yaatagi

³ Daiñi, oidaga jaa ix makïdï aagaiña ïma maaxi ñoki ix makïdï maiti ïr gïr buaboidaraga ñokidï. Mai aagaiña ïgai go ñoki ix makïdï gïr tïïgi Suxi Kristo tudu. Suxi Kristo gïr maatïturhi ix dukatai ïïgiadagi Diuxi.

⁴ Dai ix makïdï gatïtïïgiadagi ïma maaxi ñoki podukai ïïgi gïgïrdukïdï gïn ïrhidiña. Bupuiruga ïgai tudu. Ojoidi ïgai ix aatagadagi naana maaxi ix makïdï maiti ïr soiñi dai ojoiditai ïpï xi gïn bupui ñokadagi aipakoga. Odami ix makïdï pobuayi ïjïgakoitïraga dai kïïdaiña ïgai jaa dai aagaiña galnaaxi ñoki jaa buidïrï dai otoma pobïnïrhidiña xi jaa mai kïïga ibuayi tomaxi mai kïï maatï ix bhai ïr buaboi sai mai kïïga ibuayi.

⁵ Otoma sasayutïrïi ïgai. Gajiadïrï bipiayi ïgai ix makïdï ïr buaboi dai podukai ïïgi gïn bupuirutudai ïgai. Ka maiti ïr soiñikana tïgibudadï tudu. Pobïnïrhidiña sai oiditai buaboidaradï kïïga gïn bidakamu ïgai dïï maiti ïr buaboi.

Pabora aagai odami ix makïdï gïn bipidatuda ïrhidi

⁶ Dïï gia odami ix makïdï xadutudai Diuxi dai bhai gïn ïrhidiña gobaikïdï ix makïdï bia ïgai xioma kïïga ïr gïn bipidakami ix bhai ix makïdï mui bia tuminxi.

⁷ Daiñi, aidïxi dada aatïmï tami oidigi daama mai biakatadai aatïmï toma lïïchi ixtumaxi. Dai xïxkadï koiyagi aatïmï mai bukamu ixtumaxi ïpï.

⁸ Kaxkïdï gï agai aatïmï ix bhai gïr ïrhiada biakatai ix tuma ugiagi dai yukuxi ix tumaxi gïr aadagi.

⁹ Daiñi, mui odami gïpiïrï susurhigïiña gïn bipida ïrhiditai. Kaxkïdï tudu ibuada ïrhidiña ïgai naana maaxi soimaaxkami. Pobïnïrhidi sai podukai gïn bipida agai. Gobai ïgai dai gïpiïrï surhitudai dai xia buayi oidakaradï bïïxkïrï bïïtarï.

¹⁰ Odami ix makïdï go ïï tuminxi adaimïi naana dukai gïpiïrï surhigïi tudu. Ïïmoko ka dagito go kïïgadukïdï buaboidaragai ïpï adaimïitai go tuminxi dai podukai ïïgi gïn abhana darai gïïpi soi ïrhiaragai.

¹¹ Dïï gia aapi Timoteo maiti gï agai xi bhïiyagi tïgibudagai podukai. Aapi ïr pioñigadï Diuxi dai kaxkïdï gï agai bhaiyoma xi bhïiyagi aapi tïgibudagai xi ïïgiadgi Diuxi dai buañixikami dukai oidakagi. Ïïgi tomax maaxi daibuñagi gï agai xi apia buaboitudada aapi Diuxi dai xi kïïga oigïdada aapi jaa ïpï. Gï kabakadañi soi ïrhiaragai bïïtarï xïïxkadï soi gï buidadagi jaa buaboitudaitai aapi tudu dai bhaiyoma kïïga tuigaka aapi ïgai bïïtarï.

¹² Bïïxi gï gubukarhigakïdï ibui kïkiba aapi ixtumaxi xia duada ïrhiada gïr buaboidaraga tudu. Daiñi, ka kïïga maaxiko aa aapi buitapi mui odami sai buaboitudai aapi Suxi Kristo dai aidïpïrï Diuxi gï báí pïsai kïïgakïrï oidakana bïïxkïrï bïïtarï. Diuxi gï urhiñdi go kïïgakïrï oidakaragai bïïxkïrï bïïtarï tudu. Kaxkïdï gï agai xi kïïgakïrï oidaka aapi sai maatï taatana aapi ix taadaga xibi go bïïxkïrï oidakaragai. Gobai ïr gï maitïki oiditai aapi gïr buaboidaraga tudu.

¹³ Aapi Timoteo, Diuxi ïgai dai gamaakai duakarhigai bïïxi ixtumaxi ix makïdï ibhïkïi. Dai Suxi Kristo ïgai dai Ponsio Pilato buidïrï aagai ixtumaxi ïr buaboi. Dai xibi Diuxi ïmadï Suxi Kristo ïr nïijadami ix tumaxi gï tïañimi aanï.

¹⁴ Gï tïañimi aanï tudu pïsai kïïga ïïgiada aapi ixtumaxi gïr tïjai Suxi Kristo dai sai apia ïïgiada aapi asta xïxkadï ukami dibia ïgai ïpamu. Ix kïïga ïïgiada aapi ixtumaxi gï tïjai ïgai aidï gia mai tipukamu ixtukïdï gïpiïrï gï bupadagi jaa.

¹⁵ Suxi Kristo dibiagai asta xïxkadï ipïrhiadagi Diuxi tudu. Kaxkïdï tudu mosïkaxi Diuxi ïgai dai bïïxi adaama ïr xadutudikami dai bïïxi adaama ïr Tïanïdami. Ïgai bïïxi adaama ïr Rey dai bïïxi adaama ïr gubukadagai biakami.

¹⁶ Mosïkaxi ïgai mo maaxkana dai mai mumukui tomarhi ïmo imidagai. Dai odami mai bhaiga xi buijako nïnïabagi tomarhi xi miadïrï aiyagi mos ïï kabami kudixikatai ïgai. Gï agai tudu xi xadutuada aatïmï ïgai dai xi adaama gatïanïda ïgai bïïxkïrï bïïtarï. Gobai kïïga ïr buaboi.

¹⁷ Aapi Timoteo, aagidañi go buaboitudadami ix makïdï gïn bipidaka sai mai gïgïrdukïdï gïn ïrhiada naana maaxi biakatai tami idi oidigi daama. Maiti gï agai xi buaboitudada ïgai buxtuidadï tudu po ïrhiditai xi gobai ïr soiñigadïka agai. Bïïxi gobai ugitimu tudu. Kaxkïdï gï agai bhaiyoma xi buaboitudada ïgai Diuxi. Ïgai ïr soiñigadï di. Ïgai gia mai ugiti agai dai ipïrhidi xi bhai gïr ïrhiada aatïmï. Kaxkïdï gïr maa ïgai mosïï ïï naana maaxi ixtumaxi bia aatïmï.

¹⁸ Aagidañi go buaboitudadami ix makïdï kïïga gïn bidaka sai kïïga ibuada ixtumaxi ïr soiñi. Sai bïïxi bhai ïrhiaradïkïdï maakana soiñi xorai tïgitokagi tudu.

¹⁹ Xi pobuadagi ïgai aidï gia kïïgakïrï óídakamu ïgai. Suxi Kristo maakimu ïgai gïïpi maitïki tïbagiana. Ïpïan dukamu gobai xi gïïpi bhai tuatadai ïgai maitïki tïbagiana ix makïdï mai ugiti agai.

Pabora kugaitu go ñoki ix makïdï ojidi ïgai go Timoteo

²⁰ Aapi Timoteo, kïïga inukada go buaboidaragai ix makïdï gï nukaturhi Diuxi. Gï agai xi kïï sïïrhi tïtïgiada aapi gobai sai mai gai imïna tudu. Dai maiti urapïkïda aapi aagadami aatagi ix makïdï ïr ïïgi odami tïgibudadï dai ix makïdï maiti ïr soiñi. Naana maaxi aagai ixtumaxi tudu. Pokaitiña ïgai saidi ïr mamaatïkami dïï maiti ïr buaboi. Maiti urapïkïda ïgai tudu.

²¹ Mui odami ka dagito ixtumaxi ïr buaboi ïïgiditai pomaaxkami aatagi. Dai maiti gï agai xi pobuadagi aapi. Ami ukami kugaidamu aanï idi ojai aapi Timoteo. Ipïrhidi aanï sai Diuxi kïïgakïrï gï nïijadagi ïmadï modukai bïïxi go gaa buaboitudadami amïka ïpï. Mosïkaxi.