1 Tomoteo 5 - Northern Tepehuan Bible

Pabora aagidi go Timoteo ix dukatai gï agai xi ibuadagi kïkïïrhiodami bui dai bipiudu bui dai pipioñi bui

¹ Daiñi Timoteo, maiti gï agai xi bhagaidadagi ïmo kïrhiodami xïïxkadï mai kïï buadagi ïgai. Gï agai bhaiyoma xi kïïga xadutudaitai maakadagi ñoki kïï bhai dukai ïpïandukai xi ïr gï ogakamudai. Dai podukai go utu iimïdami ïpï imakada aapi ñoki ïpïan dukai xi ïr gï xixïgikagi ïgai.

² Dai gï agai xi xadutuada aapi rhiokodami ïpï gï dïïdï dukai. Dai xadutuadañi go utu iimïdami oki ïpï gï susukurhi dukai.

Pabora aagai go bipiudu

³ Gï agai xi xadutuadagi dai nukadakagi bipiudu ix makïdï mai bia soikïdami.

⁴ Dïï gia ix biakagi soikïdami dukami maamaradï xiïpï ujurhidï xiïpï bopoxikadï aidï gia sai ïgai soiñana. Gï agai tudu xi go utu iimïdami xadutuadagi dïïdïdï dai ujurhidï gamaakaitai soiñi xïïxkadï tïgitokagi. Podukai aa noraidamu ïgai soiñi ix makïdï gïrhidi. Bia ïgai sïïrhikami xi ïpïgioma soikïdagi aaduñdï tudu dai gokiïrï bhaiga xi soikïdagi jaa ix makïdï tïgitokagi. Ïmo bhai ïrhiaragai Diuxi bïïtarï xi podukai xadutuada ïgai ix makïdï gïïrhidi tudu.

⁵ Daiñi, bipiudu ix makïdï mai bia xorai soikïdagi dai ix makïdï daanïi Diuxi bïïx tasai nïnïrakatai sai Diuxi soiñana ïgai gia kïïgakïrï ïr bipiudu. Ïgai gï agai xi soikïdagi aapimï.

⁶ Dïï gia maiti gï agai xi soikïdagi aapimï bipiudu ix makïdï adaimïiña ïïgi bhai ïrhiaradï. Ïgai ïr koidadï dukai ibhïgadï tomaxi tukugadï kia duakaka maaxi.

⁷ Aagidañi go buaboitudadami tudu sai nukadakana ïïgi aaduñdï dai sai soiñana ix makïdï kïïgakïrï ïr bipiudu mai biakatai xorai soikïdagi. Ix go buaboitudadami nukadakagi aaduñdï podukai aidï gia go gaa ix makïdï mai buaboitudai mai biakamu ixtukïdï gïpiïrï bupadagi.

⁸ Dïï gia xi ïmadutai go buaboitudadami mai nukadakagi ïïgi aaduñdï gobai itïiya ïrhidi sai ka dagito ïgai buaboidaradï dai bamioma galtuiga xi bhai go gaa ix makïdï mai buaboitudai. Dai bamioma ïr galtuigakami ïgai ix mai nukadakagi maamaradï dai dïïdïdï.

⁹ Bia aapi ïmo paperhi xako ojixi go bipiudu ix makïdï bhai aa sai óídaka agai Suxi Kristo bïïtarï ibuadatai aaduindadï Suxi Kristo. Ïgai ïr go bipiudu ix makïdï go buaboitudadami maaki agai soiñi ixtukïdï óídakagi. Dai xibi gï aagidamu aanï ix makïdï bipiudu gï agai xi gïn ojagi ami. Daiñi, gï agai xi ojagi ami mosïkaxi bipiudu ix makïdï ka bhaibitu baikobhai umigi dai ix makïdï kïïga xadutugi kunakarudï mai ïmadï biïkai ïmai.

¹⁰ Gï agai xi jaa kïïgakïrï nïijadagi ïpï nïiditai ixtumaxi ibuayi ixtumaxi ïr kïïga. Gï agai xi tïgito nïida aapi ix bhai kïïga gïïrhidi maamaradï dai ix bhai kïïga miadïgidiña ïgai go buaboitudadami xibhïadïrï óídakami. Gï agai ïpï ix mai tiodiantuigakagi soikïitai go buaboitudadami tomax tuma aaduindagïrï. Gï tïgito nïida ïpï sa bhai gamaakaiña ïgai soiñi xorai soimaaxi taatamaiña. Ix makïdï gïn ojagi ami gï agai xi ïr bipiudukagi ix makïdï kaxi ibuadana naana maaxi aaduindagai kïïgadukami tudu. Ix pomaaxkagi ïgai aidï gia bhaiga ïgai xi gïn ojagi ami paperhiïrï xako ojixi budami soiñi.

^11-12 Dïï gia bipiudu ix makïdï mai kia aiturhi baikobhai umigi maiti gï agai xi ojagi ami. Kaxkïdï tudu ix makïdï gïn ojagi gï agai xi bhai aagagi ix Suxi Kristo bïïtarï gaataduña agai. Dai ix gïn ojagi go bamioma utu iimïdami bipiudu gokiïrï gïpiïrï surhigi antaada mai ibuadatai ix dukatai bhai aatadai ïgai aidïxi gïn oja. Kïïga gaïmadï biiya ïrhiada antaada ïgai ïpamu dai ka mai buamï gïn ïrhiada antaada xi ibuadagi ixtuma bhai ïrhidi Suxi Kristo.

¹³ Ka arhi paparutu antaada ïgai bhaiyoma gabuyitai soiñi go gaa buaboitudadamiañdïrï. Ka mai gaataduña antaada ïgai dai ïïmada antaada xi aipako gakikiïrï ajiopadagi dai ñokidaragakagi dai aatagadagi ixtumaxi maiti ïr soiñi. Dai go utu iimïdami bipiudu kïïga ïïmada antaada ix gïn bapasadagi xako maiti ïr bïïtarïdï ïpï.

^14-15 Mui bipiudu ka podukai dagito Suxi Kristo tudu ka mai ïïgida ïrhiditai dai ïïgiditai bhaiyoma go diabora. Kaxkïdï aanï aagai sai maiti gï agai xi gïn ojagi utu iimïdami bipiudu ami paperhiïrï dai gï agai bhaiyoma xi gaïmadï biyagi ïgai ïpamu. Gï agai xi mamartadagi ïgai dai xi kïïga nukadakagi ïïgi bakidï daidi kïïga óídakagi. Gï agai tudu xi kïï buadagi ïgai sai mai tipukagi ixdukatai galkai nïijadagi jaa go buaboitudadami.

¹⁶ Dai xi ïmo oki buaboitudadami biakagi ïmo aaduñdï biudu bia ïgai xi soikïdagi. Podukai mai biakamu go gaa buaboitudadami ix maakiagi soiñi dai bhaigakamu xi soikïdagi jaa ix makïdï bamioma tïgito.

Go Pabora aagai sai gï agai xi xadutuadagi go buaboitudadami bhaitï gukakamigadï

¹⁷ Gï agai xi kïïga xadutuadagi dai aa namïidadagi go buaboitudadami bhaitï gukamigadï ix makïdï kïïga ibuayi aaduindadï dai kïïgioma ix makïdï gamaakai ñoki dai gatïtïïgidi aatagi.

¹⁸ Dai Moiseskaru oja ïmo maaxidaragai gokïdï ïïki daidi ikaiti, —Maiti gï agai dakamidagi go turu xïxkadï gakïrhibadagi gïn ïxi— as duu oja go Moiseskaru. Daiñi go bhaitï gukakami ïmadï go tutu bïï goka ïr aatabuadami dai bïï goka gï agai xi buiyagi maitïki. Go Moiseskaru oja ïpï sai, —Ïmo aatabuadami bia sïïrhikami xi buiyagi maitïkidï— ikaiti ojadï. Kaxkïdï gï agai xi go buaboitudadami bhaitï gukakamigadï buiyagi maitïki ïpï gaatabuadatai ïgai. Ka podukai oja go Moiseskaru ïïki di.

¹⁹ Dai xi ïmoko pokaitadagi sai ïmo buaboitudadami bhaitï kïakamigadï mai kïïga ibuayi maiti gï agai xi ïïgiadagi go gïpiïrï bupadami. Mosïkaxi ix oidakagi goka xiïpï muiyoma nïijadami sai soimaaxi idui go bhaitï kïakami aidï gia.

²⁰ Dïï gia xi buaboikïdï soimaaxi idui ïgai dai ix apia oijada ïgai go soimaaxkami abïr bhagaida ïgai bïïxi go gaa buaboitudadami buitapi sai duduadimukagi go gaa dai mai soimaaxi ibuadana.

²¹ Daiñi aapi Timoteo, Diuxi gïr Oga ïmadï Suxi Kristo dai bïïxi tïtïañikarudï ïr nïijadami xi gï tïañimi aanï sai ïïgiada aapi idi ñoki. Nïijadami ïgai sai gï aagidimi aanï ïpï sai ïmadugan dukai nïijada aapi bïïxi óídakami. Maiti gï agai tudu xi bamioma namïakami duakai nïijada aapi ïïmoko.

²² Daiñi, xïxkadï dasa agadagi aapi ïmo bhaitï kïakamigadï go buaboitudadami maiti gï agai xi toma xorai dasagi aapi. Gï agai ïpïgioma xi kïïga maatïkagi aapi ix tuiga ïgai. Daiñi, xi bhaitï kïakami dasagi aapi ïmo soimaaxi buadami gobai itïiya ïrhidi sai mai buamï ïrhidi aapi xi soimaaxi ibuadagi ïgai. Xi pobuadagi aapi uraban duñimu aapi soimaaxkamigadï dai maiti gï agai gobai. Gï agai bhaiyoma xi kïïga gï nukadakagi aapi dai mai urabagi go soimaaxi toma lïïchi.

^23-25 Daiñi, ïïmo odami soimaaxi ibuadana xako mai maaxkana dai ïbogiami kïïga gï tïgito nïiditai ïmoko gï maatïkana sai soimaaxi ibuayi. Dïï gia jaa kïïga maaxkïrï soimaaxi ibuadana dai tomaxi mai kia kïïga gï tïgito nïijadagi ïmoko kaxi gï maatïkana sai soimaaxi ibuayi. Dai podukai ïpï oidaga odami ix makïdï kïï maaxkïrï ibuadana ixtumaxi ïr kïïga dai bïïxi odami maatïkana. Dai oidaga jaa ix makïdï kïïga ibuadana xako mai maaxkana dai jaa mai nïidiña. Dïï gokiïrï mai ïxto bimu ixtumaxi idui ïgai. Ayimu ix tuigako bïïxi gobai gï maaxituda agai tudu. Daiñi aapi Timoteo, kïï maatï aanï sai dudatai kokorïi gï boka xïïxkadï yïïdagi aapi sudagi. Kaxkïdï gï agai aapi xi bïïnaida lïïchi bino dai mai xu xi go ïï sudagi yïïda aapi. Kïïga duadigai gobai podukai.