1 Tomoteo 4 - Northern Tepehuan Bible

Pabora aagidi go Timoteo sai oidaka agai bupuirumadami odami ix makïdï naana maaxi aatagi tïtïgiada agai

¹ Diuxi Suxi Kristokïdï gïr tïïgi ix tumaxi ïr buaboi tudu. Dïï gia Diuxi Ibhïadï kïïga gïr aagidi ïpï sai xibi tuigako karhioga ugitïkai oidigi sai mui óídakami dagito agai go buaboikïdï buaboidaragai dai bhaiyoma ïïgiadamu tïgibudagai ix makïdï ïr yaatagi. Ïïgiadamu ïgai maakadami aatagi yaatabogami tudu ix makïdï buimu tïgibudadï diabora tïtïañikarudï dai ïgaikïdï gamaakadamu aatagi.

² Go maakadami aatagi ïgai sïïrhikïdï yaatabogaka agai tudu. Dai bïïxi bhai ïrhiarakïdï adaimu ïgai go soimaaxi asta xïxkadï ka mai taatakamu ixtumaxi ïr soimaaxkami.

³ Daidamu ïgai odami xi gaïmadï bipiïdagi dai mai kuadamu ïgai mui kuadagai ïpï pokaititai saidi ïr daidarxikami sai podukai bupuirumadamu ïgai odami. Dïï gia kïï maatï aatïmï sai maiti ïr buaboi aatagidï. Kïï maatï aatïmï bhaiyoma sai Diuxi idui bïïxi kuadagai sai aatïmï ix makïdï buaboitudai bhai gïr ïrhiada ïgaikïdï gakuadatai.

^4-5 Daiñi, kïï maatï aatïmï sai kïïgadu bïïxi aïkatai ixtumaxi idui Diuxi. Ka aagai ïgai sai kïïgadu bïïxi ixtumaxi idui di. Dai potïkai ïgai sai kïïgadu bïïxi ixtumaxi idui ka aagai bïïxi kuadagai. Dai asta aatïmï ïpï aagai saidi ïr kïïgadukami kuadagai xïxkadï aagiada aatïmï Diuxi sai bhai gïr ïrhidi ïgai bui biakatai gobai. Ix mai kïïgadukamudai gobai xadïrï maakimudai aatïmï ïmo Diuxiatanamïidana Diuxi di. Kaxkïdï maiti gï agai xi pokaitadagi aatïmï sai ïïmo kuadagai ïr soimaaxkami ix ugiagi ïmoko. Bhaiyoma gï agai xi bhai gïr ïrhiada Diuxi bui gaugakai.

Pabora aagidi go Timoteo ix dukatai aatabuayi pipioñigadï Diuxi ix makïdï kïïga ïïgidi

⁶ Daiñi aapi Timoteo, kïï maatï aanï sai arhidukatai abhiadïrï ka kïïga ïïgidiña aapi go buaboikïdï ñoki. Dai xibi gï agai xi tïtïïgiada aapi ñoki go gaa buaboitudadami aagaitai idi ñoki ix makïdï gï ojidi aanï. Ix podukai gatïtïïgiadagi aapi aidï gia kïïga ibuadamu aapi go aaduindagai ix makïdï gï maa Suxi Kristo pioñigadïkatai aapi. Dai go ñokikïdï ix makïdï tïtïgiadagi aapi buimu aapi bamioma soiñi gï ibhïdagïrï ïpï.

^7-8 Dïï gia maiti gï agai xi ïïgiada aapi go naana maaxi ñoki ix makïdï ïr go ïï aatagi dai ix makïdï maiti ïr soiñi. Dai gï agai bhaiyoma xi bïïx tasai tïgitotulda aapi gï ibhïdaga Diuxi sai gï ïïmadaiña aapi xi oijadagi Diuxi. Sïïrhikïdï ïr soiñi tudu xi gïr ïïmadatulda aatïmï xi oijadagi Diuxi. Daiñi mui odami kabami aaduinturhiña tukugadï ïïmada ïrhiditai ïmo aaduindagai xiïpï ïmo tïtïïbigai dai gobai mosïkaxi palïpi ïr soiñi tami idi oidigi daama oidakaradï bïïtarï. Dïï gia xi ïïmadagi ïmoko ix oijadagi Diuxi gobai gia gïïpi ïr soiñi. Gobai ïr soiñi gïr oidakaraga bïïtarï tami idi oidigi daama dai gokiïrï ïr soiñikamu bïïxkïrï bïïtarï ïpï.

⁹ Kïïga ïr buaboi tudu ix dukatai aagai aanï dai gï agai xi bïïxi óídakami ïïgiada gobai.

¹⁰ Aanï ïmadï aapi Timoteo kïïgakïrï ïr buaboidadami Diuxi ix makïdï tomarhi ïmo imidagai mai muki agai dai ix makïdï bhai dui kïïgakïrï bubaidaragai bïïxi óídakami bïïtarï. Dïï gia tomaxi bhai dui ïgai bïïxi óídakami bïïtarï mosïkaxi ix makïdï buaboitudagi kïïgakïrï bubuaki agai. Kaxkïdï kabami gaatabuadana aatïmï soiña ïrhiditai óídakami sai buaboitudaiña.

¹¹ Aapi Timoteo, tïïgidañi idi ojai go buaboitudadami dai tïanïda sai kïïga ïïgiada ïgai.

¹² Maiti gï dagito ïpï xi jaa soi dukai gï nïijadagi utudukatai aapi kia dai bhaiyoma kïïga ibuada aapi dai kïïga ñokada dai kïïga buaboitudada dai kïïga oigïdada aapi jaa. Kïïga buañixikami dukai oidaka tudu dai podukai tïïgida go gaa buaboitudadami ix dukatai gï agai ix oidakagi ïgai.

¹³ Gï dibidamu aanï amïka dïï asta xïxkadï aiyagi aanï gï agai xi gïn ïmpaidagi aapimï. Dai ami gïn ïmpaiñdaragïrï gï agai xi nïñiada aapi Diuxi ñokidï aagaitai go gaa buitapi ix kaiti gobai sai go gaa kaïkana. Gï agai xi podukai abïnakidada aapi go gaa dai tïtïïgiadagi ñoki.

¹⁴ Daiñi, baasïkioma go bhaitï gukakami darai ïkadï aapi gï daama dai aidï gï aagidi ïgai ïmo ñoki Diuxiañdïrï gï aagaitai aapi. Podukai gï maa Diuxi ïmo gubukarhigai. Kaxkïdï maiti gï agai xi dodorhi dakagi aapi xibi gï maakakai Diuxi go gubukarhigai.

¹⁵ Gï agai bhaiyoma xi kabami gï aga ibuadagi aapi gï aaduindaga dai kïïga tïgito aimïradagi gobai sai go gaa nïidiña xïï kïïga gïrhimi gï buaboidaraga ibuadatai aapi go aaduindagai.

¹⁶ Kïï gï tïgito nïida ix dukatai oidaga aapi tudu dai ix tumaxi tïtïïgiadagi aapi go gaa. Gï agai xi apia oijada aapi ibuadatai ixtumaxi gï aagidi aanï. Xi pobuadagi aapi aidï gia aataduñimu Diuxi aapikïdï saidi kïïgakïrï busaiña aapi ïmadï go gaa ïpï kaïkatai ïgai gï aatagi.