1 Tomoteo 3 - Northern Tepehuan Bible

Pabora aagai go sïïrhikamigadï go buaboitudadami nunukadamigadï dai aagai ix dukatai gï agai xi oidakagi xorai bhïiya ïrhiada go sïïrhikami

¹ Aapi Timoteo, idi ñoki ix makïdï gï aagidamu aanï kïïga ïr buaboi. Daiñi, kïï buañixi go aaduindagai ix makïdï bia go buaboitudadami nunukadamigadï. Kaxkïdï xorai ipïrhiadagi xi bhïiyagi go sïïrhikami ix ïr nukadakamikagi buaboitudadami bhïiya ïrhidi ïmo sïïrhikami kïï buañixikami.

² Kaxkïdï ïmo nukadakami buaboitudadami gï agai xi kïï buañixikami dukai oidakagi sai mai tipukagi ixtukïdï gïpiïrï bupadagi jaa. Maiti gï agai tudu xi mui oki biakagi. Gï agai bhaiyoma xi ïmadugakagi oñigadï. Dai gï agai xi kïï gï tïgito nïijada ïgai bïïxi aïkatïrï ixtuma buadagi sai kïï bhai maaxkagi. Dukami, gï agai xi kïïga miadaidarakagi ïgai xïïxkadï daibidagi jaa. Dai gï agai xi maatïtai tïtïgiadagi ïgai ñoki ïpï.

³ Maiti gï agai xi nabaamutïrïkagi ïmo nukadakamigadï buaboitudadami dai maiti gï agai xi bhamutïrïkan tuigakagi ïgai. Maiti gï agai ix omarhigakagi ïgai dai bhaiyoma gï agai xi kïï tuigakagi. Dai maitï gï agai ïpï xi mukiorhikan tuigakagi ïpï.

⁴ Gï agai ïmo nukadakami buaboitudadami xi kïïga tïanïda ïïgi kiidïrï sai maamaradï kïïga ïïgiadagi dai sai kïïga xadutuada ïgai jaa ïpï.

⁵ Kaxkïdï tudu xi ïmo kïïrhi maiti ixtuidikïdagi xi kïïga tïanïdagi dai nukadakagi ïïgi maamaradï xadïrï ixtuidïna xi kïïga nukadakagi Diuxi maamaradï ïpï. Xadïrï ixtutuidïna xi kïïga nukadakagi go buaboitudadami tudu.

⁶ Dai ïmo kïïrhi ix makïdï utudami buaboitu maiti gï agai ix nukadakami dasagi ïpï. Tadu ïmo gïdukami dukai gï ïrhiada ïgai ïïgi ka bhïkai go sïïrhikami ka nukadamikatai ïgai dai podukai go diabora gïpiïrï daitudagi.

⁷ Ïmo nukadakami buaboitudadami gï agai xi sïïrhi oidakagi buitapi go gaa óídakami tudu ix makïdï mai buaboitudai sai podukai mai biakagi go diabora ixtukïdï gïpiïrï daitudagi ïpï.

Pabora aagai go sonoïrï gukakamigadï go nunukadakami go buaboitudadami dai aagai ix dukatai gï agai xi óídakagi ïgai

⁸ Dai podukai go sonoïrï gukakami ïpï. Ïgai ïr nukadakami go buaboitudadami ïpï dai gï agai xi kïï tuigakami dukai nïijadagi odami. Maiti gï agai xi yaatabogakagi ïgai xiïpï xi iitorakagi. Gï agai xi ïr sïïrhi aatabuadami ix makïdï mai ojoidi xi maitïkïdagi tuminxi soimaaxi ibuadatai.

⁹ Gï agai tudu xi kïï maatïkagi ïgai sai kïïga buañixikami dukai oidaga Diuxi buitapi kïïga oiditai go buaboidaragai ix makïdï gïr tïtïgidi Diuxi.

¹⁰ Maiti gï agai tudu xi todian dukai dasagi ïmo nukadakami sonoïrï kïakamigadï. Gï agai bhaiyoma xi tïgito nïijada aapimï ix bhai kïï oidaga ïgai dai ix bhai kïï aatabuayi dai ix bhai kïï ibuadagi ïgai. Aidï gia bhaiga ïgai ix ïr sonoïrï kïakamigadïkagi go nunukadakami buaboitudadami.

¹¹ Dai gï agai xi oñigadï ïmo sonoïrï kïakami nukadakami kïï buañixikami dukai oidakagi ïpï sai podukai kïï nïidiña go gaa odami. Gï agai xi gï tïgito nïijada ïgai bïïxi ixtumaxi buadagi sai kïï bhai maaxkana. Maiti gï agai xi naana kaitiadagi ïgai aipakoga tudu dai ïïgi ixtumaxi ibuadagi ïgai gï agai xi ïr sïïrhikagi.

¹² Dai kïkïïrhi ix makïdï ïr sonoïrï gukakami nunukadadakamikagi gï agai xi ïmadugakagi oñigadï. Dai gï agai xi kïïga nukadaka dai tïanïda ïgai maamaradï ïmadï bïïxkatai ix makïdï ami kiiyïrï óídakagi.

¹³ Dai xi ïmo sonoïrï kïakami nukadami kïïga ibuadagi aaduindadï aidï gia go gaa kïï nïijadamu dai xadutuadamu daidi go sonoïrï kïakami bamioma mai duadimukatai oijadamu buaboidaradï.

Pabora aagai go buaboidaragai ix makïdï gïr tïïgi Diuxi

¹⁴ Ipïrhidi aanï xi otoma gï nïijadagi amïka aapi Timoteo. Dïï mos gï otoxdi aanï idi ojai

¹⁵ xïduñada maiti ixtui aanï otoma imiagi. Gï ojidi aanï pai maatïkana ix dukatai gï agai ix óídakagi aatïmï buaboitudadami Diuxi. Buaboitudadami aatïmï Diuxi tudu ix makïdï tomarhi ïmo imidagai mai mumukui. Dai aatïmï ïr nukadakami Diuxi ñokidï ix makïdï kïïgakïrï ïr buaboi.

¹⁶ Kïïga maatï aatïmï sai namïga gïr buaboidaraga buaboidaitai aatïmï Suxi Kristo. Daiñi, ïkioma óídakami mai maatïkana ixtumaxi ïr buaboi dïï gia Diuxi gïr tïïgi ixtumaxi ïr buaboi dibiakai Suxi Kristo. Dai xibi naana maaxikïdï maatï aatïmï saidi ïr buaboi ixtumaxi aagai aatïmï aagaitai Suxi Kristo dai sai namïga gïr buaboidaraga. Daiñi, Suxi Kristo gïr aagidi dai gïr maaxiturhi xorai ïgai dibiakai tami oidigi daama. Dai Diuxi Ibhïadï ïpï kïïga aagaiña saidi ïr buaboi xorai gï aagaiña Suxi Kristo. Dai go Diuxi tïtïañikarudï bïïxi nïidiña go Suxi ïpï dai aipakoga óídakami ayi aatagi xorai ïgai. Dai gokiïrioma mui oidigi daama óídakami bhai aa saidi ïr buaboi ïpï dai buaboitu. Bhodïrï gï baidakatu go Suxi tïbagiamu xako oidakamu gïïpi xadutudaragai ïgai bïïtarï. Xadïrï po gï duñimudai bïïxi gobai ix maiti ïr buaboikamudai gïr buaboidaraga di.