1 Tomoteo 2 - Northern Tepehuan Bible

Pabora aagai ix tumaxi gï agai xi ibuadagi buaboitudadami ïmpaiñdaradïana

¹ Xibi bia aanï ïmo ñoki namïakami gï bïïtarï aapi Timoteo. Daiñi, aanï aagai sai sïïrhikïdï gï agai xi aapi ïmadï bïïxi buaboitudadami daanïdagi Diuxi bïïxi ixtumaxi biïgakagi bïïtarï. Dai sai daanturhiña aapimï bïïxi óídakami bïïtarï ïpï sai Diuxi soi gïlda nïidana. Daidi abïr maakada ïmo Diuxi aatanamïidaragai Diuxi daanïitai ïpï.

² Daidi abïr daanturhiada go gïgïr dudunukami dai bïïxi go gaa gupudagai bipiakami ïpï. Abïr daanïda ïgai bïïtarï bai kïïga aatabuadagi ïgai. Gï agai gobai sai podukai xioma óídakana aatïmï bïïxkatai xadutudaitai Diuxi dai kïïga gïr xadutudaitai aipakoga ïpï.

³ Daiñi, Diuxi ïr gïr kïïgakïrï bubiadamiga dai ipïrhidi ïgai xi daantulda aatïmï bïïxi odami.

⁴ Ipïrhidi ïgai sai bïïxi odami kïïgakïrï bubuakïna dai sai maatïkana ix tumaxi ïr buaboi kaxkïdï.

⁵ Ipïrhidi ïgai tudu sai odami maatïkana sai mos arhi ïmo Diuxi oidaga dai mos arhi ïmaduga ix makïdï bhai buayi gïr bïïtarï Diuxi ïmadï dai ïgai ïr Suxi Kristo ix makïdï ïmo kïïrhi busai. Mai tipu ïmai.

⁶ Ïïgi gï tïïgitu Suxi Kristo tudu sai muana jaa ïmo daxdaragai dukai. Podukai bhai dui ïgai bïïxi óídakami bïïtarï sai ïgaikïdï kïïgakïrï bubuakïna óídakami. Ïgai dibia tami oidigi daama ixtuigako Diuxi ipïrhi xi dibiana dai gïr maaxiturhi sai Diuxi ipïrhidi ix kïïgakïrï bubuakïna bïïxkatai óídakami.

⁷ Kaxkïdï gin maa sïïrhikami Diuxi ansaidi ïr otosadïkana sai bhodïrï maatïtulda aanï go óídakami ix tumaxi ïr buaboi ix makïdï maiti ïr judidiu. Sai aituldana aanï go bhai ïrhiaragai aatagi tudu. Diuxi ïr gïr kïïgakïrï bubiadamiga di dai ipïrhidi xi bïïxkatai óídakami kïïgakïrï bubuakiagi. Kaxkïdï gin maa ïgai go sïïrhikami ansaidi ïr otosadïkana. Buaboi aagai aanï tudu pokaititai sai Diuxi gin maa go sïïrhikami ansaidi ïr otosadïkana. Mai yaatagïi aanï tudu.

⁸ Ka aagai aanï tudu sai gï agai bïïxi buaboitudadami xi daanïdagi Diuxi. Kaxkïdï ipïrhidi aanï sai bïïxi aipakoga xako gïn ïmpaidadagi buaboitudadami sai ami go kïkïïrhi aatagana Diuxi ïmadï daanïitai ïgai. Kïï maatï aapi sai xïïxkadï gïr aaduñi kïkïïrhi atagadagi Diuxi ïmadï táí bapañidiña ïkadï. Podukai ïïmadai aatïmï tudu. Dïï gia gï agai xi ïko darakagi ïgai soimaaxkamiañdïrï xïïxkadï daanïdagi Diuxi. Gï agai tudu xi mai bhakoikagi ïgai dai xi maiti gïn bupui ñokadagi ïpï xïxkadï daanïda agadagi ïgai.

Pabora maa ñoki bïïxi oki bïïtarï

⁹ Dai ipïrhidi aanï xi oki bhai maaxkami yukuxi gïn aadagi. Maiti gï agai tudu xi ïmo oki ipïrhiadagi xi jaa gïn tïgito nïijadagi ix maaxi tiodi nïiditai yukuxidï. Dai kaxkïdï ïpï maiti gï agai xi kabami bhaibitukami bhai buadagi ïgai kuupadï. Dai maiti gï agai ïgai xi gïn aadagi yukuxi kabami namïakami xiïpï bhaibukai dai naanakagi kabami namïakami ïpï ipïrhiditai xi jaa gïn tïgito nïijadagi.

¹⁰ Bhaiyoma gï agai xi ibuadagi ïgai ix makïdï kïïgadukagi dai ix makïdï bhai maaxkagi jaa bïïtarï. Gobai tudu bhai maaxi ïmo oki bïïtarï ix makïdï xadutudai Diuxi dai mai xu xi ipïrhiada xi jaa tïgito nïijadagi yukuxidï.

¹¹ Gïn ïmpaiñdaragïrï gï agai xi dodorhi darakagi oki kaïkatai maatïtuldaragai dai podukai dagitoagi kïkïïrhi xi tïanïdagi bïïxi aïkatïrï ami ïmpaiñdaragïrï.

¹² Mai daadagitoiña aanï oki ix tïtïgiadagi ñoki kïkïïrhi xiïpï xi tïanïdagi tudu. Gï agai bhaiyoma xi dodorhi darakagi ïgai kaïkatai maatïtuldaragai.

¹³ Daiñi, Diuxi ïpïgioma idui go Adán dai gokiïrï idui ïgai go Eba.

¹⁴ Dai aidïxi gïpiïrï surhi Adán ïmadï Eba go oki Eba ïgai dai buaboitu go diabora ñokidï dai gïpiïrï gïï dai mai xu xi go kïïrhi buaboitu. Kaxkïdï maatiga maaxi sai oki maiti gï agai xi tïanïdagi kïkïïrhi.

¹⁵ Gï agai bhaiyoma xi kïïga nukadakagi ïgai maamaradï dai kïïga gïrhidagi. Gï agai xi pobuadagi ïgai kïïga buaboidaitai Diuxi dai oigïdaitai jaa dai kïïga buañixikan dukai óídakatai. Ix kïïga xadutudaitai óídakagi ïgai podukai aidï gia Diuxi maakimu ïmo kïïgakïrï oidakaragai. Pomaaxi tudu oki bïïtarï.