1 Tomoteo 1 - Northern Tepehuan Bible

Pabora biaturhi go Timoteo

¹ Bhaiga Timoteo. Aanï ïr Pabora dai gï otoxdi idi ojai. Kïï maatï aapi sai aanï ïr otosadï Diuxi ïmadï Suxi Kristo. Otosadï aanï Diuxi ix makïdï kïïgakïrï gïr bubaitu dai otosadï aanï Suxi Kristo ïpï ix makïdï nïnïraka aatïmï sai ïpamu dibiana. Ïgai bïï gokatai gin tïjai ansaidi ïr otosadïkana.

² Gï ojidi aanï aapi Timoteo ix makïdï ïr gin maara dukai Diuxi amadïrï. Aanï tudu ïgai dai gï aiturhi go aatagi ix makïdï buaboitudai aapi, kaxkïdï gin maara dukai gï nïidi aanï. Dai daanïi aanï Diuxi gïr Oga ïmadï Suxi Kristo Gïr Nukadakami sai maatï taatana aapi xïï kïï tutuiga ïgai gï bïïtarï gï oigïrhitai dai kïïga gï oigïdaitai ïpï dai sai gï maakana ïgai ibhïxtaragai gï ibhïdagïrï.

Pabora aagidi go Timoteo sai mai dagitona ïgai jaa ix gatïtïïgiadagi aatagi ix makïdï maiti ïr soiñi

³ Aapi Timoteo, aidïxi busai aanï amïï Efesoañdïrï xako daja aapi dai jii Masedoniamu gï aagidi aanï pïsai amaxi biïna Efesoana. Dai xibi apia kia gï agai ix amaxi Efesoana biyagi aapi. Kïï maatï aapi tudu sai ami óídaga odami ix makïdï gatïtïïgidi aatagi ix makïdï maiti ïr buaboi. Kaxkïdï gï agai xi amaxi biyagi aapi dai daidagi sai ka mai pomaaxi ibuada ïgai.

⁴ Aagidañi sai ka mai ïïgiada ïgai go naana maaxi aatagi ix makïdï ïr ïïgi odami aatagidï tudu. Ojoidi ïgai xi aatagadagi aagaitai ix tïtïgidukatadai óídakami ïïki. Tïbïpi aatagaiña ïgai gokïdï dai mai naato aagaiña ix tïtïgidu mos ïï mudukatai go ïïki óídakami. Aagidañi sai ka mai pobuada ïgai. Kaxkïdï tudu gïn bupui ñokaiña ïgai aagaitai pomaaxkami aatagi dai gobai maiti ibuayi soiñi. Mai soikïi gobai odami sai maatïkana Diuxi tïgibudadï tudu. Kaxkïdï tudu mosïkaxi buaboidaitai ix tumaxi ïr buaboi gï maatïkana Diuxi tïgibudadï. Dai go gaa aatagidï maiti ïr buaboi. Kaxkïdï gï bia aanï amïï Efesoana tudu sai daidana aapi go gaa sai ka mai pomaaxi aatagada.

⁵ Daiñi, aatïmï gia gatïtïïgidiña aatagi ix makïdï kïïga ïr soiñi odami bïïtarï. Ga tïtïgidiña aatïmï aatagi ipïrhiditai ix kïïga buañixikagi ibhïadï odami bai kïïga gïn oigïdada ïgai aipakoga. Ga tïtïgidiña aatïmï ipïrhiditai xi odami ïïgiadagi gïr aatagi bai podukai maatïkana ïgai sai kïïga ibuayi ïïgiditai gïr aatagi. Podukai maaxitudamu ïgai sai buaboikïdï buaboitudai ïgai.

⁶ Ga tïtïgidiña aatïmï aatagi aagaitai ixtumaxi ïr buaboi tudu maatïkatai sai oidaga jaa ix makïdï ka dagito ix tumaxi ïr buaboi dai gatïtïïgidiña ñoki ix makïdï maiti ïr soiñi.

⁷ Ga tïanïdan dukai ñokai ïgai gatïtïïgiada ïrhiditai Moises sïïrhikamigadï dïï gia tomarhi ïïgi ïgai mai maatï ix tïiya ïrhidi ix tumaxi aagaiña.

⁸ Kïï maatï aatïmï tudu sai kïïga ïr soiñi Moises sïïrhikamigadï dïï gia gï aagai ïmoko ix maatïkagi ix tuma bïïtarï gobai.

⁹ Daiñi, go Moises sïïrhikamigadï mai gïpiïrï bupai odami ix makïdï buañixi ibhïadï dai bhaiyoma gïpiïrï bupai gobai soimaaxi ibuadami. Naana maaxi oidaga soimaaxi ibuadami tudu. Oidaga ix makïdï mai ïïgidaraga dai mai xadutudai tomarhi ïmo sïïrhikami. Oidaga ix makïdï mai xadutudai Diuxi soimaaxi ibuadatai. Ïgai mai xadutudai tomarhi ïmo ixtumaxi tomaxi ïr Diuxi ïko dasagadïkagi. Dai oidaga jaa ix makïdï gakodadami dai ïïmoko asta kodai ïïgi dïïdïdï. Go Moises sïïrhikamigadï maaxi bupai bïïxkatai ïgai tudu.

¹⁰ Maaxi bupai gobai ix makïdï abhan bopoiña ix makïdï mai kïïgadu. Dukami kïkïïrhi ix makïdï abhan bopoiña jaa kïkïïrhi oki dukai. Dai ix makïdï gasecuestrandoagi jaa ïpï. Dai ix makïdï yaataboga. Dai ix makïdï yaatagikïdï gïpiïrï bupai jaa dudunukamiïrï. Go Moises sïïrhikamigadï maaxi bupai bïïxkatai ix makïdï ïr bui bïïtïkami go buaboikïdï aatagi. Pomaaxi bïïtarï go Moises sïïrhikamigadï tudu. Maaxi bupai soimaaxi ibuadami. Dai gï aagai xi odami maatïkagi ix tuma bïïtarï gobai.

¹¹ Podukai aagidiña aanï odami xïïxkadï aagidagi aanï go bhai ïrhiaragai aatagi aagaitai Suxi Kristo. Gobai ïr ïmo aatagi kïïga namïakami. Dai Diuxi ix makïdï kïïga bhai gï ïrhidiña ïgai dai gin tïïgi go bhai ïrhiaragai aatagi. Ïgai tudu gï agai xi xadutuadagi odami aagaitai xïïxi ïr gïdukami.

^12-13 Daiñi, Diuxi ïgai dai gin maa gubukarhigai sai ibuadana aanï gin aaduindaga. Dai maakai aanï ïmo Diuxi aatanamïidaragai maatïkatai sai tomaxi ïkioma parunaiña aanï Suxi Kristo ïgai bïïxkïrï kïïgakïrï gin tïï dai gin maa oigaragai saidi ïr aatabuadamikana aanï ïgai bïïtarï. Ïkioma soi buididiña aanï go buaboitudadami dai omarhigakana aanï ïgai bui. Kïïga ïr ajïakamikatadai aanï xi taatagi gïgïbidaragai tudu. Dïï gia tomaxi soimaaxi ibuadana aanï bïïxkïrï soi gïïrhi Diuxi aanïkïdï dai bhaiyoma gin maa ïmo bhai ïrhiaragai. Mai buaboidaitadai aanï kia dai mai maatïkana ix tuma buadana. Kaxkïdï soi gïrhi ïgai aanïkïdï.

¹⁴ ¡Xïï kïï tuiga Gïr Nukadakami aanïkïdï tudu! Daiñi, xibi bïïna dakatai aanï Suxi Kristo gin maa ïgai gubukarhigai ix kïïga buaboitudada aanï dai ix kïïga oigïdada aanï jaa.

¹⁵ Daiñi, pokaitiña aatïmï sai dibia Suxi Kristo tami idi oidigi daama kïïgakïrï bubaida agaitai soimaaxi buadami dai kïïga ïr buaboi gobai. Kaxkïdï tudu bamioma ïr soimaaxi buadami aanï xi bhai toma xorai dai bïïxkïrï kïïgakïrï gin busaitu ïgai.

¹⁶ Maaxituda ïrhidi ix xïï kïï tuiga ïgai xi kaxkïdï maiti gin ojodai ïgai soimaaxi buadamikatai aanï dai bhaiyoma gin soi ansai buaboitudaiña dai kïïgakïrï busaiña. Podui ïgai sai gï maatïkana sai toma xorai bhaiga ix buaboitudagi dai kïïgakïrï busiagi bïïxkïrï bïïtarï tomax xïï soimaaxi buadamikagi ïgai.

¹⁷ Podukai gï tïgito Diuxi kïï tuigakatai ïgai tudu dai kaxkïdï gï agai xi xadutuada aatïmï dai aagana xïïxi ïr gïdukami. Tomarhi ïmo imidagai mai nïidi aatïmï Diuxi tudu dai ïgai mai mumukui tomarhi ïmo imidagai ïpï. Ïgai tudu ïr Rey bïïxkïrï bïïtarï. Dai gï agai xi xadutuada aatïmï ïgai. Gobai gia ïr buaboi.

Pabora maa ñoki go Timoteo sai apia oidiña buaboidaradï

¹⁸ Aapi Timoteo, gin maara dukai gï nïidi aanï. Dai kïï maatï aanï sai baasïkioma ïmo Diuxi ñokituldiadamigadï aagai ixtuma duñi agai aapi oiditai go kïïgadukïdï buaboidaragai. Dai xibi gï tïanïi aanï pïsai apia ibuada aapi ixdukatai agaiña ïgai. Daiñi, mui oidaga odami ix makïdï bui bïïtï gïr buaboidaraga dïï aapi maiti gï agai xi gï dagitoagi dai bhaiyoma gï agai xi bui kïkibagi aapi kïïga oiditai gï buaboidaraga.

¹⁹ Mos sai oijada aapi gï buaboidaraga tudu dai maiti ibuada ixtumaxi aapi mai kïïgadu ïrhidi. Jaa gia ibuadana naana maaxi tomaxi maatï ix mai kïïgadu dai podukai gïpiïrï surhi ïgai dai xia dodai ïïgi buaboidaradï.

²⁰ Gobai ïr ïmo parunaragai Diuxi bui. Po tudu daibusai go kïkïïrhi Himeneo dai Alejandro tïtïgidukami ïmadï xi kaxkïdï bubaitu aanï ïgai go buaboitudadami saagidañdïrï. Ïkobai bia aanï tudu sai go diabora iduñagi ïgaikïdï ixtumaxi bhai ïrhiadagi ïgai sa bhai podukai ïma dukai gïn tïtïgitoagi go kïkïïrhi dai ka mai parunadagi Diuxi. Dïï aapi Timoteo maiti pobuada ixdukai ïgai idui dai bhaiyoma oijada aapi gï buaboidaraga.