1 Pedro 5 - Northern Tepehuan Bible

Piduru maa ñoki go bhaitï gukakamigadï go buaboitudadami ïmadï kïkïïrhi utu iimïdami

¹ Xibi ojamu aanï ïmo ñoki go bhaitï gukakamigadï go buaboitudadami bïïtarï. Gin kaïkabïrai, aanï ïpï ïr ïmo bhaitï kïakamigadï go buaboitudadami ïpï dai nïidi aanï aidïxi soimaaxi taatamaitadai Suxi Kristo. Aanï ïpï urabamu Suxi xïïxkadï dibiagi ïgai dai gï maaxitudagi xïïxi ïr gïdukami ïgai.

² Aapimï bhaitï gukakami, paxtuturu dukai abïr nukada go buaboitudadami ix makïdï gïn nukaturhi Diuxi. Bïïxi gïn bhai ïrhiarakïdï abïr nukada ïgai tudu dai maiti gï agai ix po gïn ïrhiada sai gubudakïdï bia aapimï ix nukadakagi. Dai maiti abïr mosïkaxi tuminxikïdï ibuada gïn aaduindaga ïpï dai bhaiyoma abïr bhai ïrhiarakïdï nukada go buaboitudadami maatïkatai sai Diuxi bïïtarï aatabuayi aapimï.

³ Dai maiti abïr kabami tïanïda go buaboitudadami ïpï dai bhaiyoma abïr kïï bhai maaxkami óídaka aapimï. Podukai tïtïïgiadamu aapimï go buaboitudadami ix dukatai gï agai sai óídakagi ïgai ïpï.

⁴ Ix podukai nukadakagi aapimï gïn aaduñi Diuxi amadïrï aidï gia Diuxi gïn maakimu ïmo maitïki ix makïdï bïïxkïrï bïïtarï bhai ïrhiaragaka agai. Gïn maakimu ïgai gobai xïxkadï dibiagi Suxi Kristo ïpamu ix makïdï adama ïr gïr Paxturuga tudu.

⁵ Dai aapimï uutu iimïdami, gï agai sai ïïgiada dai xadutuada aapimï go bhaitï gukakamigadï go buaboitudadami ïpï. Gï agai sai mai tïtïanïdami dukai gïn ïrhiadagi aapimï toma lïïchi dai bhaiyoma gï agai sai gïn soikïdagi aapimï aipakoga. Diuxi ojadï ikaiti sai, Buidïrï kaatï Diuxi go odami ix makïdï gïgïrdukïdï gïn ïrhiadagi. Dïï gia soikïi ïgai odami ix makïdï mai gïgïrdukïdï gïn ïrhidi, ikaiti Diuxi ojadï.

⁶ Sïïrhikïdï gubuka Diuxi tudu. Dai kaxkïdï gï agai sai dagitoagi aapimï saidi gïn tïanïdagi Diuxi mai gïgïrdukïdï gïn ïrhiditai aapimï. Ix pobuadagi aapimï aidï gia xïxkadï Diuxi ipïrhiadagi gïn maakimu ïgai oigaragai saidi gïn xadutuadagi jaa.

⁷ Diuxi gïn nukadai tudu dai buamï ïrhidi gïn bïïtarï, kaxkïdï maiti abïr buamï gïn ïrhiada tomarhi ïmo ixtumaxikïdï. Dagitobïrai bhaiyoma sai Diuxi bhai buadagi ixtumaxi buamï ïrhidi aapimï.

⁸ Gin aaduñi, kïïga abïr gïn tïtïgitoda daidi abïr gïn nukadaka. Bia aapimï gïn buidïrï kaatïkamiga tudu ix makïdï ïr go diabora dai aipakoga aimïrai ïgai xia duada ïrhiditai xorai tïïgiagi ïgai.

⁹ Kïïga kabakami abïr gukada tudu kïïga buaboitudaitai dai podukai abïr buidïrï gukada go diabora. Dai gïn tïgitobïrai ïpï sai jaa buaboitudadami aipakoga oidigi daama óídakami gïn ïpïandukai soimaaxi taatamai ïpï dai mai xu mosïkaxi aapimï.

¹⁰ Kïï tuiga Diuxi gïn bïïtarï tudu dai gïn báí ïgai saidi aapimï ïpï gïn ajiagi go gïdukami xadutudaragai ix makïdï biakamu ïgai bïïxkïrï bïïtarï. Aapimï gïn aji agai go xadutudaragai gobai bïïnakatai aapimï Suxi Kristo tudu. Dïï gia gï agai sai soimaaxi taatamadagi aapimï kia dïï gia mai xii tïbïragaka agai go soimaaxi taataragai. Dai gokiïrï bhai gïn buadamu Diuxi sai maiti gïn biïgakagi tomarhi ïmo ixtumaxi gïn ibhïdagïrï. Kïïga gïn gupurtuda agai ïgai aidï gïn ibhïdagïrï saidi mai tipukagi ixtukïdï dagitoagi aapimï gïn buaboidaraga. Po duñimu Diuxi kïï tuigakatai ïgai gïn bïïtarï tudu.

¹¹ Kaxkïdï gï agai sai bïïxkïrï bïïtarï gatïanïna ïgai.

Piduru otoxdi ïmo biatuldaragai go buaboitudadami

¹² Gin aaduñi, go Silbano ïgai dai gin soi ibuadatai aanï idi ojai. Dai ipïrhidi aanï sai maatïkagi aapimï sai ïgai ïr ïmo gïr aduñi Diuxi amadïrï dai kïïga sïïrhi aatabuayi ïgai. Idui aanï idi arhi ojai gïn bïïtarï gïn soiña in ïrhiditai sai tomaxi soimaaxi taatamaimi aapimï bïïxkïrï apia buaboitudana aapimï maatïkatai sai kïï tuiga Diuxi gïn bïïtarï. Daiñi, tami idi ojiïrï gïn maa aanï ñoki dai gïn aagidi ixtumaxi ïr buaboi saidi maatïkana aapimï sai Diuxi kïï tuiga gïn bïïtarï dai gïn maa oigaragai ix taatagi aapimï bïïxi gobai ix makïdï taatamaimi aapimï xibi. Kïïga ïr buaboi tudu sai kïï tuiga Diuxi gïn bïïtarï. Dai kaxkïdï apia kïïga buaboitudai aatïmï maatïkatai sai kïï tuiga Diuxi gïr bïïtarï tudu.

¹³ Gïn aaduñi Diuxiamadïrï ix makïdï tami Babiloniïrï óídaga gïn otoxdi ïmo biatuldaragai. Dai go Markos gïn otoxi ïmo biatuldaragai ïpï.

¹⁴ Kïïga gïn oigïdaitai abïr gïn biatuldada aipakoga buaboidaitai aapimï Suxi Kristo. Xibi ipïrhidi aanï sai ibhïxtakan taadakagi gïn ibhïdaga bïïxkatai aapimï buaboitudaitai aapimï Suxi Kristo. Mosïkaxi.