1 Pedro 4 - Northern Tepehuan Bible

Piduru aagai ix dukatai gï agai sai óídakagi go buaboitudadami

¹ Daiñi, Suxi Kristo soimaaxi taata dai muu aidïxi tami oidigi daama dakatadai ïgai. Dai kaxkïdï aapimï gï agai sai gïn kabakadagi dai ïpïan dukai tïtïgitoagi aapimï ïgai. Gï agai sai bhai gïn dukagi ix soimaaxi taatamadagi ïpïan dukai ïgai tudu. Ix soimaaxi taatamadagi aapimï ïpïandukai Suxi Kristo oiditai aapimï ïgai gobai itïiya ïrhidi sai ka dagito aapimï go soimaaxkami ix makïdï oidiña aapimï ïkioma.

² Ix bhai gïn dukagi ix soimaaxi taatamadagi aapimï ïpïan dukai Suxi Kristo aidï gia ka maiti ibuadamu aapimï go soimaaxkami ix makïdï gïn tanïdagi odami tïgibudadï tudu. Aidï gia bhaiyoma ibuadamu aapimï ixtumaxi Diuxi ipïrhidi asta xako ukami óídakagi aapimï tami oidigi daama.

³ Ïkioma gia ibuadana aapimï go soimaaxkami ix makïdï ojoidi xi ibuadagi odami ix makïdï ïkobai daraka Diuxiañdïrï. Ïgai ojoidi xi ïmadï bodagi jaa aipakoga ix makïdï maiti ïr aduñdï dai xi nabaakotïrïdagi. Ibuayi ïgai naana maaxi buirudagai bagimigadïrï dai buaboitudai ïgai uubixi. Gobai ïr ïmo galnaxi buirudagai Diuxi buidïrï.

⁴ Pobuayi ïgai tudu. Dai gïn ñokidiña ïgai xïïxkadï maiti ipïrhiadagi aapimï xi uurapïkïdagi ïgai xïïxkadï ibuadagi ïgai bïïxi pomaaxkami buirudagai. Mai tïtïgai ïgai ix tuixi ka mai uurapïkïi aapimï kaxkïdï.

⁵ Dïï gia ayimu ix tuigako biakamu ïgai xi mïï gukibagi buidïrï Diuxi. Bïïxi óídakami biakamu xi mïï gukibagi buidïrï Diuxi tudu dai ïgai aagada agai ix makïdï kïïga idui dai ix makïdï mai kïïga idui. Mai xudu xi kia óídaga ïgai xibi xi kaxi ïr koidadï ïgai xibi ïpï.

⁶ Bïïxi oidigi daama óídakami mumukui tudu. Gobai ïr go gïgïbidaragai ix makïdï ajïi bïïxi óídakami. Dïï gia Diuxi ipïrhidi sai bïïxkïrï bïïtarï óídakagi iibhïadï óídakami. Kaxkïdï aiturhi Suxi Kristo go bhai ïrhiaragai aatagi go óídakami iibhïadï ix makïdï ka koi tukugadï.

⁷ Gin aaduñi, ka miadaimi ix ugitiagi oidigi. Kaxkïdï abïr kïïga gïn tïtïgitoda dai kïïga nïnïasïrhigan dukai abïr daanïda Diuxi.

⁸ Podukai gï agai sai óídakagi aapimï tudu. Dai xibi gïn aagidamu aanï ixtumaxi ix makïdï adaama gï agai saidi ibuadagi aapimï. Gï agai aapimï buaboitudadami xi kïïgakïrï gïn oigïdadagi aipakoga tudu. Gobai ïgai dai adaama gï agai saidi ibuada aapimï. Ix gïn oigïdadagi aapimï aipakoga aidï gia tomaxi dudatai soimaaxi gïn buidadagi gïn aaduñi aapimï bïïxkïrï mai bui ñokadamu ïgai. Kaxkïdï gï agai sai gïn oigïdadagi aapimï aipakoga.

⁹ Gï agai ïpï sai bhai ïrhiarakïdï miadïgidagi aapimï gïn aaduñi xïxkadï gïn daibidagi ïgai. Dai ix gï agadagi abïr bhai ïrhiarakïdï bhibhida ïgai ïpï daidi abïr maakada xako kokoxiagi ïgai.

¹⁰ Daiñi, ïjïkobai gïn maa gubukarhigai Diuxi go ïjïkobai aaduindagai bïïtarï ix makïdï ipïrhidi ïgai saidi ibuada aapimï. Kïï tuiga ïgai gïn bïïtarï dai kaxkïdï gïn maa ïgai gubukarhigai podukai ïmo oidaragai dukai. Dai gï agai sai kïïga gïn soikïdagi aapimï aipakoga go gubukarhigaikïdï ix makïdï gïn maa Diuxi. Gï agai saidi kïïga ibuada aapimï aaduindagai go gubukarhigaikïdï ix makïdï gïn maa Diuxi tudu.

¹¹ Dukami, ix makïdï gatïtïïgiadagi ñoki gï agai sai kïïga ñokadagi ñokiturhikatai ïgai Diuxi. Dai ix makïdï soikïdagi jaa gï agai sai kabami gï aajagïdagi soikïitai bïïxi go gubukarhigaikïdï ix makïdï gamamaakai Diuxi. Bïïxi ixtumaxi ibuadagi aapimï abïr Diuxi gubukarhigadïkïdï ibuada saidi jaa xadutuadana Diuxi nïiditai ixtumaxi ibuayi aapimï gïn soikïitai Suxi Kristo. Suxi Kristo ïgai dai bïïxi adaama gï xadutuada agai bïïxkïrï bïïtarï tudu dai bïïxi adaama gatïanïda agai ïgai ïpï. Gobai gia ïr buaboi.

Piduru ipïrhiditadai sai mai buamï gïn ïrhiada go buaboitudadami xïïxkadï soimaaxi taatamituldagi jaa oiditai ïgai Suxi Kristo

¹² Gïn oigïdai aanï gin aaduñi dai kïï maatï aanï sai kabami soimaaxi taatamaimi aapimï xibi oiditai aapimï Suxi. Dïï gia maiti gï agai sai soi gïn ïrhiadagi tomarhi xi naana maaxi gïn tïtïgitoagi gokïdï gin aaduñi.

¹³ Bhai gïn ïrhiadabïrai bhaiyoma. Gobai ix makïdï taatamaimi aapimï ïr ïmo urabaragai Suxi Kristo ïmadï kaxkïdï. Ïgai podukai soimaaxi taata ïpï tudu. Dai gobai itïiya ïrhidi sai gia kabami bhai gïn ïrhiadamu aapimï xïxkadï dibiagi ïgai ïpamu xïïxkadï gï maaxitudagi xïï xigiamaaxi ïgai dai xïï kabami ïr gubuakami ïpï.

¹⁴ Gin aaduñi, Diuxi Ibhïadï kïïga xigiamaaxi dai kïï gubuka. Dai xïïxkadï soimaaxi ñoki gïn aagiadagi jaa óídakami oiditai aapimï Suxi Kristo gobai ïr ïmo maaxidaragai sai gïn ïmadï daja Diuxi Ibhïadï. Bhaigabïnïrhiada gokïdï tudu.

¹⁵ Dïï gia maiti gï agai sai soimaaxi ibuadamikagi aapimï dai kaxkïdï soimaaxi gïn taataturhiadagi jaa. Maiti gï agai sai gakodadamikagi aapimï tudu tomarhi xi gaïxiadagi aapimï tomarhi xi soi buididagi aapimï jaa tomarhi xi gïn bapasadagi aaduindadïrï jaa ïpï. Ix pomaaxkagi aapimï dai kaxkïdï soimaaxi gïn taataturhiadagi jaa gobai gia xaïraraga.

¹⁶ Dïï gia xi soimaaxi gïn taataturhiadagi jaa oiditai aapimï Suxi Kristo maiti gï agai sai xaïradagi aapimï gokïdï. Gï agai bhaiyoma sai bhai gïn ïrhiadagi Diuxi bïïtarï. Kaxi gïn maa Diuxi oigaragai saidi mamaatïrdamigadï Suxi gïn aagadagi jaa kaxkïdï. Kïïga bhai ïrhiaraga gobai tudu.

¹⁷ Gin aaduñi, ka ayi sai aagadagi Diuxi xorai kïïga idui dai xorai mai kïïga idui. Dai ïpïgioma aagada agai ïgai ix bhai kïï idui aatïmï ix makïdï ïr aaduñdï. Aatïmï ix makïdï kïïgakïrï bubuakimi tudu. Poduña agai Diuxi aatïmïkïdï tudu. Dïï gia xïï kabami bïïtïka agai gobai go odami bïïtarï ix makïdï mai ïïgidi go bhai ïrhiaragai aatagi ix makïdï gïr maa Diuxi. Diuxi aagada agai ix bhai kïi idui ïgai ïpï dai ïgai mai buaboitu. Kabami bïïtïka agai gobai ïgai bïïtarï tudu.

¹⁸ Daiñi, Diuxi ojadïrï ikaiti sai, Odami ix makïdï ïïgidi Diuxi bïïxkïrï soimaaxi taatamai tomaxi kïïgakïrï bubuakïi ïgai. Dai kaxkïdï gï maatï sai go soimaaxi ibuadami ix makïdï mai ïïgidi Diuxi bamioma soimaaxi taatamada agai, ikaiti Diuxi ojadïrï.

¹⁹ Gin aaduñi, Diuxi gïr idui dai bïïxkïrï ibuayi ïgai ixtumaxi aagadagi ïgai dai mai yaatagïi. Kaxkïdï gï agai sai apia buaboitudada aatïmï sai ïgai kïïga gïr nukadamu tomaxi soimaaxi taatamadagi aatïmï ibuadatai ixtumaxi Diuxi ipïrhidi.