1 Pedro 3 - Northern Tepehuan Bible

Piduru maa ñoki go odami ix makïdï kaxi gaïmadï bii

^1-2 Kaxi gïn aagidi aanï sai ix makïdï ïr gapipioñi gï agai ix ïïgiadagi amudï. Dai podukai ïpï aapimï oki kukunakami gï agai xi ïïgiada aapimï gïn kukuna. Daiñi, ix mai buaboitudagi gïn kukuna go bhai ïrhiaragai aatagi, bïïxkïrï ïma dukai tïgito antaada ïgai nïiditai xïï kïïga xadutudaitai óídaga aapimï. Podukai ka ïma dukai gïn tïgito antaada gïn kukuna dai ka buaboituda antaada. Dai maiti gï agadamu podukai xi aagidagi aapimï tomarhi ïmo ixtumaxi.

³ Aapimï oki buaboitudadami maiti gï agai sai bhaibitukami kïï tiodituda ïrhiada gïn tukuga. Dukami, maiti abïr tïtïgitoda mïx dukatai gaxiuba agai dai ix maaxi gïn aada agai bhabhaibukai dai nanaakagi dai ix maaxi gïn aada agai yukuxi. Gobai mosïkaxi ïr gïn tukuga bïïtarï ix makïdï maaxi odami bïïtarï dai bïïxi gobai ugiti agai.

⁴ Gï agai bhaiyoma sai kïï tutiakagi aapimï gïn ibhïdagïrï. Ix xigian tutiakagi aapimï gobai ïr ïmo kïïgadukami ixtumaxi ix makïdï mai ugiti agai daidi ïr ïmo bhai ïrhiaragai Diuxi bïïtarï. Ix mai oomarhigakagi aapimï toma lïïchi tudu dai mai ñiñokidaragakagi aapimï.

⁵ Go oki buaboitudadami ïïki óídakami podukai gïn xigian tutuigatudaiña ïïgi. Kïïga buaboitudaiña ïgai Diuxi dai kïïga ïïgidiña ïgai kukunadï tudu.

⁶ Dukami, go Sarakaru tïanïdami aagaiña ïgai go Abraamkaru xadutudaitai dai kïïga ïïgidiña. Kïïga xigian tuigatadai go Sara tudu. Dai aapimï ïpïan tutiakamu go Sara ïpï ix mai duadikoitai ibuadagi aapimï ixtumaxi ïr sïïrhi mai buamï gïn ïrhiditai ix gïn buidadagi gïn kukuna.

⁷ Dai aapimï kïkïïrhi ix makïdï ka ooñiga, kïïga abïr xadutuada gïn ooñiga. Kïïga abïr gïn tïgito nïida dai maatïka ix dukatai kïï buidadagi gïn ooñiga dai podukai abïr ibuada. Ïgai mai ïpïan gupuka kïkïïrhi tudu. Dïï gia Diuxi kïï tuiga ïgai bïïtarï dai kïïgakïrï bubaitu sai bïïxkïrï bïïtarï óídakana ïgai ïpïan dukai aapimï. Kïïga abïr xadutuada gïn ooñiga dai kïïga buidada ïgai tudu. Ix mai kïïga óídakagi aapimï gïn ooñiga ïmadï gobai gïn sobhida antaada xi daanïdagi aapimï Diuxi tudu.

Piduru maa ïmo ñoki bïïxkatai go buaboitudadami bïïtarï

⁸ Gïn maakimu aanï ïpï ïmo ñoki gin aaduñi. Gï agai sai kïï xioma gïn urapïkïda aapimï aipakoga ïmo tïgibudagai biakatai aapimï bïïxkatai. Soigabïr gïn ïrhiada ïmadï gïn aaduñi Diuxi amadïrï xïïxkadï soi gïn ïrhiadagi ïgai. Gïn oigïadabïrai aipakoga tudu ïmo xixïgïmï dukai. Dai kïïga abïr tutiaka jaa bïïtarï mai gïgïrdukïdï gïn ïrhiditai aapimï.

⁹ Xïxkadï soimaaxi gïn buidadagi jaa maiti abïr aadïrï soimaaxi ibuada ïpï. Ix soimaaxi ñoki gïn aagidagi ïmai maiti abïr aa noraida soimaaxi ñoki dai bhaiyoma abïr aagiada ïmo bhai ïrhiaragai ñoki. Pomaaxi bïïtarï kïïgakïrï gïn bubaitu Diuxi tudu saidi kïïga buidadagi aapimï jaa. Dai Diuxi gïn maakimu naana maaxi bhai ïrhiaragai ix pobuadagi aapimï.

¹⁰ Daiñi, Diuxi ojadïrï ikaiti sai, Ix ipïrhiadagi aapimï xi bhai gïn ïrhiadagi tami oidigi daama dai kïïga xioma oidakagi gï agai sai mai soimaaxi ñokadagi aapimï dai mai yaatagïdagi.

¹¹ Gï agai sai dagitoagi aapimï go soimaaxkami ïpï dai kïïga ibuadagi. Gï agai sai gaagadagi aapimï ix dukatai xioma urabakatai óídakagi daidi ibuadagi ixtumaxi gï agadagi sai mai tipukagi kokodi gïn saagida.

¹² Gïr Nukadakami kïïgakïrï nïidi odami ix makïdï kïïga sïïrhi ibuayi tudu. Dai kïïga kaïkana ïgai xïxkadï daanïdagi ïgai. Dïï gia buidïrï kaatïkami ïgai xorai soimaaxi ibuadagi, ikaiti go ojai.

Piduru aagidi go buaboitudadami sai ïïmo imidagai soimaaxi taatamada agai ïgai tomaxi mai soimaaxi ibuadamikagi ïgai

¹³ Daiñi, ix kabami gïn aajagïdagi aapimï ibuadatai ixtumaxi ïr sïïrhi aidï gia maiti gï agai sai soimaaxi gïn buidadagi jaa ¿aba?

¹⁴ Dïï gia xïduñada gïn kïïdadagi jaa kïïga ibuadatai aapimï ixtumaxi ïr sïïrhi dai soimaaxi gïn taataturhiadagi ïgai maiti abïr buamï gïn ïrhiada. Diuxi gï tïgito nïidamu dai gïn maakimu bhai ïrhiaragai kaxkïdï. Maiti abïr duduadikuda xïïxkadï pokaitadagi jaa saidi soimaaxi gïn buidada agai tudu.

¹⁵ Dai bhaiyoma abïr kïïga xadutuada Suxi Kristo bïïxi gïn ibhïdagakïdï gïn Tïanïdamigakatai ïgai. Dai bhaiga abïr gïn duka sai bhaigakana aapimï xi kïïga aa noraidagi ñoki xïïxkadï gïn tïkakagi go jaa ix tuixi bhai gïn ïrhidi aapimï buaboitudaitai aapimï Suxi Kristo. Dïï gia xïïxkadï aa noraidagi aapimï ñoki gï agai sai mai gïgïrdukïdï gïn ïrhiadagi aapimï dai gï agai sai kïï bhai maaxkami dukai aa noraidagi aapimï.

¹⁶ Gïn nukadabïrai dai maiti ibuada tomarhi ïmo ixtumaxi ix makïdï soimaaxkami ïrhidi aapimï sai podukai mai gïpiïrï gïn bupadan buadagi ïïgi gïn tïgibudaga gokiïrï. Dai podukai ïpï xi gïpiïrï gïn bupada ïrhiadagi jaa xaïradamu ïgai nïiditai xïï sïïrhi ibuayi aapimï oiditai Suxi Kristo.

¹⁷ Daiñi, xioma ïr kïïga ix soimaaxi taatamadagi aapimï ibuadatai ixtumaxi ïr sïïrhi, ix podukai gï tïgitoagi Diuxi dai gïn dagitoagi ix soimaaxi taatamadagi aapimï tudu. Dïï gia maiti gï agai ix soimaaxi taatamadagi aapimï soimaaxi ibuadatai. Gobai gia mai kïïgadu.

¹⁸ Asta Suxi Kristo soimaaxi taata kïïga ibuadatai ïgai tudu. Muu ïgai bhai buadatai gïr soimaaxkamiga bïïtarï. Dai podukai bhai dui ïgai gïr bïïtarï bïïxkïrï bïïtarï dai ka mai biïga bamioma daxdaragai xibi. Kïïga buañixikami ïgai tudu dai muu ïgai aatïmï soimaaxi ibuadami gïr bïïtarï sai kïï biïna aatïmï Diuxi ïmadï. Gï muatu tukugadï tudu dïï gia gï duakaturhi ïpamu Ibhïadï.

^19-20 Aidï Ibhïadïkïdï jii Suxi xako maamaixapi iibhïadï mui koidadï. Ïgai ïr go ïïki óídakami ix makïdï mai ïïgidi Diuxi ïïki aidïxi bhai buadatadai Noé go gïï barko ïïki. Aidï tïbïpi nïnïra Diuxi ipïrhiditai sai go óídakami ïïgiadagi dïï go óídakami maiti ipïrhi. Aidï ïïki mosïkaxi mamaakoadukatadai ïgai ix makïdï kïïgakïrï bubuaka go barkoïrï aidïxi dupi go oidigi sudagiïrï tudu. Dai go gaa bïïxkatai bhaikoi dai xibi maamaixapi ïgai iibhïadï no xibhïkai. Ami tudu ayi Suxi xako maamaixapi ïgai dai maa ñoki.

²¹ Kaxi gï duakaturhi Suxi Kristo ïpamu tudu dai kaxkïdï bia aatïmï kïïgakïrï bubaidaragai. Daiñi, aidïxi sudagiïrï dupi oidigi dai kïïgakïrï bubuaka go Noé ïmadï aaduñdï go barkoïrï iimïitai ïgai, gobai ïr ïmo maaxidaragai dukai gïr kïïgakïrï bubaidaraga bïïtarï ix makïdï bia aatïmï xibi. Aatïmï kïïgakïrï bubuakïi xibi buabotudakai aatïmï sai gï duakatu Suxi Kristo ïpamu tudu dai gïr bakuanai aatïmï sudagikïdï. Sudaïrï daibusai go Noé ïïki tudu dai xibi aatïmï ïpï sudaïrï dïgabuskïi gïr bakuanaitai aatïmï. Dai maiti gï agai sai po gïn ïrhiada aapimï sai go bakuanaragai ix makïdï ibuayi aatïmï mosïkaxi ïr ïmo buanaragai gïr tukuga bïïtarï. Gobai ïr ïmo xadutudaragai bhaiyoma ix makïdï ibuayi aatïmï Diuxi bïïtarï, ka maatïkatai aatïmï sai Suxi Kristo ka bhai dui gïr bïïtarï dai ka mai tipu soimaaxkami gïr abhana.

²² Dai xibi Suxi Kristo bia ïmo gïdukami sïïrhikami sïïrhixapadïrï dakatai ïgai Diuxi amïka tïbagiana. Dai ami gatïanïi ïgai bïïxi go tïtïañikarudï Diuxi dai bïïxi go gubukadagai bipiakami ix makïdï ami tïbagiana daraka.